SomaliTalk

KU: DHAMAAN WARBAAHINTA MADAXA BANAAN EE MUQADISHO

UJEEDDO: XOG WARRAN KU SAABSAN DIB U HESHIISIINTA LE SHEEGAY IN LAGU HESHIISIINAAYO DHAMAAN SOOMAALIYA.

Anigoo ah oday Soomaaliyeed oo 80 jir ah, dagan Muqdisho, muddo ka badan 50 sanno, waxaan rabaa inaan caddeeyo waxaan ka qabo dib u heshiisiinta ay sheegeen madaxda dowladda in ay tahay mid ay ku jirto qiyaano oo aan daacad laga ahayn in xumaantu ay dhamaato oo loo guuro wanaag, waxaana caddeynaaya waxay yiraahdeen duwladdu waxaan isugu yeereynaa odayaasha dhaqanka iyo culimaa’u diinka loo yaqaanno Ahlu-sunna wal Jamaaca, iyagoo diiddan in ay la heshiiyaan qoladii la dirirtay Dowladda Itoobiya, iyo ciidan lagu sheego in ay yihiin ciidan Soomaaliyeed, laakiin aan u haysto in aysan jirin ciidan Soomaaliyeed oo loo dhan yahay, ee ay yihiin ciidan beeleed oo lagu soo xoojiyey ciidanka Tikreeda, ciidankaas oo lagu soo weeraray Koonfurta Soomaaliya oo keli ah.

Sidaas darted waxaan rabaa, in aan cadeeyo dulucda ka danbeysa weerarka la weeraray koonfur, ee aan la weerarin Punt-land iyo Soomaali-land, waxaa heshiiyey Saddex Madaxweyne oo ka taliya Punt-land, Somali-land iyo Baydhabo, waxay la heshiiyeen saddexdoodaba Raiisul wasaaraha Tigreeda, waxayna kula heshiiyeen in la weeraro koonfurta Soomaaliya, sida uu sheegay wasiirkii arrimaha gudaha ee hore, waxaana cadeynaaya in ay dhab tahay arrintaasi dakadda Boosaaso iyo dakadda Barbara oo ay ka taliyaan Punt-land iyo Soomaali-land waxaa lagu wareejiyey mar hore in uu ku shaqeysto meles-zenawi, waxaa ka maqnaa oo keli ah dakadda Muqdisho iyo tan Kismaayo, oo ay hadaba ka taliyaan Tikreeda, waana inta lagula heshiiyey saddexda Madaxweyne ee aan soo sheegnay.

Waxaase is weydiin rabta, ma ogol yihiin shacabka Punt-land iyo Somali-land sida ay rabaan maamullada saddexda Madaxweyne oo ah in la isku daro Soomaaliya iyo Itoobiya. Waxaa kale oo isweydiin rabta maamulka Punt-land ee soo aruuriyay dhallin yaradii punt-land ee ku marti qaaday Tikreeda Gaal kacyo ee isku soo daray, labadii ciidan ee weerar kasoo bilaabay ban diiradley ilaa dhoobley oo ah Xuduudka Kenya, haddana ka wada taliyaan Kismaayo iyo Xamar, macquul ma tahay maamulka Punt-land oo intaas sameeyey in uu ku dhawaaqo waxaan dhigeynaa gogol Soomaaliyeed?

Ugu danbeyntii waxaa is weydiin rabta cidda ka danbeeysa in la baaba’sho jiritaanka Soomaaliya oo lagu wareejiyo Tikreeda ka talisa Addis Ababa oo haddaba gumeysata 70 milyan oo Itoobiyaan ah, waxaa ka danbeeya Ingiriis, Mareykan iyo Kenya, oo qabta cadownimo Soomaaliyeed oo ka xun midda ay qabto Itoobiya.

Waxay noqotay Kenya doqon ku dibirsaday kaama koco, waxaanse ku kalsoon nahay Shacabka Punt-land iyo Soomaali-land, iyo Shacabka Muqdisho iyo nawaaxigeeda in aysan ogolaan doonin waxa ay rabaan cadowga Soomaaliyeed ee ay ku tashadeen gudaha iyo dibaddaba.

FIIRO GAAR AH:

Waxay tahay ujeeddada ka danbeysa baabi’inta Soomaaliya, waxaa la diiddan yahay Islaamka faraha badan ee ku nool geeska Afrika, oo kala jooga Soomaaliya, Itoobiya, Jibuuti, Ereteriya, Suudaan, Yugaandha iyo Kenya.

Waxaan ku kalsoonahay intaas aan kor kusoo sheegay oo si dhab ah u haysta diinta Islaamka ayagoo kaashanaya ilaahooda Islaam nimada siiyey, in aysan diintooda baabi’in Karin Bush iyo Baleyr iyo dhuuni qaatayaasha u adeega, kuwaas oo dhamaantood u shaqeeya Yuhuudda Gumeysata bariga dhexe, oo ay ku nool yihiin madax carbeed oo laga xukumo guriga cad ee Mareykanka, haddii laga reebo Suuriya iyo Iiraan.

Hadaba guntii iyo gaba gabadii madax weynaha Soomaaliyeed ma rabaa inuu noqdo madax weyne Soomaaliyeed oo madax bannaan oo xukuma dal barwaaqo ah oo weliba bigro ah bad iyo berriba, oo ay ku nool yihiin 12 milyan oo islaam ah? Mise wuxuu rabaa in uu noqdo madax weynaha kilinka lixaad ee Itoobiya, ee laga xukumo Addis Ababa, sida ay sheegeen madax ka mid ah dowladdaan?

Waxaan kugula talinayaa in aadan noqon madax weyne ka amar qaata gaalo, taas oo ah Nasiib darro.

Waxaa Diyaariyey.

Sh. C/raxmaan M. Axmed
Oday Soomaaliyeed
Muqdisho. 20/02/2007

La xiriir: cumar aadamnor | faaris120@hotmail.com

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | March 11, 2007

9:30-ka Fiidnimo Waqtiga Fadhi ku Dirirka