Warqad Furan oo ku socota ummadda Soomaliyeed
Warqad Furan oo ku socota
- Ø Madaxweynaha
Kumeelgaarka Dowladda Federaalka Mudane Abdullahi Yusuf
- Ø Xubnaha Baarlamaanka ku
meelgaarka ee Federaalka Soomaaliya
- Ø Waxgaradka,
Aqoonyahanka iyo guud ahaan muwaadhinka Soomaaliyeed
Talo Jeedin Tirsigeedu yahay:
01102404 - Habka Badbaadinta Soomaaliyeed
Horudhac:
Waxaan shaki ku jirin asbaabaha soo
socda in ay yihiin kuwa ugu waaweyn ee dumiyey qaranka
Soomaaliyeed:
1) Ku xadgudub Xuquuqda Ilaah
(SWT) ee ah in la ilaaliyo xuduudiisa lagana dambeeyo si buuxda oo
aan shaki ku jirin xukuumad iyo shacabba dhan waliba oo ka mid ah
nolosha umadda.
2) Waxaa si buuxda loogu
dhaqmin loona ixtiraamin dasturkii iyo xeerarkii u degsanaa qaranka
ee lagu hagi lahaa siyaasadda, dhaqaalaha, garsoorka, waxbarashada,
iyo guud ahaanba arrimaha bulshada isla markaasna suurogalin lahaa
cadaalad, sinnaan, midnimo iyo barwaaqo.
3) Waxaa loo adeegsaday
awoodda dawladda ee maamul, sharci deign, iyo garsoorba danaha
gaarka ah ee maamul wadeenada dawladda, qabiilkooda, iyo kooxaha ay
gacan saarka leeyihiin iyadoo halkaa ku dhuntay dantii guud ee
qaranka, hantidiisa, cadaaladi, xuquuqda muwaadhiniinta iyo
midnimadii soomaaliyeedba.
4) Waxaa la waayey oo dib
loogu diimey habkii demoqaadhiyadda ee soomaalida waligeed ku dhaqmi
jirtey heer qabiil iyo mid dawladeedba ka hor xilligii kacaanka ee
dawladdii Moxamad siyaad. Waxaa beddelay nidaamkaasi nidaamkii
kacaanka ee loogu magic daray Nidaamka Hatiwadaaga ee cilmiyeesan
kasoo burburiyay habkii lahaanshaha gaarka ah iyo dhaqaalihii dalka,
dhaqankii iyo diintii umadda soomaaliyeed, walaalnimada, iyo
midnimadii shacabka iyo weliba dhismihii qoyska soomaaliyeed. Wuxuu
sidoo kale caburiyay lana dagaalamay xurriyaddii xagga afka (hadalka),
maskaxda (fekerka), qalbiga(caqiidada) iyo gacanta (qoraal iyo wax
soo saar) ee muwaadinka soomaliyeed gaar ahaan culumaa’u diinka,
waxgaradka, aqoonyahanka, iyo hogaamiyaasha dhabta ah ee beelaha
soomaliyeed.
5) Waxaa ka dhashay arrimaha
kor ku xusan taag darri dawladeed, dhaqaala xumi, deen qaran oo
badan, tuugsi qaran oo joogta ah, daryeel la’aan ku dhacday
shaqaalaha dawladda, booliska, garsoorka, xoogga dalka, iyo dhammaan
xubnaha shacabka soomaaliyeed. Waxaa sidoo kale soo if baxay khilaaf
joogta ah ama tafaraaruq, isnaceeb, xaasidnimo, munaafiqnimo ama
daacad la’aan, xusul riix, musuqmaasuq, eex, qaraabo kiil, khiyamo
qaran, qabyaalad qaan gaartay, xulufo iyo mucaarad hubeysan, xagal
daacin qaran iyo waliba boobka hantida dalka.
6) Waxaa bilowdey halkan
hubeysan iyo mid siyaasadeed oo loogu talo galay in lagu badbaadiyo
qaranka laguna dumiyo dawladdii siyaad ee kali taliska heyd ee
sabatay dhibaatooyinka kor ku xusan. Hase yeeshee waxaa ka dhashay
arrinkaasi in dawladdii mujrimka aheyd ee siyaad barre ay adeegsato
awooddeedii mileteri si ay u baabiso mucaaradka hubeysan iyo cid
alla ciddii taageertay mucaaradka hiil iyo hooba. Waxaa nasiib darro
in halkaa naf iyo maalba ku waayeen dad badan oo soomaaliyeed oo
xuquuqdoodii difaacayey una dagaalamayey sidii ay u soo ceshin
lahaayeen sharaftooda.
7) Kama danbeystii dagaalkii
xaq u dirirka wuxuu isu bedelay dagaal sokeeye oo socday muddo 14
sano ah kasoo weli ka jira meelaha qaarkood ee dalka. Waxaa sidoo
kale dagaalkii sokeeyey ka dhashay dalka in uu si buuxda u burburo
una qeybsamo dawlado gobaleed madaxbannaan iyo qeybo ay ka taliyaan
kooxo hubeysan oo ka faa’ideystay burburka qaranka.
Haddaba waxaa nasiib wanaag ah in
bishan octoobar tobankeedii 2004ta, ay inoo curatay dawlad federal
ah oo loo idil yahay laguna dhisey axdiga cusub ee qaranka oo ay
hore u ansixiyeen wakiilada umadda soomaliyeed kuwasoo ku shireyey
Kenya muddo ku dhow laba sano.
Waxaa la gudboon hogaamiyaasha
dawladda cusub ee federaalka oo uu ugu horreeyo madaweynaha lagu
doortey aqlabiyadda baarlamaanka soomaaliyeed Mudane Cabdullaahi
Yuusuf Axmed in ay texgeliyaan talooyinka hoos ku qoran:
1) In aad dib u eegtaan
asbaabaha burburiyey qaranka soomaaliyeed sida matalan kor ku xusan
oo aad ku talaabsataan sidii aad uga fogaan laheydeen asbaabahaas
iyo kuwa la midka ah ee qaranka dumiyey.
2) In aad la timaadaan aragti
cilmiyeesan iyo xikmad ballaaran oo aad ku hogaamisaan qaranka
idinkoo soo bandhigaya qorshihiina siyaasdeed, dhaqaale, dibudhiska
qaranka, iyo dibumideyta umadda muddada shanta sano ee ku meelgaarka
ah.
3) In la idin ka arko Iiman,
daacadnimo, dabacsanaan, cadaalad, sinnaan, wadajir iyo akhlaaq ku
dheehan hab dhaqankiina siyaasadeed, dhaqaale iyo mid bulshaba
idinkoo islamarkaas muujinaya in idin dib uga noqon doonin gusha
kasoo hoyatay nairoobi cid kastoo is hortaagtana laga guuleysan
doono Allah idinkii..
4) In nabad iyo siyaasad lagu
xaliyo khilaafadka ka jira dalka gudihiisa oo aan marnaba awood loo
adeegsan
5) In aad ku dadaashaan in aan
loo baahan ciidan shisheeye oo dalka la keeno tasoo sababi karta
dhibaatooyin hor leh. Haddiise laga fursan waayo waa meesheeda
markii la waayo xal kale.
6) In aad u yeertaan
aqoonyahanka iyo waxgradka soomaaliyeed ee dibedda ku nool si ay uga
qeyb qaataan dib u dhiska qaranka.
7) In degdeg loo soo dhiso
maamul gobeleedyada dhiman ee gobolada koonfuta isla markii ay
cagodhigato dawladda federaalka.
8) In loogu baaqo xubnaha
shacab soomaaliyeed in ay gutaan waajibaadkooda muwaadhinnimo iyagoo
bixinaya wixii looga baahdo naf, maal, aqoon iyo xirfadba si qaranka
cagihiisa ugu istaago islamarkaasi looga maarmo tuugsi dibaadeed oo
ah gunnimo iyo sharaf dhac iyo waliba in xoogag shisheeye si buuxda
dibadda nooga taliyaan waayo lax walba meehsii ay is dhigto ayaa
lagu qawracaa. Haseyeeshee, wax dhib ma laha in saaxiibada umadda
soomaaliyeed laga qaato wixii taageero ah oo ay bixiyaan iyadoo aan
lagu xirin shuruudo dhaawaya sharafeena iyo madaxbannaanideena una
addegeynin danaha gaarka ee deeqbixiyaasha. Sidoo kale xubnaha
shacab soomaaliyeed waxay si buuxda ula xisaabtami karaan
dowladdooda marka ay la yimaadaan waajibaadkooda muwaadhinnimo naf
iyo maalba.
9) In dawladda federaalka ah
ee ku meelgaarka ay si buxda u soo diyaariso dustuurkii uu ku dhami
lahaa qaranka ka dib marka ay dhammaato shanta sano ee kumeelgaarka
ah iyadoo ay waajib tahay in dustuurkaasi uu marnaba ka horimaanin
shareecada diinta Islaamka ee saldhigga u ah dhaqanka umadda
soomaliyeed sida ku cad axdiga ku meelgaarka ee qaranka iyo in
dastuurkaasi lagu ansixiyo afti qaran.
10) Ugu dambeytii, in aad
diyaarisaan shanta sano gudaheeda tira koob xaq oo lagu sameeyo
dadka iyo hantida qarank ee degaan walba oo ka tirsan deegaanada
dalka.
Guuleysta Allah Idinkii.
Waxaa diyaariyey warqaddan Furan:
Jubaland Foundation: Somali Philanthropic & development Organization
Ururka daryeelka iyo horumarinta soomalyeed: Jubaland Foundation
Founder and Chairman: Abdisalan H. Malla
Email:
awmadow@yahoo.com
Afeef: Aragtida qoraalkanwaxaa
lehqoraaga kusaxiixan