Gabay "guubaabo"

Gabay "guubaabo"

Mohamoud Abdilahi Rooble
email: saylacnews@yahoo.com

Gabaygani wuxuu soo baxay Jun,22,2007 Wuxuuna Taageerayaa Maansadii Roda X. Misan ay ka tirisay Shirka Awdal ee ee Waqooyiga Amerika waxaana tiriyey Abwaan Mohamoud Abdilahi Rooble Maanso quruxbadan ayey Rooda ka tirisay shirka Jaaliyada Awdal ee Qawooyiga Ameerikaku dhaqani ku lahaayeen Magaalada Meniapolis ee Carigan Mareykanka.

Abwaabku isagoo dhiirigalinaya Rooda Maansadeedii Wuxu yidhi:

Guubaabo gabaygii ahaa garasho weeyaane
Guux buu la soo baxay arlada geli wanaagiiye
Geeraar da'weyn oo la hubo mudan garaadkeed dheh
Gororkii murtidu ay lahayd gabagabayntii dheh

Dabaylaha gugii soo wadiyo gugac sidii dheh
geeraar la hubo buu haa waan garwaaqsadey e
Gorgor xaytey geenyada gilaman haadka galawlayni
Gaax soo baxaysiyo murtida guudka loo dabay dheh
Godol waayo reeruhu sugeen gorof ka buuxeed dheh
Gidigood haweenkaba hadaad gees iskugu keento
Erayadan garaadkoodu muu gaadhin waligiise
Guncad caano laga maalay iyo gabay wanaagiisdheh
Garaaraha ku yaalan arkaa waa gayaan wacane
Gabalkoo dhacaayiyo aduun muuqa galabeed dheh
Jidhkaa iwada gariiree wanaaag gabi ahaantiidhe
Golihii habaasweyne iyo jidhi garooceed dheh

Xareed laas gundhow laga dhamiyo gaaxo hadalkeed dheh
Galey reero beerteeb diraac garani maysaane
Hadhuudhkoo guntii wagac tidhiyo guuskoo baxay dheh
Geedweyne laamuhu gunteen waa gahayr baxaye
Giirqaarka layskuma wacee gibilcad muuqeed dheh
Guntin hadalku uu leeyihiyo eray gobaadkii dheh
Kuma foofto geyr laasimee geedi socodkii dheh

Gaadaaf gartii loo dhigiyo, gogoldhigeedii dheh
Geesiyaal dagaal lagu ogaa, goolka loo qalay dheh
Gawriir tilmaan dhaaftey iyo gudasho xoogweyn dheh
Gurcud-dama dadkoo taagan madaw gabal ku soo fooleh
Oo muuq garaaracan watoo uunka wada gaaray
Oo gudub u kala baxay falaadh geeskastaba geeyey
Ilays gurux sidiisii socdiyo guuyo sharafeed dheh
Gaalaadhi karantoo huftidhi gubankii hoosaadheh
Ganacsade macaash buuxsadoo farax la geygeyleh
Guule mahadii weeyee dareen soo gadaad baxaydheh

Galbeed sharafta lagu oogay iyo Awrdil garabkeed dheh
Galbiskii wacnaa iyo gadii awdal Gacalkeed dheh
Gudin xumaha goysiyo wanaag guudka loo dabay dheh
Guutooyin gulufkay wadaan guux ka soo baxaydheh
Gabagabo murtidu leediyo guulo xeel sida dheh
Ganbo dumarku way wada xidhaan goor iyo ayaane
Tixo gaamuroo lagu ogaa gacalkay raadkiis dheh
Waran geesi tuuriyo gamuun ganid waxsaarkeed dheh
Gudbin xoogleh oo lagu ridalay goodir geed galay dheh
Gaadiid wax qaadiyo amuur Awr isgarab joogta
Oo gaafka socodkay wadaan geedi loo rarayo
Talaabada markay wada gudbaan waa gudoon kale e
Gooh kama baxee waxay socdaan gabaldhacweeyaane
Hadii geesigii waday colaad lagu gax siisiiyo
Oo qaar u sii galay gundigu weerar gabaxsiiyo
Dibu gurasho loogama fadhiyin waa guhaad jira e
Waa inuu guntiga giijiyaa guuldarow darane
Hogaankii u saarnaa garbaha geedka sare saaro
Ilaa uu ka go'o weyna gedin gorayacawshiiye
Adiguna gadeedaad tahiyo guri ardaagiiye
Gadabuursi waa lagu ogaa gacalwaniigiiye
Iyo geesiyaal aan aqoon geeri baqadkeeda
Gartaa weeye maantana inaad geed iskugu keentid
Gartaa weeye inaad gaariyahay halo garwaaqsiisay
Gar islaam ayaa wada lahoo guule ugu deeqye
Gartaa weeyi inaad guurtidii erayo gaadhsiisay

Gada kale hadaan sii guroon gaadho hadafkeeda
Oon erayo gaashaaman rido waa gadaan rabo e
Haduunbuu sidii geel irmaan soo garwaaxsadey e
Gariguba markuu daaq yidhaa hawd iswada gaadhay
Kama goosto geedaha dhulkee boodhku garab yaale
Laamaha la gaadhayn ayuu garab istaagaaye
Guudkuu ka daaqaa midhaha gooriyo ayaane
Ana gabayga waan kala guraa sida garaadkiiye
Goos-goos ayaan ugu qoraa loox igarab yaale
Goortu aadmi wada seexdo ee guuxu kala guuro
Ayaan gooni ula soo baxaa hadal la gaadhaaye
Isagoo gudoon wacanabaan kala gun gaadhnaaye
Sida aar la ganay waa inaad guuxdo abidkaaye
Geeraar wanaagii hadaad abid uguuxaysid
Waa inuu ku gaadhaa xanuun gaadha oogaduye
Inaad hadalka gaagaabsatoon ruuxba kaa garane
Galiilyoodayeey waa inaad hadal ku goysaaye

Nabsi wuu gudaa mabase guuro abadkiiye
Ruuxii gaf kaa galay isagu wuuna garanayne
Gocashada xanuunkaleh xusuus waa gadaan qaba e
Hadii reero geestaada yaal la isla garan waayo
Gujadiyo haday kugu hayaan eex isgarab taala
Oo galbeed kuwii lagu ogaa dhibi ay soo gaadhay
Intaan geeb qaxwa ah laga helayn reero gabigoodba
Geeraar wanaagii hadaad abid uguuxaysid
Waa inuu ku gaadhaa xanuun gaadha oogaduye
Inaad hadalka gaagaabsatoon ruuxba kaa garane
Galiilyoodayeey waa inaad hadal ku goysaaye

Sidii geesi hiilwaayey oo gacaladuu haystey
Iyo gabankii uu maali jiray ee uu garab joogay
Intay niman colaad goobayii waramo guudsaartey
Garbaduub intay hoos wadheen geedka dacalkiisa
Oo biri magaydii caruur gacaladii laayey
Kala guuray maalkuu lahaa guri ba weeyaane
Geeraar wanaagii hadaad abid uguuxaysid
Waa inuu ku gaadhaa xanuun geeskastow baxaye
Inaad hadalka gaagaabsatoon ruuxba kaa garane
Galiilyoodayeey waa inaad hadal ku goysaaye

Sida Calanka guudkeena sudhan ee aad garanaysid
Oo gayiga uu yeelan jiray lagu guboo qiiqay
Oo gobolkastaa goonidii dhibi u gaadhayso
Oon garan dhibtey soo wadiyo magacan guuraaya
Oo xabashi gaalihi damceen badahan guuxaaya
Geeskastaba ka eegoo wanaag laisku garan waaye
Markuu geedkastaa ololobay Guule baridaaye
Geeraar wanaagii hadaad abid uguuxaysid
Waa inuu ku gaadhaa xanuun gaadha oogaduye
Inaad hadalka gaagaabsatoon ruuxba kaa garane
Galiilyoodayeey waa inaad hadal ku goysaaye

Sida gaari wacanoo qurxoon oo lawada goobo
Oo guudka dabatoo indhuhu kaba go'ayn muuqa
Oon garan waxay damacsantahay gooni socodkeeda
Gadaa waxay guyaal sii wadaba way galaalaxane
Dhabankeedu goortuu gudhay garan wanaagiiye
Guurkana Ilaahbaa baxshee gaadhin calafkeedu
Oon gama an ladin oon lahayn gacal u yeedhyeedha
Geeraar wanaagii hadaad abid uguuxaysid
Waa inuu ku gaadhaa xanuun gaadha oogaduye
Inaad hadalka gaagaabsatoon ruuxba kaa garane
Galiilyoodayeey waa inaad hadal ku goysaaye

Sida ruux jacayl gubay naftii oonan garab haysan
Oo goorta uu garab yimaad ruuxu garanaayey
Nafta gucashadeediyo hamigu aanu kaba guurin
Oo hadalka guudmara markuu gacaladii eego
Hayeeshee indhaha galaclihiyo uurku gabanoobey
Inaad hadalka gaagaabsatoon ruuxba kaa garanin
Geeraar wanaagii hadaad abid u guuxaysid
Waa inuu ku gaadhaa xanuun gaadha oogaduye
Galiiyoodayeey waa inaad hadal ku goysaaye

Gundhiciyo ujeedada hadaan hoos ugarab raaco
Oon geeyo goluhuu lahaa lagu garqaadaayey
Walee gabayga aad sheegtey waa midho gobaadkiiye
Geeraar haboonbuu ahaa uunka wada gaadhye
Gobtii liicday oo soo kacdiyo waa garaad sare e
Waa gaax qarsoonayd murtida garabdhigeediiye
U galaashay odayada hortey gabayo waaweyne
Geeraar wanaagii hadaad abid u guuxaysid
Waa inuu ku gaadhaa xanuun gaadha oogaduye
Galiiyoodayeey waa inaad hadal ku goysaaye