Xiriirka Caalamiga
ee Warfidiyeenka oo ugu baaqay Madaxweynaha cusub ee Soomaaliya inuu
ixtiraamo xorriyadda saxaafadda
Maxamed Xaaji (Ingiriis)
Brussels, Belgium
Email:
Ingiriis@yahoo.com
Xiriirka Caalamiga ee Warfidiyeenka
dunida (International Federation of Journalists) loona soo gaabiyo
IFJ ayaa ugu baaqay Soomaaliya inay ku xoojiso distuurkeeda Qaranka
iyo sharcigeeda saxaafadda qodobo damaanad-qaadaya xorriyadda
saxaafadda. Xiriirku, waxa uu tilmaamay baahi degdeg ah in loo qabo
in la hagaajiyo heerka xorriyadda saxaafadda.
War Saxaafadeed uu shalay soo
saaray Aidan White oo ah Xoghayaha Guud ee IFJ, waxa uu ku yiri "Dadka
Soomaalidu waa inay ka soo kabsadaan afar iyo toban sano oo ay
argagixinayeen maliishiyooyinka hubeysan ee waddanka jooga, waana
inay u dhaqaaqaan dhinaca dimoqraadiyadda, halkaasoo ay jirto
ixtiraam ku jeeda xorriyadda saxaafadda iyo hadalka."
Waxa uu si gaar ah u weydiistay
Madaxweynaha cusub inuu ixtiraamo xorriyadda hadalka, si ay ugu
sahlanaato inay ka qayb qaataan suxufiyiinta xirfadleyaasha ah
doodaha la xiriira tallaabooyinka saxaafadda cusub. IFJ, waxa ay
xuseen inay raacayaan bayaanka ka soo baxay SOJON oo ah urur
suxufiyiin Soomaali ah oo lamaane la ah IFJ iyo ururada kale ee
xuquuqda aadanaha iyo saxaafadda.
"Waxaan soo dhoweynaynaa baaqa
suxufiyiinta iyo kooxaha bulshada rayidka si loo difaaco, loona
xoojiyo xorriyadda hadalka ee Soomaaliya" ayuu yiri White. "Waxaan
taageereynaa sheegashadooda iyo baaqooda la xiriira in la joojiyo
faafreebka tooska ah iyo kan aan tooska ahayn."
Dhanka kale, Bernard Ginet oo ah
Agaasimaha mashruucyada IFJ aan kula kulmay xafiiskiisa usbuucii
hore ayaa sheegay inay diyaar u yihiin inay xiriir ahaan uga
difaacaan suxufiyiinta Soomaalida wax kasta oo halis gelin kara
howlahooda. IFJ, waxa ay aaminsan tahay ayuu yiri in la helo
mabaa'dii aasaasi ah oo lagu adkeynayo xorriyadda hadalka Soomaaliya.
Email:
Ingiriis@yahoo.com