A.D. Elmi
adelmi@hotmail.com

Haddaba halganka ay ku jiraan jabhaddani sow uma baahnaan lahayn inuu noqdo inuu noqdo mid mira dhal ah, si deg deg ahna looga gun gaaro, si taas loo helo waxaa lagama maarmaan ahaan lahayd in Ogaden loo bedelo Soomaali, maxaa yeelay dhulka haatan loo bixiyey qeybta shanaad ee Soomaalida waxaa dega qabaa’illo kala gedisan oo Soomaali ah, oo u baahan inay helaan dallad ka ballaaran tan qabiilka Ogaden,  dalladdaasna waa Soomaali oo qaadi karta ama xambaari karta inta qabiil ee halkaas ku dhaqan, soona jiidan karta Soomaalida kale ee ku kala firirsan qeybaha kale ee Soomaaliya. 

Waxaa laga yaabaa in qoraalkani uu xasaasiyad ku rido dadka ah  ONLF ama taageera, isla markaana akhris kaddib ay u soo baxdo laba arimood midkood: inaan ka soo horjeedo halganka ONLF ama ay u qaataan inaanan fahansanayn Ogaden in loola jeedo dhulka Soomaalidu degto sida iyagu ay aaminsan yihiin, waxaana hubaal ah in magacaas ay bixiyeen gumastayaashii kala qaybiyey dalka Soomaaliya, Si kasta oo dadka ONLF u qabaan in Ogaden dhulka loola jeedo haddana, arintaasi maaha mid ka dhaadhacaysa Soomaalida halkaas ku dhaqan, fikirka ceynkaasina maaha mid ka jawaabaya baahida loo qabo in la gaaro ula jeeddo xambaarsan xoriyad u soo wada hoyan karta Soomaalida ku dhaqan Itoobiya. 

waxaan sheekaysanay dhinac taageersan jabhadda ONLF, waxaanna waydiiyey su’aalo ay ka mid ahaayeen, Maxaad magaciina ugu bedeli weyseen SNLF, si halgankiinu u noqdo mid qowmiyadda Soomaalidu u dhan tahay halka aad haatan qabiil ahaan u dagaalamaysaan? Natiijadii aan helayna waxay noqotay; “Ogadenia waa magac hore dhulka oo dhan ayaana loo yaqaannaa magacaas” waxaan weydiiyey su’aal kale oo ahayd, “Laakiin Ogadenia waxaa bixiyey gumayste ula jeedadiisu ahayd inay wax kharibmaan sow uma muuqato in haatan la joogo waqtigii la iska bedeli lahaa magacan? Waxay jawaabtii noqotay “waxba looma baahno in la bedelo magacan halgankanna sidaas ayuu ku soconayaa”. Sidaas si la mid ah ayaan is aragnay dhinaca kale ee Soomaalida degta dhulka Soomaalida ee Itoobiya hoos tago laakiin aan halganka qayb ka ahayn, waxaan weydiiyey sababta aysan uga qayb qaadanayn halganka ay ku jirto ONLF? Waxay jawaabtu noqotay in arintaasi aysan qusayn iyaga oo aysan iyagu ahayn qabiilka dagaalka kula jira Itoobiya” waxaan weydiiyey mar kale ‘Idinka miyaadan dhibaato ku qabin inaad Itoobiya hoos timaadaan, miyaydaanse rajo ka qabin inaad noqotaan waddan madax bannaan ama aad ka mid noqotan Soomaali weyn? Waxay iigu jawaabeen si diblumaasiyadi ku dheehan tahay, “Soomaalida halkan degta ayey u taallaa waxa ay aayahooda ka yeelayaan, dastuurka ayeyna noogu qoran tahay inaan go’i karno marka aan u baahanno, laakiin waxaan kuu sheegaynaa haddiiba ay noqon lahayd inaan halganno marka aan dhibaato aragno waxaan la midoobi karnaa ama aan samaysan lahayn jabhad ay ka dhex muuqato magaca Soomaali, ee qabiil qabiil uma aannaan halganneen sida ONLF oo kale”. 

Hadalkaas labada dhinac markii aan dhegeystay waxaa ii soo baxday jawaabo ifinaya sawir ii muujinaya waxa meesha ka soconaya, waxaa ii soo baxday in Soomaalida halkaas degta ay la mid tahay Soomaalida Soomaaliya degta oo dib u heshiisiinta u baahan in marka hore iyaga la dhex dhigo, waana middaas arinta igu xambaartey inaan qoro maqaalkan aan uga hadlayo arimaha Soomaalida degta Itoobiya. 

Si kastaba ha ahaatee, Soomaali meel kasta oo ay joogto waxay u baahan yihiin inay baabiiyaan khilaafka ka dhex taagan, mashaakilaadka Soomaalida haystana waa mid u baahan in xal loo helo, waxaana hubaal ah in Jeermiska qabiilka uu ku baahay Soomaali oo dhan xittaa kuwa qaxootiga ku ah waddamada kale ee caalamka, taas oo laga dheehan karo jaaliyadaha qabiilka ku dhisan ee qurbaha ka jira, halkii la samaysan lahaa jaaliyad Soomaaliyeed oo uruursan. 

W. Q. A. D. Elmi

Afeef: Aragtida qoraalkan waxaa leh qoraaga ku saiixan

Faafin: SomaliTalk.com | July 29, 2006

Dood-Cilmiyeed: Isbedelka Cusub ee Soomaaliya
Aqoonyahanno ku sugan dalka Canada ayaa ka hadlay kacdoonka Soomaaliya iyo raadka uu... Dhegeysi...