Meles: Gabay Cusub

Inj. Maxamed Cali Cibaar

 Delft, Holland 

mohamed_ebar@hotmail.com

July 2006

---

Gabaygaan la magacbaxay Meles wuxuu  soo baxay  21kii Luulyo 2006da markii la xaqiijiyay in ciidamo Itoobiyaan ahi ay ka soo gudbeen xadka  Soomaaliya ayna fadhiisin ka dhigteen magaalada Baydhabo oo xarun u ahayd dowladdii maqaarsaarka ahayd ee Kiinya lagu soo dhoodhoobay.  

Gabaygu wuxuu si toos ah ula hadlaya ninka horboodaya maamulka jihowareersan ee ay Tigreygu hormuudka u yihiin ee Meles Zenawe. Taliska Tigreygu wuxuu si aan gabbasho lahayn u sheegay inuu burburinayo oo uu dagaal ku qaadayo dadka Ahlu-diinka  ah ee Soomaaliyeed, isla markaana uusan ogolaan doonin in ay Soomaalidu ku dhaqmaan diintooda Islaamka ah, waaba haddii lagala tashanayee!! 

La yaab ma laha in lagu adeegtaha Meles Zenawe iyo inta uu marinhabaabiyayba ay ku soo dulaan dadka Islaamka ah ee Soomaaliyeed. Sababtu waxay tahay, 1435 sano ku dhowaad ayaa laga joogaa  waqtigii  uu  xabashigii Abraha oo u adeegayay Kaniisaddii Ortodokiska Kirishtaanku uu isagoo maroodiyaal wata ku duulay kacbadii Maka oo ay dadka carbeed u xajin jireen si uu u soo burburiyo, tasoo uu cawaaqibxumo kala kulmay . Haseyeeshee arrinka laga xumaado ee argagaxa lihi waa in dad mas’uuliyiin Soomaaliyeed sheeganayaa ay maanta ku soo hoggaamiyaan dadkii, dalkii iyo diintiiba  cadow duullaan ku ah, dad badan oo waxmagarato ahina ay arrinkaas ku taageersanyihiin oo ayba la qumantahay, qalbi madoobaad Qaaddir ha naga hayee!! 

Waxaan ku kalsoonahay in dadka Islaamka ah ee Soomaaliyeed ay sidii ay ku caanbaxeenba  cashar lama illoobaan ah siin doonaan cadowga isi soo miidaamiyay iyo inta gunta ah ee gumeysiga soo duudisay oo ku dambeyn doona jab iyo guuldarro aysan ka soo kabsan doonin Insha-Allaah. Allihii Abraha ciqaabay ee Alamtarana ku soo dajiyay awooddiisii isma dhimin ee ummadyahay ogaada oo Rabbi aamina, axmaqa yeelkiise. 

Waxaan kula dardaarmayaa shacabka Soomaaliyeed ee geesiyaasha ah meel kasta oo ay joogaan gudaha iyo dibaddaba  in ay u midoobaan cadowgooda , isku kalsoonaadaan, Allaahoodana ku kalsoonaadaan. Hubaal, Meles wuxuu is mooday wax uusan ahayn, annagana wuxuu na mooday wax aanan ahayn. Taariikhda ayaase si fiican u caddeyn doonta waxa uu  Meles yahay iyo waxa ay Soomaaliyi tahay hadduu Rabbi idmo. 

Ninka la soo kireystay ee Meles iyo ehelkiisa oo ay Soomaalidu  horay abaal weyn ugu gashay ayaa maanta nasiibdarro abaalgudid daaye gooddiskiisa iyo gabgabtiisa dunidii laga joogi la’ yahay. Abaal-laawe Meles oo aan filayo inuu far-Soomaaliga aqriyo haddii uusan is yeelyeelenin ayaan hawada u marinayaa farriintan gabayga ah oo aan ugu caqli celinayo. 

Gabaygu wuxuu billaabanayaa: 

1. Allaa mansab leh  makaan lagu nastiyo meelo darajeysan

2. Kii soo miciinsada asaan midig u waayeynin

3. Isagaa Malaa’igo dirsada  ciidan magag weyn leh

4. Makhluuqiisa isagaan nahoo kownkan maamulaye

5. Mu’miniin inaan nahay asaan mahadineynaaye

6. Adna kii maroodiga watee Maka ku soo dulaay

7. Ee yiri xajkaan soo masixi Mowle gurgiisa

8. Abrahaad maskaxda liidatiyo magac wadaagtaane

9. Miyirkaadi kibirkaa qarribay wuu ku muufeyne

10. Melesow I maqal meel xun baad magansan doontaaye.

11.  

12. Maan laawe danihiisa moog lagu muraadsanaye

13. Maxas laaye  muudsade dhallaan mahad ma soo celiye

14. Marin lagu hodaayiyo jid baas  mugdi ku guureeye

15. Marax  liita inkastood tahoon murti laguu quurin

16. Oo ay mamnuuc tahay inaan nacas u maansoodo

17. Mujrim qooqay inad tahay ayaan dhaar ku marayaaye

18. Anigoon mashquul kaaga dhigin mas’alo qaangaar ah

19. Miinleyda suugaan ayaan kuu malgacadeyne

20. Iyadoon basaas kuu macnayn miinka waad garanne

21. Waa taan madraso kuu dirniyo macallin waagiiye

22. Melesow I maqal meel xun baad magansan doontaaye.

23.  

24. Mukhtaarkii Gumeysiga niciyo Mahdigii Suudaanta

25. Mandeelliyo Nakruumiyo raggii muujay cududdeenna

26. Mintidkii Lamuumbaan tabniyo wiil madaale ahe

27. Maxamuud sidiisii hadduu geesi maamulayo

28. Mowlaheenna uu garabgaloo marinsan qaadsiiyo

29. Mar horey Afriikada madow caadka mari layde

30. Maanka iyo lama quursadeen midabka kooda ahe

31. Maashaa Alley noqon lahayd meel ammaan badane

32. Mug shidaal leh oo keydsan iyo macdano nooc nooc ah

33. Wabiyaal iyadoo ay  maraan badu mallaay buuxo

34. Macaluul dhasheedoo u la’an misir ma tuugteene

35. Mucaawino ayay fidin lahayd  mood intuu haraye

36. Maafiyo kuwey soo dirtiyo dulli macaanjecel ah

37. Maqaarsaaryo waxa noogu wacan aad midkood tahaye

38. Melesow I maqal meel xun baad magansan doontaaye

39.  

40. Waa meerto dunidani niyahow maalin iyo leyle

41. Mannixihii dergigu maalintuu miigga soo kiciyay

42. Muddulkiinnu maalintuu dumee taangi la marsiiyay

43. Maalintuu xasuuqaye Tigrey meydku tiro beelay

44. Maalinteey musiibadu dhacdeey qaxe malaayiintu

45. Maalintu dhul midabdoorsamee dhiiggu mulucleeyay

46. Midig iyo markaad bidix daydeed meel kastaba eegtay

47. Mushriggaad sugeysiyo markuu Mulxidba kuu deyrshay

48. Masiixigad walaalow lahayd kuguba maadeysatay

49. Adigoo madluunoo bukoo  maanka jugi gaartay

50. Oo  ciil madoobaadayoo murugo ooynaaya

51. Deris lagama maarmee halkaad mudatay waad garanne!!! ( MUQDISHO)

52. Melesow I maqal meel xun baad magansan doontaaye.

53.  

54. Munkar ku hadli maayoo adaa ii marqaati ahe

55. Maganteyda goortaad gasheed muusannaabaysay

56. Marwooyinka dayacan iyo markaad muluqyo ii keentay

57. Mas’uuliyadda waanigii gutoo maatidow naxaye

58. Masaakiin canshuur laga guroo  meel u qoondaysan

59. Marashiyo  waa taan kaaga jaray bilo masruufkoode

60. Waa taan makaan aad degtiyo maalba kuu qoraye

61. Melesow I maqal meel xun baad magansan doontaaye.

62.  

63. Maahsane haddii aadan ahayn qalbigu maareystay

64. Makhaayaddii Taleex  Matabcadow meelahaad jiiftay

65. Martisoorki Soomaaliyeed waa mid aad garanne

66. Mafafaayga muuskii  Jubbiyo khudrad la miisaamo

67. Muufada adiga oo daldali maraqu hoos yaallo

68. Macaanaada adigoo hayoon murudna reebeynin

69. Intaad indhaha mirig siisayeed margatay baa badane

70. Maamuuskii gobonnimo sidaan macangag kuu sooray

71. Iyo sidaad nacayb iigu miri  waaba kala maane

72. Mannasheegadkaan diiddanniyo marti ka sheekeyne

73. Milyan gabayna waan marin lahayn milgo la’aantaaye

74. Melesow I maqal meel xun baad magansan doontaaye.

75.  

76. Waa maacaleesh ruux hadduu yara marqaamaaye

77. Xamar waa magaalee haddaad jaman mushaaxeeda

78. Meelahaad ku nooleyd haddey muhatay laabtaadu

79. Mar kaleeto inaad noo timaad ma aha ceebaale

80. Macariifo adigoo yaqaan Muuse iyo Faarax

81. Magan Alla adoo dhihi karoon manfac  laguu waayin

82. Maquuniyo haddii aad is tiri khasab ku maareyso

83. Alleylehe inaad mujrim tahaa marag ma doonta ahe

84. Miyir inaad qabtoo aad dhantahay minidkan aan joogno

85. Iyo inaad majnuun tahay ayuu muran ka joogaaye

86. Melesow I maqal meel xun baad magansan doontaaye.

87.  

88. Dabinnadaad maleegeyso iyo  meeshad xaal geysay

89. Makrigaagu waa waxan la maqal dunina soo marine

90. Ma gudbiyo saqiir miijiyiyo mici ku dhiigloo dhan

91. Marduuf qaada kuwo lagu masliyo  odayo mooryaana

92. Qamri miiste balwadaha ku mamay oo macsida quuta

93. Maqaraaruf  aan tacab aqoon meheredlaawoo dhan

94. Xabsiyada intii mudan lahayd mooro lagu owdo

95. Haddaad maamulkood nala rabtiyo inan musiibowno

96. Alleylehe inaad mujrim tahaa marag ma doonta ahe

97. Miyir inad qabtoo aad dhantahay minidkan aan joogno

98. Iyo inaad majnuun tahay ayuu muran ka joogaaye

99. Melesow I maqal meel xun baad magansan doontaaye.

100.  

101. Meel ka dhacyo waa lagu yaqaan ruux is mahadshaaye

102. Haddaad Malik is moodeyso iyo boqor la maamuuso

103. Ooy qaar ku maaweeliyaan kaa muraadsanaya

104. Mudanowda  beenta ah haddaad uba maqsuudeyso

105. Dhabtu waa miskiin inaad tahey marinhabowsheene

106. Sida macallinkaadii anoo casharro kuu meerin

107. Oo aan mushaar kaaga rabin fahamka maahmaahda

108. Anigaa runtii kuu macneyn qaar maldahayeene

109. Misaal iyo tusaalaan ku siin kuu muraayad ahe

110. Melesow I maqal meel xun baad magansan doontaaye.

111.  

112. Mowle nimuu dulleynaayo yaan maaro loo heline

113. Malaayiin iyagoo hantoo maal adduun haysta

114. xilal aysan mudan  iyo iyagoo  mansabyo  loo dhiibay

115. kuwa madaxda lagu sheegayaa aysan uba muuqan

116. Oo raba malyuun inay dilaan maalmo gudahooda

117. Kuwa malafsan gurigaada oo miririfleynaaya

118. Een mucjisee kaa faaruqayn kuguna meeraysta

119. Oo inaadba soo mayratiyo musqushi kuu diiddan

120. Minyarooyin siday kuu yihiin minanka kuu jooga

121. Kuwa ay marwada kuu dhaxdaa kaba masayrayso

122. Oo meel xishoodkii dhigtayee tuuray maradiisi

123. Duuflaaladaa miyirka laad tahay misaalkoode 

124. Melesow I maqal meel xun baad magansan doontaaye.

125.  

126. Mujrim ruux kastoo soo ahaa maxas wuxuu laayo

127. Maalin buu nabsiga meerayaa madaxa soo qabanne

128. Miruhuu abuurtuu qofiba muudsan doonaaye

129. Middiduu afeeyaa ka jari marin halbowla ahe

130. Doqonkii Manrovia xukmay mala’ awaalkiisii

131. Meydkii uu googoyn jiriyo mashaqaduu suubshay

132. Matantahoo lagaa jeexay oy muuqan dabadaadu

133. Maqas baa jirkaa taaban iyo mindiyo soofeysan

134. In maqaarka laga siibi karo Doo ma filanayne     (Samuel Doe)

135. Mudankiisi yuu helay haddaan been la marinayne

136. Melesow I maqal meel xun baad magansan doontaaye.

137.  

138. Mobuutihi Sa’iir yeeshayee looga kala maagay (Mobutu Sese Seko)

139. Waxuu marras u xoogsheegto oo macashu laalaaddo

140. Wuxu midab shabeel soo xirtoo  Miririqleeyaaba

141. Wuxu dheeman miistoo agoon mooraduugaaba

142. Maalkii dadweyanaha wuxuu meelo geystaaba

143. Xukunkii muddada dheer ahaa seken ma moodayne

144. Na mood iyo markuu shacabku yiri macasalaamoo tag

145. Isagoo miskiin yaabbanoo oo mergiga taagaayaa

146. Oo Marsheediskii lagala haray uu Milyaard siistay

147. Oo matoobo hantidiisu tahay uu ku mudan ciidda

148. Oo marad la luudaaya bey maalin qixiyeene

149. Melesow I maqal meel xun baad magansan doontaaye.

150.  

151. Mengistihii galbaday waad ogtahay meeshi uu maraye (Mengistu Haile Mariam)

152. Maangaab wixii uu xushiyo Qalbi-malaasoo dhan

153. Maarrey sideedii wuxuu danyarta mooreeyo

154. Waxa uu midkoodii mintida marag ku taagaaba

155. Maslaxadda wuxuu diido oo muruq ku faanaaba

156. Mu’aamarad wixii uu ku dilo niman maqaawiira

157. Musuqmaasuq waxuu doorbidoo xaqa musmaaraaba

158. Magaranya hoosteeda iyo xaafaddii Makonon

159. Madaxtooyadiisii markii la isku meegaaray

160. Mulacyada sidoodii asoo muska ku hoos dhuuman

161. Haddii aan Mareykanku baxsheen magli ma seegeene

162. Melesow I maqal meel xun baad magansan doontaaye.

163.  

164. Mufsidniintaa Maalik caasiyoo meyti iyo nool leh

165. Oo mayaci uu ugu darsamay mingis habaarqabe ah

166. Ayaad lagu misaalyow aduna marinkood haysaaye

167. Dadkaad marisay ehelkoodi baa  mitirro kuu jiraye

168. Mar uunbay magaalada Addis mashxaradaysaaye (Addis Abeba)

169. Makele-na mar baad orod ku mari mugdi habeenkiiye ( Caasimadda Tigray)

170. Mujrimkii mar baa lagugu oran laayay maatidiye

171. In milicda lagugu jiidayuu sheegay malaheeye

172. Haddii aadan meyd noqonninoon malag ku soo doonan

173. Oo aan madfaca duula iyo miino kula haadin

174. Mindhinaw inaad jeel ka dhihi adoo maxaabiis ah

175. Oo ay Maxkamad kuu dambeyn waa mid aan hubaye

176. Melesow I maqal meel xun baad magansan doontaaye.

177.  

178. Waxba yaan murtidu ila durkine waxaan ku soo meershay

179. Muxibbiyo qaddarintaan mudnaa inaad i maamuusto

180. Abaal magid anoon kaa sugayn oo isaga maarmay

181. Inaad miyir lahaataan jeclaa ood macquul tahaye

182. Mandaqaddan holceysaan lahaa miis ku nabadeeye

183. Maqrib goortaan kuu diray haddaad mashriq u heeseyso

184. Adeegana maqsuud aad ku tahoy kula macaanaatay

185. Ood muhallig la kireysto iyo noqotay maal raadis

186. Maalmaa laguu tirinayaa maanta dabadeede

187. Melesow I maqal meel xun baad magansan doontaaye.

188.  

189. Miif miifta duqsigii badshee meel san dagi waaya

190. Mar uun buu madaarkiisu noqon maraq karaayaaye

191. Adna dabin rag miiqaa Masyahow mijaha kuu surane

192. Haddaad taada moogtoo nin kale tiisa kuu meersho

193. Ood  Mowlahoon caabbudniyo Maxamed (SCW) oon raacnay

194. Muslinnimadii aad nagu nacdoo naguba maagayso

195. Muqdishaba haddaad karahdayuu ku dhibi muuqeedu

196. Masaajidka haddaad necebtihiyo Mu’adin sowdkiisa

197. Hadduu  mala-awaalkaadu  yahay mariba Soomaali

198. Marsadii Jabuutiyo Berbera Mudug intaad dhaafto

199. Marka iyo Kismaanyiyo  illaa xeebka Mombaasa

200. Soo meher xalaalee hadduu tabayo maankaadu

201. Malahaagu waa riyo haddaad talo maqleysaaye

202. Nin mariid dalbaday baad tahoo malag hodaayaaye

203. Is-miidaamin haddii aad rabtiyo inaad is-miineyso

204. Dad Mujaahidiinaan nahoon mowdka ka cabsoonne

205. Inaan guul mataankeeda nahay waabad moogtahaye

206. Isi soo maqiiq waa waxaan kala macaashanaaye.

207.  

208. Miimiida is-madluumintiyo munkar la caadeysto

209. Waa idiin mashruuc muranka iyo deris la maagaaye

210. Miciinsiga shisheeyuhuna  waa meheraddiinniiye

211. Sidii aabbahaa Minilik iyo Xeyle maanlaawe

212. Marmarsiinyo beeniyo adoon masabbid joogteynin

213. Adoon Moosko iyo Waashiton beenta kula meerin

214. Yaa Mucatab xiraneey adoon duni la  meereysan

215. Madanaa dab kulul kuugu jira maashka daaweyne

216. Markaan guluf mahiigaan ah iyo maayad soo kicinno

217. Oo aan xaqii naga maqnaa  muruq ku soo doonno

218. Markaan maanyo kugu soo rogniyo mool ku liqi doona

219. Adigoo macaaclow hirqaday  milix markaad laacdo

220. Waa waxan hubaa inad matagi qaanta noo maqane

221. Is-miidaamin haddii aad rabtiyo inaad is-miineyso

222. Dad mujaahidiinaan nahoon mowdka ka cabsoonne

223. Inaan guul mataankeeda nahay waabad moogtahaye

225. Isi soo maqiiq waa waxaan kala macaashnaaye! 

226. Isi soo maqiiq waa waxaan kala macaashnaaye

227. Isi soo maqiiq waa waxaan kala macaashnaaye

228. Isi soo maqiiq waa waxaan kala macaashnaaye

       ********  DHAMAAD *************

-----------------------------------------

[:: XABSIGA THAILAND oo lagu ilaawey saddex ka tirsan askarta daraawiishta DGPL::: 01 | 02 | 03 | 04 | 05 | 06 | 07 | 08 | 09 | 10 | 11 | 12 | 13 | 14 ]

Alle-garabsi, Guul iyo Gobonnimo

 

Inj. Maxamed Cali Cibaar
Delft Holland
mohamed_ebar@hotmail.com
 

Afeef: Aragtida qoraalkan waxaa leh qoraaga ku saxiixan

Faafin: SomaliTalk.com | July 24, 2006