Minneapolis: Warbixin Mutamarkii 10aad ee Woqooyiga Ameerika
- Warbixintii: SomaliTalk.com
Waxaa magaalada Minneapolis lagu soo gabagabeeyey Mutamarkii 10-aad ee Woqooyiga
Ameerika oo socdey saddex maalmood (June 18-20, 2010). Mutamarkaas oo
sanad kasta xilliga xagaaga lagu qabto Minnesota. Mutamarka sannadkan waxaa si wada jir ah u soo diyaariyey Xarunta
Abuubakar As-Saddiiq Islamic Center ee Minneapolis iyo Goloha Iimaamyada Soomaaliyeed ee Waqooyiga
Ameerika. Ilaahay Mahadi ha kagaadho Mu'tamarka ayaa si habsami ah kusoo
gabagaboobay.
Mu'tamarka waxaa kabaxay 60 muxaadaro oo isagu jira Somali, Ingiiris iyo
Carabi. Waxaa kaloo Mu'tamarka oo aad u waynaa lagu soo bandhigay 24 barnaamij
oo bulshada baahideeda kala duwan loogu talagalay. Waxaana kasoo qayb
galay culimo ka kala timid Maraykanka, Yurub iyo Carabta iyo Afrika oo Sh.
Shibille Camerada la iska arko lagu soo xiray. Mu'tamarka ayaa ka kala baxayey 4
qaybood oo is garab socda ayaa sanadkan xooga saarayey Fahamka Diinta guud ahaan,
gaar ahaana dhinaca Fiqiga.
Waa xarunta lagu qabtay Mutamarka, xilli biririf la qaatay
Mutamarka sannadkan 2010 waxaa cinwaankiisu yahay "Qofkuu Illahay Khayr la
doono, Diinta ayuu fahansiiyaa", waxaana ka soo qayb galay jaaliyadaha Muslimiinta
ee ku dhaqan Gobolka Minnesota, waxaana muxaadarooyin kala duwan ka jeedinaya
culimo farabadan.
Maalintii koowaad ee Mutamarka waxaa lagu furay Aayadaha Quraanka Kariimka. Kaddib waxaa mutamarka
furay Sheikh C/raxmaan Sheikh Cumar, oo ah iimaamka Masjidka Abuubakar Asidiiq
ee Minneapolis. Furitaankii kaddib, muxaadaro cinwaankeedu ahaa "Qofkii
Ilaahay Khayr la Doono, Diintuu Faahamsiiyaa," waxaa soo jeediyey Sheikh
C/raxmaan Sh. Cumar. Waxana uu ku xeel dheeraaday waxyaabaha looga baahan yahay
dadka
gudbinaya dacwada Islaamka iyo muhiimadda ay leedahay in aan la degdegin.
Kaddib muxaadaro cinwaankeedu ahaa "Ku Sugnaanta Diinta" waxaa soo jeediyey
Sheikh Maxamed Kaariye, oo ku xeel dheeraaday taariikhdii loo soo maray dacwada
iyo fidinta Diinta Islaamka iyo sidii loogu soo sabray, ayadoo ciqaab iyo
dhibaato weyn la gaarsiin jirey ducaadda ku taagan caqiiqada saxda ah. Halkaas
oo uu si qoto dheer u tilmaamayey sida loogu baahan yahay in la yeesho sabir dheeraad ah.
Waxaa markaas muxaadaro cinwaankeedu ahaa "Manhajka saxda ah ee barashada
Cilmiga Sharciga" soo jeediyey Sheikh Cabdullaahi Ibraahim. Waxana uu
dadweynahii madasha ka soo qayb galay kula dardaarmay muhiimada barashada
cilmiga sharciga ah.
Kaddib waxaa kulanka yimid musharaxa xisbiga Dimoqraadiga ee u tartamaya
Governorka Gobolka Minnesota, MATT ENTENZA, oo sheegay in uu wax u qaban doono
Soomaalida reer Minnesota haddii la doorto, waxana uu yiri: i doorta doorashada
ugu horeysa oo dhici doonta Agoosto 10, 2010. Isagoo taas ka hadlayey waxa uu
yiri: "August 10 waa ogahay in ay tahay bilowga Ramadaanka, oo aad soomantihiin,
waxaana idinka doonayaa in aad ii codaysaan, haddii aan guulaysto waxaan is garab taagayaa Soomaalida
iyo Muslimiinta...." Waxana uu hadalkiisii ku soo gabagabeeyey "Soomaaliya ha
noolaato."
Waxaa sidoo kale maalintii xigtey mutamarka yimid
Margaret Anderson Kelliher oo ayaduna u sharaxan Governatooraha Gobolka
Minnesota ayadoo ballan qaaday in ay Soomaalida la shaqaynayso haddii la doorto.
Labada musharxba waxay ka hadleen sida ay u taageersan yihiin Xijaabka in ay
qaatay dumarka Muslimiinta ah ee ku dhaqan Minnesota.
Kaddib Sh. Abul Fadli ayaa waxaa uu madasha ka soo jeediyey taariikh
ku saabsan Golaha iimaamyada ee Woqooyiga Ameerika iyo waxqabadkooda, asagoo ku
xeel dheeraaday asaaskii Golaha Iimaamyada iyo sida ay ugu khidmeeyaan
jaaliyadaha Muslimiinta ee ku dhaqan Woqooyiga Ameerika.
Waxaa markaas kaddib madasha mutamarka lagu soo dhaweeyey arday da'yar oo
akhriyey Qur'aanka Kariimka. Ardaydaas oo isugu jirey wiilal iyo gabdho ayaa si
qiiro leh u akhriyey Aayado Quraanka Kariimka, arrintaas oo niyad wanaag ku abuurtay dadkii ka
soo qabgalay madasha iyo intii kala socotey Khadka Internetka. Waxa kale oo ay taasi dhiiri gelin u ahayd carruurtii
faraha badnayd ee ka soo qayb galay mutamarka ee la socdey waalidiintooda.
 
Waxaa kaddib mutamarka laga soo jeediyey khudbad kooban oo ku saabsan cudurka
loo yaqaan
Autism-ka oo la sheegay in uu carruurta Soomaaliyeed ee Maraykanka ku soo
badaanayo ama kaga badan yahay quruumaha kale. Autism-ka waa cudur carruurta ku
sababa in hadalku ka daaho ama aysan hadlin, ama uu noqonayo canug xayraan ah oo
aan fariisanayn.
Markaas kaddib, muxaadaro cinwaankeedu ahaa "Carada, aadaabteeda, iyo
maaraynteeda," waxaa soo jeediyey Sh. Cabdirisaaq Xaashi oo ku xeel dheeraaday
sida loo maareeyo carada/xanaaqa oo ah shey qalbiga qofka gala. Carada waxaa ay noqon kartaa in mid bannaan oo ay tahay in la caroon karo,
sida haddii lagu xad gudbo Diinta Allah, waa in laga caroodo. Laakiin haddii qofka
naftiisa laga xad gudbo waxaa haboon in uu iska cafiyo. Sh. C/risaaq Xaashi waxa uu aad ugu dheeraaday carada iyo noocayadeeda, waxana uu yiri waxaa rasuulka laga
weriyey: Waxaa dadka ugu wanaagsan qofka aan hore ka
caroon, haddii uu caroodana ka soo laabta. Waxaana dadka ugu liita qofka hore
ka carooda oo aan ka soo laaban caradaas..
Waxaa muhiim ah in la iska ilaaliyo carada, isla markaana haddii la caroodo
in durbadiiba laga soo laabto carada. Haddii aad carooto markiiba Allah xasuuso,
kana laabo carada, adigoo Allah magan galaya. Xaaladda aad ku sugan tahayna iska
bedel, sida haddii aad taagan tahay fariiso., ama ka dhaqaaq meeshii aad ku
carootay. Sidoo kale, haddii aad carootid aamus ama ha hadlin, si aadan go'aan u
gaarin oo aadan uga shallaayin, ayuu yiri.
Faras magaalaha Minneapolis, halka lagu qabtay Mutamarka
Salaadii Makhrib kaddib, Nadwo cinwaankeedu ahaa "Mushkiladda Qoyska,
Sababaheeda, Dhibkeeda iyo Xalkeeda" waxaa si wada jir u soo jeediyeen
Sh.
C/laahi Sh. Axmednur iyo Sh. Maxamed Mursal. Waxayna ku xeel dheeraadeen sababaha
keena khilaafka ka dhex dhici kara qoyska iyo xalkooda.
Culimada oo ka hadlayey khilaafaadka waxay sheegeen: in khilaafaadka ugu
horeeya ay ka yimaadaan kala shakiga iyo kala maqnaanta oo ninka iyo xaaskiisu
kala maqnaadaan muddo dheer. Waxa kale oo khilaafka keena in Dumarku ku tuhmaan
ragga xagga bakhaylnimada, halka raggu ay haweenkuna ku tuhmaan xoolo khasaarin.
Waxay culimadu sheegeen: Qiyaaso badan oo laga sameeyey dalalka Galbeedka waxaa la ogaadey in
furriinku uu aad u sareeyo, sidaas oo kale ayaa furriinku faro kulul ugu hayaa
dalka Muslimiinta.Xalka arrintaasi waa in loo laabto xagga Allah, ayagoo ku
camal falaya kitaabka.
Waa in ninka iyo xaaskiisu ay is ixtiraamaan. Waxaa dhacdaa qof dadka kale u
dabeecad wanaagsan in uu xaaskiisii ku dabeecad qalafsanaado. Waxaa loo baahan
yahay in la isu sabro. Iyo in ay ka qayb qaataan tarbiyada carruurtooda.
Ninka: gabadha uga sheekee waxaad jeceshay iyo waxaad nebetahay. Waxaadna
gabadha u
sheegtaa waxay ku wanaagsan tahay, halkii uu isku mashquulin lahaa xumaanta.
Ninka Soomaaliyeed in uu guriga tago cishaha kabacdi. Hadiyad hakala bakhaylin
gabadha, ayey culimadu ku taliyeen si loo hagaajiyo qoysaska.
Gabadhu waa in aysan ninkeeda ku dhibin furitaan, markasta oo ay wax yar isku
qabtaan aysan ku tirtirsiin furriin. Gabadhu waa in ay adeecdo
ninkeeda, waa cibaado, Ninkaaga raali geli, ayey culimadu kula taliyeen dumarka.
Mutamarka maalintii labaad muxaadarooyinkii laga soo jeediyey waxaa
kale oo ka
mid ahaa muxaadaro cinwaankeedu ahaa "Halkee ka joognaa Kitaabka Allah," oo uu
soo jeediyey Sheikh Mukhtaar Xuseen oo si cilmiyayasan uga hadlaay muhiimadda
uu leehaya Kitaab Allah iyo in lagu camal falo.
Kaddib waxaa muxaadaro cinwaankeedu ahaa "Xuquuqda Banii Aadamka" soo
jeediyey Sheikh Cabdiraxmaan Sheikh Cumar, oo ku xeel dheeraaday xuquuq Insaanka
iyo diinta islaamka.
Qofka waxa uu xaq u leeyahay oo uu Islaamku siiyo bini'aadamka waxaa ka mid
ah, ayuu yiri sheikh C/raxmaan: In qofku noolaado. Waa in aan qofka lagu dilin xaq darro. Qofku in uu helo
aamman. Arrimahaas oo ah xuquuqda asaasiga ah ee Allah siiyey qofka bini aadamka
ah. Waxa kale oo islaamku siiyey qofku in uu ku noolaado nolol wanaagsan. Waxa
kale oo Sheikh C/raxmaan uu si xeel dheer uga hadlay xuquuqda uu Islaamku siiyey
Dumarka. Waxana uu aad uga hadlay sida Islaamku uu xoojiyo in loo sinnaado
caddaalada.
Nafsadda in la xifdiyo. In la xifdiyo qofka hantiida, qofka cindigiisa in
la ilaaliyo iyo sharafkiisa, caqliga in qofka caqligiisa la xifdiyo, waa in
sinada laga ilaaliyo mujtamaca iyo in la ilaaliyo diinta. Waxaana xuquuqda
asaaskeeda laga qaadanaya Kitaabka Quraanka, ayuu yiri.
Muxaadaradii xigety oo cinwaankeedu ahaa "Xuquuqda Carruurta," oo uu soo
jeediyey Sh. C/risaaq Xaashi, waxa uu marka hore ku xeel dheeraaday nimcada in
Allah qofka siiyo carruur. Waxana uu sheegay in waxa ugu wanaagsan oo adduunka
looga tago uu yahay cannug saalax ah. Xuquuqda caaruurtu ku leeyihiin waalidka
marka laga soo tago korinta iyo nafaqo siinta waa in lagu barbaariyo sidii ay
Allah u caabudi lahaayeen. Waa in carruurta marka hore loo xulo hooyo wanaagsan,
kaddib
canugga marka uu dhasho loo bixiyo magac wanaagsan isla markaasna labaro Diinta
Islaamka.
Akhlaaqda carruurtu waxay ka bilaabataa in canugga la baro sida cuntada loo
cuno ama wax loo cabbo, waa tarbiyaddu meesha ay kabilaabato. In la baro in ay
bisinka ku bilkaabaan, midigta ku cunaan, cuntadana ka cunaan dhanka iyaga xiga,
sida ka sugnaatay rasuulka.
In canugga labara sida loo socdo, dabaasha, iwm. In waqti la siiyo. Sheikh
C/risaaq waxa uu sheegay in dhulkaan galbeedka aad looga cabanayo ragga
Soomaaliyeed oo aan carruurta waqti siin, xitaa hal saac siin, waa in ay shaqo
jiraan iyo marka ay guriga yimaadaan oo seexdaan. Waxa uu ka sheekeeyey qiso ku
saabsan nin ay saaxiib ahaayeen oo gabar uu dhalay baray in ay si sax ah uu
sheekayn karto marka ay gaartay 2 sano oo si fiican u hadlaysay. Waa in la baro
tarbiyadda oo waa caqliga iyo xagga akhlaaqda in laga dhiso, wixii xun laga reebo
wanaagga la baro.
Salaaddii duhur kabacdi, muxaadaro cinwaankeedu ahaa "Tilmaamaha Sowjka
Wanaagsan," oo uu soo jeediyey Sh. AxmedNuur Macallin, oo ku xeel dheeraaday
sifooyinka ku haboon sowjka wanaagsan. Waxaa muhiim ah in sowjku ahaado mid aan
cabsi gelin gabadha xaaskiisa ah, waana in uu markasta ka farxad geliya, waa in
uu guriga ku soo galo waji faraxsan, isagoo salaan ku bilaabaya reerka, oo kula
hadlo erayo macaan, kana mahad celiyo wixii wanaag ah oo ay gabadhu qabato kuna
ammaano. Guriga ku saacido oo hawsha la qabatid. In uu ixtiraamo caqliga gabadha
iyo fikirkeeda. Waa in gabadha malaha loo wanaajiyo, oo aan laga shakin gabadha
maadaama ay tahay tan guriga kula dhiseysa, oo aan marna loo muujin dareen xun..
Gabadha in la dareensiiyo in ay tahay gabadha ku dayashada mudan... kuna
ammaantid gabadha waxyaabaha fiicfiican, laguna taageero waxyaabaha fiican..
Waxaa jira xilliyo ay gabadhuhu xanaaq badan yihiin sida marka aysan daahirka
ahayn oo ay xaydka qabaan, waa in marka xilliyadaas la ilaaliyo gabadha.. Waxaa
muhiim in qoysku yeeshaan mar lawada cuno cuntada sida qadada ama cashada.. In
aadan wax ku dhufan ama la dilin gabadha xaaskaaga ah.. Wixii reerka dhexdiisa
ah in aan cid kale lagu faafin oo ay ahaadaan arrin qoyska dhexdiisa ah, ayuu
yiri.
Muxaadaro cinwaankeedu ahaa "Farqiga fikradaha kala duwan,' oo uu soo
jeediyey Sh. C/risaaq Sancaani ayuu kaga hadlay waxyaabaha keeni kara khilaafka,
isagoo si qeexan u sheegay in aysan wax khalad ah ku jirin Kitaabka Quraanka iyo
Sunada rasuulka, waxaa soo raaca wixii muslimiintu isku raacaan.
Sheikh Sanaaci waxa uu ku xeel dheeraaday in qofka muslimka ay waajib ku
tahay in uu wixii xaq ah sheego , wixii khalda ahna naqdiyo. Wixii xaqa ah waa
in loo hogaansamo, xitaa haddii xaqaasi ka imanayo qof ama fikir kaa soo hor
jeeda.
 1.8 billion
qof oo Muslimiin ah ayaa Adduunka ku nool, taas oo ka dhigeysa afartii qof ee adduunka
ku nool in hal uu yahay Muslim. Islaamkuna wuu soo
noolaanayo ayey yiraahdeen Sh. Waleed Idress iyo Sh. Salah Al Sawi.
Sida aan kor ku soo xusnay, Mu'tamarka waxaa kabaxay 60 muxaadaro, waynaa lagu soo bandhigay 24 barnaamij
oo bulshada baahideeda kala duwan loogu talagalay, barnaamijyadaas oo aanan
halka kusoo wada koobi karin. Sida Sheikh Maxamed Kaariye oo ka hadlay Cilmaaniyada iyo dhibaatadeeda
isagoo sharxay
waxa ay tahay iyo sida ay uga soo horjeedo Diinta samaawiga ah.
Dhamaan mu'tamarka waa laduubay, Cajaladihii oo maqal iyo muuqaal ah waxaad
ka helikartaa/kadalbankartaa Maktabada Abuubakar.
Gabagabadii ayaa Mu'tamarka ayaa looga duceeyey loogana mahad celiyey dhamaan
walaalihii sida hagar li'ida ahayd isaga xilsaaray inuu mu'tamarku si wanaagsan
ku soo gabagaboobo. Sidoo kale waxaa aad loogu mahad celiyey dhamaan Culumadii
waqtigooda usoo huray inay ummada u faa'iideeyaan. Sidoo kale Walaalaha Media-ha
oo suura galiyey in Mu'tamarka laga daawado aduunka, lana duubo Muxaadara kasta
oo ka baxday Qayb kasta.
Sawiro kale oo dheeraad ah halkan ka eeg
Sawiro kale oo dheeraad ah halkan ka eeg
Faafin: SomaliTalk.com / June 21, 2010
| 
Daabaco
Boggan | Print
