GOGOLDHIGGA GANACSIGA
(DURUUS
TAXANE AH)
QAYBTII 3AAD EE GANACSIGA IS-KAASHATO
WAAJIBAADKA IS-KAASHATADA
![nayruus](/2007/oct/27oct56.jpg)
Qaybta:
1aad... |
2aad
Waa in uu qof kasta daacad ka
yahay hawsha ganacsiga
Qof kasta waa in ay kal iyo
laab ka tahay hawlaha horumarinta ganacsiga. Waa in uusan
samayn falal dhib u gaysanaya dadka kale ee shirkadda ku
jira ama sumcad xumo u keeni kara shirkadda. Haddii
heshiiskii hore u oggolaanayo in uu qof Is-kaashatada ka mid
ah cayrin karo, waa in uu taas caddaalad ka sameeyaa. Haddii
ay jirto khasaare uu keeno khaladaad uu horey u sameeyey waa
in uu saxaa.
Waa in uu u shaqeeyaa danta
shirkadda
Waa mas’uuliyadda qof kasta
oo Is-kaashatada ka mid ah in uu u shaqeeyo sida ugu wacan
danta shirkadda iyo shuraakada kale. Waa in uu ilaaliyaa
qawaaniinta iyo sharciyada shirkadda. Waa in uu ka fogaadaa
dhammaan falalka u keenaya khasaaraha iyo dhibaatooyinka
niyadsamidda shirkadda.
Waa in loo isticmaalo hantida
shirkadda kaliya danta shirkadda
Qof kasta oo ka mid ah
xubnaha Is-kaashatada wuxuu u isticmaali karaa hantida
shirkadda wixii ay ku jirto danta shirkadda. Hantida
shirkadda, sida: Teleefoonnada, Kambiyuutarada, Gawaarida,
Tacabka IWM, waa in loo isticmaalaa danta shirkadda ee aan
loo isticmaalin in lagu qanciyo baahi shaqsiyadeed.
Waa in ay qayb-sadaan khasaaraha
soo food saara shirkadda
Sida ay dan-wadaagta
shirkaddu u qayb-sadaan faa’iidada soo gasha shirkadda,
haddana sidoo kale, waa in ay qayb-sadaan khasaaraha soo
wajaha shirkadda, iyadoo qayb-sigaasna lagu salaynayo
saamiyada ay wadaagaan sidii horay loogu heshiiyey.
BUR-BURKA HESHIISKA IS-KAASHATADA GANACSI
Bur-burka heshiiska
Is-kaashatada ganacsi waxaa loola jeedaa dib-u-habaynta iyo
dib-u-abaabulidda heshiiskii dan-wadaagnimada kolka uu
dhismihii Is-kaashatada is-beddelo. Is-baddelku wuxuu keenaa
in ay siyaadaan ama naaqusaan tirada Is-kaashatada. Haddii
uu ku soo biiro shirkadda qof cusub, tirada Is-kaashatadu
way siyaaddaa. Haddii mid ka mid ah Is-kaashataduna uu
dhinto, waasho ama uu hawl-gab naqdo, tirada dan-wadaagtuna
waa naaqustaa. Is-beddellada noocaan ah ayaa keena in dib
loo baabi’iyo ama loo hagaajiyo heshiiskii hore, lana
yagleelo heshiis cusub. Tusaale ahaan, haddii B, T iyo J ay
dan-wadaag ku noqdaan shirkad oo uu J hawl-gab noqdo,
heshiiskii saddexdaas ka dhexeeyey wuu bur-burayaa, waxaana
heshiiskii dib-u-abaabulaya ama u hagaajinaya labada soo
haratay, waa B iyo T-e. Haddii dan-wadaagta B, T, iyo J ay
aqbalaan X, haddana heshiiskii hore waa bur-burayaa, heshiis
cusubna dib ayey u dhistaan dhammaan B, T, J iyo X.
XAALADAHA
KEENA IN HESHIISKII IS-KAASHATADA GANACSI BUR-BURO
Heshiiskii Is-kaashatadu
wuxuu bur-buri karaa:
- Markii uu qof cusub ku
soo biiro shirkadda.
- Markii uu qof hawl-gab
ka noqdo shirkadda.
- Markii uu qof ka mid
ah shirkadda waasho.
- Markii uu qof ka
musallafo shirkadda.
- Markii uu qof ka mid
ah shirkadda ay maxkamadi dambi ku xukunto.
- Markii ay dhammaato
muddadii lagu heshiiyey in ay shirkaddu soconayso.
- Markii qof ka dhinto
shirkadda.
BUR-BURKA GANACSIGA IS-KAASHATADA
Sida uu u bur-buro
heshiiska dhex mara dan-wadaagta haddana sida oo kale, waxaa
bur-bura shirkadda Is-kaashatada. Bur-burka heshiiska
Is-kaashatada iyo bur-burka shirkadda way kala duwan yihiin.
Bur-burka heshiiska Is-kaashatada waxaa laga yaabaa in uusan
socoshada ganacsiga waxba u dhimin, laakiin bur-burka
shirkadda waxay keenaysaa dhammaanshaha ganacsiga iyo kala
go’a xiriirka dhammaan dan-wadaagta.
AALADAHA AY SHIRKADDU KU BUR-BURTO
Shirkaddu waxay ku bur-burtaa
arrimahaan soo-socda:
- Haddii shirkadda
lagu qabto in ay wax sharci darraa ka ganacsanaysay.
- Haddii
ay xantiiraan dhammaan Is-kaashatadu.
- Haddii
ay ku heshiiyaan Is-kaashatadu in ay joojiyaan
ganacsigooda.
MEELAHA
UU KU HABBOON-YAHAY GANACSIGA IS-KAASHATO
Ganacsiga Is-kaashato wuxuu
habboon yahay kolka uu ganacsigu yahay mid dhex-dhexaad ah,
Is-kaashataduna tahay mid isku heer ka ah dhanka awoodda iyo
dhaqaalaba.
CASHARKA
IYO SETIMAANKA DAMBE
Waxaad Setimaanka dambe la
socon doontaan Cutub Cusub oo ka hadlaya Maamulka iyo
Maamulaha, waxaana Qaybtiisa 1aad kaga hadli doonaa - Alle
Idinki - Fikrad ahaan Maamulka iyo Maamulaha.
Qaybta:
1aad... |
2aad
Qoraha: S. Nayruus
Goobta: Karachi,
Pakistan
E-mail-ka: snayruus@hotmail.com
iyo
nayruus@gmail.com
Mobile-ka: +92-345-8118910.
ILAHA XOG-URURINTA
- A practical
Introduction to Business By: Koontz and Fulmer
- Accounting- The basis
for business decisions By: Meigs, Williams, Haka &
Buttner.
- Strategic Management –
Concepts and Cases By: Fred R. David.
- Business Research
Methods By: Emory.
- An Integrated Approach
to Business Studies By: Bruce R. Jewell
- Business
Accounting By: Frank Wood & Alan Sangster.
- Business Law By:
Ronald A. Anderson.
- Financial Management
of the Small Firms By: Walker W. Pitty.
- Principles of Commerce
and New Management By: M. A. Khalid.
- The Business –
Problems and Solutions By: Skatler.
- Qaamuuska
Af-Somaliga By: Keenadiid.