Wariye:  C/casiis Axmed Gurbiye, Cairo, Egypt.
gurbiye@hotmail.com

12/11/2004

Madaxwaynahii geeriyooday ee Falastiin Yaasir Carafaad ayaa Tacsi iyo xus qarameed dad bani kasoo qayb galeen  subaxnimadii Jimcihii  loogu dhigay magaalada Qaahira ka hor  inta aan lagu aasin Raamalaah.

Madaxwaynayaal, Boqoro, Amiiro, salaadiin iyo mas'uuliyiin ka kala socda in ka badan 40 dal oo caalamka ah  ayaa kasoo qayb galay xusukan oo lagu qabtay masjidka Jalaa'a ee ciidamada cirka dalkan Masar oo ku yaala xaafadda Masr jadiida, halkaas oo ay Sh.Al-Azhar sh.Maxamed Sayid Dhandhawi iyo dad kale kula dukadeen mayda Carafaad  ka hor inta aan laga duulin garoon milatari  oo goobtaas  dhowr boqol oo mitir u jiray.

VIDEO: Daawo Aaskii Arafat Sawirka: CBC

Madaxwaynaha Soomaliya mudane C/llahi Yusuf Axmed iyo wafdigiisa oo haatan ku sugan Qaahira ayaa ka mid ahaa wufuudii ka qayb gashay tacsida Madaxwayne Yasir Carafaad, iyadoo sidoo kale Madaxwaynayaashii Carbeed ee goobtaas isugu tagtay ay ka mid ahaayeen Madaxwaynayaasha Suuriya Bashaar Al-asad, Yeman Cali C/llahi Saalix, Boqor C/lahi Urdun, Suudaan Cumar xasan Al-bashiir, Al-jeeriya C/casiis Butafliiqa, Zaynu caabidiinka Tunis iyo ninka leh dhaxalka boqotooyada Suudiga Amiir C/llahi Binu C/casis Aala- Sucuud.

Waxaa sidoo kale kasoo qayb galay madax caalami ah oo ka kala socda wadamada Afrika,wadamada dhexdhexaadka iyo shakhsiyaad ka socda hay,adaha caalamiga.

Carafaad ayey madaxdaas aragtidii ugu dambeesay  la raaceen markii lagasoo dajiyay gaarigii siday waxaana inta aan la saarin diyaaradii u duulin lahayd Cariish loo tumay heesta calanka Falastiin ee Bilaadii Bilaadii...iyadoo halkaas ku ilmaynayeen gabadhiisa Zahwa Carafaad oo ehel ahaan ku wehliyeen Suha Carafaad oo ah garoobtii uu ka geeriyooday Carafaad iyo walaashiid.

meydkii Arafat markii la keenay Ramalah | Sawirka Aljazeera.

Saacado yar kadib naxashkii Carafaad oo Cariish lagaga qaaday mid ka mid ah diyaaradaha  qumaatiga ukaca ayaa laga dajiyay Raamalaah halkaas oo dadkii isugu soo baxay awgeed  mudo 30 daqiiqo ka badan ku qaaday ragga amniga in maydka diraadda laga soo dajiyo si loogu aaso qabri ku meel gaar ah oo carafaad looga sameeyay xaruntiisa Raamalaah .

Maamulka Falastiiniyiinta  ayaa sheegay in Carafaad si rasmi loogu aasidoono Qudus marka ay duruufta saamaxdo, Carafaad ayaa ku taamayey in lagu aaso magaalada Yuhuudu haysato ee Qudus.

Abuu Camaar ayaa khamiistii ku geeriyooday Isbitaalka perci ee magaalada Paris halkaas uu mudo laba todobaad ah la jiifay xanuun aan ilaa hadda la shaacin,waxuuna ku xijaabtay da,dii 75-naad.

   Falatiiniyiinta ayaa Ruuxi fatuux si kmg ah ugu doortay madaxwaynaha Falastiin halka ururka PLO madax looga dhigay Cabaas Abuu maazin iyadoo xukuumadda Falastiinna R/wazaare ka yahay Axmed Qurai.

  Dhanka kale Madaxwaynaha Maraykanka G.Bush iyo R/wazaaraha Ingiriiska T.Bleir oo shir jaraa,id si wada jir galabtii jimcihii  ugu qabray Washington ayaa soo qaaday arinta Falastiin.

 Madaxwayne Bush ayaa sheegay in uu rajeenayo in dowlad Falastiin ka dhalato inta aanu xafiiska ka tagin 2009-ka isagoo intaa ku daray in loo baahan yahay isbedel kusoo kordho xaaladda B/dhexe.

Sidoo kale  golaha amaanka  ayaa shir deg deg ah isugu yimid si looga wada hadlo arin Falastiin isagoo uu halkaas kala hadlay X/guud ee Q/midoobay K.anan.

Wariye:  C/casiis Axmed Gurbiye, Cairo, Egypt.
gurbiye@hotmail.com | 12.11.2004