SOMALITALK.COM dahabshiil
w w w . S o m a l i T a l k . c o m
SOMALITALK - CIID MUBAARAK

Sida Looga Ciiday Xeryaha qaxootiga ee Kakuma iyo Nairobi, Muqdisho, Toronto, Johannesburg, Minneapolis iyo Helsinki Finland.

  • Warbixinno : SomaliTalk.com | Dec 19, 2007


Sida Looga Ciidey Toronto:

Magaalada Toronto ee dalka Canada kumanaan Muslimiin ah ayaa isuguyimid goobaha ay ku tukanayeen salaada ciida. Sawirada hoose waa xaruna DAARUL-HIJRA ISLAMIC ISLAMIC CENTER oo lagu tukadey salaaddii ciidul Adxa.




Sawirada sare waxaa soo tebiyey DAARUL-HIJRA ISLAMIC ISLAMIC CENTER


Sida Looga Ciiday Xeryaha qaxootiga ee Kakuma

Ugu horrayn waxaan salaan ku aadden ciidul-adxaaga halkaan ugu tabinaynaa dhammaan muslimiinta ku nool daafaha dunida; waxaan mid gaar ah u tabinaynaa ummadda Soomaaliyeed iyo bahda www.Somalitalk.com oo in badan warbaahin loo baahan yahay suurta galiya. Intaasi ka dib.


Kaakuma: Muslimiinta isugu sobaxay salaadii ciida, Dec 19, 2007.

Saaka oo taariikhdu ay tahay 19-12-2007 kuna beegan 10-12-1428H, saacaddu markii ay ahayd 06:30 AM; waxaa goobaha tukashada salaadda-adxiyada muslimiinta ku nool xeryaha qaxootiga Kakuma oo ku yaal galbeedka fog ee waddanka Kenya.*


Kaakuma: Muslimiinta isugu sobaxay salaadii ciida, Dec 19, 2007

Muslimiinta halkaasi ku nool oo ka soo kala jeedda wadamada Somalia, Sudan, Ethiopia, Uganda, Rwanda, Brundi, Kongo iyo qabiilka loo yaqaan Turkano ah qabiilka dega degaannada ay qaxootiyadu ku yaallin ayaa tukashada ciidul-adxaaga bannaada iyo barxada degaankaasi u yeelay muuqaal aad iyo aad u qurux badan iyo bilic dheeraad ah oo aan la qiyaasi karin, waxaana wajiyadooda ka muuqanayey farxad iyo rayn-rayn aan la soo koobi karin.

Kaakuma: Muslimiinta isugu sobaxay salaadii ciida, Dec 19, 2007

Waxaa lagu tukadey dhowr goobood ay ka mid yihiin: KK-town, KK1, KK2, KK3, iyo KK4. Waxaa halkaasi laga akhriyey khudbado dhowr ah oo ay ka mid tahay khudbaddii salaadda iyo kuwo kale oo dhammaantood looga hadlayey arrimo khuseeya diinta Islaamka, barashadeeda iyo ku dhaqankeedaba.


Sheekh Baarri oo akhrinaya khudbadda ciidda salaadda ka dib
 

 

Salaadda ka dib, waxaa la arkayey saaxiibbo iyo qaraabo isugu hanbalyeynayey farxadda ciidda waxaana la guda galay biraynta adxiyada ciddii heli kartey iyo in laga farxiyo masaakiinta ku nool degaanka.


Laba ka mid ah culimada magaalada oo si caam ah tahniyad ugu diraya bulsho waynta islaamka ah gaar ahaan ummadda Soomaaliyeed

WABILLAAHI TAWFIIQ


Saciid Ismaaciil Xasan (Urur)
seidismael@gmail.com
Tel: 254 7262 55 8 44
www.seidismael.com

Salaadii Ciida ee Nairobi oo ku siktay in faraha la iskula tago balse Sh Umal uu xaliyay

Kumanaan kun oo muslimiin ah ayaa saakay waxay isugu soo baxeen xarunta Sir Ali Muslim Clup ee magaalada Nairobi si ay u tukadan salaada Ciidal Adxaada ee sanadka 1428 oo ay iyadoo ay maanta ku beegnayd bishu 10ka bisha Dulxijah.


Naiorbi: Muslimiinta isugu sobaxay salaadii ciida, Dec 19, 2007

Goobta salaada ciida lagu tukanayay ayaa waxaa dadkii ugu yimid ay isugu jireen qaybaha kala ka disan ee bulshada iyadoo sanadkaan marka la bar bar dhigo ciida sanadkii hore ay dadku aad u badnaayeen maanta taas oo ay dadku ku sababeeyeen dhowr arimood uu ay ugu badnayd in dad badan oo soomaali ah ay ka soo carareen dalkoodii hooyo ka dib markii sanadkii hore ay qabsadeen ciidamada Ethopia oo ku soo gabanaya kaalinta dowlada DFKMG ah ee Soomaaliya.

Sidoo kale arimaha dadka in ay soo bataan keenay ayaa waxaa ka mid ahaa iyadoo 27ka bishaan loo dareeri doono sanaadiiqada codbixinta si loo soo doorto dowlad cusub iyo madax wayne taas oo maanta laga dareemayay goobta salaada loo soo aaday dhaq dhaqaaq ay ku dheehnayd dhiilo colaadeed oo ka dhex aloosnayd taageerayaasha labada Musharax xildhibaanimo ee soomaalida ah ee ka taagan Degmada Kamakunji oo ay xaafada soomaalidu degto ee islii hoos timaado taageeryaasha taageerayaasha Ibraahim Juunii iyo Yuusuf Xasan ayaa si dirqi ah ku kala baxday in ay isku dhacaan.



Shiekh Maxamed Abdi Umal oo ka mid ah culumada ugu waa wayn bariga afrika ayaa isagu soo kala dhex galay dhalinyaradii kacsanayd ee doonayay in ay faraha iskula tagaan siyaada awgeed waxaana uu sheikhu ka codsaday in arintaasi aan loo baahanayn isagoo sheegay in goobta lagu tukanayo ay tahay meel cibaado ayna ka reeban tahay in wax kasta oo hor istaagaya cibada iyo Campainingka isagoo intaasi ku daray in dhiig la daadiyo ay tahay danbi wayn waxaana uu yiri '' waxaan daramaynaa in dhib uu halkaan ka jiro dhalin yarda doonaysa in ay dhiig daaadiyaana waxan ugu baaqayaan in ay ilaah ka baqaan ''


Sh. Umal oo akhrinya Khudbada ciida Al Adxa.. Dec 19, 2007

Shiekh Umal ayaa isaga oo ay dadka Aamin ka daba dhahayaan waxaa meesha laga habaaray cidii wax fitino ah ka dhex abuurta muslimiinta farxada isugu timid ee ciidaya.

Arintii ayaa dhulka caga waxaa u dhigay Shiekha iyo hadalkiisaas iyadoo ay habsami socodkii gudashada salaada ciida ay dib u bilaabtay waxaana dadka salaada ka bixiyay Shiekh Maxamed Cabdi Umal ka dibna markii salaadii la gutay ayaa waxaa uu jeediyay khud bad dheer oo ku aadan ciida waxaana oo ugu baaqay dhamaan muslimiinta in ay is cafiyaan isagoo ku dheeraatay arimaha islaamka waxaana uu ka hadlay dhibka ka jira Soomaaliya waxaana uu ka yiri dhibkaasi in uu yahay mid ay soomaalidu gacanteeda ku kasbatay isagoo ku baaqay in dariiqa u laabashada rabi oo kaliya looga bixi karo waxaana oo soo qaaday oo kale arintii meesha ka dhacday maanta waxaana uu ku tilmaamay in ay arintaasi soomaalida magangalayda kenya u joogta ay dalkoodii keentay loona baahay in laga dikoonaadu hurinta fitanka.



Ugu danaybtii gudashada salaada ciida ayaa waxay ku dhamaatay jawi aad u wanaagsan iyadoo ay dadkuna isugu marinayeen tahniyada iyo salaamaha goobta dhexdeeda oo ay saxaafada kenya qaar ka mid ah si toos ah u gudbanaysay farxda ciidul adxaada.

Akhritayaal waxad naga dhowrtaan codka warkaan hadii eebe Idmo

Maxamed Cabdi Maxamed Bootaan
bootaan_somalitalk@yahoo.com

Ciidul Adxaa iyo Muqdisho.

(Nolol meel aysan ka jirin Ciid kama dhicikarto)

Maanta waxa ay aheyd maalin farxad leh ,maalin ciid ah ,maalin Muslimiinta kuweyn ,maalin qadari leh,maalin waajib ah oo gudasho mudan islamarkaasna muslimiin aad u farabadan ay ku gudajereyn gudashada Xajka oo ka mid ah tiirarka Islaamka ,waa sax Muslimiinta waa ay faraxsanaayiin ,waana ay u dabaaldagayeen Ciida laakiin dhib baa jiray gobo badan oo Dunida Islaamka ka mid ah Somalia, Palastian, Ciraaq iyo Afghnistan dhibaatooyin ayaa muslimiin loogu geystay intee lagu gudajiray diyaargarowga iyo dabaaldaga Ciida ,goobo ka mid ahan wadamada aynu soo sheegnay maba aysan jirin dad isugu soo baxay oo farxada ciida sidaa looga dhiihan karay marka laga reebo tukashada salaada ciida oo ay muslimiinta ka wadamideysnaayeen.

Somalia:Muqdisho waa magaalada ugu weyn somalia ,waana magaalada ay ku noolaayeen dadka ugu badan Somalia ka hor imaanshaha Ethiopia ee muqdisho,waxa ayna ka mid aheyd magaalooyinka sida weyn looga dareemo Maalinta ciida ,wadooyinka ,gawaarida ,goobaha dad weynaha isugu yimaadaan waxa ay ahaan jireyn goobo aad u mashquul badan ,taa waxaa sii dheeree Caruurta oo iyagana qeyb ka qaadan jiray farxada ciida oo wadooyinka iyaga oo xeyn xeyn u socda hadba dhinac ugoynjiray,sax,taas waa ay jirtay waaxa ayna aheyd Caado in wadooyinka ay buuxsamaan ,garaawida mashquulkoodu bato,Laakiin Labo ciid oo aynu hadda tii labaad ku gudajirno waxaas oo dhan Muqdisho ma ka jireyn.

Maanta

"Masaajidyo tiro yar ayaa laga maqlayay Codka Takbiirta,mana jirin Caruur labisan ama farxad ay ka muuqato oo wadooyinka magaalada dhexmarayay ,sidoo kale mashquul magaalada laga dareemayay ayaan jirin"sidaas waxaa ii sheegay Mid ka mid ah saxafiyiinta soomaaliyeed oo jooga Muqdisho laguna magacaabo Axmed Aadan Ibraahim (saadaam).

Xiligaas waxa uu Axmed ku sugnaa Banaanka hore ee Gurigiisa oo laga kala qaxay waxa uuna kasoo noqday Masaajid u dhawaa oo isaga iyo dad tiro yar ay salaadii ku tukadeen,waxa uu ka hadlayaa sababta uu Guriga kucileneysa ee uusan uga fogaan hoygiisa "Sababta waxa ay tahay ma jirto marka koowaad Goob aan aado maxaa yeelay magaalada dhan ayaa cidla ah gaar ahaan xaafadeyda,mana lahan dad aan qaraabo salaam u adaado maxaa yeelay Aniga iyo dad ila mid ah ayaa magaalada ku haray si ay guryaha uga caabeyaan kooxaha gurayaha u dhaca".

Calas Maxamed Guutaale waxa uu isna ka mid yahay dad tiro yar oo ku haray Xaafada Towfiiq ee Degmada Yaaqshiid oo fariisimo ay ku leeyihiin Askarta Ethiopianka ah,waxa uu fadhiya dhayax yar oo u dhow Gurigiisa si haddii ay rabshado ama iska horimaadyo ay ka dhacaan xaafada uu horay ugu sii galo Gurigiisa.

"waxa aan dareemayaa nolol Mugdi ah,cidlo,cabsi saa'id ah iyo murugo joogta ah,Aniga iyo rag kale oo tira yar ayaa xaafada kusoo harnay ,Maanta salaada waxa aynu ku tukanay Gurigiina dhexdiisa maxaa yeelay ma aysan jirin Masaajid noo dhow oo aynu aadikarnay si aan salaado usoo tukano"

Isaga oo laga dheehan karo sida uu uga xunyahay xaalada uu ku jiro waxa uu yire"Xarunta Istaadiyaamka Muqdisho oo aheyd goob maanta oo kale la isugu yimaado waxaa ku sugan xoogag Ethiopian ah,sidoo kale Masaajidyo farabadan ayeey ku jiraan ama dardood u xiran,Suuq iskaba daa ".

"maxaan ciidnaa Nololshii ayaaba meel noo saarneyne,cunto la'aan ayaa na heysta adinka waxa aad ka hadleysaan Ciid" sidaas ayaa laga soo xigaty hooyo somalia ah oo tiro caruur ah heysta islamarkaasna ku sugan xaafada suuqaxoola ee Degmada Hurwaa ee Magaalada Muqdisho.

Waxa ay ka mid tahay qoysas ayaad u tabaryar ama u liita oo aan wali ka qixin Xaafada Suuqa xoolaha sababo dhaqaalo awgood.

"salaada aniga iyo caruurteyda waxa aynu ku tukanay gurigeena,walaaloow farxad iyo ciid ciid nooma taal ,haddii aan taas awoodno halkan khatarta badan ayaan ka bixilaheyn"ayeey ku cataabtay hooyadaan soomaaliyeed.

Waa wiil 12-sano jir somalia ah kuna sugan Deegaanka Suuqa xoolaha" Aniga ma ciidin ,caruurtii dhan waa ay naga guureyn aniga ayaahalkan joogno kale".

Fagaarayaasha waa weyn ee Muqdisho ayaa xiligan waxaa ku sugan ama xarun ay u tahay Kooxo Ethiopia ee jooga Muqdisho.

Shiekh C/raxmaan shiekh Maxamed Xasan Diirshe waxa uu ka mid yahay Culumada somalia ,hadda waxa uu ka mid yahay tiro somalia aad u farabadan oo Magaalada Muqdisho kasoo qaxay ,waxa uuna ku suganyahay Magaalada Nairobi ee wadanka Kenya ,waxa uuna ka hadlayaa Xaalada Muqdisho iyo ciida.

"Maanta Iyadoo ay tahay Maalin faxadeed oo ciid ah ,hadda waxa aan aad uga xumay dhibka Muslimiinta somaliada ku heysta Muqdisho ,iyadoo ay si weyn ay iitaabaneyso Masaajidyada ay Xarumaha Cibaadada ee aan maanta shaqeyneynin". Ayuu yire sheikha.
Tiro dad somalia ah oo isugu jira Qeybaha kala duwan ee Bulshada kana soo qaxay Muqdisho ayaa Soo gaaray Nairobi oo caasimad u ah Kenya.

Dadkan waxa ay manta Ciida kala qeyb-qaateen Muslimiinta Kenya ,waxa ayna u ciideyn si wanaagsan,laakiin waxa ay wali ka murugsanyihiin dhibka heysta Somalia Muqdisho oo manta ka hor istaagay inay ciida si wanaagsan oo siddii hore la mid ah ugu taan.

Bilaal Cabdi Faarax waa 19-sano jir somalia ah oo kasoo qaxay Muqdisho iminka waxa uu ku suganyahay Magaalada Nairobi waxa aan kula kulmay Xaafada somalia ay u badan yihiin ee Islii,waxa uuna muujiyay dareen ka xumaansho xaalada Muqdisho .

"Waxa aan joogaa Kenya oo aan waqti dhow imid waxa aana Aniga oo ciidaya aan Murugo haddana la qeybsanayaan dadkeyga Somalia ee Muslimiinta ah ,kuwaas oo aan maata si fiican uga qeyb qaadan Ciida".

Isaga oo dhinacyada eeg-eegaya ,kana baqanaya Kooxda police-ka Kenya oo Somalia ugaarsata waqtiyadan oo kale ayuu waxa uu yire" sax,maanta waa maalin Farxad leh laakiin Murugada waa in aad la qeybsataa walaalahaaga Muslimiinta ah ee Gacanta u galay Cadow xitaa haddii aad adiga dalka kasoo baxday".

Labo Ciid oo Muqdisho ay ku suganyihiin Ciidamada Dowlada FKMG ah ee somalia iyo Askarta Ethiopia ee soo afjartay Xukunkii Maxkamadaha Islaamiga soomaaliyeed ayaa Muqdisho waxa ay noqotay goob ka duwan wadanka Inteese kale ,dadkii daganaana waxa ay noqdeen kuwo geeriyooda ,kuwo dhaawacma iyo kuwo ka carara oo ka qaxa Guryahooda.

28-December ayeey aheyd Markii Muqdisho ay soo galeyn Askarta Ethiopia waxaana iminka naga xiga wax aan sidaas uga badneyn Todobaad Haddaba Su'aasha waxa ay tahay Muqdisho sedan miyeey sii

W/D:Muxyadiin Axmed Rooble
Email: saadaam_7@hotmail.com
Muhudin01@yahoo.com
Nairobi,Kenya

Sida Looga Ciidey Koonfur Afrika

Dadka oo eey ka muuqatay shucuur farxadeed oo wajiyadooda laga dheehan karay ayaa maanta ku kala tukaday magaalooyinka waaweyn ee dalka K/Afrika oo qaarkood ey isu jiraan masaafo ahaan inka badan 2000km, soomaalidii maanta u dabaal dageysay ciida magaalada johansburg  ayaa waxay salaada ku tukatay hool weyn oo ku yaala dhismaha AMAL SHOPPING CENTRE oo ah dhisme weyn oo eey soomaalidu leedahay. halka magaalooyinka Cape town iyo P.E iyaguna salaada ciida lagu tukaday goobo cayiman oo had iyo jeer lagu oogo salaadaha ciida. 

Muslimiinta dalkani ku dhaqan ee aan soomaalida aheyn ayaa iyagu aanan maanta ciideynin, ciidooduna eey tahaymaalinta bari ah, hase yeeshee culumaa'udiinka soomaalida dalkani eey go'aansadeen in maanta ey soomaalidu ciido. walow eey hade jiraan baaqo kasoo yeeraya culumada qaarkood oo sheegaya in eey haboontahay midnimada islaamku in la illaaliyo oo markasta lala tukado walaalaha islaamka ah ee soomaalida dalkani kaga badan.

Salaadaha ciida ayaa ah isu imaatinada kaliya ee laga ogaan karo isku xirnanta soomaalida iyo tiro ahaan dalka sida eey u joogaan, waxaana ciidba ciida ka dambeysa muuqanaysa in eey soo kordhayaan soomaalida dalka imanaysa, gaar ahaan eey sare usii kacayso tirada qoysaska aburrmaya, iyadoo la arkayo caruur iyo haween aad u tiro badan oo aan horey loogu aqoonin dalkani. 


Johansburg: Nin Maanta oo Ciid ah soo gaaly Diinta Islaamka oo shahaadada loo qabtay Dec 19, 2007

Dhanka kale kale wax yar ka hor salaadii ciida johansburg ayaa culumada soomaaliyeed waxay ku guuleysteen in shahaadada loo qabto nin diinta maanta ku cusub oo soo islaamay, ninkani oo uu illaah soo hanuuniyey ayaa go'aansaday in uu kusoo biiro diinta islaamka. si weyn ayaana loosoo dhaweeyey, iyadoo dadka hortooda shahaadad loogu qabtey. 

c/nasir axmed sh. bashir (saxansoxo). Email: saxansoxo1@hotmail.com

Sidii Looga Ciidey Minnesota, USA

Kumanaan Muslimiinta deggan magaalooyinka mataanaha e St. Paul iyo Minneapolis ayaa Subxnimadii Arbacada waxay camireen farasmagaalaha magaalada Minneapolis, gaar ahaan meesha loo yaqaan 'Minneapolis Convention Center' si ay ugu tukadaan salaada ciidul Adxa.


Ciid ul adxa iyo Minneapolis: Dec 19, 2007

Muslimiinta Minneapolis/St.Paul iyo magaalooyinka ku xeeran waxay camireen hoolalka waaweyn ee xarunta ugu baaxadda weyn magaalada Minneapolis ee ku taal bartamaha magaalada, dadkaas oo wajiyadooda ay ka muuqatey farxadda ciida iyagoo isu hambalyaynaya.


Muslimiinta oo camiray minneapolis convention center: Dec 19, 2007

Ciidii maanta waxaa lagu tilmaami karaa ciidihii ay dadka ugu tirada badani ka soo qayb galeen salaadda ciida, cimilada magaaladuna aad ayey u wanagsanayn. Waxaana salaada ciida Muslimiinta tujiyey Sh. C/Raxmaan Sh. Cumar.


Ciid Mubaarak


Sidii looga ciidey Helsinki Finland!

Kumanaankun qof oo muslimiin ah oo ku ciiday hoolka weyn ee Pasila 

Markazka  Helsinki Islamic Center ee masjidka Al-hudaa ayaa waxaa uu soo qabanqaabiyay xaflad weyn oo ay isugu soo baxeen dad tiradooda  lagu qiyaasay in ka badan 1500 oo qof , halkaasoo ay saaka subaxnimadii ku tukadeen salaada ciida Al-adxaa . 

Aroornimadii saaka ayay dadku bilaabeen in ay ka soo dureeraan guryahooda iyagoo ku sii jeeda qaacada salaada, qaacada ayaa waxay ahayd mid loogu talagalay arimaha Ispoortiga, iyadoo ay sanad walba dadku ku tukadaan halkaas. 

Dadka isugu soo baxay gudashada waajibaadka salaadda ciidda oo isugu jiray caruur, dhalinyaro, waayeel, rag iyo dumarba waxaa wajiyadooda ka muuqday farxad iyo rayn-rayn iyagoo isugu hanbalyaynayay munaasabadda ciiddaasi. 

saacaddu markii ay ahayd 10:30 ayaa imaamku u istaagay salaadda, waxaana salaaddii kadib uu halkaasi khadiibka Masjidka Al-hudaa C/rasaaq Sugulle Maxamed  ka soo jeediyay khudbad dheer oo koobaysay dhamaanba waxyaabaha ay bulshadu u baahan tahay.

Khudbadu waxaa ay ku saabsanayd khudbadii Xajkii widaaca ee Nabiga (NNKH) oo looga hadlay Xuquuqul  insaanka, arimaha dumarka, sida loogu baahan yahay in ummaddu ay iskaga  harto casabiyada iyo qabiilka oo ay mid ku noqdaan walaaltinimada Islaamka. Sidoo kale waxaa uu khadiibku ka hadlay macaasida faraha badan ee la fududaystay baryahan sida Ribada, Mukhadaraadka oo ay ka mid yihiin khamriga, Jaadka IWM.. Waxaa kaloo uu khadiibku kaga hadlay khudbadiisa Arimaha Soomaaliya oo uu sheegay in caalamku uu indhaha ka qarsaday marka ay cadowga Soomaaliuyeed ee Itoobiyaanku burburinayeen dhulkayaga iyo hantidiisa, xasuuqayeen shacabkeena, islamarkaana ay ku xadgudbayeen muqadasaadkeena.. isagoo sheegay in loo baahan yahay in ummadda Islaamka guud ahaan , gaar ahaana shacabka Soomaaliyeed ay meel uga soo wada jeestaan sidii dhulka looga xorayn lahaa gaalada iyo kuwa gabaadka ah u ah oo khadiibku uu ku tilmaamay in aanay jirin wax dowlad la yiraahdo ee ay yihiin shufto iyo buundo uu gumaysigu fuulayay oo ka dhiganayay marmarsiinyo uu ku shaqaysto.

Sidoo kale waxaa uu khadiibku ku booriyay muslimiinta in dadkaa walaalaheen ah ee la xasuuqayo iyo kuwa jihaadka kala soo horjeeda cadowga la garab istaago oo kaalmo macnawi ah iyo mid xisi ahba hiil iyo hooba lala garab istaago. 

Ugu danbayntii waxaa halkaasi ay dadku isku weydaarsadeen hanbalyo iyo isgacan qaad iyagoo isugu ducaynayay in Allaah ka aqbalo camalka saalixa , ciidaan teeda kalena uu Allaah ku gaarsiiyo cibaado suuban iyo camal saalix ah.

Waxaana runtii la oran karaa in sanadkan qaab aad u heersareeya loo soo agaasimay howsha gudsahada salaadda, iydoo dadka iyo gawaarida ay kala hagayeen qaar ka mid ah  ciidamada Booliska iyo dhalinyaro firfircoon oo ka mid ah ducaadda markazka. 

Abu Abdi Jabar | Helsinki Finland!

adxaHambalyada Ciidul-Adxaa ee bahda SomaliTalk.com ka akhri halkan....

GargaarSoomaalida Minnesota Oo Gargaar Dhaqaale Fidinaysa
Gurmad Dhaqaale oo loo fidinaayo Shacabka Soomaaliyeed ee ka barakay Dagaalada Muqdisho.. Xaggee.. Goorma


Kaakuma waxay ku taal cirifka Woqooyo Galbeed ee Kenya

Faafin: SomaliTalk.com | Dec 19, 2007

 

Kulaabo bogga  www.SomaliTalk.com 
© www.SomaliTalk.com