Taliyaha Ciidanka Booliiska DFKMS , Cabdi Xasan Cawaale Qaydiid ayaa uga furay 600 oo askari oo Booliis ah tababar Kulliyada Tababarka Ciidanka Booliiska ee Deg. Carmo wee G/Bari.

Cabdi Qaydiid oo beryahaan ku sugnaa Puntland ayaa dadkii halkaas joogay u sheegay  in ujeedada socdaalkiisu uu ku saabsan yahay  saddex arimood.

" Aniga iyo Sxb-da kale ee DFKMS ka socda waxaan halkaan u nimid 3 arimood oo kale ah":-

1. Wada-tashiyo iyo kala qaadasho war-bixinno madaxda DGPL, maadaama aanu ka nimid caasiimada Soomaaliya ee Muqdisho.

2. Furitaanka Tababarkaan Boooliiska

3. Iyo maadaama lagu jiro asaaskii iyo dib u dhiskii ciidanka Booliiska Soomaaliyeed in aanu idiin sheego halka wax noo marayaan, haddaanu nahay madaxda Booliiska Soomaaliyeed.

Cabdi Qaydiid wuxuu sheegay in ay sidoo kale doonayaan 300 oo Booliis ah oo Puntland ka socda in lagu biiriyo Ciidanka Booliis ah oo tababar uga bilaabmi-doono Muqdisho si ay uga qaybqaataan sugida amaanka Caasiimada.

Col, Qaydiid mar uu ka hadlayey dagaaladii dhexmaray DFKMS iyo Ciidamada Itoobiya oo dhinac ah iyo Ciidamadii Midowgii Maxaakiimta ayaa waxaa uu sheegay in 2 jeer ay uga guulaysteen dagaaladaas, haddana ay soo af-jarayaan wax uu ugu yeeray Dagaal Tuugaysi ah oo Bambo gacanta laga tuuro, Mid dhulka lagu aaso, ama Remote Control lagu hago iyo  Baastoolad la soo qarsado oo madaxa qofka looga toogto IWM.

Qaydiid oo ka hadlaya halka ay maanta marayso nabad-gelyada Muqdisho ayaa waxaa uu sheegay in aysan jirin cid inta qori la soo bxii karta xabad riddi karta marka laga reebo si tuugaysi ah..

Qaydiid, Wuxuu ku amaanay ciidamada DFKMS, kuwa Itoobiyaanka iyo Amisom in ay nabad-gelyadii caasiimada soo celiyeen , marka laga reebo waxyaalaha yaryar ee iska dhaca.

Cabdi Qaydiid waxaa uu si gaar ah ugu mahad-celiyey hay'adda UNDP/Rolls oo uu ku amaanay in ay gacanta kowaad siiso ciidamda Booliiska ee DFKMS.

Hadal dadku ay si kala gooni-gooni ah u fasireen oo uu Cabdi qaydiid isticmaalay ayaa ahaa sidatan:

" Haddaan Soomaali nahay, annagaa dalkayagii burburinay, dadkayagii isku laynay, isla markaasna sharcigii ka talaabsanay, maantana waxaanu rabnaa inaanu soo celino Midnimadii umadda Soomaaliyeed.

Hadalkaan ayaa dadka qaar u riyaaqeen, halka qaar kalena ay ku tilmaameen in uu Qaydiid qiranaayo in uu ka mid ahaa dadkii Soomaaliya maanta dhibka ay ku jirto kaga jiray safka hore.