Shariifoow Kala Daa
Shareecada Islaamka oo
la isku xukumo waa liibaan aduunyo iyo mid aakhiro. Ummada muslinkana sharaf iyo
cisi waxaa ugu danbeeyey markay shareecada Alle iska xooreen, oo ay ka
doorbideen mabaadiida kale ee dulmiga ku dhisan. Ummada Soomaaliyeed ee muslinka
ahna xal waaraa ugama horeeye qaadashada sharciga Alle ee cadaalada ku dhisan.
Abwaan Bacadle oo tilmaamaya arrinkaasna waxaa gabayadiisa ka mid ahaa.
HA QADARIN DIMOQORAADI WAA QOLO
AFKAARTOODE
SHUUCIYANA LAGA QUUSAYOO LAGU
QASAAROOWYE
QUBOO DAADSHA LABADABA WALAAN
LAGU QABOOBEYNA
QURAANKA IYO SUNAHA MUQADASKAA
QAATA XUKUNKOODA
Oday soomaaliyeed baa waxaa
laga sheegay aafadii Cilcadeeye qofkii soo gaarey oo la cadaabo waa doqon.
Hada dawlada UNku u soo wakiilatey Soomaaliya iyo xubnihii baarlamaanka ee
Imbigaati ayaa shareecada Islaamka isku xukumaya qofkii loogu sheekeeyo oo
rumeystaa waa doqon. Sababtuna maaha wax meel fog laga raadinayo; waayo raga la
leeyahay shareecaday ansixiyeen (Golaha Wasiirada) iyo kuwa la horgeyn doono si
ay u ogoladaan ama u diidaan (Baarlamaanka) in badan oo ka mida waxaa laga
yaabaa in shareecadu ku xukumayso in dhagax lagu dilo, la karbaasho ama
tacsiir kale lagu fuliyo; ee ma waxaa la rabaa in nalaka dhaadhiciyo waxaa
iimaankoodu gaarey sidii Asxaabtii suubaneyd Allaha ka raali noqdee ee oran
jirey Rasuul Aloow na daahiri. Mise ayaga qabanmeysee shacabkaa loogu talagalay?
Nin layaabay dhaqankii
Daraawiishta ayaa waxaa laga hayaa col Shariifi wacayso, caalim reera
dhacaaya, cilmi geel lagu qaado Casiiskii na abuurtoow cimri yuu ku simaa oo
ciribteeda ogaada. Hada shareecada Aadan Madoobe iyo qoladii ADC fadhiday la
weydiinayo tolow yaa ciribteeda ogaada. Nin isna la yaabey talo xumo tolkiis baa
waxaa laga sheegay wacade waxani hadey eex tahayna aakhiraa la ba’ay hadey
aqoon tahayna aduunkaa la ba’ay. Soomaalidu dulmigii ay horey u
gashay oo cadaabkani ka dhashay miyey rabtaa inay sii kororsato marka ay ku
jeesjeesayso shareecada Alle. Waxaa isweydiin leh hadii shareecada in wadanka
lagu xukumo uu baarlamaanku ansaxin waayo, go’aanka baarlamaanka xukuumada ma
yeeleysaa? Jawaabtu hadey haa tahay meesha belaayo hor leh iyo dulmi weyn baa ka
soo socdee garo. Hadiise ay jawaabtu maya tahay hade hay’ad aan go’aankeeda
la aqbaleyn hadaba maa la iska daayo wax weydiinteeda, mise waa riwaayad
shacabka Soomaaliyeed lagu maaweelinayo.
Madaxweyne Shariif ma iloowsan
yahay sababtii meesha loo keenay oo looga takhalusay rag badan oo looga
kalsoonaa? Gacantii qarsooneyd ee ka danbeysay soow maaha mida shareeca
iska dhaafe aan ogaleyn xataa muslim salaada si fiican u tukada. Ma ilowsan
yahay in daraadiis loo burburiyey dawladii ka horeysay? In daraadiis loogu
tuntuntey axdigii TFG? Ma ilowsan yahay xataa in daraadii loogu tuntey
heshiiskii garabkiisa iyo ay wada gaareen dawlada ku meelgaarka ah. Soomaalidu
waxay tiraahdaa geelu habeeda labada danbe waa ku lahaan jirey laakiin haduu
labada hore ku yeesho waa ged uu la yimid. Shareeco Reer Galbeed iyo cawaantood
la dagaalamayaan waan arki jirey; laakiin shareeco ay dhaqaalo ku bixinayaan oo
ay leeyihiin ciidamo daafaca haloo diro waa ged hor leh sharaxaadeedana u baahan.
Cajiib.
Nin magaalo shiikh iyo qaadi
labadaba ka ahaa ayaa maalintii danbe waxaa soo dul istaagay asagoo turub
ciyaaraya wiil ardadiisi ka mid ah; ardaygi oo ay isu qaban la’dahay shiikha
kitaab akhrintiisi iyo turub ciyaarkiisa ayaa yiri qaalalaahu tacaala iyo
qulaankaanu fas weeye isma qaadi karaane qaaliyoow kala daa. Madaxweyne
Shariif hakala daayo Beesha Caalamkaa I wadata iyo shareecadaan wax ku xukumayaa.
Maanta ummada Soomaaliyeed
waxay safka hore kaga jirtaa hadeysanba lambarka koowaad ahayn sifo kaste oo
taban. Waxaan lambarka koowaad ka nahay wadamada fashilmay, waxa aan lambarka
koowaad ka nahay musuqmaasuqa, waxaa nalaku naaneysaa caasimadi burcad badeeda.
Fakhriga, gaajada, caafimaad darada iyo biyo la’aanta. Taya xumada hogaamineed
iyo siyaasadeed waxa ay gaartey ilaa xad raga siyaasada lafagura ay
yiraahdaan markay wadan ama dal siyaasadiisa ka dayrinayaan; wadankaan hadaan
siyaasadiisa sidan laga deyn siyaasadiisu waa Soomaaliyoobeysaa- waxay
noqonaysaa waxaan meel laga bilaabo iyo meel loo raaco toona lahayn oo lagu
wareero. Dadka heerkoodu halkaa joogo iyo shareeco ku dhaqankeed masaafo dheer
baa u dhexeysa. waayo shareeco waxaa isku xukuma dadka aduunka ugu sharafka
badan uguna ilbaxsan.
Gunaanad
Cali Mahdi oo madaxweyne
Soomaaliya ka ah ayaa waxa uu ka hadlay arrimo dhowr oo ay ka mid tahay qadiyada
gooni isu taaga gobalada waqooyi, waxa uuna yiri Soomaaliya lama kala goyn karo.
Cali Mahdi marka uu saas leeyahay xaaladu waa ku xun tahay oo waxaa socda
dagaalki Muqdisho ee aadka u ba’anaa ee ay ku hardamayeen asaga iyo Caydiid.
Nin hadalkiisa dhageysanayey ayaa wuxuu yiri Cali Mahdiyoow intaadan waqooyi ka
hadlin bal Kaaraan Xamar ku dar. Hada Inshaa Allaah shareeco ku
dhaqankeed waan gaareynaaye, War bal sharafkii dadka Soomaaliyeed haloo soo
celiyo; shareecada dadkii lagu xukumi lahaa iyo kuwii wax ku xukumi lahaana hala
badbaadsho, dhiiga iyo dhaca joogtada ahna hala joojiyo.
Cabdiraxmaan Salad Aaden
Email: dhaguuf@hotmail.com
Afeef: Aragtida qoraalkan waxaa leh qoraaga ku saxiixan
 MAQAALLADA
KALE KA AKHRI HALKAN...GUJI....
Faafin: SomaliTalk.com | March
19, 2009 | 
Daabaco
Boggan | Print
