XALKA QUR AH!
Fardowsa C/qaadir
Cabdi
Madaxa Majallada Marwo
E-mail:
firdowsabdi@yahoo.com
Marka dib loo jalleeco taariikhda Soomaalida inta wax laga
qoray iyo inta la xasuustaba, waxaa si weyn la isaga marag
kacay in aan Soomaalidu walligeed barrin bajiino reerka ku
furin duco qabana uu san hoggaanka u qaban iyadoo isla
markaasna dadaallada xal doonku ay tiro beeleen. Hadaba
su’aasha is weydiinta mudani waxay aheyd illaa iminkana
tahay “maxaa qaldanaa illaa iminkana qaldan oo sixid u
baahan?!”
Mudadii walaahowga waxaan la dafiri Karin in xeel dheerayaal
badani ku taliyeen in maadaama dadka Soomaaliyeed ay yihiin
ummad muslim ah 100% ay dawadoodu ku jirto sharciga Alle oy
ka jid yeeshaan iyo inay islaamka galaan gabi ahaantiisa
balse taladaas wax ku oolka ah waxaa u baas baxay
hogaamiyaalkii dalka soo maray oo gabi ahaantood ay
taladaasu la qalloocneyd haba kala duwanaato siyaabaha ay ku
diidayeene; qaar u haystay in islaamku yahay wax aan
dhaafsiisnayn in lagu tukado haweenkana lagu meheriyo,
mowtida iyo maliilkana lagu akhriyo, qaar kale waxay u
arkayeen in Islaamku uusan aheyn nidaam dhammaystiran oo la
jaanqaadi kara hannaanka dowladeed, kuwo kalana waxay is
lahaayeen waa nidaam dib u socod ah oo aan horumarka
caalamku ku tallaabsaday bulshada Soomaaliyeed gaarsiinayn
oo waxaa u soo dhadhamaysay in ay ku habboon tahay in lakala
saaro diinta iyo dowladnimada, qaarna waxay ka baqayeen in
lagu calaamadiyo asalraacnimo isla markaana la mariyo halkii
rag hore la mariyay!
Waxaa iyana jirtay jaahilnimo mujtamaca ka haysatay
muhiimmadda diinta Islaamka, iyadoo la dhihi karo shacabku
ma helin wacyi galin joogta ah oo ay kaga haqab beelaan
aqoonta ay u leeyihiin muhiimadda Islaamka iyo
ujeeddooyinkii uu u yimid. Waxaana lagama maarmaan ah in
culumadu boorka ka jafto dowrkooda oo ay dardar galiyaan
hanuuninta dadweynaha ayna quluubtooda ka daahiriyaan
afkaarta dib u socodnimada iyo cilmaaniyadda ku dhisan ee uu
cadowgoodu dhagaha ugu shubay isagoo u soo maray warbaahinta
iyo waliba waxbarashada tooska ah iyo midda dadbanba.
Haddii aan dib ugu soo noqdo su’aashii aheyd “maxaa qaldanaa
oo qaldan? Waxay jawaabtu tahay iyadoo iska fudud in
baadidii loo raadiyay meel aanay jirin xalkiina laga
raadiyay mushkiladda qudheeda; Murti ayaa oranaysay (cudurka
ku dhaca fardaha haddii dameeraha laga gubo dawada lama helo)
sidaas darteed ayay Soomaalidu u baahan tahay in ay aqbasho
inay khaldaneyd una diyaargarowdo in ay saxato wixii ka
khaldanaa iyo in Islaamku yahay jawaabta qur ah.
Islaamku waa diin caalami ah kumana koobna qaarad gobol ama
dal gooni ah, nabi Muxammedna wuxuu ahaa rasuulka qura ee
loo soo diray caalamka gebi ahaantiisa! Maantana waa
maalinta loogu baahi badan yahay in caalamku qaato
siyaasaddii uu Nabi Muxammed CSW ku baddalay caalamkii
baaba’a ahaa xilli aad u kooban kana soo saaray quwad jirta
iyo mujtamac saalix ah kana nabad qaba dhan walba..
Ma ahan Soomaalida oo qur ah cidda u baahan in ay Islaamka u
aragto habka qur ah ee lagu noolaan karo ee waxaa u baahan
in lagu qanciyo fikradan ah xalka qur ah dhammaan caalamka
iyo caalamiinta ku dhex nool! Maxayna sidaa u aheyn kadib
markii dunidu soo tijaabisay nidaamyo iyo diin ku sheegyo
fara badan sida: diin la’aan, hanti wadaag,(shuuciyad)
dimoqraadiyo, etc; iyadoo dhammaan lagu soo wada hungoobay
dhibaatadiina dunida ku sii badanayso ayay hadana iska indha
tirayeen inay xitaa tijaabiyaan markan Islaamka!
Arrinta Soomaalida ku gaarka ah ayaase waxay tahay in ay
yihiin dad muslimiin ah ayna mustaxiil tahay in ruux muslim
ah xaalkiisu ku suubbanaado waxaan Islaamka ka aheyn taasina
waxayba lid ku tahay muctaqadaadka dadyawga Islaamka waana
waxaan la sugeyn in ay sharaf, quwad, horumar, iyo sacaado
adduun iyo aakhiroba helaan haddday ka doonaan meel aan
islaamka aheyn.
Islaamku waa waddada qur ah ee ay Soomaalidu isku aammini
karto, kuna dhisan karto dowlad ay raalli ka yihiin
Soomaalida oo dhan, waa dawada qur ah ee daweyn karta
cudurka aan u aqaanno AIDSka Soomaalida (Qabyaaladda), waana
tii Nabi Muxammed CSW ku daaweeyay carabtii Madiino
dagganeyd oo qarniyaal fara badan isku leyn jiray labo
qabiil (Aws iyo Khasraj) kadibse inta Islaamka lagu
walaaleeyay loo bixiyay magaca sharafta badan ee Ansaar.
Waxaan Maqaalkayga ku soo afmeerayaa jawaabta mowduuca
maqaalka oo ah: (xalka qur ah, keli ah ee aan mid labeeyaa
jirin waa inaan dabbakhno kuna dhaqanno si dhammeystiran
shareecada Islaamka laga bilaabo guriga, masaajidka illaa
xaafiiska madaxweynaha!)
Fardowsa C/qaadir Cabdi
Madaxa Majallada Marwo
E-mail:
firdowsabdi@yahoo.com
Afeef:
Aragtida qoraalkan waxaa leh qoraaga ku
saxiixan
Faafin: March 11,
2007
|
Daabaco
Boggan | Print
ARAGTIDA/MAQAALLADA
DADWEYNAHA EE MAANTA