QABRIGOOD DUN SOOMAALIDII !!  (Gabay)

Cumar C/nuur Nuux – Nabaddoon

omarabdinur@hotmail.com

Tixdaan gabayga ah waxay tilmaan cad ka bixineysaa heerka dadnima-xumada Soomaalidu gaartay. Iyagoo isdaawanaya ayey dunida deg deg uga suuli doonaan, eeddana bilow iyo dhammaad iyagaa iska leh. Qofkii gacantiisa isku gowraca cidna looma qisaaso(Cumar Nabaddoon 2007). 

1. Dad qabiil Ilaahood yahaan qiilba loo heline
2. Quraankiyo Sunnada ay bartaan kuma qashuucaane
3. Qalbigaa engegan oo malaha qiiro iyo dhiige
4. Quful baa ku jaban dhagaha oo waa qam maqalkiiye
5. Qabrigiin dun Soomaaliyeey qoon xun baa tahaye 
    
6. Qarannimadu waa wadajirkoo lagu quwoobaaye
7. Haddii qoloba qoladiinna kale malag u qooleyso
8. Oo cadow quruun dhaarsanaa hawl u qabanayso
9. Kolley qaylodhaan iyo mashxarad qoomamaa xigiye
10. Qabrigiin dun Soomaaliyeey qoon xun baa tahaye 
     
11. Qorigii Darwiishkee kufriga qiiqa uga keenay
12. Qaarkiin waxaad uga hadheen waa qabiil kale’e
13. Qarni iyo sannado baad xumihi weli qufaysaane
14. Maantana Shariif qiima laad gaal u qabateene
15. Qabrigiin dun Soomaaliyeey qoon xun baa tahaye 
     
16. Qalbigaan ka ooyaa sidaad wax u qorsheyseene
17. Qofkii iga danbeeyaa waa ogaan waxaan ka qiiroone
18. Qalqaalada waxaad ugu jirtaan qurun Amxaaraaye
19. Tigree qolof le weeyaan kuwaan qoosha kuu suraye
20. Qabrigiin dun Soomaaliyeey qoon xun baa tahaye 
     
21. Wixii qaari kaaruhu ku dilay quraca hoostiisa
22. Diyaaraad qummaatiga u kaca baaska qabadsiiyey
23. Sidii qadowga geedaha wixii ruux qombabay yaallay
24. Wixii Qamar hagoogilan Tigree qori ku jeexaayey
25. Ama qoys gablamay iyo agoon jiifka qaban weydey
26. Qaarkiin bishaarey u tahay lagu qaboobaaye
27. Oo qaran qabiil lagu sidkaad quud ka sugataane
28. Qabrigiin dun Soomaaliyeey quus ayaad tahaye 
     
29. Dagaal qaawan waa dhici jiriyo qaran la maagaaye
30. Qawleysatadu  waa jirtiyo dhuuni qaatuhuye
31. Hayeeshee dad wada qaaddan baan qaadan waanada’e
32. Qof yar iyo qof weyn  waxaad tihiin qolofti meygaage
33. Qashar dhuuxi laga miirtay baa qiimo kaa badane
34. Qabrigood dun Soomaalidii waa la quursadaye 
     
35. Qeyrkood ka hare iga Walloo waana loo qoraye
36. Qaaraddii madoobeyd malaha qaran sidoodaahe
37. Oo qosyba qoyskii xiguu mool u qodayaaye
38. Qaybiyoo u tali baa iyana loogu qiil dayaye
39. Qorshahana waxaa loo igmaday qolo Wayaanaahe
40. Qabrigood dun Soomaalidii waa la quursadaye
41. Qabrigood dun Soomaalidii waa la quursadaye 

                           Dhammaad 
Cumar C/nuur Nuux – Nabaddoon

omarabdinur@hotmail.com 

GABBAL DUMAY = DAGAAL OOGE (Gabay):waano ku socota dadweynaha Soomaaliyeed iyo digniin ..... Guji