Caloolyowga Shacabka

Laga soo bilaabo kasoo noqoshadii dagaalkii lala galay Itoobiya ayaaney shacabka Soomaaliyeed ka bixin dhibaatooyin kaga yimaada siyaasiyiinta kursi doonka ah ee ilaa maanta isku haya hogaanka Soomaaliya.

Dad lagu qiyaasay ilaa hal Milyan Soomaali ah ayaa ku dhintay dagaaladan soo bilowday 1978-dii waxaana ku barakacay Malaayiin kale. dhibaatooyinkan ay bulshadu la ciirsan tahay ayaa sal looga dhigaa  mid xukun doon ah  oo isla badasha waqtiga ama daruufaha lagu jiro oo dagaal -oogayaashu ka  kaluumaystaan dhiiga shacabka oo aan loo daynin dhinacna, ka sokow barakaca  ganacsatada  ka tanaaday canshuur la,aanta ayaa xiriir  dhaw la leh  qab-qablayaasha  ayagoo danta ugu wayn ee ay isugu xiran yihiin ay tahay inaanay helin dawlad xakamaysa dhaca toosan ee ay ku hayaan shacabka.

Shacabka ayaa ka warsugaya  shirka  laga soo wareejiyay Eldoret  oo la filayo inuu ka bilowdo  Mbagathi maalinta isniinta ee bishan Febraayo tahay 24, waxaanu shacabka  dib u laqay  damiciisii ka dib markii qab-qablaashu intoodii badnayd aysan ka muuqan goobta shirka.

Saluuga siyaasiinta,oo ka biyo diidsan gogosha  oo wararka ka soo yeedhayana qiil ka dhigtay inaysan ahayn goob u qalanta  shaararka ay huwan yihiin ayaan garawsan kumanaanka ku jira xeryaha qaxootiga  wadanka  ay doonayaan inay sariiro wacan ku seexdaan, kumanaanka  maalin walba ku hafta biyaha bada cas ayagoo raadsanaya sidii ay u  heli lahaayeen  nolol, kumanaanka  gaajada ugu dhinta saxaraha u dhaxeeya waqooyiga afrika iyo aasiya, kumanaanka  dhalinyarada ah ee ku naafoobay dagaalada ay ku qaldeen dagaal-oogayaashu  oo u baahan daryeel , iyo guud ahaan bulsho waynta ay daashatay dilka, sicirbararka, afduubka, iyo malaayiinta  ku kala firdhay daafaha dunida oo u taahaya  inay arkaan wadankoodii hooyo asagoo dawlad dhab ahi ka jirto.

Cabashada Doofaarka

Xarunta cusub ee loosoo raray shirkii ka soconayey Eldoret ayaa ah kuleejo ku taala duleedka Nairobi laguna magacaabo Mbagathi. Xeradan ayey ergeda badankood diideen iney degaan kadib markii la sheegay iney ka jirto jiif xumo, biyo lan'aan, qabow iyo dhaxan badan iyo dhibka ugu weyn oo ah in  ay xeradu ku nool yihiin doofaaro aad u fara badan.

Arintan ayaa ka careysiisey in badan oo ah hogaamiye-kooxeedyada shirka ka qeyb gelaya keentayna iney badankood yiraahdaan Mbagathi  ma aha goob u qalanta degaan amaba in shir lagu qabto.

"Doofaaro ayaa sidii adhigii goobta tuban" ayuu yiri mid kamida ergeda DKMG oo sheegay in ergadiisu degen yihiin Hotel ku yaala Nairobi aaneyna damacsaneyn iney kuleejka degaan.

Ergeygii hore ee dowlada Kenya uga wakiilka ahaa shirkan Mr. Mwangale ayaa horay ugu eedeeyey in ergeda Soomaalidu doonayaan oo keliya cuno iyo jiif balse aaney meesha u iman iney heshiis gaaraan,  Soomaali badan oo aan la sheekeystay ayaana qaba inuu dhaboobay hadalkii Mwangala waayo maalmahan waxa keliya ee ay ergedu ka hadlayaan ayaa ah cuno iyo jiif xumada kuleejada ka jirta.

Soomaalida oo aad u neceb xayawaanka Doofaarka ayaaney u muuqan iney ogolaan doonaan ku noolaashaha xeradan loo bixiyey Doofaarey.

Camal Xumada Siyaasiyiinta

Laba iyo Tobankii sano ee lasoo dhaafay ayaa waxaa la qabtay 12 shir dib u heshiisiin Soomaaliyeed kuwaasoo lagu kala qabtay wadamo badan oo Soomaaliya deris la ah uuna ugu dambeeyey kii lagu soo dhisay dowlada la magac baxday Carta.

Shirarkan oo inta badan qaata bilooyin fara badan ayeysan marna kasoo bixin guulo la taaban karo ama heshiis lagu xalinayo dhibaatooyinka ka taagan dalka Soomaaliya.

Hadaan soo qaadano shirka iminka ka soconaya Kenya ayaa waxaa muuqda inuu yahay mid fashil qarka u saaran kadib markii uu soo baxay khilaaf aan la xalin kerin una dhexeeya hogaamiye-kooxeedyada Soomaalida.

Mudo gaareysa 5 bilood ayey ku heshiin waayeen qeybsashada tirada ergeda Gudiga Farsamada IGAD  ogolaaday iney shirka ka qeyb qaataan oo dhan 300, waxaana maalin walba muuqda is qabqabsi ku aadan qeybsashada tirada ergeda.

Mowliid Macaane iyo Dr. Gaandhi ayey ahaayeen kuwii uu dagaalka gacan ka hadalku ku dhex maray Eldoret halka Muuse Suudi iyo Cabdullaahi Yusuf hadalo qalafsan is dhaafdhaafsanayeen.

Hogaamiye-Kooxeedyada Muqdisho ayaa badankood Muqdisho ku laabtay, Xassan Abshir iyo Cabdalla Deerowna safaro shakhsiyadeed ayey u aadeen UAE iyo Syria, Barre Hiiraale oo carooday ayaa isna ka degey Kismaayo, Cabdullaahi Yusuf iyo ninka ay beryahan saaxiibka yihiin ee Shaati Guduud ayaa degen hotel weyn oo ku yaala magaalada Nairobi, halka afhayeenka Shaati Guuud la sheegay inuu degen yahay xero qaxooti oo ku taala magaalada Muqdisho. Intii ka hartay ergeda shirka u tagtay Kenya ee aan awoodin iney huteelo degaan ayaa habeen iyo maalin ka cabanaya cuno xumo, jiif xumo iyo doofaarada xerada kula nool.