|
Dareenka Dadweynaha iyo Toddobaadkan
WD. Mohamud Yusuf Garre
Yusuf22@lycos.com
Febraayo 17, 2003
Waa Taxane Todobadle ah, Faalo iyo Falanqeyn. Waa Fahamka siyaasada fashilan ee
Soomaalida. Waa Fiiro Dheer iyo Fahamka Dadweynaha. Waana Faaqidaada Todobaadka
ee dhacdooyinkii ugu xiisaha iyo hadal haynta badnaa ee Soomaalida iyo Caalamka.
Qodobada Todobaadkan:
- Cabdiraxman Tuur oo Hargeysa Kusoo Laabtay
- Hogaamiye-Kooxeedyada Muqdisho oo shaki weyn ka qaba shirka Soomaalida ee Kenya
- Gaadiidleyda Eldoret oo Isbaaro u Dhigtay Ergeda Soomaalida
- oo ma ciid baa jirtay?
oo ma ciid baa jirtay?
Maalintii Ciida ee sanadkan ayaa dad badani wax ka yiraahdeen sidii ay u
dareemeen maalintaas. Soomaali ku sugan wadamada Mareykanka, Yurub, Masar,
Kenya iyo Australia oo aan ka wareystay sidii ay u ciideen maalintaas ayaa
intooda badan iigu jawaabay ma aheyn maalin aanu dareenay wax farxad ah waayo
maba jirin damaashaadyadii laga sameyn jirey wadankeena malamaha ciida ah.
Hadana arday wax ka dhigta jaamacada Azhar ee magaalada Qaahira oo fikradiisa ka
dhiibanaya su'aal aan ka weydiiyey sidii uu u ciiday ayaa iisoo diray qormo uu
cinwaankeedu yahay " Ciid Ma Dareemo Nimaan Ciidiisa Joogin" taasoo cabireysa
fikrad ay qabaan Soomaali badan oo ku nool dalka debediisa. Ardaygan ayaa
muujiyey inaan leys barbar dhigi karin ciidihii uu ku ciiday Soomaaliya iyo kuwa
uu debeda ku qaatay.
Wiil Soomaaliyeed degan Mareykanka oo la weydiiyey sidii uu u ciiday ayaa
isaguna ku jawaabay "oo Ma ciid baa jirtay?". Hadaba in badan oo Soomaalida
debeda ku nool ayaad moodaa iney qabaan dareen la mida midkan ay muujiyeen dadka
aan la xiriiray. Waxaana muuqata in aan dareemin ciidaheena balse aanu dareeno
ciidaha wadamada Galbeedka laga ciido sida Christmass, New Year iwm taasoo ah
nasiib daro haysata dhamaan Soomaalida debeda kunool.
Gaadiidleyda Eldoret oo Isbaaro u Dhigtay Ergeda Soomaalida
Maalintii jimcaha ee 15ka bishan ayey aheyd goortii ay gudiga farsamada IGAD u
qorsheeyeen in ergooyinka Soomaalida loo raro madasha cusub oo noqon doonta
agagaarka Nairobi, hadaba kolkii ay soo istaageen basaskii daad gureyn lahaa
ergooyinka ayaa waxaa bilowday mudaaharaadyo ay soo abaabuleen gaadiidleydii
qandaraaska shirka haystay, hadaba gaadiidleydan oo sheeganayey iney lacag
fara badan ku leeyihiin gudiga farsamada ayaa ku dhawaaqayey erayo ay ka mid
ahaayeen "Hadaan lacagi jirin Safarna Ma Jirayo" waxayna baska walba oo ka
mid ahaa basaskii ergooyinku saarnaayeen ku hor gudbeen shan gaari oo yar yar
si aysan wax dhaqdhaqaaq ah u sameyn.
Arintaas ayaa waxay keentay in uu gudiga farsamada igad wada xaajood rasmi ah la
yeesho gudiga gaadiidleyda ayna u balan qaadeen iney sida ugu dhaqsiyaha badan
u bixin doonaan lacagaha ay ku leeyihiin gudiga farsamada. Hadaba arintan ayaa
sababtay dib u dhac maalin qur ah oo ku yimaada safarkii ergada shirka.
Hogaamiye-Kooxeedyada Muqdisho oo shaki weyn ka qaba shirka Soomaalida ee Kenya
Dhamaan hogaamiye-kooxeedyada ugu magaca dheer beelaha hawiye ayaa isaga soo
dareeray shirka Soomaalida uga soconaya kenya. Muuse Suudi, Cusmaan Caato,
Maxamed Dheere iyo Maxamed Qanyare ayaa dhamaantood kusoo laabtay Muqdisho
iyagoo sheegay iney wada tashiyo yeelan doonaan.
Waxaa in dhowaalaba muuqday dagaal fadhi ku dirir u dhexeeya qaar kamida
hogaamiye-kooxeedyada Muqdisho iyo ninka ugu magaca dheer shirka Nairobi Col.
Cabdullaahi Yusuf oo ay dad badani qabaan inuu balanqaadyo ka haysto dowladaha
shirka soo abaabulay.
Hadaba dad badan oo u dhuun daloola arimahan ayaa sheegaya in siyaasiyiinta
beelaha Hawiye shaki weyn ka qabaan waxa kasoo bixi doona shirkan hada loosoo
raray duleedka Nairobi, shakigoodan ayaana la sheegayaa inuu ku saleysan yahay
iyagoo ka cabsi qaba in dowladaha shirka soo abaabulay ay jagada
Madaxweynenimada la doonayaan Col. Cabdullaahi Yusuf.
Cabdiraxman Tuur oo Hargeysa Kusoo Laabtay
Madaxweynihii ugu horeeyey ee Somaliland ayaa Todobaadkan kusoo laabtay
magaalada Hargeysa kadib sanado badan oo uu baxsad kaga maqnaa gobolkaas. Waxaa
la sheegayaa in madax sare oo ka tirsan maamulka gobolkaas ay garoonka kusoo
dhoweeyeen Cabdiraxman Tuur.
Tuur oo madaxweyne-ku xigeen ka noqday dowladii Salbalaar ee uu hogaamin jirey
Gen. Caydiid ayaa si aad ah uga soo horjeeday madaxweynihii geeriyooday ee
Somaliland Maxamed Xaaji Ibrahim Cigaal. Iyadoo la sheegayo in soo
laabashadiisan ay soo dedejisay geerida Cigaal.
Dadka reer Hargeysa ayaa u arkay siyaabo kala duwan soo laabashada Tuur iyadoo
qaarkood u arkaan inuu yahay halyey usoo halgamay gobolkaas halka qaar kalena
qabaan inuu yahay nin aan la aamini karin oo kursi doon ah.
QORMADII TODDOBAADKII
HORE.... GUJI......
WD. Mohamud Yusuf Garre
Yusuf22@lycos.com
AFEEF: Qoraaladan waa kuwo u gaar ah qoraaga ku
saxiixan, kana tarjumi mayaan aragtida SomaliTalk.com.
XUSUUSO CINWAANKA QORAALKA..... WIXII
JAWAAB AHNA KU HAGAAJI QORAAGA....
FAAFIN: SOMALITALK.COM
QORAALADII HORE EE MAXAMUUD Y. GARRE:
AKHRI
HALKAN iyo HALKAN
Powered by
www.SomaliTalk.com
All About Somalia and More...
|
