Shirkii Asmara Maxaa ka soo Baxay?

Shirkii Asmara Maxaa ka soo Baxay?

Soon Wanaagsan:

Waxaa in dhawaala ahba shir uga socday magaalo madaxda Dalka Erateriya ee Asmara kooxo lagu sheegay inay mucaaradsan yihiin kana soo hor jeedaan Dawladda Empagathi, shirkan oo ay ka soo qayb galeen ku dhawaad 500 oo ergo oo ka kala yimid gudaha Dalka iyo dibaddiisa, ka qayb galayaasha shirka waxaa ugu cadcaddaa uguna tun weynaa Wadaadadii maxkmadaha Islamka ee lagu jabyey guluf colaadeedkii dhacay bishii December kuna kala firdhoobeen Dalka iyo dibaddiisa noqdeeenna qax habqan iyo qurba joog iyo kuwo la shaqo bilaabay Dawladda empagathi sida: Sh. Cali Dheere, garabka labaad waa nimanka la magac baxay: Baarlamanka Xorta ah ugana horreeyo Shariif Xasan Sh. Axmed Guddoomiyihii hore ee barlamanka Empagathi iyo Xuseen Caydiid, waxaa soo sadaxeeya kooxo lagu sheegay: Qurba-joog iyo Aqoon yahanno Soomaaliyeed.

Shirkan oo bilowday 05/09/07 soona gabagaboobay 14/09/07 islama bishan September waxaa la dhihi karaa ka qayb galayaasha shirka waxay u badan naayeen haraaggi Maxkamadaha iyo taageerayaashooda iyo kooxo boos ka waayey qariiradda siyaasadeed ee Dawladda Empagathi sida: Ina Caydiid oon wada xusoosanno mowqifkiisa u aadanaa ugu horrayn maxkamadaha xilligi ay ka talinayeen gobalada qaar oo in badan ku tilmaamay inay yihiin Argagixiso iyo xagjir maanatana la wada shirayo shaahna la wada cabayo waa la yaab!, sidoo kale mowqifkiisa ku aadnaa hadalkii qalafsanaa ee foosha xumaa uuna ku yiri: in laga mideeyo labada dal waa Soomaaliya iyo Xabashidee dhinacyada: Military-ga(Ciidanka), Dhaqaalaha(Lacagta), iyo baasaborka, waxaase is weydiin mudan Oraahdan tiraabaysa: Goormaa Beer Lafo Yeeshay?! Ina Caydiid goormuu Garwaaqsaday oo gartay xummaanta hadalkaa uu lahaa? Mise Shariifka maxkamadaha ayaa quraamiyoo Xiseen mar dhow waxaa la arki doonaa isagoo garhdeeroo Qamiis Cad iyo Camaamad Cas xiran, waxay noqotaba wayna u joognaa!.

Shiranka Asmara wuxuu daba socday shir ay soo qaban qaabisay Dawladda empagathi kuna soo gabagaboobay Magaalada Muqdisho 15/07/07-30/08/07 loona qabtay Odayaasha dhaqanka beelaha kuna dhamaaday Fashal iyo guul darro, lagu tilmaami karo: Shimbaro yahow Heesa, marka laga eego wax tar yarida dadyowga ka soo qayb galay iyo saamayn la’aantooda ayna sii dheertahay inuu waaqica wax ka badali waayey gaar ahaan dagaaladda ka holcaya magaalada Muqdisha iyo dagaallo beeleedyada ka socda qaybo badan oo dalka gudihiisa ah, haddaba su’aasha is waydiinta mudan waxay tahay: haddii shirkii Asmara yahay dabaaqtan iyo xafiiltan lid ku ah shirkii Muqsdisha muxuu uga duwan yahay? Muxuuse soo kordhin doonaa?!.

Soomaalida waa dad aan wax ku qaadan dhacdooyinka dunida iyo taariiqdaba bal ila dhadhanso miraha heestan macaan ee ay ku luqayso Fannadda weyn ee Saafi Ducaale hal ku dhaggeeduna yahay: Salaan Macaan Heestiina waa tan:

Wixii Maanta Joogiyo
Wixii Jeer la soo Maray
Maalmaha Muhiimka ah
Waa Macalin kuu Dhiga
Murtidiyo Maahmaahday
Kuu Marinayaanee.

Waxaan ka dheehan karnaa erayada heestan in Maalmuhu yihiin Macalin wax laga barto, balse waxaa ayaan darro ah haddii aan Soomaali nahay inaanaan waqtiga waxba ka qaadan , ulajeedka dhabta ah waxay tahay inay shirka ka soo qayb prof Cali Qaliif Galayr iyo prof Cabdi Ismaaciil Samatar ayna soo jeediyiin si Shirku guul ugu dhammaado in la ballaariyo oo laga soo qayb galiyo Soomaali badan iyo in shirka laga saaro xubnaha qaarkiis ee dawladaha qarkood ay ku tuhunsan yihiin inay xiriir la leeyihiin Argagixiso iyo Al-qaacidda, balse nasiib darro taladii labadaa prof waa lagu gacan sayray oo dhagaha ayaa laga furaysaty.

Haddaba talo soo jeedintaas waxay shirka ka ilaalin lahayd in lagu sunto argagixiso iyo waxaa isugu yimid harragii maxkamadaha iyo taageerayaashooda si loo wiiqo guul kasta oo ka soo bixi lahayd shirka, dhab ahaantii sidii ayey noqotay gabgabadii shirka Dawladaha: Marayknka, Xabashida iyo Empagathi waxay shirka ku sunteen inuu ahaa shir argagixziso, iyagoo ka faa’iidaysanaya dadyowga qaar ee shirka ka dhex muuqday, balse haddii la tix galin lahaa fekerka labadaa prof sidaan wax uma dheceen.

Go’aanadii shirka ka soo baxay waxaa ugu muhiim sanaa: Dhimsaha Isbahaysiga Xoraynta iyo Dib-u-soo Noolaynta Soomaliya , Aduun Weynaha oo laga dalbaday gargaar dagdag ah inuu u fidiyo Dadka tabaalaysan , Dhaleecayn loo jeediyay dowlada Empagathi iyo Qabqablayaasheeda, waxaase ka sii muhiimsan in gudoomiye loogu doortay Sheeq Shariifkii Maxkamdaha dhextaalna looga dhigay Shariif xasankii Barlamaanka, haddaba markaan eegno go’aanadaas waxaan dhihi karnaa shirkii Asmara wuxuu ku dhamaaday fashal iyo dhicsimo, maxaa yeelay shirka wuxuu ku calaamadsan yahay shir argagixiso waxaa sii xoojinaya arintaan waa ka qayb galka Xasan Daahir Aways iyo umagacaabidda Shiiq Shariif gudoomiyaha Asbahaysiga, waa su’aal da’wayne: miyaa la waayay mawaadin kale oo xilkaa qabta siyaasi aqoon yahan kuu doono ha noqdee, miyaan la og soonayn Shiiq Shariif halkuu wax ku furay shalay? miyuusan marayn dhabbihii shalay?, Maxkamadaha waxaa gulufka colaadeed loogu qaaday waa inay argagixiso ahayeen iminkana waxaa xilkii ugu sareeyay Isbahaysigaas loo dhiibay ninkii shalay xilka ugu sareeyay u hayay Maxkamadaha .

Waxaa hubaal ah inaan sidaa dunida u sii qiimaynayn natiijooyinkii ka soo baxay shirka Asmara, haddaanse usoo noqdo dadyowga shirayey ee Soomaaliyeed ma ahan dad isku jaad ah ama isku mabda’ ah waxayna isugu jireen midagta fog iyo bidaxda fog, waxaana kuugu daliil ah dooddii ku saabsanyd eray bixinta la xiriirtay waxa loo adeegsanayo dagaalka sida: Jihaad, Muqaawamo, iyo Halgan, oo markii la is mari wayey loo saaray guddi ka soo dooda erayadaas, bal aan is waydiinno waxaas miyaa mudan in waqti lagu lunsho?, teeda kale wuxuu kuu muujinayaa xoogga ay ku lahaayeen shirka Wadaadada iyo kuwa cabay Sunta Carabta, waaba yaabe xaggee nooga daba wadaan Jihaad sowse Jihaadku ma agoontoobin bishii December iyo wixii ka dambeeyey?!, maxaase keenay in la garab dhigo erayga Halgan kuwaan ay feer dhigeen ee ah: Jihaad iyo Muqaawamo? Si kastaba ha ahaatee waxaa wax laga xumaado ah dad Soomaaali ah oo meel isugu yimid inay ka doodaan eray bixin la xiriirta eray loo helayo mid u dhigma ama ka agdhow!.

Guntii iyo gabagabadii: Xabaddii waa bilaabatay sdia laga iclaanshay Asmara, balse waxaan waydiin lahaa ragga iclaanshay Xabadda ma Asmara ayey Xabadda ka ridayaan?, mise sida Xasan Turki ayey Howdka Kaynta iyo Toonta dhexdeeda ku dhuumaalaysanayaan? Waxaa habboon inaan dhalinyarada la qatalin lana marin habaabin oon loo jeexin hilin ay ku hoobanayaan kuna baaba’ayaan maxa yeelay dhalinyaradu waaa mustaqbalka dalka dadka., iyadoon lagu beer laxawsanayn erayo macaan oo soo jiidanayana dareenkooda.

Bashiir M. Xersi.

brdiraac@hotmail.com

Tripoli-Libya

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | Sept 17, 2007