Isbahaysiga Asmara looga dhawaaqay oo doorayana xubno cusub

Wararka naga soo gaaraya Magaalada Asmara ee dalka Ereteriya waxay sheegayaan in maanta la filayo kulan isugu yimaadaan 191 xubnood ee uu ka kooban yahay Isbahaysiga Xoreynta iyo dib u soo nooleynta Soomaaliya, waxaana kulankaasi shir guddoomin doona Guddoomiyaha Isbahaysigaasi Sheekh Shariif Sheekh Axmed.

Maanta ayaa lagu wadaa in isbahaysigu uu doofto labo guddoomiye ku xigeen, xoghayahe guud iyo afhayeenka isbahaysiga, sidoo kale waxaa la dooran doonaa waaxyaha uu ka koobnaan doono isbahaysigaasi, waxaana si gaar ah isha loogu hayaa Waaxda Gaashaandhiga, Waaxda Maaliyadda iyo Waaxda Arrimaha gudaha iyo waliba waaxda arrimaha dibadda.

FAYA-DHAWR CUDURRADA, DAAWOOYINKA IYO EREY-BIXINTA CAAFIMAADKA

Marka maanta la soo gebagabeeyo doorashadaasi ayaa la filayaa in berito la qabto xafladdii gunaanadka ee Isbahaysigaasi. Rag fara badan oo u sharaxan xilalka gudoomiye ku xigeenada iyo xoghayaha guud ayaan ilaa iyo hadda la ogeyn cidda si rasmi ah isku soo sharaxday. Dhawaan ayay ahayd markii Guddoomiyaha Isbahaysiga loo doortay Sheekh Shariif Sheekh Axmed, halka guddoomiyaha Golaha dhexe loo doortay Shariif Xasan Sheekh Aadan oo la sheegay in uu shaqeyn doona qaab Baarlamaan. Mar uu soo gebagaboobo kulankaan ayaa waxay xubnaha Isbahaysigu ka kooban booqashooyin u kala aadi doonaan wadamada dibadda iyo gudaha dalka Soomaaliya, kuwaas oo Bulshada ka dhaadhicin doona waxa loo aasaasay Isbahaysigaasi. Dowladda Federaalka ayaa cambaareysay isbahaysigaasi kuna tilmaantay in uu yahay mid la doonayo in qas looga abuuro gudaha dalka Soomaaliya, hase yeeshee beesha Caalamka ayaa la sheegayaa in ay dadaal ugu jirto sidii la isugu soo dhaweyn lahaa isbahaysigaasi iyo waliba Dowladda Federaalka.

Xarunta Ismaaciil Jimcaale oo cambaareysay xarigii Weriye Jantiile iyo Tacdigii Weriyaasha Shabeele loo gaystay

Xarunt Ismaaciil Jimcaale ayaa cambaareysay xarigii loo gaystay weriya ka tirsan wargeyska Ayaamaha iyo website internet ah kaas oo lagu magacaabo Max’ed Xuseen Jimcaale (Jantiila).

Weriyahan oo la xiray 12-kii bishan ayaa waxaa xarigiisa hay’addu ku tilmaantay mid ka baxsan Sharciga Islaamka, dhaqanka soo jireenka ah ee Soomaalida iyo baaqa Caalamiga ah ee xaquuqda Aadanaha.

War saxaafadeedkaan oo shalay gelinkii hore na soo gaaray ayaa waxaa weriyaha la sii daayey shalay gelinkii dambe, waxayna sidoo kale xarunta Ismaaciil Jimcaale cambaareysay hanjabaaddii iyo xarigii loo gaystay weriyaasha Idaacadda Shabeele waxayna xarunta ku tilmaantay in uu yahay mid ka baxsan Shareecadda Islaamka, dhaqanka soo jireenka ee Soomaaliyeed iyo baaqa caalamiga ah qodobkiisa saddexaad oo leh (qof waliba waxa uu xaq u leeyahay in uu ku noolaado nabad iyo xoriyo). Waxayna xaruntu ugu baaqday Dowladda Federaalka in ay ilaaliso xoriyatulqawlka iyo waliba goobaha warbaahinta, waxaana war-saxaafadeedkaani ku saxiixnaa Maryan Xuseen Awreeye oo ah Guddoomiyaha xarunta Ismaaciil Jimcaale. 

Weriye Jantiile oo dib u helay xoriyaddiisii

Shalay galabnimadii ayuu dib u helay xoriyaddiisii weriye Max’ed Xuseen Jimcaale (Jantiile) oo u shaqeynayay wargeyska Ayaamaha iyo Web-Site-Internet ah.

Weriyahan ayaa ka mid ahaa dad fara badan oo ay Ciidamada Dowladda ka qabteen Suuqa Bakaaraha mar halkaasi ay hawgalo ka wadeen.

Weriye Jantiile oo mudo shan maalmood ah ku xirnaa xabsiga Baarista Xisbiga ayaa waxa uu sheegay in si wanaagsan loola dhaqmay intii uu ku jiray xabsigaasi.

Aamiin Yuusuf Khasaaro oo ku hadlayey magaca Maamulka Wargeyska ayaa u mahadceliyey madaxa Xiriirka Dadweynaha iyo Saxaafadda C/waaxid Max’ed Xuseen iyo Wasiirka War-faafinta Madoobe Nuunow oo iyagu gacan ka gaystay daysmada weriyahaasi, sidoo kale waxa uu maamulka Wargeysku u mahadcelinayaa Xarunta Ismaaciil Jimcaale oo iyadu cambaareeysya xarigaasi oo ku tilmaantay mid ka baxsan Shareecadda Islaamka, xeerarka Soo jireenka ah ee Dhaqanka Soomaaliyeed iyo baaqa caalamiga ah qodobkiisa saddexaad oo leh qof waliba waxa uu xaq u leeyahay nabad iyo xoriyo in uu ku noolaado.

Iska hor imaad ka dhacay Magaalada Kismaayo

Wararka naga soo gaaraya Magaalada Kismaayo waxay sheegayaan in maalintii shalay ahayd halkaasi ka dhacay iska hor imaad la isku adeegsaday hubka noocyadiisa kala duwan oo u dhexeeyey hubka noocyadiisa kala duwan, waxa uuna iska hor imaadkaasi u dhexeeyey laba maleeshiyo, iyadoo ay ku dhinteen labo qofood, waxaana ku dhaawacmay ilaa iyo shan kale.

Lama garanayo sababaha uu ku bilowday iska hor imaadkasi, hase yeeshee warar ayaa waxay sheegayaan in labada maleeshiyo ay iska shakiyeen.

Ma ahan markii ugu horeysay oo iska hor imaadyo noocaan oo kale ah ka dhacaan Magaalada Kismaayo, iyadoo dhawaan iska hor imaad uu ku dhex maray labada maleeshiyo oo ka tirsan Dowladda taas oo keentay mid ka mid ah labadii dhinac laga soo saaro Magaalada kadib markii ay burbureen dhex dhexadino fara badan oo la waday.

Gacma Dheere oo sheegay in Max’ed Dheere, Cabdi Qaybdiid iyo Darwiish la xisaabtankooda leedahay Wasaaraddiisa.

Wasiirka arrimaha gudaha Dowladda Federaalka Max’ed Sheekh Max’ed Guuleed (Gacma Dheere) oo shalay shir jaraa’id ku qabtay magaalada Muqdisho ayaa wax laga weydiiyey in ay baarlamaanka hor tagaan mas’uuliyiinta ay ka mid yihiin Taliyaha Ciidanka Booliiska Cabdi Qaybdiid, Taliyaha nabad sugida Max’ed Warsame Faarax (Darwiish) iyo guddoomiyaha gobalka Banaadir Max’ed Dheere, waxa uuna sheegay Gacma Dheere in warbixinta raggaasi looga baahnaa ay bixisay Wasaaradda Arrimaha gudaha, isagoo sheegay in la xisaabtanka raggaasi ay u taalo wasaaradda arrimaha gudaha.

“Waan soo dhaweyneynaa in Baarlamaanka uu la xisaabtamo Hay’adihiisa, hase yeeshee Hay’adahaani waxay hoos yimaadaan Wasaaradda Arrimaha gudaha, wasaaradda ayaana bixineysa warbixintooda” ayuu yiri Gacma Dheere oo sidoo kale wax laga weydiiyey in dalka Sucuudiga ay ku kulmi doonaan Isbahaysigii looga dhawaaqay Magaalada Asmara, waxa uuna arrintaasi ku tilmaamay mid aan sal iyo raad toona laheyn.

“Mar ayay habooneed wada hadal, kaas oo ahaa xiligii ka horeysay dagaalkii ka dhacay Muqdisho” ayuu yiri Gacma Dheere oo sheegay in wixii wada hadal ee Dowladda Federaalka ay u xilsaaran yihiin Guddiga dib u heshiisiinta qaranka Soomaaliyeed, kuwaas oo laga doonayo in ay sii wadaan wixii dib u heshiisiin ah oo laga dhex sameynayo Ummadda Soomaaliyeed. 

Amiin Yuusuf khaaaro.
amiinkhasaaro@hotmail.com.