JILAA ISRAA’IILI AH OO MATALAYA FILIM LAGA SAMEEYEY SADDAAM XUSEEN 
 

abdirahman sharif

taysiir55@hotmail.com

---

Hadda waxaa soo gabagaboobay duubistii Filimka, waxaa soo saaristiisa suuragelisay Hay’adda Warbaahinta Biritin (BBC), wuxuu ka faaloonayaa noloshii Madaxweynihii hore ee dalka Ciraaq, Saddaam Xuseen, kaasoo lagu fuliyey xukun daldalaad ah bilowgii sannadkan, laakiin, muran badan oo wali socda ayaa wuxuu hareeyey xeeldheerayaasha ku hawlan soo saarista Filimkan, sababtuna waxey tahay iyadoo doorkii Saddaam uu filimka ku matalayo jilaa u dhashay Israa’iil.

Filimkan oo Luqadda Ingiriiska ku hadlaya ayaa hawshiisa waxaa la soo afjaray bishii ina dhaaftay ee October, waxaana loogu magacdaray, (Mesopotamia) ama Labada Webi Dhexdooda, waxyaabaha xiisaha u yeeli doona waxaa ka mid ah, marka dad weynaha loo soo bandhigo, iyadoo uu diiradda saari doono shakhsiyaddii Saddaam Xuseen, ka hor intii aan la daldalin iyo kaddiba, iyadoo noloshiisana ay doodo badan ka dhasheen oo lagu kala aragti duwan yahay, waxaa soo saaray filimkan Alex Homz oo u dhasahay dalka Ingiriiska, filimkaasi waxaa ku matalaya qaabka iyo magaca Saddaam, jilaa u dhashay Israa’iil oo lagu magacaabo Frederick.

Waxyaabaha soo jiidashada leh waxaa ka mid ah, in jilaagu uu aad u shabaho sida warar hordhac ah ay sheegeen, qaabkii iyo muuqaalkii Saddaam Xuseen, halka doorka Xaaskiisa Saajida, ay matali doonto gabadh lagu magacaabo Agdaslo oo caan ah, una dhalatay Mareykanka, balse asalkeeda uu yahay Iiraaniyad.

Muran dheeraaday ayaa wuxuu ka taagan yahay, habka ay filimkan jilistiisa uga qeyb qaadanayaan, shan jilaa oo uwada dhashay dalka Tuniisiya, oo ay ku jiraan, Hishaam Rastam, Maxamed Cali Alnahdi, iyo Fu’aad, oo Agoon ku matalaya, waana arrin si kale marka loo fasiro noqoneysa mid meel ka dhac ku ah Carabta, sida dadka qaar ay ku doodayaan, waxaa sidoo kale ku jira, waxyaabo lagu muuqaal xumeynayo Saddaam, marka lagu daro kaalinta weyn ee uu filimku ku leeyahay ninka Israa’iiliga ah.

Jilaa caan ah oo u dhashay dalka Tuniisiya oo loogu yeero Cali Binuur, ayaa si kulul u cambaareeyey wax uu ku tilmaamay iney yihiin khiyaamooyin, isagoo yiri, “Filimaanta noocan oo kale ah waa kuwo lagu xumeynayo muuqaalka Carabta” wuxuu intaa ku daray, “Filimka waxaa si qaldan loogu isticmaalay Saddaam iyo Carabta, waxaana lagu burburinayaa muuqaalkeena iyo sumcaddeena, waana taas midda aan aniga ku diiday inaan dadka jilaya ka mid noqdo”. Binuur wuxuu u sharaxnaa inuu door ka qaato filimka hawshiisa, laakiin markii dambe wuu ku gacan seyray inuu ka qeyb qaato.

Alnahdi oo isagu ah jilaaga labaad ee filimka, wuxuu sheegay, inuusan la socon isagu in jilaaga filimka ku matalaya Saddaam uu yahay nin Israa’iili ah, markii uu ogolaanayey ka qeybqaadashadiisa, wuxuu dafiray waxyaabaha lagu soo celcelinayo, ee ah in filimka inta uu socdo ay ka soo dhex muuqan doonaan, waxyaabo lagu sharaf dilayo Carabta.

Wargeyska lagu magacaabo ALWAXDA ee uu soo saaro Xisbiga mucaaradka Alwaxda ee dalka Tuuniisiya, ayaa si kulul u cambaareeyey raggan wax ka matalay filimka, waxaana uu yiri wargeysku, “Waxey ku degdegeen qaar ka mid ah jilayaasha iney hunguriyeeyaan fursadahan oo kale, waxaa ku adeeganaya ajaanib iyagoo aan is dareemeyn, ama iska indha tiraya, waxey markaasi eeganayaan ilo dhaqaale” wuxuu kaloo yiri wargeysku, “Waxey aaminsan yihiin in qabashada hawlahan oo kale ay ka mid yihiin waxyaabaha caadiga ah”.

Nin xubin ka ah ragga agaasimay filimkan ayaa sheegay in kaliya uu filimku ka sheekeyn doono 24 sannadood oo noloshii Saddaam ah iyo xiriirkii qoyskiisa, iyo sidoo kale, dagaaladii uu ka soo qeyb qaatay tan iyo sannadkii 1979-kii, waxaa kale oo ku jira, dagaalkii Mareykanku hoggaaminayey ee dalka Ciraaq lagu qaaday sannadkii 2003-dii, kaasoo lagu riday maamulkiisii, wuxuu kaloo sheegay in Filimku uu diiradda saari doono, dagaalka sannadaha badan qaatay ee shacabka Ciraaq ay dhex durduurteen.

Ninka filimkan ku matali doona Agoonka, ayaa sidoo kale, wuxuu difaacay kaalintiisa iyo eedeymaha uu wajahay, wuxuu yiri, “Filimka Saddaam laga matalay waxaan kala qeyb qaatay ninka Israa’iiliga ah, sababtoo ah, iigama ay muuqan waxyaabo lagu xumeynayo Saddaam iyo Carabta”.

Agoonku wuxuu intaa ku daray, “Filimku wuxuu soo gudbinayaa taariikh nololeedkii Saddaam Xuseen, iyadoo galaangalkiisii iyo mowqifyadiisii siyaasadeed ay ku jiraan, kumana xadgudbayo Carabnimada iyo Qarannimadeeda, iyo mabaadii’ Carbeed toona”, wuxuu hadalkiisa ku soo gabagabeeyey, “Waxaan qiimeeyey xaaladda, sidaas ayaana Filimkan uga qeyb qaatay, waan ku qanacsanahay, dhibaatana uma arko sida dadka qaar ee diiday iney ka qeyb qaataan filimka, maxaa yeelay iyagu ma aaney darsin xaaladda”

Laakiin, waxaa la saadaalinayaa in caro badan ay ka dhalan doonto Filimkan marka ay daawadaan Shucuubta Carabta, iyo taageerayaasha laga jinsiyadaha ah ee Madaxweynihii hore ee dalka Ciraaq Saddaam Xuseen.