Muqaawamo: Rabbiga Caalamka; Shariif: Beesha Caalamka
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed korkiisa ha
ahaato.
Waxaan leeyahay dhammaan shacabka Soomaaliyeed Ciid Mubaarak. Waxaan
Ilaah ka baryayaa in sanadankan kiisa kale aan gaarno waddankoo xor ah
oo la isku maamulayo diinta Ilaah.
ALLAAHU AKBAR. Soomaalidu waxay tiraahdaa: Ilaahayna la kala baryi
og, hadalna la kala oran og. Ilaah baan idin ku dhaarshee isu fiiriya
labadaas oraah. Dadka maqaalka akhrinayoow yaad ku xiran lahayd labadaas
garab – Rabbiga Caalamka ama Beesha Caalamka? Sheekh Shariif isaga waxaa
afkiisa laga kari la’yahay Beesha Caalamka. Waa ninka Jendayi Frazer,
Axmed Walad Cabdalla iyo Sirdoonka Maraykana waxay dhahaanna ku
qanacsan; halka uu diiday bayaankii ay Culimada Soomaaliyeed soo
saareen.
Anigu in wiilka qumayo qaadday mar horaan gartay. Waa markaan
la
simay Xasan Turaabi iyo dadka la midka ah ee waxyaalo badan oo Islaamku
qabo ku tilmaamay xikmad-darro. Soow hadda sheekh Shariif ma laha
culumadu waxay sheegeyso diinta iyo siyaasadda midna ma waafaqsana!
Cod uu furto waxaa sheekh Shariif ugu horreysay markii Aadan Cayroow
la dilay. Waxay u egtahay in sirdoonka Maraykanka iyo Tigreegu ku
dhaheen waxaan leyneynaa xagjirka marka adaa talada Muqaawamada lagu
dhiibayaa. Haddii hadalkaas uu dhihi lahaa Rabbiga Caalamka waa meel
mari lahaa laakiin Beesha Caalamku ma meel marisay ballanqaadkii loo
sameeyey Shariifka? Teeda kale ma cid aan Ilaah ahayn baa wax dili karta
ama nooleyn karta?! Marka in kastoo cilmaaniyiin la shaqeysa Shariifka
sida Shariifkii Baarlamaanka, Cumar Xaashi iyo kuwo kalaba isku dayeen
iney kala qeybiyaan Muqaawamada iyagoo ilaa xad ku guuleystay laakiin
Rabbigii Caalamka ayaa arrintaas aan weli suurtagelin. Mar horaba niman
diin lagu tuhmayey ayaa ka soo cararay safkii Jibuuti waxaana ka mid ah
Abuu Dujaana. Kuwo kalana waa la filayaa haddii Ilaah idmo.
Waxaa la sheegayaa in wafti ka socday Shariifka oo ka soo degay
Jowhar dib loo ceshay. Haddii arrintaasu caddaato waxaad arkeysaa in
sida Rabbiga Caalamku rabo wax u socdaan. Nimanka Shariifku khalday
kulligood laguma tuhmayo iney Beesha Caalamka jecelyihiin oo ka
hormariyaan Rabbiga Caalamka ee si kale baa loo khalday iyagoo lagu yiri
halkaan bey nabaddu ka dhowdahay.
Haddii bayaankii culumada kaddib uu qof diin sheegan jiray isku
dhejiyo sheekh Shariif waxaa muuqaneysa iney isaga la mid yihiin oo
diideen dantii culumada iyo tii shacabka Soomaaliyeed. Waa arrintaas
waxa shacabka Soomaaliyeed intooda badan u taageereen Muqaawamada.
Tigreegii dadka qaarkood ku sheegi jireen iney walaalo yihiin oo
waddanka u qabanayaan ayaa hadda isla dadkaasi leeyihiin Tigreegu waa
gumeysi! Waa markii sidii la rabay laga waayey. Hadda sheekh Shariif
wuxuu ku hayaa: walaalayaaloow, Tigree naga baxa! Taasi waxay ku
tusineysaa sida uu siyaasadda uga maranyahay. Waxay u dhowdahay in
Tigreegu inta ay maaweelinayaan Shariifka iyo shacabka Soomaaliyeed ay
isu diyaarinayaan iney weerar ku qaadan Shabeellaha Hoose, Jubbada Dhexe
iyo Jubbada Hoose haddaan Rabbiga Caalamku qaban. Laakiin wiilkaasi
wuxuu ku fiicnaa inuu ardada Soomaaliyeed Juqraafi u dhigo ee ma ahayn
inuu laba qof uu maamulo.
Walaalayaaloow dad badan oo culumo sheeganaya raqiisanaa! Huteelo la
seexiyey iyo xoogaa doolar ah baa ka dhigay iney haweeneydii Frazer
ahaydna waxay tiraahdo aqbalaan waxa culumadu tiraahdana diidaan. Waxaa
la siiyey lacag waa hore laga baxay (275 xubnood) oo aanan garaneyn
meeshey ku qeybsanayaan, cidda qeybineysa iyo sida loo qeybsanayo.
Wataas mar horababa la leeyahay reer Jowhar waa diideen wafdi ka socda
Shariifka. Jowhar waa la ceebeeyey markii nimankii C/hi, Cabdi Qeybdiid
iyo Darwiish la fariistay lagu soo dhoweeyey Jowhar laakiin hadday
ceebta iska meyraan oo mar dambe aysan Shariifka iyo wax la mid ah u
ogolaan Jowhar waa arrin soo-dhoweyn mudan.
Halka Shariifku ku hayo “jeclilaayey Jibuutidan joogo” ayaa
muqaawamadii waxay dadka ku tujinayaan caasumadda Soomaaliya, Marka iyo
Kismaayo. Halka ay Sheekh Shariif iyo Axmed Walad Cabdalla isku meel ku
tukanayaan; Muqaawamadu waxay la tukanayaan shacabka iyo culumada
Soomaaliyeed. Soow sharafta la sheego taas maaha.
Shacabkoow hal mar Dhegaha Fura
Maraakiibtaan tirada badan ee la sheegayo iney la dagaalayaan
Burcad-badeed iyo sheekada sheekh Shariif ee ah Xabashi baa baxeysa yaan
la idin ku sirin. Waxaad mooddaa in la yiri dadkaan Soomaalidu waa dad
madax adag oo xitaa labadii sano ee Tigreega lagu fasaxay wax ku qaadan
waaye marka hadda waxaa la rabaa in Beesha Caalamka ee Shariifku sheegi
jiray ay badaha noo soo fariistaan oo halkaas naga weeraraan halka
Tigreega iyo eydoodana lagu fasaxo iney waddanka oo dhan dib u galaan.
Waataas qorshahooda haddaan Rabbiga Caalamku naga qaban. Si Rabbiga
Caalamku wax noogu qabto waa inaan Isaga aaminnaa sidoo kalana siduu
rabay wax loo wajaho ee aan nin-jecleysi iyo dano gaara wax lagu
maamulin. Haddiiba gaalo ay rootigooda u dagaalayaan maxaa noo diiddan
inaan diinteenna, dalkeenna iyo dadkeenna difaacno?
Sheekh Shariif iyo kuwa raacay waa niman raacay niman la leeyahay!
Waxaan ka wadaa soow Rabbiga Caalamku ma laha Beesha Caalamka? Maxaynu
addoomo ugu noqoneynaa dad la leeyahay? Gabyaa Qaasim Allaha u
naxariistee baa laga sheegay:
- Ilaahay saan ka arki jiray waa ku socotaaye
Waxaan aaminsanahay in sidii C/hi Binu Salool u waayey taajkii Ansaar
uu Shariifkuna u waayayo xukun kale oo Soomaaliyeed markuu nacayb u
gaaday dadaalkii culumada iyo Muqaawamada. Sidoo kale ha arko in ay
Beeshu Caalamku awoodi weyday in korneylku Soomaali xukumo oo noqdo
madaxweyne awood leh. Marka sidii C/hi Binu Salool uu Jimcayaasha
masaajidda uga oran jiray: hala caawiyo oo hala rumeeyo nabi Muxamed
(SCW) ayaa hadda Shariifku isku dayaa inuu ku hadaaqo hadalo ah:
shacabka haloo turo, nabad wax halagu raadsho, Tigreegu waa baxayaan,
Beesha Caalamka ciidamo ha keento, iwm. Markaan waxaan rajeynayaa inuu
ku baxo dariiqii C/hi Binu Salool. Marka hadda sheekh Shariif waxaa u
soo haray inuu isku dayo inuu qaab qabiil wax ukala qeybiyo inkastoo
Soomaalidu ku fahantahay. Sida hadda muuqata Jowhar iyo Dhuusamareebba
waxay taageereen Muqaawamada. Teeda kale Muqaawamadu waa iney iska
ilaashaan wax kasta oo u keeni kara in guushu daahdo. Arrimaha guushu ku
daahdo wey yaqaannaan. Marka Rabbiga Caalamku wuu imtixaamaa dadka ee
hala samro. Marka qof kasta waa ogyahay garabka adag ee waa innaga waxa
guusha iska hortaagan.
C/Waaxid
C/hi Khaliif
London, UK
cabdulwaxid@hotmail.com
Shaybka oo 14 Xubnood Heysta iyo Sheekhii oo 275
Heysta... Akhri....
Afeef: Aragtida qoraalkan waxaa leh qoraaga ku saxiixan