WARARKA FEB 18, 2006
-
Mid ka mid ah Masaajidda waaweyn ee Muqdisho oo an lagu tukan Salaadii.
-
60 qof oo ku geeryootay dagaalo dhex maray Beelaha Mareexan iyo Reer
Baciidyahan..
-
Gabar daawo ahaan u marsatay sunta Xoolaha oo geeriyooyey..
-
Geedi iyo Max’ed Dheere oo laga dalbaday in ay kala dhexgalaan Bashiir
Raage iyo..
-
Ciidamo taabacsan Shiikh Aadan Madoobe oo soo gaarey Baydhabo..
-
Hay’adda Dhowridda iyo horumarinta Soomaaliya oo Cambaareysey Falkii .
Warqad furan oo ka soo baxday Maxwell (Isuduwaha Gargaarka
ee Soomaaliya) Akhri [pdf]
###
Mid ka mid ah Masaajidda waaweyn ee Muqdisho oo an lagu tukan Salaadii.
Masaajidka Hilaal ee Xaafadda Al-Baraka ee degmada Hodan ee Magaalada Muqdsho ayaan
shalay lagu tukan Jimcaha kaddib markii khilaaf soo kala dhex galay Culumada
masjidkaasi uu sababay in albaabada loo laabo.
Khilaafkaan ayaa la sheegay in uu la xiriiro gacan ku haynta Masjidka oo la isku
maan dhaafay sida ay sheegeen ilo xog ogaal ah, waxaana warku intaa ku darayaan
in koox ka mid ah Culumada isku khilaafsan masjidkaasi ay albaabada isugu
dhifteen Masjidkii.
Dadweynihii u soo dukasha tagi jiray masjidkaasi ayaa maalintii shalay ahayd
salaaddii jimcaha ahayd ku soo guteen meelo kale oo ka baxsan xaafadooda,
waxaana dadka yaab ku noqotay khilaafkan cusub ee soo kala dhex galay
Culuma’udiinka Masjidka Hilaal, iyagoo sheegay in ay wax laga xumaado in Masjid
la isku maan dhaafo oo waliba la gaarsiiyo in albaabada la isugu laabo, waxayna
dadkaasi sheegeen in ay salaaddii noqotay in ay la aadaan masaajid kale oo,
waxayna ugu baaqeen dadka gacanta ku haya masjidka ay dib u furaan masjidka oo
wixii khilaaf ah lagu xaliyo wada hadal iyo is afgarad.
Mudadan 15-ka sano ah ayaa waxaa soo baxayay arrimo fara badan oo layaab ku
abuuray dadka Soomaaliyeed balse way la qabsadeen intooda badan, iyadoo ay iska
hor imaadyadii ka dhacay Maasjidda ay ahaayeen kuwo joogto ah oo intooda badan
ka dhasha kooxaha diinta.
“wixii khilaaf ah waxay ahayd in si gaar ah loo xaliyo, balse ma aheyn in
Maasjidka loo yimaado Cibaadda Alle la xiro, iyadoo ah maalin jimce ah, waxaana
mas’uuliyeeda qaadi doona maalinti qiyaamo ciddii ka dambeeyay xarigaasi,
waxaana ka codsaneynaa dadweynaha deegaanka in ay gacan ka gaystaan sidii aan
mar dambe loo xiri lahayn masjidkaasi” ayuu yiri wiil dhallinyaro ah oo ka mid
ah dadkii shalay ku lug go’ay Masjidkaasi. [Xaqiiqada adduunka ka ka socota
eeg halkan ]
60 qof oo ku geeryootay dagaalo dhex maray Beelaha Mareexan iyo Reer
Baciidyahan..
Weriyaheena deegaanka Cabud-Waaq Mudane Dayuurad ayaa noo xaqiijiyay in Dagaalo
dhex maray beelaha Mareexaan iyo Reer Biciidyahan ay ku geeryoodeen ilaa iyo 60
qof oo labada dhinac, waxaana ku dhaawacmay illaa iyo 70 qof.
Dagaaladaan oo ka dhacay deegaanka Yamaarugle iyo Gar ma qaato ee Kililka
Shanaad ee itoobiya ayaa labada dhinac isku adeegsadeen hubka culus iyo midka
fudud, iyadoo dad gaaraya 40 oo dhaawac ah la keenay Magaalada Cabud-Waaq ee
Gobalka Galguduud.
Dagaalkaan oo dhowr jeer soo noq noqday ayaa ilaa iyo haatan wax xal ah laga
gaarin waxayna labada beelood isku haystaan dhul deegaan ah oo ku yaal soonka
Shanaad ee Itoobiya.
Kal hore ayay ahayd markii waxgarad iyo Culuma’udiin ka tirsan Maamul
Gobaleedka Puntland ay yimaadeen in ay dhex dhexaa-diyaan labadaasi beelood
balse ay ku guuldareysteen, iyadoo dagaladaani ay ku soo beegmeen xili
deegaanadaasi ay ka jiraan abaar aad u daran.
Gabar daawo ahaan u marsatay sunta Xoolaha oo geeriyooyey..
Sida ay noo sheegeen Weriyaasheena ku sugan Magaalada Hargeysa Faarax Max’ed
Cali (Blue) iyo C/raxmaan Shariif Max’ed (Taysiir) waxaa Isbitaalka Magaalada
Hargeysa ku geeryooday Gabar da’deedu tahay 20 jir oo ay magaceeda ku sheegeen
Farduus kaddib markii ay marsatay korka Sunta Xoolaha (Dhib).
Gabadhaasi oo ay sheegeen in ay qabtay Cudurka kor cun cunka ayaa waxay
daawadaasi u marsatay si ay isaga daaweyso cudurkaasi, hase yeeshee markii ay
marsatay daawadaasi ayay miir doorsoontay waxayna gashay Koomo, waxaana loola
cararay Isbitaalka halkaas oo ay ku geeryootay gabadhaasi.
Ma ahan markii ugu horeysay oo dad Soomaaliyeed u geeryoodaan sunta xoolaha
iyadoo ay taakhaatiirta Soomaaliyeedna ay ka degeen in suntaasi Xoolaha loo
isticmaalo dadka.
Kal hore ayay markii Gobalka Hiiraan deegaano ka tirsan ay dhowr qof ku dhinteen
kaddib markii caag laga daadiyay suntan Xoolaha ay ku shubteen biyo.
Geedi iyo Max’ed Dheere oo laga dalbaday in ay kala dhexgalaan Bashiir Raage
iyo..
Iyadoo dhawaan ay bur- brutay waan waan laga dhex waday dhinacyadii ku
dagaalamay deegaanka Galgalato ee duleedka Magaalada Muqdisho oo ay kala
hogaaminayeen Bashiir Raage iyo Abuukar Cumar Caddaani ayaa waxaa labada dhinac
soo gaaraya baaqyo lagaga dalabanayo in wixii khilaaf ah ku xaliyaan wada hadal
iyo is afgarad.
Bulshada rayidka ah ayaa waxay u soo jeediyeen labadaas xubnood in waqtigaan aan
loo baahaneyn in dadka Soomaaliyeed dagaal loo horseedo, waxayna sheegeen in
dalku uu haatan ku sugan yahay xaalad aad u halis ah,
Xasan Hilowle (Xasan Kacaan) ayaa waxa uu u soo jeediyay Ra’isul Wasaare Cali
Max’ed Geedi iyo Guddomiyaha Gobalka Sh/dhexe Max’ed Dheere in ay u guntadaan
sidii heshiis uu u dhex mari lahaa Bashiir Raage iyo Abuukar Cumar Caddaani,
maadaama ay isku beel yihiin.
Waxaa maalmahan ka jiray deegaano ka tirsan Magaalada Muqdisho dhaq-dhaqaaq ay
sameenayeen labada dhinac oo laga yaabo in uu dagaal kale dhex maro labada
dhinac
Ciidamo taabacsan Shiikh Aadan Madoobe oo soo gaarey Baydhabo..
Ciidamo ka amar qaata Wasiirka Garsoorka Dowladda Federaalka Shiikh Aadan Max’ed
Nuur (Shiikh Aadan Madoobe) ayaa ayaa lagu soo waramayaa in ay soo gaareen
Magaalada Baydhabo ee Gobalka Bay.
Ciidamadan oo horey ugu sugnaa Magaalooyinka Waajid iyo Xudur ayaa la sheegay in
ay baydhabo u yimaadaan sidii ay uga qayb-qaadan lahaayeen dhinaca amniga ee
Magaalada Baydhabo oo lagu wado in uu ka dhaco 26-ka bishan shirka Baarlamaanka
Federaalka Soomaaliyeed.
Ciidamada Siikh Aadan Madoobe ayaa haatan lagu xareeyay xero ku taal Baydhabo
halkaas oo uu tababar uga socon doono inta ka harsan qabsoomida kulanka
Baarla-maanka.
Magaalada Baydhabo ayaa horey waxaa ugu dagaalamay madaxdii RRA-da, waxaana
gacan ku heynta Magaalada u haray Max’ed Ibraahim Xaabsade balse ku dhawaaqistii
Guddoomiyaha Baarlamaanka uu ku dhawaaqay in shirka Baarlamaanka uu ka dhacayo
Baydhabo ayaa waxaa waan waan ka dhex bilaabatay siyaasiyiinta Beelaha Digil iyo
Mirifle uga jira Dowladda kaas oo lagu dhameeyay wixii khilaafaad ah oo horey u
dhex maray, waxaana lagu heshiiyay in la wada sugo amniga Magaalada Baydhabo
Hay’adda Dhowridda iyo horumarinta Soomaaliya oo Cambaareysey Falkii .
Hay’adda dhowridda iyo horomarinta Soomaaliya OSPAD ayaa cambaareysay dhamaan
kooxihii ka dambeeyay in ay qalqal geliyaan bulshada taagta daran, gaar ahaan
falkii naxdinta lahaa ee lagula kacay ardayda wax ka barata dugsiga Hoyka Xamar,
kaddib markii baskii ay saarnaayeen rasaas ooda looga qaaday.
Waxay sheegtay hay’addu in falkaasi cabsi iyo argagax ku beereen ardaydaasi yana
dhici karto in ay suulka ka joogsadaan.
Dhinaca waxay Hay’addu cambaareyneysaa beelihii ku dagaalamay deegaanka
Yamaarugle, kaasa oo sababay in ay ku dhintaan dad fara badan ilsa markaana uu
sababo barakac aad u baahsan waxayna Hay’addu falalkaasi ku tilmaantay kuwo
xadgudub ku ah shareecadda Islaamka, baaqa caalamiga ah ee xaquuqda aadanaha
qodobkiisa saddexaad oo oronaya qof kasta waxa uu xaq u leeyahay in uu nabad iyo
nolo ku noolaado iyo xoriyo, waxaana qoraalkaan na soo gaarsiiyay madaxa waaxda
dhowrista xaquuqda aadanaha ee Hay’adda OSPAD C/llaahi Max’ed Cali.
W/D Amiin Yuusuf Khasaaro
E-Mail
amiinkhasaaro@hotmail.com
Faafin: SomaliTalk.com | Feb 18, 2006
Barnaamijkii Radio Xoriyo
17 February
2006
Abaaraha oo gacan xun ku haya Ogadenya iyo Oromiya.
Xadka
Itoobiya iyo Eritereya oo wali xaalkiisu khatar yahay.
Hay’adda UNHCR oo ka digtay doonyaha tahriibka .
Febraayo Waa bil Xusuus
Mudan(Dhacdooyinkii ugu waaweynaa ee ogadenya ka dhacay Febraayo1994).
======================
Abaaraha
ayaa si ba’an u haya Ogaadeenya iyo Oromiya, waxayna abaartu horseeday in
cunto la’aan wayni ay labadaas meelood ka jirto, iyadoo dad ay tiradoodu hal
milyan ka badan tahay ay macaluul qarka u saran yihiin, sidaas waxaa
arbacadii digniin ku bixiyay Ururka Cuntada iyo Beeraha FAO ee Qaramada
Midoobey.
Ururka
Cuntada iyo Beeruhu FAO wuxuu dalal deeqda bixiya ka dalbay in la soo
gaadhaan 18.5 milyan oo dollar, si gargaar degdeg ah labadaas gobol loogu
fidiyo. Ururka FAO wuxuu xaaladda Ogaadeenya iyo Oromiya ku tilmaamay mid
aad u liidata oo wax-ka-qabasho degdeg ah u baahan.
Ururka
FAO wuxuu kaloo intaas ku daray in roobkii Dayrta ee la waayay uu keenay in
xoolo badani ay le’daan. Wuxuu kaloo intaas raaciyay in abaar middanoo kale
ahi ay ka jirto dalalka Soomaaliya iyo Kenya.
Ogaadeenya oo kaliya waxaa ku tabaalaysan in hal milyan ka badan, kuwaasoo
kaalmo degdeg ah u baahan, waxaana la filayaa in xilliga Jiilaalka oo ku
began inta u dhaxaysa bilaha Janwari iyo Maarso uu sii kordhiyo dhibaatada
abaarta ah ee gobolka ka jirta, sidaas waxaa qoraal uu soo saaray ku sheegay
Ururka FAO.
Ururku
wuxuu kaloo sheegay in lacag loo baahan yahay lagu daryeelo xoolaha, si
noloshooda loo badbaadiyo iyo in dadwaynaha la siiyo abuur ay hadhow beeraha
u isticmaalaan iyo gargaarka ku aaddan daryeelka degdegga ah.
Xadka
Itoobiya iyo Eritereya oo wali xaalkiisu khatar yahay.
Dhulka
hubka ka caaggan eek u dheraran xadka u dhexeeya Eritereya iyo Itoobiya ayaa
wali xaaladdiisu aad u kacsan tahay, sidaas waxaa khamiistii lagu sheegay
warbixin ka soo baxday ergada Qaramada Midoobey ee xadka ilaalisa. Ergadu
waxay warbixintan soo saartay labo bilood ka dib markii dawlada Eritereya ay
go’aansatay inay dalkeeda ka caydhiso shaqaalaha Qaramada Midoobey ee u
dhashay dalalka Yrurub iyo Woqooyiga Ameerika.
Ergada
Qaramada Midoobey waxay sheegtay in bilihii u denbeeyay ay labada dale e
Eritereya iyo Itoobiyaba ay dhaqdhaqaaq millatari ka wadeen xadka u
dhexeeya.
Dhinaca
kale dawlada Eritereya ayaa sheegtay in koox dhawr iyo toban qof ka kooban
oo u shaqaynayay Qaramada Midoobey, kuwaasoo la sheegay in la xidhxidhay,
aan la xidhxidhin, balse la xareeyay, si ay u gutaan shaqada qaranka.
Afhayeen
u hadlay Qaramada Midoobey ayaa sheegay in dawlada Eritereya ay wali hayso
11 ka mid ah 13 qof oo Qaramada Midoobey u shaqaynayay oo la qaqabtay
horraantii toddobaadkan. Afhayeenku wuxuu sheegay in xadhiggani uu qayb ka
yahay xayiraada ay dawlada Eritereya ku soo rogtay Qaramada Midoobey, hase
yeeshee dawlada Eritereya ayaa arrintaas ku gacan saydhay.
Dawlada
Eritereya ayaa Qaramada Midoobey ku eedaynaysa inay ku guul darraysatay inay
wax tallaabo ah ka qaado xukuumadda Itoobiya eek u gacan saydhay
oggolaanshaha qaraarkii ka soo baxay maxkamadda adduunka ee ku saabsanaa
xallinta khilaafka xadka Eritereya iyo Itoobiya.
Hay’adda UNHCR oo ka digtay doonyaha tahriibka .
Hay’ada
Qaramada Midoobey u qaabilsan arrimaha daryeelka qaxootiga ee UNHCR ayaa ka
digtay doonyaha aan adkaysiga fiican lahayn ee lagu soo raro dadka
soomaalida u badan ee u soo tahriiba waddanka Yamen.
Qoraal ay UNHCR soo saartay waxay ku sheegay in looga digayo dadka
tahriibayaasha ah inay adeegsadaan doonyaha xaaladoodu aad u liidato ama
cilladaysan ee ay ka soo raacayaan dalka Soomaaliya, taasoo horseeda in
boqollaal dad ahi ay Badda u dhex dhintaan ama khataro kale la soo
gudboonaadaan.
Qoraalkan oo laga soo saaray xafiiska UNCHR ee waddanka Yamen waxaa lagu
xusay in dadka wax tahriibiya ee inta badan ka shaqaysta xeebaha Soomaaliya
iyo Yamen ay dhibaatooyin iyo xadgudubyo ba’an u gaystaan dadka doonaya in
loo tahriibiyo dalka Yamen.
Hay’ada UNHCR waxay kaloo qoraalkan ku sheegtay in dadka wax tahriibiya ee
iska leh doomaha ama maraakiinta dadka lagu tahriibiyo ay dad rakaabka ah ku
qasbaan inay Badda isku dhex tuuraan iyagoo awood adeegsanaya.
Radio Xoriyo
17
February 2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 31 MB ee dhererkeedu yahay
9820 KHZ, Maalmaha Talaadada iyo Jimcaha 7: 30PM waqtiga Afrikada Bari
70,000 oo Qof
oo Mudaharaad ku dhigay Pakistan
iyo Baarlamaanka Norway oo soosaaray xeer mamnuucaya aflagaadada
Diimaha iyo Xildhibaanad
reer Australia ah oo Raali gelin ka bixisay hadalkeed "Qaranka
Islaamka"
Guji..
Kismaayo:
Maleeshiyo si Nabad ah looga saaray Xaafadda Guulwade
»Cali
Max’ed Geedi oo la filayo in uu gaaro Adis –Ababa
»C/llaahi
Yuusuf iyo Geeddi oo dib ugu soo laabtay Jowhar
iyo Warar
Ku Saabsan Abaaraha Soomaaliya .. Akhri Feb 16
»Duq
Ibliis Copenhagen bay Daash ku leedahaye
»Gefka
loo geystey Nabiga (NNKH) waa Xaniinya taabadkii ugu.. »Denmark
oo muslimiinta ku dhex nool ku eedeyneysa.. »Fikirkiisa
Guracan baa dunida dab ka dhaliyey!! »OGAAN IYO ULAKAC | Inj. Nabaddoon
»HADDII NABIGII ALLE
LOO GAFEY MAXAA KULA GUDBOON? |