Garoowe: Wadaadada
Qaadiriyada oo weeraray masaajid ku yaal Garoowe...
Habeenimadii Sabtida ee
Axaddu soo geleysey (May 20, 2007), wakhtigii salaad cisha,
ka hor ayaa waxaa soo weeraray maasjidka Al-Raxma oo ku yaal
bartamaha magaalada, koox debleey ah, mar uu tafsiirka
Quraanka Kariimka ah ka socday masaajidka.
Dad goob joog ahaa, ayaa u sheegay SomaliTalk, in ay niman
hubaysan soo galeen deyrka masaajidka, dabadeedna rasaas
fureen.
Weerarkaas masaajidka wax
khasaare ah ma uusan geysan dhimasho iyo dhaawac toona.
Beryahaan danbe, waxaa magaalada Garoowe dhexdeeda lagu
arkayey baabuur farabadan oo nooca tiknikada ah iyo sidoo
kale, rag aad u hubaysan oo ka tirsan Qaadiriya ee Gobolada
Puntland, iyadoo uu haatan ku sugan yahay wadaadka ugu
sareeya Qaadiriya gobolada puntland, magaalada Garoowe.
Waxaa beryahaan danbe ay dadku isla dhexmarayeen waxa ay u
danleeyihiin Qaadiriyada oo aan waligood la arag iyagoo
sidaan oo kale u hubaysan.
Waa markii ugu horeysay oo la arko baabuur iyo ciidan aad u
hubaysan oo ay wataan Qaadiriyadu.
Waxaa ku cusub Garoowe, in arintii ahaan jirey isdhaafsi
hadalo kulkul ay haatan isu bedeshay xabad.
Maamulka Puntland ayaa hada ka hor dood cilmiyeed isugu
keenay labada dhinac masaajidka Saxaaba ee magaalada Garoowe
, kaas oo amaankiisa aad loo adkeeyey ayna ka soo qayb
galeen masuuliyiin badan oo ka trisan dowlada iyo daweyne
aad u fara badan.
Waxyaalihii laysku mari waayey ka dib markii kitaabta laysu
soo gurtay ayaa waxaa ka mid ahaa, in la masaafaysto
gabdhaha oo ay culumada kale ku sheegeen wax diintu inaga
xaaraantimaynayso, halka Qaadiriyaduna ay arintaas
difaaceen, iyagoo tusaale, u soo qaatay waxay ugu yeereen
dhaqanka Soomaalida ee soo jireenka ahaa kaasoo labada qof
isla baxaan maadaama ay iyagu isdoorteen, balse taas
culumada kale ayaa ku tilmaantay mid laga soo gudbay oo
wakhtigii jaahiliyada ee diinta ka hor la isticmaali jirey.
Buurtinle ayeey ahayd
meeshii haatan ka hor ay ku dhinteen uu ku jiro iimaankii
masaajidka , wakhti lagu guda jirey salaadii cishaha, ka dib
markii bambo lagu soo tuuray masaajidka dhexdiisa, taas oo
khasaare ba'an geysatay, xiligaas ka horna waxaa jirey in
gacmaha laysula tago tiro ka dhawr jeer.
Haatan, inkastoo ay arintu cusub tahay hadana majirto cid ku
mashquulsan sidii loo xalin lahaa.
Isku soo wada duub oo dadku waxay isweydiinayaan, " nin
masaajid weeraray cida uu cafinayo".
Kalluumaysatadii ay soo
qabteen ciidamada ilaalada xeebaha DGPL oo la sii daayey.
Waxaa Axadii May 20, 2007
ooda laga rogay dhamaan maxaabiistii ay soo qabteen
ciidamada ilaalada xeebaha ee Puntland.
Siideynta maxaabiistaan ayaa timid ka dib xiiriir dhex maray
maamul goboleedka Puntland iyo safiirka Masaarida ee
Soomaaliya.
Tirada maxaabiista ayaa lagu sheegay 45 oo saddex ka mid ah
yihiin kabtanno.
Tirada marakiibta ayaa iyana ah labo markab oo laga Leeyahay
isla dalka Masar, maxabiista baxarida oo mudo 3 toddobaad la
hayey ayaa maanta dib loogu soo celiyey maraakiibtii ay
saarnaayeen oo ku xiran dekada magaaladan Boosaaso, waxaana
ka muuqatay farxad sida ay sheegayaan dad goob joog ahaa.
Safiirka dalka Masar u fadhiya Soomaaliya Saciid Maxed Mursi
ee oo muddo ku sugnaa magaladan Boosaaso ayaa ku amaanay
maamulka Puntland siidaynta baxrida reer Masar.
wasiirka dekedaha iyo kalluumaysiga iyo Safiirka dalka Masar
Saciid Maxed Misri ayaa shir jaraa'id si wada jir ah ugu
qabtay xarunta wasaaradaa.
Saciid Maxed Raage ayaa ugu horayn Saxaafada uga waramay
sababta keentay siidaynta maxbiistan waxana uu sheegay in ay
isku afgarteen maamulka Puntland iyo Safiirka Dowlada
Masaaridu.
Walina waxay maraakiibtii iyo shaqaalhii ku sugan yihiin
magaalada Boosaaso, oo ay dhaqso uga shiraacan doonaan.
Shirkii Nabad-gelyada
Gobolka Mudug oo soo geba-gaboobay:
Shir looga hadlayey nabad-gelyada guud ahaan gobolka Mudug
oo uga socday odayaasha Koonfurta iyo Waqooyiga Gaalkacyo,
ayaa la soo geba gabeeyey, lays kuna af gartay dhamaan
waxyaalihii ay kawada hadleen cuqaashu.
Gobolka Mudug waxaa inta badan ka dhaca iska hor imaadyo
sababa dhimasho iyo dhaawac.
Waxaa loo aanaynayaa dhacdooyinkaas inta badan in ay
keenaan, aanooyin qabiil, kala dhac gawaari, daaqsinta
xoolaha iyo ceelasha oo laysugu yimaado iwm.
hay'ada DRC ayaa u fidisay gogasha ay isugu yimaadeen
odayashaan oo dhowaantaan shir kan lamid ah ugu qabatay
odayaasha dhaqanka gobolka Nugaal magaalada Garoowe.
Qodobada laysku afgartay labada dhinac ayaa waxaa ka mid
ahaa. in aan la difaacin gacan ku dhiiglaysaha, in lasu soo
celiyo wixii la kala dhoco sida gawaarida , in dadka lagu
wacyi geliyo in la sii xoojiyo wada noolashaha dadka
walaalaaha ah ee ku nool gobol kaas, in layska kaashado
dhinacyada wax wada qabsiga gobolka iyo qodobo kale oo fara
badan.
mid ka mid ah odayaasha ka soo jeeda Koonfurta Gaalkacyo oo
lagu magacaabo, Yuusuf Xaashi Cilmi ayaa u sheegay saxaafada
in ay odayaasha labada dhinac oo isku duuban ay wacyi gelin
ku soo sameeyeen dadka ku nool Gobolka Mudug, Waqooyiga iyo
Koonfurtaba.
Gobolka Mudug ayaa ah gobol ay wada degan yihiin dad ka wada
shaqeeya dantooda guud oo isku dhexnool, xaga ganacsiga iyo
wax wada qabsiga kaleba, balse dad yar oo wax ma garata ah
ayaa mararka qaarkood ku kaca falal burcad nimo.
Isku soo wada duub oo, maanta ka dib dagaaladii sokeeye ee
Soomaaliya, gobolka Mudug wuxuu ka mid yahay gobolada ugu
degan Soomaliya, waxaana ku soo barakacay kumayaal dad ah oo
ku soo cararay dagaaladii magaalad caasiimada ah ee
Muqdisho.
Dowlada Hoose ee Garoowe oo
boorka iska jaftay:
Waxaa lagu dhaliili jirey duq-magaalooyinkii hore ee soo
maray Garoowe, kuwa aan waxba ka qaban daryeel ka degaanka,
sida nadaafada wadooyinka, dhulka sida sharci darada ah
loogu habsado oo bilicda magaalada wax weyn u dhima.
Hada, duqa magaalada Garoowe, C/qaadir Cismaan Foodcade ayaa
dadku ku amaanayaan wax ka qabadka bilicda iyo nadaafada
magaalada caasiimada ah ee ay isugu imaanayaan dadka badan
ee ka kala imaanaya dhamaan gobolada DGPL , kuwa Soomaaliya
amaba caalamka.
Waxaad ku arkaysaa magaalada meelo badan oo dhegax iyo guryo
sharci daro ahaa ka dhisnaan jireen oo iminka si fiican
looga shaqeeyey. meesha ugu nadaafada xumeyd ayaa ahayd
Togga Majo-Maqarsho ee biyaha siiya dooxooyin badan oo ku
yaal gobolka Nugaal.
Majo-maqarsho wuxuu ahaan jirey meel nadiif ah oo ay ka
cabaan xoolaha nooc kasta, sida geela, lo'da, ariga, fardaha
iyo dhamaan nafleyda kale iyo sidoo kale dadka.
Balse, sana dadaan danbe ayaa Togga Majo-Maqarsho wuxuu
musqulo iyo kudaafad u ahaa dadka soo barakacay.
Maanta mar aan soo maray Togga ayaan waxaan ku arkayey
iska-rogooyin iyo dadweyne ka wada olole nadaafadeed waxaana
ka muuqday bilic wanaagsan.
Togga Masho-maqarsho wuxuu u dhaxeeyaa meelaha ay dadku ugu
badan maraan.
Wuxuuna u dhaxeeyaa Magaalada iyo Jaamacada Puntland State
University, Garowe Teacher Training College, Isbitaalka Guud
ee Garoowe, Xeradii Ciidamada Militeriga Soomaaliya qeybtii
Konton iyo Afraad iyo waliba iminka oo laga dhisay guryo
hoteelo ah oo aad u qurux badan, sidaas awgeedna waxaa
isdaba maraya oo togga goynaya dadka u socda meelahaas
muhiim ka ah. Waxaad ku arkaysaa magaalada baabuur ay
cod-baahiyaal cod dheer ku xiran yihiin oo lagu wacyi
gelinayo dadku in ay dhawraan nadaafada.
Maxamuud Cumar Bill
Garoowe
mcbille@gmail.com
252-5-794242
May 20, 2007
Daabaco
Boggan | Print