Maxaa kala heysta Taleefoon Gacmeedyada (Mobile Phones-ka) iyo Reer
Saudi Arabia?
Iyadoo Waddanka
Saudi Arabia uu ka mid yahay dalalka sida weyn u isticmaala taleefoon
Gacmeedyada (Cell Phones-ka) ee Adduunka ayaa haddana waxaa meesha ka
marneyn dhibaatooyinka iyo saameynta Taleefoonnadani ay ku dhex yeesheen
bulsho weynta dalkaasi, gaar ahaan Goobaha Cibaadada (Masaajidda) iyo Golaha
Kulammada.
Wargeyska “Al-xayaat” ee ka soo baxa magaallada London ayaa
cadadkiisii shalay oo Jimco ahayd, taariikhduna ku beegnayd 14/09/2007 waxa
uu qoray in Taleefoonnada gacantu ay ka mid yihiin waxyaabaha ugu badan ee
Reer Saudi Arabia ay ka qaateen Technology-yada casriga ah, Mobile-duna ay
haatan ka mid noqdeen nolol maalmeedkooda caadiga ah.
Wargeysku waxa uu intaa ku daray in dadka Reer Saudi Arabia ay si
aan caadi ahayn u adeegsadaan (Text Messages-ka) ama dhambaallada laga dhex
diro Taleefoonnada gacanta, iyadoo sanadkan gudihiisa ay dadyowga Sucuudigu
isku direen 45,000,000-Milyan oo Fariimaha Mobile-ka laga dhex diro, iyadoo
sanadkii la soo dhaafay ee 2006 aysan dhaafsiisnayn fariimihii Mobile-da
laga dhex diray 30,000,000-Milyan, halka dadka adeegsada adeegyada
taleefoonnada gacantana lagu qiyaasay 15.6-Milyan.
Sidoo kale wargeysku waxa uu intaa ku daray in marka la eego
saddexdii maalmood ee ka horreysay bilowgii Bisha Barakeysan ee Ramadaan
laga dhedhansan karo sare u kaca adeegsiga Taleefoonnada gacanta iyo
mashquul-ka dhex taagan khadka Taleefoonnada dalka Saudi Arabia.
Naasir Al-Barri oo Jariidaddu ay soo xigatay ayaa waxa uu xusay in
habeennimadii Ramadaanku soo galayay uu keligiis diray 100-Messages, waxaana
uu yiri “Dhab ahaantii Adeegga dhambaallada laga dhex dirsado Taleefoonnada
gacanta waa kuwo aad loo jecleysto, waxaana si sahal ah qofkii aad doonto
aad hadalkaaga ku gaarsiin kartaa adigoo saacado badan iyo wax hadal fara
badan aan samaynin”, waxaana uu intaa ku daray “Waxaa suurtogal ah in qofka
aad wax u direysid uu jiifo ama kulan ku jiro, ama xitaa waxaa iska dhici
karta in qofkaasi aadan muddo dheer la hadlin, kaddibna uu ku weydiiyo
halkii aad jirtay muddadaasi fog, maxaad noola soo hadli weysay?, inaad la
hadasho oo cabbaar aad sheekeysataanna waxaa ka fudud in aad dhambaal ugu
dirtid si fudud, wixii aad dooneysidna aad halkaas kaga hadasho”.
Sacad Al-Cambar oo isna hadalkiisa ka dhiibanayay Cell Phones-ka
waxa uu yiri “Tani waa mid ka mid ah arrimaha naga dhigay in aan noqonno
Bulsho is jecel, maxaa yeelay Munaasabadaha sida Bisha Ramadaan oo kale
hadafkeeda dhabta ah waa in aan is maqalno, isla xiriirno iskuna
Tahniyadeyno, Dhambaallada la isaga dhex diro Taleefoonnada iyo
Internet-kana waxay noqdeen kuwo ka tarjuma Shucuurta shaqsiga”.
Ibraahim Al-Bakri oo ah Khabiir ku takhasusay Arrimaha Bulshada
ayaa isna waxa uu ku nuux-nuuxsaday faa’iidada iyo khasaaraha Taleefoon
gacmeedyadu u leeyihiin bulsho weynta Carbeed, waxaana uu yiri “Bulshada
Khaliijku waxay leedahay waxyaabo fiican oo laga dhaxli karo, waxaana ugu
muhiimsan iyagoo isku dira Tahniyadaha Munaasabadaha Diineed iyo kuwa
caadiga, dhaqammada & Caadooyinka, laakiin hadda waqtigu wuu is beddelay oo
noloshu waxay noqotay mid ka deg-deg badan middii hore”.
Mar uu is bar-bar dhigayay wejiga fiican iyo wejiga xun ee
Taleefoon gacmeedyadu waxa uu AL-Bakri yiri “Dhinaca aan lagu farxin ee
Taleefoonnada gacanta waxaa mar walba ka badan dhinaca wanaagsan, tusaale
ahaan adeeggani waxa uu fududeeyay in uu soo dhoweeyo wax aad u dheer,
fududeeyana xiriirka, sidoo kalena halka waagii hore markii aad doontid in
aad qof la soo hadasho ama soo siyaarato aad meelaha dheer u safri jirtay la
hadalkiisa oo qura, waxaa hadda kaaga filan in aad dirto dhambaalka
Mobile-ka oo qura, waxaa kale oo Bulshada Carbeed messages-ka Tel-ka ay aad
u dirsadaan Munaasabadaha Ciidaha oo Muslimiintu ay dhaqan u leeyihiin in ay
isku tahniyadeeyaan”.
W/T: Yaxye Yuusuf Khasaaro
e-mail address:
yaxyekhasaaro@hotmail.com
yaxyekhasaaro@gmail.com
Sept 14, 2007