Marxuum Yaasiin - Allow kuu naxariiso
Waxaa argagax iyo lama filaan igu noqotay akhbaartii naxdinta
laheyd ee dilkii gudoomiyaha gobolka Karkaar Allaha u
naxariistee Marxuum Yaasiin Siciid Xuseen. Dil kasta oo loo
geysto qof bani’aadam ah oo aan waxba galabsan waa arin murugo
leh, balse dilka loo geysto madaxda iyo hogaamiyayaashu waa arin
niyadjab ku ah dhammaan bulshada una dhiganta dil loo geystey
bulshadaas idilkeed. Mida ugu sii naxdinta bandanna waa marka
dilkaasi loo geysto qof aad shakhsiyan isu taqaaneen wada
shaqeyseenna markhaatina aad ka tahay ruuxaas wanaagiisa.
Gudoomiye Yaasiin waxaanu isbaraney dhammaadki sanadkii
2005-ta markii loo magacaabey in uu noqdo Gudoomiyaha gobolka
Karkaar. Markaas oo aan anigu wadey howlihii u gargaarka
bulshadii ku waxyeeloobey Tsunaamigii. Gobolka ugu badan ee ay
howlaha Tsunamigu ka socdeen wuxuu ahaa gobolka Karkaar oo
labada degmo ee Bander Beyla iyo Xaafuunba ay ka tirsan yihiin.
Marxuum Yaasiin oo aan si wadajir ah doonyo ugu qeybineyno
bulshada reer Xaafuun
Waxaan aad u xusuustaa kulankayagii ugu horeeyey ee Gudoomiye
Yaasiin. Mudo yar markii uu kulanku socdey ayaa waxaa ii soo
baxdey in uu yahay Gudoomiye ka duwan gudoomiyayaashii aan horey
u arki jirey. Wuxuu aad uga warqabey xaalada gobolkiisa. Waxaa u
cadeyd sida ay ukala mudan yihiin howlaha horyaala ee gobolka
markaas loo dhiibey. Wuxuu ahaa gudoomiyaha keliya ee iila
yimaada qoraal iyo warbixin tafatiran ee xaalada gobolka iyo
sida uu u doonayo in loo garab qabto. Yaasiin aad ayey ugu
cadeyd baaxadda dhibaatada iyo tabardarida gobolkiisa maadaama
gobolka Karkaar uu ahaa gobolka ugu cusub ee Puntland.
Waxaanan marnaba hilmaameyn hadalkii uu markaa igu yiri ee
ahaa ‘walaalow Nuuradiinow waxaan doonayaa in aad i gacan
qabatid. Howlaha aan kaaga faradhuudhuubanahay ee bulshada kala
dhex-galkoodana ii dir”. Yaasiin wuxuu ahaa nin adag, howl kar
ah, u adeegida bulshaduna ay dhab ka tahay. Markii aan weydiiyey
sabata ku kaliftey in uu jagada gudoomiyanimada qabtana waxaa uu
Yaasiin Allaha u naxariistee ii sheegey in uu doonayo in uu
dadka u adeego, dhaqaalana ka dooneyn oo Yaasiin wuxuu magaalada
Qardho ku lahaa beer iyo geel si wanaagsan loo xanaaneeyo oo uu
masaariiftiisa ka soo saarto. Wuxuu ahaa nin isku fillan.
Marxuum Yaasiin oo aan guryo wada gudoonsiineyno bulshada
reer Xaafuun
Sidoo kale Gudoomiye Yaasiin wuxuu ahaa nin ahlu-diin ah.
Wuxuu iiga sheekeeyey dhibka uu bulshada uu u adeegayo ku qabo
iyo sida keliya ee uu ugu adeegi karo asagoon dadka la tirsan ay
tahay in uu is xusuusiyo aayad Quraanka ku taala oo aheyd (Laa
nuriidu minkum jazaa’an walaa shukuuran) oo macnaheedu yahay in
uusan dadka ka dooneyn abaal iyo mahad naq toona balse uu dar
Ilaahey ugu adeegayo.
Kulankaasi aad ayuu ii taabtey. Yaasiin waxaa uu noqdey
gudoomiyaha aan isugu dhownahay runtiina aad iyo aad ayuu iila
shaqeeyey umada reer Karkaarna ugu adeegey. Waxaan yaasiin wada
galey safarro badan, waxaan wada xalliney dhibaatooyin badan oo
la soo deristay howlihii Tsunaamiga. Yaasiin waxaa uu Ilaahey
siiyey hibo uu ku xaliyo mushkiladaha isfaham la’aanta ah oo
wuxuu ahaa nin aftahan ah dadkuna ay u soo istaagaan.
Marxuum Yaasiin wuxuu garab weyn naga siinjirey habsami u
socodka howlaha gargaarka
Marxuum Yaasiin waxaa iigu danbeysey bishii Janaayo ee
sanadkan 2009. Waxaa uu igu soo booqdey doorashadii ka dib
aqalka aan ka deganaa magaalada Garoowe. Waxaa ay markaasi wada
socdeen Gudomiyaha gobolka Bari Mudane Musse Geele. Labada
Gudoomiyaba waxey markaasi iigu hanbalyeynayeen dorashada iyo
sida ay Murashaxiintu uga qaateen dowr taariikhi ah oo si
nabadgelya ah isbedel siyaasadeed lagu keeney. Waxaan filayaa in
ay dhammaan murashaxiintii tartameyseyna ay sidaas oo kale usoo
booqdeen uguna tahniyadeynayeen.
Waxaan aad u xusuustaa sida ay firfircoonida iyo nashaadka
nololeedba uga muuqdeen habeenkaas. Maantana waxaa uu Marxuum
Yaasiin u hoydey aakhiro waana xaalka aduunyada oo Ilaahey oo
keliya ayaa baaqi noqon doona. Balse waxaa qofka lagu xusuustaa
waxa uu bulshadiisa u qabtey ugana tagey.
Waxaan geerida ku timid Marxuum Yaasiin uga tacsiyeynayaa
dhammaan dadka reer Puntland oo dhammaanteen ayuu inaga
geeriyoodey. Waxaan si gaar ahna ugu tacsiyeynayaa eheladii iyo
qoyskii uu ka geeriyoodey. Samir iyo iimaan Ilaahey ha inaga
siiyo
Marxuum Yaasiina dunidana waxaan ku xusuusaneynaa sida uu
dadkiisa ugu adeegey. Aakhirana waxaan Ilaahey uga baryeynaa in
uu ajar iyo xasanaadba ugu badelo sida ay isaguba niyadiisu
aheyd uuna Ilahey ka rajeyn jirey. Aamiin.
Nuuradiin Aadan Diiriye.
nuradin.dirie@googlemail.com