Ummadyahay

Maansadan Ummadyahay waxaa curiyay Abwaan Maxamed Dhagaafe Cilmi oo iminka ku sugan magaalada Adis-Ababa ee wadanka itoobiya maansadan oo soo baxday 10/7/2007 ayaa waxa ay tahay maanso wadani ah oo Abwaanku kula hadlaayo Ummadwaynta Soomaaliyeed maansadan oo su`aalo iyo talaba isugu jirta. Akhris wacan

Ummadyahay

Ummadyahay Halaagiyo
Holaciyo dhibaatada
Horta maxaad u jeceshiin.?
Maxaad horumarkiiniyo
Inaad Nabad ku hoyataan
Hagaaggii u deedeen
Collaadaha u hurisaan.?
Hooyo iyo Aabiyo
Horintii koraysaba
Maxaa hanaddadeenii
Hubka loogu laayaa.?
Hayb waysku raacnaa
Hadalkaan wadaagnaa
Hidaha iyo dhaqankana
Diin quraan ku hiranaa
Misna kala habownoo
Qabiilbaa nakala horay.
Hanaan dowladdeed iyo
Wixii nagu haboonaa
Aan helnoo haleelnee
Dadka ma u horseednaa
Hilinkii wacnaayoo
Nabad mow habaynaa.?
Haah dhaha jawaabtoo
Halyeeyada dalkaygow
Aynu harumar gaarnee
Calankeena hoostagay
Hiil u tara dhamaantiin.
Hurgumada qabiilkana
Halmar aan ka gudubnee
Diiwaan ku haga oo
Hubka dhiga dhamaantiis.
Waynu kala habownoo
Habqanka iyo yaacii
Hareeraha aduunkaa
Qofba meel ku heermee
Hugunkiyo collaaddii
Aankasoo hanuunnee
Qoloqolo ka hara oo
Ku hungoobi maynee
Qaranimo haloo kaco.
Hareer kale ka eegoo
Ciiddeena hadankaa
Macdantuna ay hoostaal
Wabiyada halcanayiyo
Baduhuna hareerraha
Nooga heeranyiinoo
Halkaad dalag ku beertana
Horay ay usoo bixin
Duunyaduna hirdoogliyo
Howd caleenle miratoo
Rabaa noo hibeeyoo
Hodan nooga yeelee
Aduunyada nin haystiyo
Nin helaaba uu jrin
Hantideena weeyee.
Inagaa ka hurudnee
Hanqaltaaga beentaa
Ina hoday dhamaanteen
Hohe aan ka gudubnee
Qayrkeen halkuu tagay
Higso oo la jaanqaad
Haysu jeedin adiguye
Soomaalaay halmida noqo
Noqo noqo halmida noqo..

Dhamaad

Abwaan Maxamed Dhagaafe Cilmi

Adis-Ababa Ethiopia

Email: m_dhagaafe@hotmail.com

Tel.. +251913123411