Gabay: Qaadan kari waayay

• Abwaan Maxamed Dhagaafe Cilmi Nairobi Kenya
  Email:m_dhagaafe@hotmail.com ama m_dhagaafe@yahoo.com

  ---

Gabaygan la magac bacay Qaadan kari waayay waxaa curiyay Abwaan Maxamed Dhagaafe Cilmi waxa uuna gabaygu soo baxay 5/12/2006 ta waxaa uuna gabaygan ka Hadlayaa marxaladihii dhibta badnaa ee ummadda soomaaliyeen soomartay iyo waliba Wadada qaloocan ee hadda lagu socdo haddiiba dagaal la hurinayo.

Waxaa kale oo Abwaanku uga hadlayaa gabaygan Cawaaqib xumada Qabyaalada iyo Sida ummaddeenu u jeceshahay.

Waxaa kale oo Gabaygu ka hadlayaa dhaqanka is qarxiska oo kusoo siyaaday ummadda soomaaliyeed ayada oo dadka Soomaaliyeed aysan caado u lahayn in ay is qarxiso . 

Waxaa gabaygu ku bilaabmayaa sedan…. 

Qaadan kari waayay 

1. Qamuunyoodayay xalay miyaan jiifki qaban waayay
2. Sidii ruux qunbulad cunay miyaan qaraw lasoo toosay
3. Qalbigaygu wuxuu diidayoon qoonsadaa jiraye
4. Soomaaliyoo qaadannoo qorigi aan tuurin
5. Oo wali qabiil aan ka harin Nabadna aan qaadan
6. Oo sida qaruun aan is dhalin kala qaloonaysa
7. Oo qaybba meel-lagu xirtoo aan is qabanaynin
8. Oo qiima-laawiyo nimaan gayin ku qooqaayo
9. Oo qaarad kale laga hagoo qodobo loo yeersho
10. Oo quuqle iyo qaaqle iyo qayl u talinaayo
11. Oo ay qorsheeyeen dagaal laysku qiro beelo
12. Oo shacabka aan laga qorayn qayladiyo dooda
13. Nabaddiina laga quustayoon lays qadarinaynin
14. Qaxarkiyo dhibaatada jirtoo aan la qarinaynin
15. Qun markaan u eegaa qalbigu sii qarxanayaaye
16. Dhulkeenii qasaaraha ka jira qaadan kari waayay. 
     
17. Nin raggaa qushuuciyo wadani qiimaloo wacane
18. Midkii qurux dagaal moodayow malahan qayraade
19. Qaxarkii lasoo maray haddaan qodobo soo qaato
20. Qarankeeni aafoobay iyo qaaraddii gubatay
21. Qunbulado rasaasiyo wixii balo ka qiiqaysay
22. Wixii shacab la qoor gooyayoo qoon la halakeeyay
23. Qabuur laguma gurinine wixii mayd qolfo`ah yaalay
24. Qofkii laanta qaadkaahi ay qiimo kor u dhaaftay
25. Guryihii qurxoonaan jiroo hoobiyuhu qaaday
26. Jidkii la isku qaadahayayoo qaraxu aafeeyay
27. Warshadihi lakala qaybsadoo nalaka qoon daystay
28. Qabqabliyo waxay nagu dhigeen qarash kuwii siiyay
29. Qun markaan u eegaa qalbigu sii qarxanayaaye
30. Dhulkeenii qasaaraha ka dhacay qaadan kari waayay. 
     
31. Qoorgooyo joogtaahi waa qodob inoo yaale
32. Dad ayaan qadayn maalintaan dhiigba qubanayne
33. Waa qaali Nabadduye maxaa ina qilaaf siiyay?
34. Waxdhanbaan qaracan wada ahayn qoriga awgiise
35. Waxdhanbaa ninkii qaaliyaba qoorta loo jaraye
36. Waxdhanbaan qasaare iyo hoog qaxar u taagneyne
37. Waxdhanbaan qax iyo silic marniyo nolol qaraarkeede
38. Waxdhanbaan qaraabo iyo ehel la isku qiimayne
39. Waxdhanbaa qurxoontii haween qaydka loo jaraye
40. Intaasoo qasaraaa markii qaadir ina dhaafshay
41. Qabqablihina uu naga qabtoon wada qaboobaanay
42. Qiiqkale inaan hurino oo qaylo kor u duusho
43. Oo aan qorshaynaa dagaal qaadan kari waayay. 
     
44. Qalabkoo an boobniyo galaay qoomamaa xigine
45. Warhoy Nabad inaan qaadanaa maanta qayr badane
46. Qowlkayga igu raaca oo qoriga aan tuurno
47. Isqadariya waad noqon-kartaan qaran walaallaaye
48. Soomaali qowlka iyo diin waysku wada qayre
49. Haddaan qolana gaalada galayn cunaya qaansiirka
50. Waxa qaarba meel laagu xiray qaadan kari waayay. 
     
51. Qurux male qabyaaladi ninkii qiimalaa garane
52. Anakuna qareen baan u nahay qaali iyo wile
53. Qalbigaa illaah nooga dhigay sida quraankiiye
54. Qofkastana qabiil iyo hanbaa qoorta loo suraye
55. Nimaan qalad lahaynbaa harkii qaan rag loo diline
56. Dhaqankaas an qiimaha lahayn qaadan kari waayay. 
     
57. Qaraxyadi ka dhacay baydhaboo qoonka badan laayay
58. Wixii soo qorsheeyiyo wixii qaas ahaan fuliyay
59. Qasdigay lahaayeen haddaan yaraha qiimeeyay
60. Waa wixii ciraaq iyo qaribay qoonka falastiine
61. Niman yohow qaracanbaan ahoo qaadan kari waayay. 
     
62. Nimanyohow qaxootiga noqdoo xabash u qoor dhiibtay
63. Iyo kuwa jahaad qaada loo qori xalmoodaaya
64. Haddii aad qadarin naga rabtaan qaata taladayda
65. Oo shacabka qiimeeya oo qaxarka aan dayno.
66. Qurgooyada ka hara wada jirkaad qayrku halaysaane.. 
     

                       Dhamaad

Abwaan Maxamed Dhagaafe Cilmi Nairobi Kenya
Email:m_dhagaafe@hotmail.com ama m_dhagaafe@yahoo.com

Faafin: Aragtida gabaygan waxaa leh qoraaga ku saxiixan

Faafin: SomaliTalk.com | Dec 6, 2006