Isku-aadka Dagaalka Muqdisho oo la soo Bandhigey

W/D: Amiin Yuusuf Khasaaro

E-Mail amiinkhasaaro@hotmail.com

Muqdisho, Soomaaliya

Tan iyo markii ay bilowdeen dagaalada ka socda Koonfurta Soomaaliya ee u dhexeeya Ciidamada Itoobiya iyo Dowladda Federaalka oo dhinac ah iyo kooxaha ka soo horjeeda ayaa waxa uu soo maray marxalado kala duwan, inkastoo dadweynuhu ay si aad ah uga walwalsan yihiin dagaaladaasi, ayna ku waraareen haddana waxaad moodaa in xiliyadaan dambe ay isku aadka dagaalka soo fahmayaan, waxaana maqlaysaa koox dad ah oo sheekeysanaya lehna “Isku-aadku waa sidee, oo Caawa yaa kulmaya”, waxayna dadka oo waayo-aragnimadooda dhanka dagaalada soo noqnoqday ee Muqdisho ka faa’iideysanaya saadaaliyaan sida ay kulamadu u dhacayaan oo ay dhinacyadu isugu aadayaan. mid ayaa la soo boodaya oo dhahaya “Caawa kulan adag ayaa jira”, Qaarba durbadiiba ka naxa balse yaa isku aadan baa loogu celiyey ?, “ Isku Aadku Caawa waxa uu noqonayaa Midowga Maxaakiimta Vs Itoobiya”, inta madaxa gacmaha la saaro ayaa la wada qirayaa in uu kulankaasi yahay mid culus, balse qaar kale ayaa qaba in ay kulankaasi daawan karaan iyagoo ula jeeda in ay ka fog yihiin garoonka ay ka dhaceyso cayaartaasi, balse dadweynaha u dhow garoonka cayaartu ka dhaceyso ma ahan kuwa daawanaya cayaartaasi taa bedelkeedase waxay ku maqshquulsan yihiin sidii ay uga gamban lahaayeen Hardanka Garoonka.

Qaababka Isku-aadku u dhaco ayaa dadka oo in badan goob joog u ah , waxayna ku saleeyeen in ay sidaan kulamadu u dhici karaan.

Uganda Vs Al-Shabaab
Midowga M. Vs Itoobiya
Uganda Vs Raas-Kambooni
TFG Vs Jabha Islaamiya
Uganda Vs Midowga Maxaakiimta
Al-Shabaab Vs Itoobiya
Raas Kam. Vs TFG
TFG Vs Midowga Maxaakiimta.
Al-Shabaab Vs TFG
Raas. Kam. Vs Itoobiya.
Burundi Vs ………..

Kulamadaan waa Kulamo aad u dhibaato badan oo aan lahayn wax waqti ah balse waa ku soo boodo, taasina waxaa aad uga walwalsan shacabka oo iyagu inta badan doonaya in ay isku aadka la socdaan si ay uga tabaabusheestaan.

Inta badan kooxahaan way is wada arkeen marka laga reebo Burundi, oo iyadu mar qura jug culus la gaarsiiyey, waxayna ku jirtaa difaac.

Kulamadii ugu dambeeyey haddii aan wax ka sheegno, waxay dhex mareen Al-Shabaab Vs Uganda, waxa uuna kulankaasi ahaa mid adag oo sababay in ay dadweyne fara badani garoonka ka baxaan si ay kaga fakadaan hardanka labada kooxdood, markii uu dhamaaday kulankaasi ayay dadweynuhu waxay isla dhex mareen “Wellee xalay kulan dhacay, qaarkood waxay leeyihiin waxa uu ku dhamaaday barbar-dhac halka kuwo kalana ay leeyihiin waxaa 1-0 ku bediyey Al-Shabaab, waxa uuna kulankaani ka dhacay Guriga Uganda, waxaana Uganda looga fadhiyaa in ay Guriga Al-Shabaab aado, balse Kabtankooda ayaa yiri “Anagu ma tagi karno Guriga Al-Shabaab” waxaana la weydiiyey sababta waxa uuna ku jawaabay “No Comment” , balse markiiba waxaa la isweydiiyey kulanka xiga, mid dadweynaha ka mid ah ayaa qiyaasaya kulanka xigga, waxa uuna yiri “Caawa waxaa wada kulmaya Midowga Maxaakiimta Vs Itoobiya”.

Wax la wada sugo waxaa laga war helay isla garoonka Uganda iyadoo la isku herdinayo, lafaha ayaana la iska jebiyay, waxa uuna ahaa kulankii ugu adkaa oo xasuusta dadka ka go’in, waxaana cayaartii markii ay dhamaatay la isla dhex maray labada kooxood ee xalay cayaartay waxayna dadka qaar sheegeen in kulankii xalay dhex maray Uganda Vs Midowga Maxaakiimta, balse waxaa dib laga ogaaday in xalay Uganda ay la cayaartay koox cusub oo lagu magacaabo Raas-Kambooni, waxayna dadku isweydiiyaan kooxdaan cusub, mid ka mid ah dadkii ayaa soo booday oo yiri “Waan aqaan kooxdaan oo Seria C ayay ahayd”, mid kale ayaa ugu jawaabay “Haddii Seria C ahayd kolleyba xalay waxay noqotay Seria A, Dabyar ma shideyn waxayna dooneysaa in ay hogaamiso Horyaalka”.

Kooxda Raas Kambooni waxay haddana foodda is dareen koox ka socotay TFG oo horyaalka uga jirtay kaalmaha hoose, waxay shacabku sheegeen in kulankaasi ahaa mid 1-0 ku badisay kooxda Raas-kambooni, inkastoo TFG-da markii ay dambe ay cayaartooy ka heleen Itoobiya waxaana la isweydaarsaday darbado kulkulul oo ay waxyeelo ka soo gaartay dad rayid ah.

Kooxda Uganada ayaa iyadu ka walwalsan Cayaartooy la’aan haysa kadib markii laga xiray garoonkii ay cayaartooydu uga soo degi jirtay, waxayna codsaneysaa in kulamada dib loogu dhigo, hase yeeshee Kooxda Al-Shabaab ayaa diidan dib u dhigistaas, waxayna ku doodeysaa in kulamada la joogteeyo.

Inkastoo Isku-aadku sidaa yahay, oo shacabku fahmeen haddana waxay ku wareersan yihiin xiliga la cayaarayo, iyadoo codsanaya in ay isku-aadka loogu daro waqtigiisa si ay u dabaabusheestaan oo aysan dhibaato ka soo gaarin.
W/D Amiin Yuusuf Khasaaro

E-Mail amiinkhasaaro@hotmail.com

U Coddeey Caseeyaasha: Duruufaha soo wajahay Carruurta Caseeyaasha Akhri....

Faafin: SomaliTalk.com |  Sept 28, 2008