Shirkii ugu horeeyay Ururka dib u xoreynta iyo turxaan bixinta Isboortiga
Soomaaliyeed oo lagu qabtey magaalada London isla markaana laga soo saarey War
Saxaafadeed Sport
Waxaa habeenimadii Jimcaha taariikhduna ahayd 3 April 2009 lagu qabtey magaalada
London xaafada Wembley Park, shir ay isugu yimaadeen Bahda Isboortiga
Soomaaliyeed ee ku dhaqan dalka Ingiriiska isla markaana wada ka tirsan Ururka
dib u xoreynta iyo turxaan bixinta Isboortiga Soomaaliyeed, shirka ayaa looga
doodayay arimo badan oo ku saabsan xaalada Isboortiga dalka Soomaaliya maanta
iyo sidii aan marnaba looga aamusnaan karin maamul xumida iyo masuqmaasuqa
baahsan ee ka socda GOS iyo xiriirada hoos yimaada, kuwaas oo ku guuldareystey
inay isboortiga Soomaaliyeed gaarsiiyaan ama ku baahiyaan dhamaan dalka
Soomaaliya.
Waxaana shirkaan ka soo qayb galay dad magac iyo sharaf ku leh Isboortigii
Soomaaliyeed, hadii ay ahaan lahaayeen ciyaartooydii hore Xulka Qaranka
Soomaaliya wiilal iyo gabdho sida Kubadda Cagta iyo Kubadda Kolayga, Macalimiin
Sport, Aqoonyahano, Siyaasiyiin, Taageerayaal iyo bahda Saxaafada Isboortiga
Soomaaliyeed, waxaana ka mid ahaa dadkii ka soo qayb galay isla markaana ka
hadlay :
1. Xildhibaan Mohamed Cali Bilaal.
2. Macalin Xasan Farah ''John'' Macalin Kooxda ENC & Xulka Gabdhaha Qaranka
Soomaaliya''
3. Dr. C/raxmaan Cunaaye. '' Dr Sports iyo taageero kooxda Jeenyo LLPP''
4. Mohamed Ismail Cali '' Kooxda Horseed iyo Xulka Qaranka Soomaaliya''.
5. Mohamed Sheekh Cabdi '' Kooxda Jeenyo LLPP & Badda''
6. Safiyo Mohamud Gudaal '' Safiyo Neero'' Kooxda Somali Fruit''. Macalimad
Kooxda Gabdhaha basketball Soomaalida London.
7. Cabdi Nur Cali Rooble '' Goolhaye Kooxda kubadda cagta Muqdisho''.
8. Shukri Dhalbaas '' Kooxda kubadda kolayga Muqdisho''. macalimad kooxda
gabdhaha basketball SoomaalidaNorthampton.
9. Siciid Xuseen Ceyroow '' Kooxda Kubadda cagta Horseed iyo Xulka Qaranka
Soomaaliya
10. Bakiin Maaxi '' Kooxda Jeenyo LLPP''.
11 Mahad Ahmed Tagow '' Ex kooxda Elman''.
12. Liibaan Ahmed Mohamud '' Taageere Isboorti''
13. C/laahi Xasan '' Taageere Isboorti''
14. Yusuf Mohamed Abdi Yusuf '' Sport Media Editor''.
iyo qaar kale oo badan
Shirkaan oo ahaa kii ugu horeeyay oo noociisa ah ee lagu qabtey dalka Dibadiisa
isla markaana ujeedada loo qabtey ahayd in aragti midaysan laga qaato qaabka loo
wajihi karo ama sidii loo turxaan bixin lahaa Isboortiga Soomaaliya khaladka
weyn ee ku dhex jira jira,hadii ay ahaan lahayn sixida maamulka, dib u habaynta
Isboortiga iyo sidii dalka oo dhan loo garsiin lahaa isboortiga . sida tuulo,
degmo ilaa Gobal.
Dhamaan dadkii ka soo qayb galay shirakan ayaa dhamaantood iska wada aragti ahaa
in maamulka Isboortiga dalka gacanta Dowlada Soomaaliyeed lagu soo celiyo isla
markaana ku nuux nuuxsaday in Isboortigu yahay kan kaliya ee midayn kara umadda
Soomaaliyeed balse aad moodo in maanta u marayo meeshii ugu hoosaysay taariikhda
Isboortiga Soomaaliyeed, madaama Isboortigii la dhax keenay wax ka duwan
ujeedooyinkii loo aasaasay Isboortiga sida musuqmaasuq, eex, qabyaalad, nin
jeclaysi, xilal boobid, iska horkeen iyo boobka hantida lagu soo qaato in
isboortiga dalka lagu horumarinaayo, waana arinka ugu weyn ay dhamaantood ay ka
wada midaysnaayeen bahda Isboortiga ee madasha ka hadlay.
Waxayna cod dheer ku sheegayeen inaysan ogalaan karin in isboortiga la soo dhax
galiyo qabyaalad iyo musuqmaasuq, sidaa daraadeedna bahda Isboortigu yihiin
dadka madax banaan Qabyaalad iyo masuqmaasuqa isla markaana loo baahan yahay in
jiilka cusub loo horseedo wado xalaal ah oo ku dhisan isboorti jacayl iyo
wadaniyad Soomaaliyeed.
War- saxaafadeedka laga soo saarey shirka Ururka dib u xoreynta iyo turxaan
bixinta Isboortiga Soomaaliyeed waxa u qornaa sidatan:
1: Waxaan taageeraynaa dadaalada nabada ee Dowlada Midnimo Qaran, isla markaana
ka codsanaynaa in Sport uu la jaanqaado dib u dhiska dalka Soomaaliya.
2: Waxaan taageeraynaa fikirka cusub ee Wasiirka Isboortiga iyo Dhalinyarada
Soomaaliya mudane Saleebaan Colaad Rooble isla markaana waxaan balan qaadaynaa
inaan qayb ka noqono taageerida ciyaartooydii hore dalka Soomaaliya ee ku
dhibaataysan gudaha dalka iyo sidii Isboortiga dalka loo soo hoos gayn lahaa
Wasaarada, si meesha looga saaro musuqmaasuqa, is barbaryaaca iyo khilaafaadka
jira.
3: Waxaan taageeraynaa cid kasto oo dadaal ugu jirto sidii Isboortiga
Soomaaliyeed loo horumarin lahaa gudaha iyo dibadaba.
4: Waxaan soo jeedinaynaa in tixgalin la siiyo turxaan bixinta iyo dib qaabaynta
maamulka isboortiga Soomaaliyeed.
5: Waxaan cod dheer ku sheegaynaa in isboortiga la gaarsiiyo dhamaan dalka
Soomaaliya isla markaana lagu baahiyo Tuulo, Degmo ilaa Gobal.
6. Waxaan soo jeedinaynaa in ciyaartooydii hore dalka Soomaaliya mudnaan iyo
tixgalin laga siiyo talada iyo maamulida Isboortiga dalka, isla markaana dadka
aqoonta hore iyo kuwa cusuba leh lagu soo daro maamulka guud ee Isboortiga
dalka.
7: Waxaan ugu baaqaynaa bahda Isboortiga Soomaaliyeed ee gudaha iyo dibada inay
gacmaha is qabsadaan isla markaana u soo jeestaan sidii Isboortriga Soomaaliyeed
loo soo noolayn lahaa.
8: Waxaan cambaaraynaa hadalkii ka soo yeeray masuul ka tirsan GOS , masuulkaas
oo meel uga dhacay dadkii fikirkooda ka dhiibtey doorashada GOS ee lagu qabtey
dalka Jabuuti. isla markaana ka codsanaynaa inuu raali galin buuxdo oo deg deg
ka bixiyo hanjaabadii iyo aflagaadii uu ka siidayay Radio Ceelbuurnet aaqirkii
Bishii Maarso 2009.
Ugu dambayntiina waxaan dhamaanteen jecel nahay inaan la soo dhaxgalinin
isboortiga sidiisaba eex, qabyaalad, xilal raadin, musuqmaasuq, shaqsi jaclaysi,
urur ku dhisan is kooxaysi iyo is xijin isla markaana isboorrtigu u noqdo mid
umadda ka wada dhaxeeyo oo mid ah isla markaana iskuna keena umadda Soomaaliyeed
kaasoo ka shaqeeya nabadaynteeda iyo dib u heshiisiinta dadkeena Soomaaliyeed.
Dhamaad mahadsanidiin
W/D: Yusuf Yusuf
Sports Editor & SSPAMEDIA
mrsomalia@hotmail.com
London
Faafin: SomaliTalk.com | April 6, 2009 |
Daabaco
Boggan | Print
