Reer Siidarow Ciid Mubaarak—iyo Farriin!
Qore: C/Laahi Janno
Minneapolis, MN
buugiyoqalin@hotmail.com
Markii aynu salaaddii Ciidda Carafo tukunay, baa aniga oo
aynu isla soconno siddex wiil oo dhalinyaro ah ka soo wada
baxnay sarta Konfenshanka ee ku taalla magaalo-faraska
Minneapolis. Inkastoo ay meeshu buuq badneyd, waxa aan dareemay
gariirkii telefoonkeygii gacanta. Jeebka ayaan si halhaleel ahi
gacanta ula galay. Cidda i soo wacday ayaan eegay. Waa
hooyadeey.
“Guriga iiga sii hor mar,” ayaa ka mid ahaa
hadaladeedii, “siina hagaaji ka hor intayan martida iman, oo
maamooy daahyadii dhaqnaa ku xir daaqadaha.”
Xaafaddii Siidar ayaan imid. Sarta E (ii) la yiraahdo ayaan
galay. Mise…?! Waan amakaagay. Waa maalin Ciid. Waa farxad.
Waa raxmad. Waa maalin is-booqasho. Waa maalin
is-marti-gelin. Waa maalin weyn….iyo hal elafeetar? Labadii
elafeetar ee Sarta E mid baa fadhiistay, oo shaqo-gabay.
Meeshana waxa tubnaa dad faro-badan oo salaaddii Ciidda ka soo
noqday. Inta yara is-buufiyay, ayaan si caro lehi jeebka ugala
soo baxay telefoonkaygii gacanta.
“Resident Service,” ayuu nin ka mid ah sikuuritiga igu
yiri, “how can I help you?”
“Meeshatan waa laysku xayiran yahay, oo elafeetarka
ayaa fadhiyee ma ogtihiin?” ayaan ku iri.
“Waan ka xunnahay in ay sidan dhacdo,” ayuu ninkii
sikuuritiga ahaa iigu jawaabay, “waanse gudbinayaa farriintan.”
“Laakiin maanta waa maalin Ciid ah,” ayaan la soo
booday si uusan arrinka u dhayalsan, “dadku way isku
xayirmayaan.”
“Caadiyan, elafeetarka waa aynu xirnaa Arbaca walba
subaxeeda si loo mariyo jekab,” ayuu igu yiri, “balse waxaynu u
yeeraynaa kambanigii shaqada ku lahaa elafeetarkan.”
Wada-hadalkayaga waxa uu ku billowday kuleyl, balse
waan yara dabcay markii aan dareemay in ninkii sikuuratka ahaa
uu diyaar u yahay is-fahan.
Hayeeshee su’aalo kale ayaa ii soo baxday: sarahan
dhaadheer ee xaafaddan Siidar soo ma lahan guddi ina matala oo
ay Soomaali ku jirto (Riverside Plaza Tenants’ Association,
Board of Directors)? Maxayse Soomaalida ina matasha qorshaha
ugu darsan waayeen in maalinka Ciidda ahi aan la xirin
elafeetarada? Mise uma aysan indho-dheereen? Su’aalahan waxa
ay danqiyeen bukto hore (opened a can of worms). Sidaa awgeed
su’aalo kale ayey igu dhaliyeen: sideedaba maxaa loo xirtay
baarkinka Sarta E? Illaa iyo intee la’eg buuse baarkinku
xirnaanayaa? Muxuuse maamulka Riverside Plaza ku tala-galay in
uu sameeyo si uu dhibta baarkin la’aanta ahi uga qafiifiyo dadka
deggan saraha dhaadheer—iyo martidoodaba? Dadka meesha degganse
miyeysan mudneyn in loo warramo, raalli-gelintoodana laysku
taxallujiyo?
Qiyaastii sanad ka hor, aniga oo hooyadeey uga soo adeegayay
dukaanka Plaza ee dabaqa siddexaad ku yaalla, ayaa waxa ay
isheydu qabatay islaan Aasiyaan ahoo cutushnimo la soo
godantay. Waxa ay si baqdin leh tallaabada ula raadsaneysay
jaranjarta kor loogu raaco xafiiska laga xukumo saraha
dhaadheer. Arrintii way i danqisay. Waxa ii soo baxday in
sidoo kalena ay jiraan islaamo kale oo waayeel ah hayeeshee dhib
ku qaba korista jaranjartaa—islaamahaasoo jeclaan lahaa
elafeetar muuqda, elafeetar leh batoon ay riixan karaan markii
ay u socdaan xafiiska laga xukumo saraha, elafeetar ay maamulan
karaan oo ay af-yaqaanaan. Bacihii aan adeegga ku siday inta
dhigay, baan jeebka kala soo baxay telefoonkeyga gacanta.
“Resident Service,” ayuu nin sikuuritiga ah igu yiri,
“how can I help you?”
“Haddii ay dadku rabaan in ay aadaan xafiiska
maamulka,” ayaan hadalka uga billaabay, “xaggee u marayaan?”
“Jaranjarta ayay soo qaadan karaan,” ayuu iigu
jawaabay—waana runtiisa.
“Haddiise ay yihiin dad naafo ahna?” ayaan u raaciyay.
“Elafeetarka ayay soo qaadan karaan,” ayuu misana si
boobsiis ahi iigu yiri—tanina waa runtiisa.
Ha yeeshee meesha aan la rabay weli islama aynaan
gaarin.
“Haddee waayeelka xaafaddan deggan inta badani waa dad
aan af-Ingiriisiga ku hadlin. Marka sidee bay ku ogaan karaan
in uu jiro elafeetar u qaada kor iyo xafiiska maadaama aysan
badi ku hadlin af-Ingiriisiga?”
“I don’t know,” ayuu iigu soo af-jaray.
“Thank you,” ayaan aniguna u daba-dhigay, anigoo
dareemay in uu fashilmay.
Fashil noocma ah? Fashil sababtoo ah haddii maamulka
saraha dhaadheer uu u nugul yahay rabitaanka iyo baahida dadka
deegaanka, waxa uu ninkan sikuuritiga ahi i siin lahaa jawaab
waafi ah—jawaab markii ay ugu yartahay ay ka muuqato in ay la
socdaan waxa la tabanayo; in ay ku gudo-jiraan in ay wax qabtaan
iyo sidii ay u qaban lahaayeen; in uu yoolkoodu yahay qancinta
iyo u qidmeynta dadka deggan saraha dhaadheer ee xaafaddan
Siidar… in uu i siiyo jawaab wax un garowsi ah laga dhadhansan
karo. Taa caksigeeda, ninkii sikuuritiga ahaa ee xafiiska
fadhiyay waxa uu hadal iigu gunaanaday jawaab laga akhrisan karo
farriin ah: “Aniga waxa aan ahay waardiye meel fadhiya; heegan u
ah difaaca ninka i shaqaaleystay; wixii dhib ahee adiga
soo-galootiga ah ku heystana madaxay ka bannaan…waxbana hayga
weydiinin, xitaa talaba ha ahaatee.”
Runtii, adduun ay caddaaladu ka maqan tahay waa adduun
uu isla-xisaabtanku suulo. Waa adduun uu la-xisaabiyihii la
xisaabtamo lama-xisaabiyihii—waa adduun uu daalimkii xisaabinayo
dulmanihii. Waa adduun uu dulmanihii ku hoos jiro cagta
“sharciga”, daalimkiina uu cuskanayo garabka “sharciga”. Horaa
loo yiri ri’ waliba shilahay is-dhigtaa lagu qalaa.
Markii aan telefoonka isa saaray ayaan neef weyn soo tufay.
Bacaheygii ayaan siddada ku dhegay, una dhaqaaqay dhankii sartii
ay hooyadey deganeyd. Waxa aan garowsaday in ninkii sikuuritiga
ahaa uusan qaladka laheyn. In qaladku uu ka imanayo dadyowga
deggan saraha dhaadheer ee xaafadda Siidar kuwaasoo badi isugu
jira soo-galooti iyo wadani dan-yar ah, kuwaasoo ka sooman faham
iyo cod mideysan oo ku aadan noloshooda xaafadda Siidar—ka
sooman hal cod oo baahiya rabitaankooda iyo baahidooda. Hal cod
oo aan habaar iyo af-lagaado aheyn, balse dulmi-diid ah.
Xaq-doon ah. Xushmad leh. Caqliyeysan. Cilmiyeysan.
Sharciyeysan. Tanaasul leh.
Qore: C/Laahi Janno
Minneapolis, MN
Fadlan wixii talo iyo tusaale ah iigu soo tebi cinwaankan:
buugiyoqalin@hotmail.com
Waxaan qoray: December 23rd 2007 | Faafin: Jan 2008
Daabaco
Boggan | Print
