Nairobi: Guriga Madaxweynaha DFKMG oo Tuugo Soo Weerartay

17/11/2004

Kenya - Labo nin oo hubaysan ayaa xalay isku deyay in ay soo jebiyaan guriga madaxweynaha DFKMG uu ka degan yahay Nairobi (oo ku yaal dhanka galbeed ee magaalada Nairobi), arintaas oo sabatay in ciidanka ilaalada kenya ee aagaas ilaalinayay ay dableydaas tacshiirad is weydaarsadeen, halkaasna ay tuugadii ka carareen, sidaas waxaa yiri sarkaal Soomaaliyeed oo ay soo xigatey warbaahinta Koonfur Afrika.

Wax dhaawac ah lama soo sheegin.

Dhacdadaas ka dib ciidanka ammaanka kenya waxa ay adkeeyeen ammaanka madaxweynaha DFKMG, Cabdhullaahi Yuusuf Axmed, oo ah madaxweynaha bishii Octoobar 10keedii ay Nairobi ku doorteen 275 xubnood oo ka tirsan baarlamaanka Soomaaliya ee lagu soo dhisay Kenya.

"Aad iyo aad ayaan ugu qanacsanahay ammaanka kenya. Waana mas'uuliyadooda in ay arinta baaritaan ku sameeyaan" sidaas waxaa yiri Yusuf Mohamed Ismail, afhayeenka madaxweynaha Soomaaliya.

Madaxweynaha Soomaaliya shalay galab ayuu kusoo laabtay Nairobi [warka safarada waftiga MDFKMG hoos ka akhri].

ISHA: Sapa-AP

Faafin: SomaliTalk | 17/11/2004

• Beesha Mudulood oo Kulankii Labaad Ku Taageeray Wasiirka Koowaad

Silsiladda Taariikhda Islaamka: Qaybtan oo Labo Toddobaadle ah waxay kamid noqday qormooyinka ugu xiisaha badan ee kusoo baxa SomaliTalk, waxana ay maanta ku saabsan tahay "Nabiga (scw) Oo La Amray u Istaagidda Gudbinta Dacwada".. Qore: Shiikh C/risaaq Macalim Abshir

---

Madaxweynaha Dowlada FKMG ah iyo Afhayeenka Baarlamaanka oo galabta ku soo laabtay Magaalada Nairobi.

 Canab Mumtaz | Somalitalk | Nairobi
canabmumtaz@yahoo.com

16/11/2004

Wafdiga ka socday Dowlada iyo baarlamaanka oo baryahaan la wada sugayay in ay dib ugu soo laabtaan dalka kenya oo ah halka ay ka socdeen wadahadalada soomaaliyaa ayaa maanta ka soo dagay garoonka Jommo kenyatta ee magaalada Nairobi.

 

Wafdiga waxaa ku soo dhaweeyay garoonka wasiirka kowaad,ku xigeenka gudoomiyaha baarlamaanka iyo xildhibaanada baarlamaanaka FKMG ah ee soomaaliya.

 

Madaxweyne C/llaahi Yuusuf Axmad,Afhayeenka Baarlamaanka Shariif Xasan Sh.Iyo wafdiga weheliyay safarkooda oo u gacma haatinayay xubnihii soo dhawaynayay ayaa dib ugu soo laabtay fariisimadoodii.

 

Wafdiga ayaa lagu wadaa in ay bari galinka hore kulan la yeeshaan baarlamaanka si ay uga warbixiyaan safaradii ay soo galeen iyo waxyaabihii ay kala soo kulmeen intii ay ku jireen safaradas kala duwan ayna ku soo kala bixiyeen qaar ka mid ah wadamada Afrika iyo Dunida muslimkaba.

 

Madaxweynaha Dowladda FKMG ah ee soomaaliya iyo xubnaha la socday ayaa kulamo la soo yeeshay madaxda wadamada ay tageen iyagoo war bixinayay xaalka soomaaliya hor dhigayna ajandaha dowlada cusub iyo barnaamijyadda ay uga baahan tahay wadamadaas oo ah taageero dhaqaale iyo aqoonsi si wax badan looga qabto dhibka ka jira soomaaliya dowladdana ay noqoto mid si dagan uga howl gasha soomaaliya.

 

Dhamaan kulamaasa waxyaabihii ay kala soo kulmeen ayaa laga sugayaa in ay baarlamaanka hor dhigaan kulankooda uga horeeya.

 

Dhinaca kale wasiirka koowaad ayaa wali wada kulamadii uu la lahaa siyaasiyiinta.madax dhaqameedka,baarlamaanka iyo aqoonyahaniinta si ay ugu suurta gasho in uu dhiso gollaha wasiiradda dhibna uusan uga imaanin,wasiirka oo aan wali la dhaarinin maalmaha soo socda ayaa lagu wadaa in loo dhaariyo xilkiisa kadibna uu guda galo soo dhisida gollihiisa wasiirada oo si wayn loo wada sugayo.

Canab Mumtaz
Somalitalk | Nairobi
canabmumtaz@yahoo.com

16/11/2004

SHILALKA BAABUURTA MAREYKANKA XILLIGA CIIDAHA:  "hal qof ayaa ku dhinta shil baabuur 30-kii daqiiqaba" ka akhri warbixintii Cabdiweli Haybe..

---

Madaxwaynaha Soomaaliya iyo Wafdigiisii ayaa Si Sareeysa loogu soo dhaweeyay Wadanka Jabuuti

Axmed Muuse Cabdulle(Idaawaqaca)
axmeddheere65@hotmail.com 
Kenya, Nairobi Somalitalk | 15/11/2004

C/lahi Y.   | Geelle

Madaxweynaha jamhuuriyada federaaliga ah ee Soomaaliya C/laahi Yuusuf Axmad ayaa galabta gaaray dalka Jabuuti.

Madaxwaynaha iyo wafdigiisa ayaa safaro ku soo maray wadamo ka tirsan Carabta iyo Afrika isagooo socodkiisa ka bilaabay Ugaandha Galabtana ka Yimid Sanca wadanka Yaman.

Madaxweyne C/laahi Yuusuf oo tan iyo markii xilka loo dhaariyey ujeedadiisa aheyd sidii wadamada carabta uga dhaadhicin lahaa dhismahaan cusub iyo nidaamka la sameeyey ayaa magaalada Sanca waxa uu kula kulmay madaxweynaha dalkaas, jaaliyada Soomaaliyeed iyo mas’uuliyiin ka tirsan dalka Yaman.

Madaxwaynaha Soomaaliya Mudane Cabdulaahi Yuusuf Axmed waxaa garoonka Jabuuti ku Soo dhaweeyay madax sarsare oo ka tirsan wadanka Jabuuti. Waxaana uu kulan casho ah la wadaagay Madaxwaynaha Dhigiisa Jabuuti ee Ismaaciil Cumar Geele iyo madaxsaroo ka tirsan doowlada Jabuuti iyago kawada hadlaya arimaha Soomaaliye ee Cakiran.

Madaxwaynaha Soomaaliya waxa uu cadeeyay in imminka uu dhamaaday khilaafkii xagga siyaasada ah ee u dhaxeeyey Carabta iyo Ethiopia  ee quseeyey siyaasadda Soomaaliya. Waxa kale oo uu sheegay in hogaamiye kooxeedyada aan loo ogolaan doonin in ay ku dhaqaaqaan wax qaynuunka ka baxsan.

Axmed Muuse Cabdulle(Idaawaqaca)
axmeddheere65@hotmail.com 
Kenya, Nairobi Somalitalk

15/11/2004

---

Ra'iisul Wasaaraha Soomaaliya oo  Qado Sharaf u Sameeyay Baarlamaanka FKMG
» Siyaasiyiin looga baqayay in ay dowladda ka horyimaadaan oo Muujiyay taageerada DFKMG..
»Xadgudubka loo gaysto Saxafiyiinta Soomaaliyeed...
»14 Maxbuus oo laga siidaayey Xabsiga Dhexe ee Galkacyo..
»Xaflad: Gabagabadii duruustii Ramadaanka & Xamar...
 Wararka oo faahfaahsan ka akhri halkan... Guji...

• Waraysi: Mudane C/kariim Axmed Cali oo ah mid ka mid siyaasiyiinta Muqdishu ahna xubin baarlamaanka Soomalida

Wariye:C/casis Axmed Gurbiye, Cairo, Egypt | Email: gurbiye@hotmail.com | 12/11/2004

Madaxwaynaha Soomaliya Madane C/lahi Yusuf Axmed iyo wafdi uu hogaaminayo ayaa

C/lahi Yusuf iyo wafdigiisa ayaa  galabnimadii khamiistii Qaahiro ku yimid booqasho aan rasmi ahayn si ay uga qayb galaan tacsida Madaxwaynaha Falastiiniyiinta Yaasir Carafaad oo Jimcihii ka dhacday magaalada Qaahira ka hor inta aan lagu aasin magaalada Raamalaah ee daanta galbeed.

Wafdigan oo ay ka mid yihiin Gudoomiyaha Barlamaanka Shariif Xasan iyo xubno ka tirsan baarlamaanka cusub ayaa la dajiyay Hotelka Hilton Heiopolis Qaahira kaasoo wax yar u jira Airporka qaahira.

Mudane C/kariim Axmed Cali oo ah mid ka mid siyaasiyiinta Muqdishu ahna xubin baarlamaanka Soomalida ee dhawaan lagu dhisay Mbagathi ayaa ii xaqiijiyay  in Qaahiro u yimaadeen tacsida Carafaad galabta sabtidana ka dhoofayaan.

C/kariim ayaa sidoo kale ii sheegay  in  subaxnimada sabtida la kulmaan Caamir Mousa, X/guud ee urur goboleedka Jaamacadda Carabta oo ka mid ahaa madaxdii ka qayb gashay tacdii carafaad halkaasna wafdiga Soomalida isku arkeen.

Mar uu ka jawaabayey Su,aal ahayd sababta mas,uuliyiinta Masaarida uga gaabsadeen la kulanka Madaxwaynaha Soomaliya iyo wafdigiisa waxaa uu yir:{waxay masaarida casuumaad madaxwaynaha u fidiyeen isagoo jooga Adis-Ababa, duruufo xaga safarka ayuu madaxwaynuhu la baaqday ka dib waxay casuumaad noo fidiyeen inagoo joogna Sanca waxaan u sheegnay in xiligaas aan balamo la lahayn wadano ay ka mid yihiin Sacuudiga, Qatar iyo Cumaan, hadda waxaan u nimid tacsi waxaanna filayaa madaxwaynaha halkan dib ugu soo laabandoono dabayaaqada bisha 12-naad}.

Mudane C/kariim mar aan kula kaftay in jago waziir loo balanqaaday iyo in kale, cid damaanad qaad haysato ma jirto ayuu iigu jawaabay isgoo dhoola cadaynaya.

Mar aan wax ka waydiiyay waxyaabihii ay kala soo kulmeen wadamadii ay booqdeen waxaa uu iigu jawaabay  in dalalka Uganda iyo Yeman labada balanqaadeen in dhanka amniga gacan nagasiinayaan, taageerayaanna dadaal kasta oo wax loogu qabanayo shacabka Soomaliyeed, mar uu ka hadlayey Madaxwaynaha Yeman waxaa uu carabaabay in Cali C/llahi Saalix dadaal uga galay in wadamada Carabta Dowladan cusub garab istaagaan.

Ugu dambeentii waxaan C/kariim Axmed Cali waydiiyay rajada uu ka qabo in dowladan iyo Xukuumadda la dhisayaba ku guulaysataan dib u dhiska iyo dib usoo celintii qarankii Soomaliya? C/kariim oo su,aashaas ka jawaabayena waxaa uu ku dooday inuu rajaxayo in fursadan tahay mid qaali ah hadii aysan  ahaynba  tii ugu dambeesay  in laga faa,idaystana tahay mid u taalo Umadda Soomaliyeed,isagoo intaa raaciyay in umadda Soomaliyeed ka daashay dagaal haatanna loo baahanyahay in loosoo wada jeesto dib u dhiska dalka,isagoo dhalinyarada ku boorinaya in codkooda mideeyaan si barito dalka ugu hogaamiyaan wadaniyad,hor umar iyo sinaan.

Mas,uuliyiintii aan halkaas kula kulmay waxaa sidoo kale ka mid ahaa Gudoomiyaha Barlamaanka Soomalida Mudane Shariif Xasan,shariifka waa nin furfuran,degan dadkiisana ka mid ah.

Wafdigan uu C/llahi yusuf hor ka cayo ayaa horay usoo booqday wadamo ay ka mid yihiin Uganda iyo Yeman ka dibna kusoo cimraystay masjidka barakaysan ee magaalada Mekka.

 Wariye:C/casis Axmed Gurbiye,Cairo,Egypt
gurbiye@hotmail.com | 12/11/2004

• Aaskii Yaser Arafat ee Ramalah