SHIRWEYNIHII KOOWAAD EE URURKA INDHOOLAYAASHA SOOMAALIYEED OO MUQDISHO KA DHACAY

W/D: Amiin Yuusuf Khasaaro | Muqdisho | Nov 27, 2004

Waxaa Maalintii khamiista ahayd Hotel-ka Shamo ee magaalada Muqdisho lagu qabtay shirweynihii koowaad ee ururka Indhoolayaasha Soomaaliyeed, waxaana ka qaybgalay dhammaan indhoolayaasha Soomaaliyeed ee ku nool gobolka Banaadir iyo kuwii ka yimid degmooyinka ku dhow-dhow gobolka banaadir,

Indhoolayaashii ka qaybgaley shiweynaha (foto Xiis  )

waxaana ugu horreyn halkaasi ka hadlay Sheekh C/raxmaan Maxamuud Culusoow oo isagu si aad ah ugu dheeraaday Taariikhdii ay soo mareen indhoolayaasha Soomaaliyeed isagoo sheegay in waqtigii ay jirtay dowladda ay heli jireen gacan ballaaran, sidoo kale wuxuu sheegay in ALLAHA u naxariistee Xaashi Wehliye oo ka mid ahaa ganacsatada Soomaaliyeed iyo Maxamed Siciid Ciyoow (Gentelman) oo isagana ka mid ahaa ganacsatadii Soomaaliyeed ay kaalmayn jireen indhoolayaasha Soomaaliyeed, waxaa kaloo ka hadlay C/fitaax Maxamed Daahir oo ah nin indhoole ah oo haddana aqoonyahan ah wuxuuna sheegay in shacabka looga baahan yahay inay gartaan in ruuxa indhaha qaba iyo midka aan qabin ay isku mid yihiin. Xubninii kale ee halkaas ka hadlay waxaa ka mid ahaa Dr. C/risaaq Dalmar oo ah dhaqtar ku taqasusay cudurrada indhaha wuxuu sheegay in indho la’aantu ay ku timaado dhowr xaaladood, kuwo indho la’aantoodu ku timaado xuubka indhaha, kuwo ay biyo ka galaan dabadeedna ka ridaan, kuwo cudurro ka ridaan iyo kuwo dhaawacyo ay ka ridaan.

Gudoomiyaha Shirkadda Coca-Cola, Cabdirisaaq Ciise (foto  Xiis)

Gudoomiyaha shirkadda Coca Cola, Cabdirisaaq Ciise, oo isna halkaas ka hadlay ayaa waxa uu sheegay in shirkadda Coca Cola ay qayb ka qadan doonto u gargaaridda dadka indhoola-yaasha ah isagoo sheegay inay indhoolayaasha Soomaaliyeed u furi doonaan iskuul ay wax ku bartaan iyo inay shirkaddu ugu deeqi doonto 10-Compurter oo ah noocay isticmaalaan dadka indhaha la’, waxaa kaloo halkaasi ka hadlay Abwaan Abshir Nuur Faarax oo sheegay in Ganacsatada Soomaaliyeed looga baahan yahay inay u gargaaraan dadka indhoolayaasha ah,

Dr Cabdiraxmaan Luunge (Foto Xiis)

Dr. C/raxmaan Maxamed Faarax (Luunge) ayaa loo doortay inuu noqdo guddoomiyaha ururka Indhoolayaasha Soomaaliyeed, waxa uuna u mahadceliyay shirkadda Coca Cola oo u suurogeliyay inay qabsadaan shirweynahaan iyo weliba Hotel Shamo, wuxuuna sheegay in looga baahan yahay indhoolayaasha Soomaaliyeed inay iskaashadaan si ay uga baxaan dhinaatada ay ku jiraan. Waxaa kaloo Dr. C/raxmaan Luunge oo qoraal dheer ka aqrinayay warqaddo ay ugu qornaayeen barnaamijkii qudbadda ahayd ee uu ugu talo galay shirweynaha isagoo adeegsanaya afrta Braille, wuxuuna sheegay in tiknologiyadda Casriga ah ee Caalamka ay suurogelisay in qofka indhoolaha ah iyo midka indhaha qabay ay isku si u dhaqmaan.

W/D: Amiin Yuusuf Khasaaro

E-Mail amiinkhasaaro@hotmail.com

Muqdisho, Soomaaliya

Faafin: SomaliTalk.com | Nov 27, 2004