WARARKA FEB
1, 2006
-
Dowladda
Kenya oo sheegtay in Siyaasiyiinta Somaliyeed aysan..
-
Ra’isul Wasaare Geeddi
oo sheegay in in Cabdulaahi Yuusuf uu ka been abuurtey...
-
Xubnaha labada Gole ee
ku sugan Muqdisho oo sheegay in Baydhabo tahay..
-
Francios Fall oo dhex
dhexaadinaya....
-
Banaanbax lagu
taageerayay in Baydhabo lagu qabto kulanka ugu horeeya..
-
Xaflad sagootin ah oo
loo sameeyay guddoomiyihii hore ee Naadiga Nakadsa..
Dowladda
Kenya oo sheegtay in Siyaasiyiinta Somaliyeed aysan..
Afhayeen u
hadlay Wasaaradda arrimaha dibadda ee Kenya ayaa si weyn loogu soo dhaweeyay
Go’aankii Guddoomiyaha Baarlamaanka ee ahaa in Magaalad Baydhabo lagu qabto
kulanka ugu horeeya ee Baarlamaanka taas oo ay Dowladda Kenya sheegtay in ay soo
dedejineyso in ay wax badan u qabsoomaan baarlamaanka iyo xukumadda maadaama
aysan mudo sanad ah aysan wax kulan isugu imaan. “Ma dooneyno in wixii ka soo
baxay shirkii dib u heshiisiinta Soomaaliyeed ay noqdaan kuwo aan waxtar lahayn
iyadoo la og yahay in Dowlada Kenya shirkaasi ay kaga baxday lacag aad u fara
badan ilaa iyo haatanna aan lacagtaasi weli la bixin” ayaa lagu yiri warkaas ka
soo baxay wuxuu inaas sii raaciyeen “Siyaasiyiinta Soomaaliyeed ma lahan biseyl
siyaasadeed ma doonayaan in dalkooda ay ka saaraan dhibaatada”. Dowladda Kenya
waxay sheegtay in aysan ka daahi doonin sidii shacabka Soomaaliyeed u heli
lahaayeen dowlad u shaqeysa kana saarta dhibaatada, waxaa kalloo warkaas lagu
sheegay in Dowladda ay ka qaybqaadan doonto sidii loo dhex dhexaadin lahaa
xubnaha sar sare ee dowladda oo iyagu khilaafkoodu noqday mid aan dhamaad lahayn,
waxaana la filayaa in Magaalada Jowhar uu dhawaan soo gaaro ergay ka socda
Dowladda si uu kulamo ula yeesho Ra’isul Wasaare Cali Max’ed Geedi oo isagu ka
biyo diidsan go’aankii Guddoomiyaha Baarlamaanka ee ahaa in Magaalada Baydhabo
ay noqoto Magaalada Martigelineysa kulanka ugu horeeya ee Baarlamaanka, sidoo
kale waxa uu ergaynaa la kulmi doonaa Guddoomiyaha Gobalka Sh/dhexe Max’ed Cumar
Xabeeb (Max’ed Dheere) oo isagu ka mid ah ragga sida aadka ah uga soo horjeeda
in Baydhabo lagu qabto kulanka Baarlamaanka
Ra’isul Wasaare Geeddi oo
sheegay in in Cabdulaahi Yuusuf uu ka been abuurtey...
Ra’isul Wasaare Cali
Max’ed Geedi ayaa shalay kulan la yeeshay xubnaha Golihiisa Wasirada ee ku sugan
Jowhar wuxuuna kulankaasi ahaa mid looga hadlayay go’aankii guddoomiyaha
Baarlamaanka ee ahaa in Magaalada Baydhabo ay noqoto halka lagu qabanayo kulanka
ugu horeeya ee Baarlamaanka, wuxuuna Ra’isul Wasaaruhu ku tilmaamay go’aan uu
qaatay shaqsi keliya oo aan laga tashan xubnaha kale ee Dowladda.
Ra’isul Wasaare Cali
Max’ed Geedi waxa uu sheegay in Magaalada Baydhabo ay tahay meel aan xasilooneen
oo aan lagu aamini karin xubnaha Dowladda, isagoo sheegay in arrintaasi ay keeni
karto dhibaato hor leh.
Mar uu ka hadlayay
in Go’aankaasi uu wax ka ogaa iyo in kale waxa uu yiri “C/llaahi Yuusuf iyo
Guddoomiye Shariif Xasan waxa aan isku ogeyn in Shirka lagu qabto Muqdisho ama
Jowhar markaana talada la baahiyo si ay meeshaa uga soo baxdo meel la isku
raacansan yahay. Ra’isul Wasaaruhu waxa uu sheegay in isaga, Madaxweynaha iyo
Guddoomiyaha Baarlamaanka ay isku raaceen in inta aan lagu dhawaaqin Magaalada
marti-gleineysa kulanka in marka hore la soo kormeero Magaalooyinka Muqdisho,
Kismaayo, Baydhabo iyo Jowhar.
Xubnaha labada Gole ee ku
sugan Muqdisho oo sheegay in Baydhabo tahay..
Xubnah labada gole
ee ku sugan Muqdisho ayaa waxa ay isugu yimaadeen kulan uu shir guddoominayay
afhayeenka xubnahaas Cumar Xaashi Aadan, waxaana looga hadlayay go’aankii
Guddoomiyaha Baarlamaanka ee ahaa in Magaalada Baydhabo ay noqoto Magaalada
lagu qabanayo kulanka ugu horeeya ee Baarlamaanka.
Kulankaasi ayaa
xubnaha labada Gole waxay si weyn ugu soo dhaweeyeen in Magaalada Baydhabo lagu
qabto kulankaasi, waxayna ku tilmaameen in Magaaladaasi ay tahay Magaalo u
qalanta in lagu qabto kulankaasi.
“Wax maanta looga
hor yimaado go’aankaasi meesha ma yaalaan, waayo xubnaha ku sugan Jowhar iyo
kuwa ku sugan Muqdisho dhamaantood waxay u qoor dhiibteen Guddoomiyaha
Baarlamaanka isaga ayaa lahaa go’aankaasi” ayay yiraahdeen xubnaha labada Gole
oo sheegay in ay ka qaybgali doonaan kulanka ka dhacaya Magaalada Baydhabo ee
26-ka Febaraayo.
Francios Fall oo dhex
dhexaadinaya....
Madaxweynaha dowladda
federaalka C/llaahi Yuusuf Axmed ayaa wuxuu ka codsaday beesha caalamka inay
gacan ka geystaan sidii loo dhameyn lahaa khilaafka mar kale soo wajahay
dowladda federaalka kaddib markii xafladdii lagaga dhawaaqayey halka lagu
qabanayo kulanka ugu horreeya ee baarlamaanka uu ka baxay Ra’isul wasaare Cali
Max’ed Geeddi oo uu dib ugu laabtay magaalada Jowhar.
Francios Fall oo ah ergayga
gaarka ah ee Qaramada Midoobey u qaabilsan arrimaha Soomaaliya ayaa haatan
dadaal ugu jira sidii uu Ra’isul wasaaraha ugu qancin lahaa in uu ka qeyb qaato
Geeddi socodka nabadda Soomaaliya isla markaana ay dowladdu u noqon laheyd mid
wada shaqeysa.
Ergayga ayaa la filayaa in
maalmaha soo socda uu soo gaaro magaalada Jowhar si uu kulamo ula yeesho Ra’isul
wasaare Cali Max’ed Geeddi iyo guddoomiyaha gobolka Sh/dhexe Max’ed Cumar Xabeeb
{Max’ed Dheere} si uu ugu qanciyo inay ka qeyb galaan kulanka ugu horreeya ee
Baarlamaanka ee la filayo in 26-ka bishan uu ka dhaco magaalada Baydhabo.
Ra’isul wasaaraha iyo Max’ed
Dheere ayaa iyagu si aad ah uga soo hor jeestay in magaalada Baydhabo lagu qabto
kulanka ugu horreeya ee Baarlamaanka, waxey doonayaan in Jowhar ay noqoto halka
lagu qabanayo kulanka ugu horreeya hase yeeshee wareysi uu bixiyey C/llaahi
Yuusuf wuxuu ku sheegay in Ra’isul wasaare Cali Max’ed Geeddi uu ogolaa in
Baydhabo lagu qabto kulanka ugu horreeya ee Baarlamaanka.
Banaanbax lagu taageerayay
in Baydhabo lagu qabto kulanka ugu horeeya..
Iyadoo Magaalada Baydhabo ay
noqotay Magaalada martigelineysa kulanka ugu horeeya ee Baarlamaanka kaasoo
dhacaya 26-ka Feebaraayo ayaa waxaa maalintii shalay ahayd Magaalada Baydhabo a
dhacay banaanbax aad u balaaran kaasoo ay ka soo qaybgaleen qaybaha kala duwan
ee bulshada iyo mas’uuliyiin ka socotay Dowladda Federaalka iyo guddigii loo xil
saary diyaarinta kulanka ugu horeeya laguan taageerayay qabashada kulankaas ee
Baydhabo ayaa waxa ka hadlay mas’uuliyiin ka tirsan Dowladda Federaalka, waxayna
sheegeen in ay aad ugu faraxsan yihiin in Magaalad Baydhabo ay noqoto magaaladii
ugu horeysay ee lagu qabto kulanka Baarlamaanka.
Dadweynaha oo aad u fara
badnaa ayaa ku dhawaaqayay ereyo ay ka mid ahaayeen “Baydhabo way u qalantaa in
lagu qabto kulanka Baarlamaanka, xaq ayay u leedahay in lagu qabto”.
Dadweynaha oo aad u
xamaasadeysnaa ayaa waxaa loo sheegay in loo baahan yahay in si weyn loogu
diyaar garoobo kulankaasi isla marakana looga shaqeeyo nabadgelyada iyo
xasiloonada Magaalada.
Xaflad sagootin ah oo loo
sameeyay guddoomiyihii hore ee Naadiga Nakadsa..
Xaflad si heer sare ah loo
agaasimay laguna sagootinayay Guddoomiyihii hore ee Naadiga NAKADSA laguna soo
dhaweenayay guddoomiyaha cusub ayaa shalay lagu qabtay machadka SIMAD ee
magaalada Muqdisho waxaana ka qaybgalay ardayda ka mid ah naadigaasi, madaxda
Hay’adaha Samafalka, maamulka Dugsiga Axmed Gurey iyo martisharaf kale, ayaa
waxaa ugu horeyntii ka hadlay Mahad Max’ed Xasan oo ka mid ah ardayda Jaamacadda
Banaadir oo sheegay in ardayda Soomaaliyeed looga baahan yahay in ay u is
taagaan sidii ay dadkooda uga badbaadin lahaayeen abaarta iyo dhibaatadeeda,
sidoo kale waxaa ka hadlay Maryan Cabdule Qaawane, Axmed Diini Axmed, Max’ed
Nuur Gacal iyo C/kariin Xuseen Guuleed oo dhamaantood u soo jeediyay
guddoomiyaha cusub in uu halkiisa ka sii wado howshiisa, waxayna sheegeen in
Ardayda Soomaaliyeeed looga baahan yahay in ay gacan siiyaan dadkooda
dhibaateysan.
Waxaa kalloo ka hadlay C/Najiib
Xasan Nuux oo ah maamulaha dugsiga sare ee Axmed Gurey ayaa waxa uu sheegay in
ardayda ka tirsan naadigaas ay tiradoodu gaareyso 1700 oo arday oo ka
qalinjebiyay dugsiga Sare ee Axmed Gurey, marka la fiiriyo tirade ardaydaasi waa
mid tayo wanaagsan oo bulshad wax u qaban karta, wuxuuna u soo jeediyay guddgia
cusub ee Naadiga NAKADSA in ay howshooda horey u sii wadaan.
Guddoomiyihii hore Ciise
Maxamuud Guure ayaa dukumintigii naadiga ku wareejiyay Guddoomiyaha cusub Max’ed
Xaashi Balal, waxaana halkaasi lagu daawaday barnaamij ka hadlayay wax-qabadkii
naadiga mudadii uu jiray, sidoo kale waxaa halkaasi barnaamujyo guubaabo ah ka
soo jeediyay Maxamuud Ibraahi (Qarbuush) iyo koox uu watay.
W/D
Amiin Yuusuf Khasaaaro
E-Mail
amiinkhasaaro@hotmail.com
Faafin:
SomaliTalk.com | Feb 1, 2006
Wararkii Shalay hoos ka
akhri...
WARARKA JAN 31, 2006
-
Dowladaha Talyaaniga iyo
Itoobiya oo la sheegay in ay ka dambeeyeen ka bixidii Geedi..
-
C/llaahi Yuusuf “Geedi
isagaa saxiixay Baydhabo in lagu qabto kulanka...
-
Cali Max’ed Geedi oo si
kedis ah ugu soo laabtey Jowhar...
-
Hadaladii laga yiri
xafladdii ku dhawaaqista goobta shirka lagu..
-
Max’ed Dheere “Kenya
laguma gaari karo go’aan ay leedahay soomaalida..
-
Xildhibaan Faysal Cumar
oo soo dhaweeyay ku dhawaaqida Baydhabo...
-
Hay’adda
DBG oo markii ugu horeysay u tababartay dad Soomaaliyeed oo ka hortaga Sunta
lagu daadiyo...
Dowladaha Talyaaniga iyo
Itoobiya oo la sheegay in ay ka dambeeyeen ka bixidii Geedi..
Xildhibaano
diiday in magaciisa la sheego kuna sugan Magaaalada Nairobi ayaa waxa ay
sheegeen in ka bixitaankii xafladdii lagu dhawaaqayay halka lagu qabanayo
kulanka ugu horeeya ee Baarlamaanka ee Ra’isul Wasaare Cali Max’ed Geedi ay
sababteeda lahaayeen ama ay ka dambeeyay dowladaha Itoobiya iyo Talyaaniga.
“Cali Max’ed
Geedi isaga ayaa ogolaaday in lagu qabto Magaalada Baydhabo kulanka, balse
xiriiro ay la soo sameeyeen ayaa waxay ku booriyeen Cali Max’ed Geedi in uu
isaga baxo xafladda ku dhawaaqista, deg degna uu ugu ambabaxo Magaalada Jowhar
taas oo uu u hogaansamay Ra’isul Wasaare” ayay yiraahdeen xildhibaanadaasi, oo
sheegay in maalmahan uu khilaaf u dhexeeyay Madaxweynaha iyo Dowladaha
Talyaaniga iyo Itoobiya oo iyagu si aad ah u doonayay in kulanka lagu qabto
Magalada Jowhar.
Kulan ay
Magaalada Khartuum ku yeesheen Madaxweynaha iyo Milless Sanawi ayaa la sheegay
in kulankasi uu ku dhamaaday is afgaranwaa iyadoo markii uu ku soo laabtay
C/llaahi Yuusuf Magaalada Jowhar uu sheegay in ay jiraan Dowladu shisheeye oo
aan dooneyn maslaxadda Ummadda Soomaaliyeed, balse loo maleenayo in ay yihiin
Itoobiya iyo Talyaaniga.
Cali Max’ed Geedi
ayaa la filayaa in maanta uu kulan deg deg ah isugu yeero xubnaha labada Gole ee
ku sugan Magaalada Jowhar, kulankaas oo looga hadli doono waxa ay ka yeelayaan
ku dhawaaqistii Baydhabo.
C/llaahi Yuusuf “Geedi
isagaa saxiixay Baydhabo in lagu qabto kulanka...
Madaxweyne
C/llaahi Yuusuf oo khudbad ka jeediyay xafladdii shalay lagu qabtay Hotelka
Grand Regency ee Magaalada Nairobi ee Guddoomiyaha ku iclaaminayay halka lagu
qabanayo kulanka ugu horeeya ee Baarlamaanka in ay tahay Magaalada Baydhabo ayaa
waxa uu ka hadlay Madaxweynuhu maqnaashaha iyo ka baaqsashada Ra’isul Wasaare
Cali Max’ed Geedi ee xafladda.
Madaxweyne
C/llaahi Yuusuf waxa uu sheegay in uu ka xun yahay in Ra’isul Wasaare Geedi uu
ka soo qaybgali waayo xafladda, wuxuuna Beesha Caalamka, Xildhibaanada meesha
joogay iyo Ummada Soomaali-yeedaba uga tacsiyeeyay arrintaas, Madaxweynuhu waxa
uu sheegay in Cali Max’ed Geedi uu saxiixay isla markaana uu ogolaaday in shirku
lagu qabto Magaalada Baydhabo.
“Ra’isul Wasaare
Geedi isagaa saxiixay in Baydhabo lagu kulmo, isagaa Guddoomiyaha Baarlamaanka
la qaatay anna sidaas ayuu ii sheegay, Guddoomiyaha iyo Ra’isul Wasaaruhu iyagoo
wada socda ayay ii yimaadeen waxayna ii sheegeen in ay isku afgarteen arrintaas,
aniguna waan ka ogolaaday, maanta waxaana ku balansaneyn in aan xafladdaan aan
beesha Caalamka iyo Xildhibaanada hortooda kaga dhawaaqno, Geedina in uu ka soo
qaybgalo ayaan ku balansaneyn, haddey sidaas tahayna ma garanayo waxa uu uga
baaqsday Ra’isul Wasaaruhu uuna uga tagay Magaalada Nairobi” ayuu yiri
Madaxweyne C/llaahi Yuusuf oo xildhibaanada ka dalbaday in ay gacan ka gaystaan
sidii Ra’isul Wasaaraha loogu qancin lahaa go’aanka la gaaray.
Cali Max’ed Geedi oo si
kedis ah ugu soo laabtey Jowhar...
Ra’isul Wasaare
Cali Max’ed Geedi ayaa shalay ka soo degay Garoonka Magaalada Jowahr xili la
filayay in uu ka qaybgalo xafladdii looga dhawaaqi lahaa goobta lagu kulminayo
Baarlamaanka Soomaaliya kaddib markii uu ka soo biya diiday qorshaha Madaxweyne
C/llaahi Yuusuf iyo Guddoomiyaha Baaralamaanka Shariif Xasan Shiikh Adaan oo
isku raacay in kulanka lagu qabto Magaalada Baydhabo.
Ra’isul Wasaare
Geedi markii uu ka soo degay Garoonka diyaaradaha ee Magaalada Jowhar wax hadal
ah ma bixin inkastoo saxaafaddu weydiisay waxa uu ku saluugay shirka
Madaxweynaha iyo Guddoomiyaha Baarlamaanka ay ku go’aamiyeen in Magaalada
Baydhabo laga dhigo goobta kulanka Baarlamaanka, balse waxa uu isugu yeeray
xubnaha golayasha ee ku sugan Magaalada Jowhar maalinta berito ah in ay shir
isugu yimaadaan uuna siin doono wixii war ah oo ku saabsan arrintaas.
Soo bixiitaanka
Ra’isul Wasaare Geedi uu ku gacan seyray qorshaha Guddoomiyaha iyo Madaxweynaha
ayaa waxay ku soo beegan tahay xili xasaasi ah oo Guddoomiyaha Gobalka Sh/dhexe
Max’ed Dheere uu isna sheegay in uusan aqbaleynin in lagu kulmiyo Baarlamaanka
meel ka baxsan Magaalada Jowhar haddii taas la waayana aysan gorgortan geli
karin kulanka Baarlamaanka uu ka dhaco caasimadda Muqdisho.
Hadaladii laga yiri
xafladdii ku dhawaaqista goobta shirka lagu..
Xildhibaano iyo
Wasiiro ka tirsan Dowladda Federaalka KMG ah iyo dublamaasiyiin iyo martisharaf
ka socotay beesha caalamka ayaa shalay isugu tagay hotelka Grand Regency ee
Magaalada Niarobi halkaas oo ay ka dhaceysay xaflad qado ah oo lagu iclaaminayay
goobta sida weyn loo sugayay ee Guddoomiyaha Baarlamaanku ku qaban doono kulanka
ugu horeeya ee Baarlamaanka Soomaaliya. Kulankaas oo u ka qaybgalay Madaxweyne
C/llaahi Yuusuf ayaa waxaa ugu horeyn ka hadlay guddoomiyaha Baarlamaanka
shariif Xasan Shiikh Aadan oo sheegay in uu ku faraxsan yahay in howl dheer
kaddib ay soo gebgabowdo la tashiyadii iyo howshii u saabsaneyd sheegista goobta
shirka. Waxa uu sheegay in maanta uu aad ugu faraxsan yahay in uu si rasmi ah
ugu dhawaaqo in 26-ka Feebaraayo ay tahay maalinka uu dhacayo kulanku isla
markaanka uu ka dhacayo Magaalada Baydhabo, waxa uuna ka codsaday Xildhibaanada
in ay si deg deg ah ku yimaadaan mudadaas. Waxa uu sidoo kale ka codsaday beesha
caalamka iyo wadamada deeqaha bixiya in ay taageeraan go’aankaas isla markaana
ay soo dedejiyaan dhaqaalhii ay ugu talagaleen qabsoomidda kulankaas, isagoo
sidoo kalana ka codsaday in ay goob joog ka ahaadaan maalinta uu kulankaasi
dhacayo. Prof. C/raxmaan Xaaji Aadan (Ibbi) oo ka tirsan Wasiirada Dowladda kana
mid ah xildhibaanada KMG ah ayaa halkaasi ka akhriyay warqad qoraal ah oo ay ku
qoran yihiin dhamaan qodobadii ay ku heshiiyeen Guddoomiyaha iyo Madaxweynaha
iyo waqtiga iyo meesha kulanka lagu qabanayo, sidoo kale waxaa halkaasi ka
hadlay Madaxweynaha KMG ah C/llaahi Yuusuf Axmed waxa uuna sheegay in uu ku
faraxsan yahay in Guddoomiyaha Baarlamaanka howshii laga sugayay uu maanta soo
gebagabeeyo, waxa uu sheegay in howshaan ay tahay howshihii Guddoomiyaha isaga
iyo inta kalana laga rabo in ay taageeraan, wuxuu sidoo kale sheegay in uusan
garanaynin sababa uu Ra’isul Wasaaruhu uga maqan yahay kulanka, waxaa kaloo
halkaasi isna ka hadlay ergayga gaarka ah ee xoghayaha guud ee Qaramada Midoobey
Francios Fall oo u mahadceliyay Madaxweynaha, Guddoomiyaha Baarlamaanka iyo
Xildhibaanada waxa uuna sidoo kale ka codsaday beesha caalamka in ay si deg deg
ah u diyaariyaan dhaqaalihii shirka.
Max’ed Dheere “Kenya laguma
gaari karo go’aan ay leedahay soomaalida..
iyadoo si wayn
loo sugayey go’aanka ku dhawaaqista goobta uu ku kulmayo golaha Barlamaanka
soomaaliya ayaa waxaa soo baxaya khilaaf xoogan oo dhexyaala madaxda ugu sareysa
dowladda KMG ah kas oo ku sabsan magaalada lagu kulmayo waxaana maalintii shalay
ahayd ka hadlay arintaas gudoomiyaha gobolka sh/dhexe maxamed cumar xabeeb
(maxamed dheere) oo sheegay inuusan raali ka hayn in kulanka laga wareejiyo
magaalada jowhar.
maxamed dheere
waxa uu sheegay in kulankaas uu ka dhoco jowhar hadii kalena uu ka dhoco
magaalada muqdisho wixii inytaas ka baxsanina ay tahay wax laga leeyahay dano
iyo ujeedooyin qarsoon, waxa uu sheegay maxamed dheere in madaxdii soomaaliyeed
ay ku sugan yihiin dfalka gudihiisa ee aysan joogin dalka kenya tas oo loo
qaatay in uusan la dhacsanayn howsha ay wadaan madaxweynaha iyo gudoomiyaha
baarlamaanka.
waxa uu intaas
raaciyey inaysan sharci ahayn in magaalada baydhabo lagu kulmiyo golaha
baarlamaanka waxa uuna sheegay in magaalada jowhar ay si sharci ah ku tahay
saldhiga kmg ah ee dowladda magaalada muqdishona ay si shrci ah ku tahay
caasimadda soomaaliya isagoo intaas ku daray inaysan magaalda baydhabo aysan
meelna ka soo gali karin laabadaas.
“Kenya laguma
gaari karo go’aan khuseeya soomaaliya waayo dowladdii iyo madaxdii Soomaali-yeed
waxay ku sugan yihiin dalka gudihiisa sidaas darteed ma jirto wax ka khudseeyo
kenya arimaha soomaaliya” ayuu yiri maxamed dheere oo intaas ku daray in cidii
ku dhawaaqda in kulanku ka dhoco meelka baxsan muqdisho iyo Jowhar ay iyadu
masuul ka tahay wixii ka yimaada arintaas.
Xildhibaan Faysal Cumar oo
soo dhaweeyay ku dhawaaqida Baydhabo...
Xildhibaan Faysal Cumar
Guuleed oo ka soo jeeda Gobalada Waqooyi ee Soomaaliya ayaa ka hadlay arrimo
dhowr ah oo isugu jira ku dhawaqistii Guddoomiyaha Baarlamaana goobta uu ka
dhacayo kulanka Baarlamaanka, howlihii ay waayadaan labada Gole ka hayeen
gobalka Banaadir iyo sidoo kale anjadayaasha looga hadli doono kulanka ugu
horeeya ee golaha Baarlamaanka.
Xildhibaanku waxa uu soo
dhaweeyay go’aankii uu ku dhawaaqay Guddoomiyaha Baarla-maanka in kulanka ugu
horeeya ee Baarlamaanku ka dhaco Magaalada Baydhabo ee Gobalka Bay 26-ka
Feebaraayo, xildhibaanku waxaa kalloo uu ka hadlay howlihii labada Gole ay ka
wadeen Gobalka Banaadir, waxa uuna sheegay in sidoodii ay u sii socon doonaan,
marka kulanka ugu horeeya uu dhacana howlaha Xamar ma is taagayaan inta
dhimanaya waxaa lagu dhameystiri doonaan kulanka Baarlamaanka.
Wuxuu sidoo kale
Xildhibaanku sheegay in kulanka Baarlamaanka marka ugu horeysa ee xildhibaanadu
is arkaan ay kaga doodaan sidii ay meel isaga dhigi lahaayeen, isla markaana ay
uga heshiin lahaayeen khilaafaadkii hore kaddibna laga doodo la islana meel
dhigo sidii ay u shaqeyn lahayd Dowladda, Baarlamaankuna u yeelan lahaa fikir
mideysan. Mar uu sidoo kale ka hadlaayay soo laabashada Ra’isul Wasaare Cali
Max’ed Geedi uu ku soo laabtay Magaalada Jowhar ayuu yiri “anigu ma joogo
Nairobo waaxaanse ku suganahay Muqdisho laakiin waxaan ogahay in Ra’isul Wasaare
Geedi uu saxiixay in Baarlamaanku uu ku kulmo Baydhabo.
Hay’adda DBG
oo markii ugu horeysay u tababartay dad Soomaaliyeed oo ka hortaga Sunta lagu
daadiyo...
Hay’adda DBG ayaa
shalay soo saartay War Saxaafadeed ku saabsan tababar dad soomaaliyeed ka
hortaga waxyaabaha haraadiga ah ee sunta ah ee lagu daadiyo xeebaha Soomaaliya.
Tababarkaas oo
socday mudo labo todobaad ah ayaa waxaa war-saxaafadeedkasi u qornaa sidatan:-
Kaddib dhul gariirkii ka dhacay Badweynta Hindiya ee Koonfur Bari qaaradda
Aasiya taariikhdu markay ahayd December 26-dii 2004 si gaar ahan ugu dhiftay
qaar ka mid ah wadamada kala ah Induniisaya, Thailand, Sri-Langa iyo Maldives
soona gaaray xeebaha Soomaaliya, haddaa hay’adda daryeel bulsho guud DBG iyadoo
dhowrsa barnaamujkeeda qiimeynta waxyeelada ka dhasha masiibooyinka waxay si deg
deg ah u dirtay saraakiil sahan ku sameysa baaxadda dhibaatada saameysay
bulshada iyo deegaanka Soomaaliyeed mudadii lagu jiray howshaas waxaa xeebaha
Soomaaliyeed gaar ahaan qaybaha badaweynta Hindiya lagu arkay haaman iyo
fuustooyin waaweyn oo daxaleystay isla markaana si gaara h u xiran oo badidood
badda ka soo caariyay kaddib mowjadihii xowliga dheer ku socday ee a dhashay
Sunaamigii.
Haamahaas iyo
fuustooyinkaas sida laga soo xigtay dad ku nool xeebaha ku firirsan badweynta
Hindiya waxay gaysteen khasaarooyin isugu jira dad iyo doonyo laga soo bilaabo
Jubadda Hoose iyo kuwa Mudug.
Musiibadaas
kaddib DBG waxay baaq u dirtay caalamka si loo darso waxyaabaha ku dhex jira
qalabkaas oo la tuhunsan yahay ilaa iyo hada in ay ku jiraan sun kala duwan si
khatartaas loo xakameeyo dalka waxaa dhawaan yimid khuburo shisheeye oo tababar
siisay koox Soomaliyeed mudadii u dhexeysay 11 ilaa iyo 15-kii Janaayo.
Nooca tababarka
waxa uu ahaa sidii kooxda DBG u wajihi lahayd isaga ilaalin lahayd qatarka
haamanka iyo sidii dadka soomaaliyeed looga badbaadin lahaa ilaa iyo heer iyadoo
la ogsoon yahay in xilka adag ay qaban karto dowlad.
Tababarku waxa uu
ka koobnaa gargaarka deg degga ah iyo caafimaadka guud, qaabka neefsashada iyo
qalabka difaaca, ka sifeynta sunta qalabka iyo goobta shaqada, qaabka
qaaditaanka halista ah iyo istimcaalka Global Positioning. Haddaba Abuukar
Shiikh iyo Cumar Colaad oo ah saraakiisha ugu sareysa hay’addaasi ayaa waxay ugu
baaqeen shacabka Soomaaliyeed in wixii war ah oo dheeraad ah oo ku saabsan
haamahaas Ha’adda DBG si kooxda tababaran loogu diro.
W/D Amiin
Yuusuf Khasaaaro
E-Mail
amiinkhasaaro@hotmail.com
|