Shaybka oo 14 Xubnood Heysta iyo Sheekhii oo 275 Heysta
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed korkiisa ha
ahaato.
Korneylku 14 xubnood oo uu Harti ka soo xushay buu wataa halka Sheekh
Shariif marka laga tago dhowrka Harti Abgaal helay wuxuu hagayaa 275
xubnood oo cusub! Sheekadii Shimbiraale, Ashahaado-la-dirirnimo iyo
Tigree-soo-gelin waxba keeni weyday. Xubnaha Sheekhu wato waxay ku
laablaabmaan kuwa sheybka ku dhowaad labaatan jeer! Ma garanayo waxa
qeybintaas lagu saleeyey. Bush iyo Zenawi ma waxay la mid noqdeen
odeygii inta arkey dhallinyaro kubbad ciyaareysa la yaabay wiilasha
tirada badan ee hal banooni isku ceyrsanaya dabadeedna yiri meey 22
kubbadood siiyaan si midba hal banooni u ceyrsado! Mise cadowgu kas buu
u yeelayaa oo wuxuu rabaa inuu shacabka Soomaaliyeed isku diro? Ama
maraqii la oran jiray suubbaleyn (Soup Plain/Plain Soup) oo laga yiri:
suubbaleyn ma maraq baa? Waa maraqii makhaayadaha muufada oo inta lafo
geel ama lo’aad fuusto gobollo lagu rido oo biyo iyo milix lagu daro
dabka la saarijiray. Mar kasta oo fuustadu is dhinto lagu shubijiray
tanag biyo ah iyo milix. Caawa oo dhan waxaas baa dadka loo qeybinayaa
si muufada loogu qooyo. Tayo maraq lama fiirineyn ee waxaa la rabay wax
muufada qooya. Marka adigaa la rabaa inaad suqaar, macsaro iyo moos ku
darsato ama haddaad dan yar tahay cusbo iyo biyahaa Ilaah kuu calfo.
Marka xildhibaannadu ma sidii bey noqdeen?
Waa nimankii Sheybku dacaayadeyn jiray qaarkood waxa shirka Jibuuti
sutida u haya oo hadda ka hadlaya waqti la fariisinayo baarlamaanka
cusub. Ma laga yaabaa in arrintaas cibroqaadasho noo noqoto si aan mar
dambe qof diinta loogu dacaayadeyn. Waxa dhibka wada diin Islaam maaha
ee waa dadkeenna Soomaaliyeed. Fiicnaan lahaydaa haddii Sheybku dadka
wax kale ku dacaayadeyn lahaa.
Xildhibaannadii hore qabiil baa wax lagu saleeyey oo 4.5 baa wax lagu
qeybsaday laakiin ilaa hadda ma garanayo qabiilka qeybsanaya 275-ta.
Labo qabiil baa mar horaba la shaaciyey – ganacsato iyo garabka Jibuuti.
Qabiilka ama kooxda laga tirada badan yahay 0.5 wax ku qeybsaneysa ma
garanayo. Haddii la yiraahdo 275 dambe laguma dhisin qaab qabiil waxaa
soo baxeysa baarlamaankii kala-kaanka ahaa ee ugu horreeyey ee abid la
sameeyo! Baarlamaannada ama doorashaa lagu soo galaa ama qof baa si kale
ku soo xula laakiin horay looma arag kala-duwanaanta soo socota. Haddii
la dhaho Islaax 1 bey leeyihiin, Aalu Sheekhna 1, As-Salafiyana 1,
Suufiyana 1; halka Al-Itixaad la siinayo 0.5!
Waxaa noogu dambeysay iyadoo wadaadada ragga laga sooco laakiin hadda
Sheekhu wuxuu la qeyb noqday Soomaali oo dhan. Soomaali oo dhan 275
xubnood halka isaguna helay 275. Qamiiskii iyo koofidiisii waa qabaa.
Markuu khudbeynayana Xamdi Ilaah buu ku furfurtaa! Soomaalaay Sheekhu ma
lacagta doolarka ah buu ka arkay “ in God we trust?” Marka Sheekhu
isagoon diinta dacaayadeyn buu Bush iyo Zenawi wax la qeybsaday. Runtii
haddii adoon diin caayin jago la heli karo; maxaa dadka qaarkood ku
kallifay iney dacaayadeeyaan diinta iyo dadkeeda?
Shariifka iyo kooxdiisu mar horaba waxay sheegeen iney madaxweyne iyo
dowlad cusub la dhisayo Jannaayo 2009. Waxay kaloo sheegeen waqtiga
baarlamaanka cusubi fariisan doono halka uusan korneylku weli waxba
oran. Marka soow guuldarro uma aha haddii korneylka sidaas siyaasadda
looga galbiyo isagoo looga badiyey 20:0 (labaatan iyo eber. 20 x 14
xubnood = 280 xubnood) waa u ceeb iyo hoog.
Shariifka iyo saaxibbadiis maxay ka dheefayaan ku biiridda baarlamaan
horay fadhiid u ahaa? Ma filayo iney ka dheefayaan waxaan ceeb ahayn iyo
arrimahan soo socda:
- Waxaa loo jeexay waddadii Carta iyo Mbagathi.
- Waxaa wax lagu qeybsaday qabiil marka waa “barakeeyeen”
qabiilkii.
- Waxay xildhibaannadii u kala qeybsheen kuwo qabiil iyo kuwo
“wadaado-diimeed-qabiil” oon horay loo arag ileyn waagii wadaadada
keliya ahaayeen waxay dhihi jireen wax qabiil lagu qeybshay shuqul
kuma laha.
- Kuwii horaba wax keeni waaye marka in la dhimo bey ahayde ma
ahayn in la badsho.
- Bakhti-afuuf dowlad aan jirin iyadoo cadow ku shaqeysanayo.
- dagaal qabiil oo laga baqayo iyagoo ummaddii qabiil iskaga
horkeenaya.
- Culumadii ooy ceebeeyeen. Dad badan oo kuwaas culumo u qaba
darteed.
- Dadkoo arkaya iney u halgamayeen hunguri iyo jago.
Ma garanayo wax kale oon ku mitaalo sheekh Shariif oon ka ahayn sheeko
xariir ku taalay buugta Afsoomaaliga. Waxaa la sheegaa inuu libaax duq
ahi bukooday oo uu awoodi waayey inuu ugaarsado. Maalintii dambe buu
dawaco la tashay oo yiri maxaan sameynaa? Dawacadii waxay tiri anaa kuu
soo qoolgelinaya habar duug iyo duurjoogta oo dhan oo waxaan mid kasta
ku leeyahay waxaa ku casuumay oo kuu yeeray libaaxaas gaboobay oo raba
inuu madax idiin ka dhigo deegaanka. Wixii midba mar ay soo qoolgelisaba
waxaa u dambeeyey dameer. Dameerkii markuu godka sii galayey ayaa
libaaxii duqa ahaa is heynwaayey oo sugi waayey intuu si fiican usoo
galayo dabadeedna labada dhegood buu goostay dameerkii. Dameerkii oo
dhiig ka da’ayo baa dib usoo booday oo u yimid dawacadii oo yiri naa
inkaar kugu dhacdaye maxaad saas iigu geshay? Dawacadii waxay tiri: ma
kaa dhab baa? Wuxuu libaaxu rabay inuu kuu gesho taajka madaxnimada
marka adaa madaxa la soo booday ee orodoo ku noqo! Sidii baa dameerkii
madax madax isku tuuray godkii libaaxa isagoo taaj raadinaya! Marka
sheekh Shariif oo ogaa wixii Bush iyo Zenawi ku sameeyeen dadkii uu
xukumay ilaa xataa ay xasuuqaan reer miyi badan iyo xoolahoodii inuu
maanta Zenawi oo ku dhiiqday arrinta Soomaaliya uu jago ugu soo fariisto
waa ku khaldanyahay. Shakina iigama jiro in sida dameerkaas loo quudan
doono markuu madax madax isu tuuro ileyn hadda meeluu ka noqdo ma
joogee. Soow madaxda Itoobiya oo khudbeyneysa ma hor fariisan? Jendayi
Frazer oo dawacada u dhiganta baa waaleysa ood mooddo iney sheekha ku
leedahay wixii gantaalo diyaaradaha Maraykanku tuurayeen waxay ahayd
hubka wax ifiya marka aday kaa goobayeen keymaha si Nayroobi laguu keeno
oo madaxda lagaaga dhigee ee uma socon iney dad Soomaaliyeed laayaan!
Sidoo kale shacabka Puntland ee maanta C/hi Yuusuf Garoowe ku soo
dhoweynayoow haddee waxaad beerateen waad guraneysaan. Maxaa ka hirgalay
sheekhadiisii? Kismaayaan idiin keenin? Laascaano baan idiin hayn?
Idinkaa dowladda badsanaya? Marka hadda waxaaba soo baxday in ninkii
C/hi ka soo horjeesta uu macaashayo sida qolyaha Jibuuti jooga. C/hi iyo
odayaasha Harti wiilashoodii diinta yaqaanay waxay ka dhigeen waxay
laayaan, waxay buuraha iy duurka u direen iyo waxay 24 saac dacaayad ku
hayaan halka Axmed Diiriye iyo Odayaasha Hawiye ay sharfeen wiilashooda
kuwa Muqaawamada ah iyo kuwooda Jibuuti jooga ee shirarka Zenawi ka
dhexmuuqdeyba.
Maaddaama Sheybkii arrintii Shimbiraale iyo Tigree-soo-gelin wax ku
keeniwaayey waxaanan garaneyn waxa sheekh Shariif iyo xertiisu ugu
dabomareen iyo waxa ay ka keeni doonaan! Mise Sheybku ma aqoon sida
shisheeyaha loola hadlo marka idinkaa shabaab ah oo ka lib keenaya?
Marka sida dhaqaalihii adduunka hoos ugu dhacay ayaa xildhibaannadii
waxaa ku dhacay sicir-barar oo waxaa la kordhiyey 100%.
C/Waaxid C/hi Khaliif
London, UK
cabdulwaxid@hotmail.com
Qoraalkii hore ee C/waaxid:
Maxkamadihii oo
Aqalkii Ilaahay ka Tagay oo Aaday Aqalka Cad!.. Akhri..
Faafin: SomaliTalk.com | Nov 28, 2008 |