Daabaco Boggan | Print

• Cumar C/rashiid oo Magacaabay Sii Hayaha Xilka Agaasimaha Guud ee Bangiga Dhexe
• Qaar Ka Tirsan Haweenka Baarlamaanka KMG ah Ee Soomaaliya Oo Maanta (Jun 1, 2010) Isu Soo Sharaxay G/ku Xigeenka Koowaad iyo Labaad ee Baarlamaanka
• Prof. Cusman M. Dufle oo qoraal ka soo saaray joojinta cabbista Sigaarka
• Maamul Cusub Oo Loogu Magac Daray Dib U Xoraynta Gobolka Shabeelada Dhexe Oo Lagaga Dhawaaqay Magaalada Muqdisho
• Ciyaaraha aduunka oo bilaaban doona isbuuc kadib
• Boqolkiiba 42% Dhegeystayaasha Raadiyaha ku hadla Afka DFKMG oo ku jawaabay in Shariif Xasan uusan waxba ka bedeli doonin khilaafka baarlamaanka
• Magaalada London oo lagu qabtey qorituurkii koobka Somaliweek 2010
• Halyeeyadii Ciyaaraha Fudud Ee Somalia Oo Kulmay 

Cumar C/rashiid oo Magacaabay Sii Hayaha Xilka Agaasimaha Guud ee Bangiga Dhexe

Warar laga helay Xafiiska Ra'iisal wasaaraha DFKMG Cumar C/rashiid ayaa tibaaxay in uu Bangaga Dhexe u magacaabay Agaasime Guud oo ku meel gaar ah.

Sida warku tibaaxay Maxamed Cali Xuseen ayaa noqon doona sii hayaha Agaasimaha Guud ee Bangiga Dhexe ee DFKMG. Arrintaas ayaa la sheegay in Cumar C/rashiid uu wareegto ku soo saaray ayadoo sabab looga dhigay kaddib markii "Madaxda Sare ee Bangiga Dhexe ee DFKMG ay hawshoodii dalka dibaadiisa u badatay, taas oo ay lagama maarmaan noqotay in la helo cid masuul ah oo lagala xiriiro hawsha bangiga dhexe," waa sida ku cad warka laga helay xafiiska ra'iisul wasaaraha June 1, 2010.

Magacaabistan ayaa timid maalin kaddib markii Wasiirka lacagta (ahna sii hayaha Wasaarada Maaliyada DFKMG) Eng. Cabdiraxmaan Cumar Cismaan uu sheegay in dakhligii DFKMG ka soo galay Dekedda Muqdisho sanadkii 2009 uu ahaa 11.53 million doolar ($11,529,563), halka dakhliga dekedda ka soo xerooday sannadkan 2010 (Jan-May 30) uu yahay 5.15 million doolar ( $5,154,725), inkasta oo uusan faahfaahin sida dakhligaas soo xirooday uu ku baxay.

Maxamed Cali Xuseen oo ah sii hayaha xilka Agaasimaha Guud ee Bangiga dhexe loo magacaabay ayaa laga soo xigtey in uu sheegay in bangigu hadda laamo ku leeyahay Dekedda iyo Garoonka Muqdisho.

Warka xafiiska ra'isul wasaaraha DFKMG ma caddayn in xilkii laga qaaday Gudoomiyaha Bankiga Dhexe Bashiir Ciise Cali, oo hore si cad uga hor yimid qorshaha Dowladda FKMG ku dooneysay in ay lacago cusub oo Shillin Soomaali soo daabacato, xilligii wasaaradda maaliyadda uu wasiirka ka ahaa Shariif Xasan. Bashiir Ciise Cali waxa uu bartamahii bishii Janaayo 2010 yiri “Ma ahan in xilligan la isku mashquuliyo sameynta lacago cusub, run ahaantii lacag cusub in dalka lagu baahiyo, waxay u baahan tahay in laga fikiro, maxaa yeelay dowladdu haatan gacanta kuma heyso dalka oo dhan”.

Qaar Ka Tirsan Haweenka Baarlamaanka KMG ah Ee Soomaaliya Oo Maanta (Jun 1, 2010) Isu Soo Sharaxay G/ku Xigeenka Koowaad iyo Labaad ee Baarlamaanka

Dhegeyso: Khadiijo Maxamed Diiriye

Dhegeyso: Aamina Cumar Jaamac

Xubnaha haweenka baarlamaanka KMG ah ee Soomaaliya kaga jira ayaa maanta soo bandhigay musharxiin jagada gudoomiye ku xigeenka koowaad iyo Gudoomiye kuxigeenka labaad ee baarlamaanka KMG ah .

Marwo khadiijo maxamed diiriye ayaa isu soo sharaxday jagada Gudoomiye ku xigeenka koowaad ee baarlamaanka KMG ah ee soomaaliya islamrkaana shaaca ka qaaday inay u taagan tahay jagadaasi

Sidoo kale Marwo khadiijo maxamed diiriye oo maanta u waramaysay saxaafada ayaa sheegtay inay markii horeba haysay xil qaran hadana ay doonayso inay qabato jagada Gudoomiye ku xigeenka koowaad ee baarlamaanka KMG ah ee soomaaliya

Dhinaca kale Haweenka maanta isu soo sharaxay jagooyinka gudomiye ku xigeenka labaad ayaa waxaa kamid ahaa Xildhibaanad marwo Aamina cumar jaamac ,waxayna sheegtay inay mudadii labaatanka sano ahayd ee lasoo dhaafay dhibaatadii soo gaartay dadka shacabka ah ee soomaaliyeed ay aad uga xun tahay doonaysana inay xilka gudoomiyenimada labaad marka ay ku guulaysato ay wax ka qaban doonto dhibaatada gaar ahaan kuwa haysta haweenka iyo caruurta

Si kastaba ha ahaatee ku xigeenada gudoomiyaha baarlamaanka ayaa waxaa u taagan in ka badan Toban musharax balse waxaan ilaa iminka aan la ogayn Cida si dhab ah ugu guulaysan doonta jagooyinkaasi.

MUNAASABADDA MAALINTA JOOJINTA CABISTA-SIGAARKA EE CAALAMIGA AH
31 MAY 2O1O

Prof. Cusman M. Dufle

Maanta oo ay bishu tahay 31 Maajo 2010 waa maalinta loo asteeyey joojinta cabista sigaarka ee caalamka, taasoo looga gol leeyahay in bulshada caalamka lagu wacyigeliyo khatarta uu leeyahay.

Isticmaalka Tubaakada ama cabitaanka sigaarka waxay noqon kartaa : cabista sigaarka, Siigarka, Bayb-ka, Shiishadda, tubaakada la ruugo ama la calaliyo, midda daanka la gashado, iwm. Intaasoo dhanba waa khatar haba ku kala badnaadeene.

Adduunyada horumartay iyo midda soo koreysaba waa ku badan yihiin cabista sigaarka iyo khatartiisaba.

Guud ahaan adduunyada cabista sigaarka ama isticmaalka Tubaakada waxaa lagu qiyaasaa 1.45 bilyan qof iney isticmaasho maanta. Hal bilyan waxay ku nool yihiin waddamada soo koraya.

Cabista sigaarka wuxuu ku badan yahay ragga qiyaastii shan jeer in ka badan haweenka.

Cabista sigaarka wuxuu sababaa dhimasho degdeg ah ama cimri gaabad, waxaana la sheegaa in sanad walba ay u dhintaan sigaar cabista 5.4 milyan oo qof.

Wuxuuna mas'uul ka yahay dhimashada 10kii qofoodba qof taasoo ka dhigan in 3 meeloodoo laba waxay u dhintaan cudurada sigaar-cabista ka dhasha waana lambarka 2aad ee cudurada ioo dhinto caalamka marka laga soo tago cudurka Dhiig-karka. Dhimashadaas 70% waxay ka dhacdaa Dunida saddexaad.

Cabista sigaarka waxaa la socda 19 maaddo oo kiimiko ah oo dhalin kara cudurka kansarka. Wuxuu kaloo wataa maaddada loo yaqaano Nicotin-ka oo sababa qabatin balwad ahaan loo qabatimo jir ahaan iyo maskax ahaan.

Dadka sigaarka caba khatarta uu u keeno waxay ku xiran tahay waqtiga dheer ee uu isticmalayey iyo xaddiga uu ka isticmaalo.

Waxaa kaloo jirta in qofka haddii uu joojiyo isticmaalka tubaakada ama sigaarka waqti hore in khatarta cudur ee uu keenayo iney is dhimi karto.

CABISTA SIGAARKA IYO SAAMEYNTA CAAFIMAADKA UU KU LEEYAHAY

Cabista sigaarka wuxuu sababaa cudurada ku dhaca wadnaha iyo xididdada 20-30% (Heart attacks iyo Strokes), wuxuu kaloo sababaa cudurada sambabka ku dhaca sida Chronic Obstructive Pulmonary Disease (COPD), sambabka oo weynaada ama adkaada (Emphysema), Chronic Bronchites; wuxuu kaloo sababaa cudurka kansarka ku dhaca sambabka 30-35 %. Kansarka Dhuunta iyo Afka (larynx and mouth), kansarka ku dhaca hunguri-wadeenka (Esophagus), Pancreas-ka, Caloosha, Beerka, Xameytida, Xiidmaha, Kaadi-heysta, Qabsinada, Ilma galeenka. Wuxuu kaloo keenaa dhalma la'aanta ragga iyo haweenka.

Waxaa xusid mudan in 85% uu ragga ku keeno Caniinimo ama ragannimada uu waayo. Haweenka uurka leh wuxuu ku keenaa in ay ilmihii dhiciso ama ay dhasho ilmo miisaan hoose ama neefqabad qaba (asphyxia) ama u horseeda dhimasho kedis ah.

Xagga maskaxda wuxuu horseedaa hurdadoo yaraata, degganaansho la'aan iyo qeybta fikirka iyo xusuusta oo hoos u dhaca. Wuxuu kaloo isbeddel ku sameeyaa dabciga iyo la dhaqanka bulshada isagoo acsaabtiisa had iyo jeer kacsan tahay.

Cabista sigaarka waxay waxyeelo u geysataa Aragga Indhaha iyo Maqalka dhegaha.

Khatarta kale ee sigaar-cabistu waa qofka ka ag dhow meesha lagu cabayo (second-hand smoke) oo neefsanaaya ama qaadanaaya qiiqa sigaarka agagaarkiisa lagu cabaayo, kaasoo la sheegay in khatartii cuduradii la soo sheegay ay ku dhici karaan qiyaas dhan 25-30%.

Bulshada Soomaaliyeed 20kii sano ee u dambeysay oo burburka, dagaalada iyo barakaca ay jireen waxaa si xaddi leh u kordhay tirada sigaarka cabta gaar ahaan dhalinyarada da'da yar iyo kuwa Shiishadda la cabo u badan ee dadka waaweyn kuwaasoo ku keeni karaya mustaqbalka dhibaato weyn oo dhanka caafimaadka.

BAAQ

Waxaan dhammaan bulshada Soomaaliyeed ugu baaqayaa meel kastoo ay joogaan iney ka fogaadaan cabista sigaarka bacdamaa diinteenna Islaamka aysan oggoleyn in nafta la tahluukeeyo khatarta caafimaadka ee aan kor ku soo xusnayna uu keenayo.

Wa-billaahi-tawfiiq

Prof. Cusmaan M. Dufle

Maamul Cusub Oo Loogu Magac Daray Dib U Xoraynta Gobolka Shabeelada Dhexe Oo Lagaga Dhawaaqay Magaalada Muqdisho

Maamul lagu magacaabo dib u xoraynta gobolka shabeeladda dhexe ee maamulka ahlu- sunna waljamaaca ayaa maanta (Jun 1, 2010) lagaga dhawaaqay magaalada muqdisho,iyadoo ay sheegeen in Maamulkan uu la dagaalami doono xarakada mujaahidinta al-shabaab oo xiligan gacanta ku haya gobolkaasi shabeeladda dhexe.

Gudigaan lagaga dhawaqay magaalada muqdisho ayaa ka kooban 5-xubnood oo ah fulinta waxaana gudoomiye u ah macalin daahir cadow Calasow oo hore gudoomiye uga ahaan jirey gobolka shabeelada dhexe waxaana uu sheegay in guud ahaan dalka uu ku jiro dhibaato culus gaar ahaan gobolka shabeeladda dhaxe islamarkaana uu xiligan ay go’aansadeen in la sameeyo gudi la dagaalama maamulka islaamiga ah ee iminka ka arimiya sheebalada dhexe waa siduu hadalka u dhigaye ----- DHEGEYSO

Sidoo kale waxaa ka hadlay xaflada lagaga dhawaaqay maamulka la baxay dib u xoraynta shabeelada dhaxe ee maamulka ahlu -sunna qaar kamida odayaasha gobolkaas, sida
Cabdule xuseen maxamuud oo sheegay in la isku waafaqay gudigaan in uu shaqeeyo --- DHEGEYSO

Dhinaca kale wax garadkii ka hadlay xafladaasi ayaa waxaa kamid ahaa xasan maxamed ahmed oo tilmaay in ay dhibaato ay qabaan dadka shabeelada dhexe inay helaan maamul midaysan waa siduu sheegaye loona baahan yahay in laga dulqaado dhibaatada uu sheegay inay ka jirto hada -----DHEGEYSO

si kastaba ha ahaatee gobolka shabeelada dhaxe oo ay iminka ka jiraan nabad gelyo buuxda ayaa waxaa gacanta si buuxda ugu haya xarakada mujaahidiinta Al-shabaab oo hore xilka uga tuuray gudoomiyaha gudigaan cusub daahir Cadow Calasow oo ay dhawaana maamul shebeelada dhexe ah u magacaabeen dowlada kmg ah

Yaasiin Faytin
Yaasiinfaytin@hotmail.com

Ciyaaraha aduunka oo bilaaban doona isbuuc kadib

1000, oo qofood oo dalxiisayaal ah ayaa maalin waliba soo gaarayaan wadanka k/Africa iyadoo ay uyimaadeen in ay daawadaan ciyaaraha aduunka si ay ugu fududaato in ciyaaraha daawadaan labada bilood ee soo socota gudaha wadanka k/afrika.

Dhamaan wadanka oo idil ayaa waxaa laga dareemayaa in ay si weyn usoo dhaweynayaan ciyaaraha k/cagta ee aduunka iyadoo sidoo kale dadka kusugan magaalada johanesberg ee ah magaalada lagu furayo ciyaaraha k/cagta ee sanada 2010 ee fifa world cup.

Markaa tagto meelaha ugu magaca weyn ee wadanka south Africa ayaa waxaa lakulmeesaa dad xiran fanaanada jaalaha ah ee qaranka bafan bafan (south Africa) iyo guryaha oo lagu xardhay calanka south africanka ,baabuurta, maqaahiyaasha, hodhelada,garoomada,dhamaan waxaa ay udiyaar garooween sidii ay u soo dhawey lahaayeen ciyaaraha aduunka iyadoo ay inta badan ciyaartoyda ay imaadeen wadankaan k/Africa .

Dhanka ganacsiga ayaa sidoo kale diyaar garoow xoogan kaga jiro sidii ay usoo dhaweynayeen ciyaaraha k/cagta ee aduunka ee dhawaan kafurmi doona magaalooyinka waa weyne ee wadanka south Africa, sidoo kale ganacsatada soomaaliyeed ayaa iyana diyaar garoow weyn kugu jira ciyaaraha aduunka si ay dhaqaale ugu helaan labada bilood ay ciyaaraha socdaan ee jun iyo july.

Dhanka amaanka ee wadanka south Africa ayaa si weyn loo adkeeyay iyadoo ay ciidamo farabadan ee sood afrikan ah loo diyaar geliyay sidii ay amaanka wadanka loo sugi lahaa iyadoo ay qaas ahaan loo diyaariyay ciyaaraha aduunka inkabadan 95, kun oo ciidamo siqaas ah loo tababaray ,sidoo kale dadka reer sood afrikaanka ah ayaa waxa ay sheegeen in ay samay doonaan boobitaan jansiyad naceeb ah oo ay ku sameyn doonaan dadka qaxootiga ah ee jooga wadanka gudahiisa.

Ciidanka taliska police-ka (SAPS)wadanka sood Africa ayaa waxaa ay sheegeen in ay u diyaariyeen ciidamo farabadan oo loogu tala galay in ay ka badbaadiyaan dadka sood afrikaanka ah xoolaha qaxootiga iyo noloshooda oo Qatar kujirta, maxaa yeelay waxaa loogu hanjabay in ay isaga tagaan wadanka hadii ay taa samay waayaan ay dili doonaan.

Dhanka taraafikada wadanka waxaa arkaysaa markaad marayso wadooyinka waa weyn ee wadanka ciidamada taraafikada oo soo buux dhaafiyay wadooyinka oo mar qura ishaada saaraysaa baabuur oo ay trafica ku dhegentahay oo in kabadan seddex gaari oo kuwa trafica lajoogto (low inforecement).

Dhanka kaamirooyinka wadanka waxaa lasoo kordhiyay kaamirooyinka ku xiran wadooyinka, garoomada, meelaha ay dadka isugu imaadaan, iyo meelo kale oo dhoor ah iyadoo ay dawladu sheegtay in ay doonayso in ay sugto amaanka wadanka oo dhan si ay ufududaato in xal loo helo nabad gelyada iyo amaanka wadanka south Africa.

Mahamed abukar bariyow
Cape town south Africa
Tell +27734405477
E,mail. Mahamedsom1@hotmail.com

Boqolkiiba 42% Dhegeystayaasha Raadiyaha ku hadla Afka DFKMG oo ku jawaabay in Shariif Xasan uusan waxba ka bedeli doonin khilaafka baarlamaanka

Raadiyaha ku hadla Afka DFKMG ee Muqdisho oo cod bixin ama afti weydiiyey dadweynaha, gaar ahaan su'aal ku saabsanayd "Shariif Xasan wax ma ka baddali doonaa khilaafka Baarlamaanka? Waxaana dadkii ka jawaabay ay ku codeeyeen in boqolkiiba 42% ay yiraahdeen MAYA waxba kama bedi doono, halka boqolkiiba 26% ay yiraahdeen waa ka bedeli karaa.

London waxaa xaafada Wembley hall ku yaal lagu qabtey habeenimadii Sabtida taariikhduna ahayd 29/05/2010 xaflada qorituurka koobka Somaliweek 2010, xafladaas oo ay ka soo qayb galeen qaar ka tirsan bahwaynta isboortiga Soomaalida ku dhaqan xaafada Galbeedka magaalada London.

Qorituurka waxaa loo sameeyay 16 kooxood, kuwasoo kale ahaa sidatan islamarkaana loo qaybiyay 4 qaybood, kuwaasoo aaqirka bisha Luulyo 23 keeda lagu wado in magaalada London si rasmi ah uu uga furmo koobkii Somaliweek 2010 hadii Eebe idmo.

 Waxaa lagu casumay inay qorituurka tuuraan ciyaartooydii hore ee dalka Soomaaliya  sida Safiyo Neero,Miski Omar,Xaawo Taako, Bakiin Maaxi,Baaba Jay,Xuseen Abati, C/nuur,Cabdulaahi Muxyadiin iyo caruur Soomaaliyeed oo iyagana ka qayb ka ahaa qorituurka

Dad badan ayaa ka soo qayb galay munaasabada qorituurka Somaliweek,kuwasoo hadalo u badnaa taageero iyo amaanba leh ka jeediyay, waxayna kale ahaayeen dadkii faraha badnaa ee ka hadlay:

Odayaasha Isboortiga magaalada London Danjire  Mohamed Ahmed Caalin, Ahmed Abdi Dahir ‘’Shell’’, Aden Hersi Jaango’an ‘’Adaamo, C/qaadir Shire’’Kasmo’’, Dr C/raxmaan Cunaaye,Ahmed nuur Seyga Ruushka, , C/qaadir ciise Biyooley,Shiine Guhaad,Muriidi Zein,Osman Shiis,C/qani Jeenyo (President of new Generation Sports and Culture) Abuukar Aden ‘’Boos Caato’’ (gudoomiyaha ururka heerka koowaad ee Sweden),Muqtaar Shuute,Digeeye,Shukri Dhalbaas,Rashiid Jama,Hassan Shiino,Dahir Ciise, Abshir iyo gabar ka socotey London 2010, halka ururka Somaliweek-na ay u hadleen Mohamed Buuwe, Xuseen deeq, Mohamed ali,waxaana barnaamijka xiriirinayay Elmi Waabari.

Fanaanada  Soomaaliyeed Maryan Cali Muuday oo ka tirsanaan jirtey Wasaarada Waxbarashada iyo Kooxda Iftin ayaa goobta ka qaaday labo heesood oo aad u qiiro galiyay dadkii ka soo qayb galay xaflada qorituurka iyo fanaanka da’yar ee magaalada London Fu’aad oo isna hees wadani ah oo cusub ka jeediyay goobta halka muuskitiistaha Qaranka Mohamed Macalow oo isna muusiga tumayay iyadoo uu goob jooge ka ahaa Xuseen Bisad oo ah wiil Soomaaliyeed oo ka mid ah dadka ugu dhaadheer dunida iyo dad badan oo aanan halkaan ku soo koobi Karin ayaa ka mid ahaa dadkii ka soo qayb galay

W/Q:YUSUF YUSUF

Sports editor of sspamedia

mrsomalia@hotmail.com

London

Halyeeyadii Ciyaaraha Fudud Ee Somalia Oo Kulmay 

MINNEAPOLIS: Shir aad iyo aad u ballaraan ayaa lagu qabtay dalka Mareykanka gaar ahaan Magaaladda Minneapolis kaa oo ay qabanqaabiyeed Ciyaaryahanadii hore ee Ciyaaraha fudud ee Soomaalia Magac iyo maamusba ku lahaa kuwaa oo kala ah: 

1. Cabdi Warsame Isaaq

2. Cali Cabdi Maxamed(Cali Bay)

3. Shidane Cumar Axmed

4. Cumar Xasan Culusow

5. Cabdulaahi Jumcaal Axmed (Ceel Shube)

6. Axmed Cusmaan Cilmi (Axmed Xoor)

7. Maxamed Cabdi Sheekh

8. Jaamac Bile Cabdi.

Shirkaas waxa ugu horeyntii ka hadlay Ciyaaryahan Ceel-Shuube wuxuuna u mahadceliyey dadkii soo qabanqaabiyey shirkaan oo muhimad gaar ah u leh inta ay hiwaayadoodu tahay Ciyaaraha Fudud, waxaana uu ku soo dhaweeyey Mudane Cabdi Warsame Isaaq oo isna ka hadlay muhiimadda uu shirkaan oo kale leeyahay isagoo farta kuu fiiqay in mudnaanta la siiyo ku barbaarinta ciyaaraha fudud dhalinta soo koreysa waxaana la isla gartay in ajendaha shirka uu noqdo kuwa soo socdo:-

1. In la dhiso guddi ku meel gaar ah oo soo abaabula shirweyne kan ka balaaran.

2. In xiriir toos ah loola xiriiro tababarayaashii gacanta ka geystay horumarinta Ciyaaraha Fudud haddey ahaan lahaayeen Somali iyo Ajaaniiba.

3. In Mustaqbalka Dhaw la unko naadi ay isugu yimaadaan bahda Ciyaaraha Fudud.

4.  In aqoon kororsi loo raadiyo Ciyaartoydii Cuslaatay iyo kuwa aqoonta leh.

5. In Xiriir joogta ah lala sameeyo Xiriirka Soomaaliyeed ee Ciyaaraha Fudud.

6. In Tababar loo furay dhaalinta soo koreysa ee ku wanagsan Ciyaaraha Fudud.

7. In Bahweynta Ciyaaraha Fudud laga uruuriyo qaaran oo lagu fuliyo shaqo maalmeedka.

Ka dib waxa shirkaasi uu guda galay in si saraaxad leh looga dooday qodobadda kor ku xusan iyadoo la isku raacay in ay qodobadaasi saldhig u noqon karaan horumarinta Ciyaaraha Fudud ee Somalia ha noqdaan kuwa jooga dalkii ama kuwa ku nool dibadda,sidoo kale waxay ka soo qeybgalayaashii shirkaasi ay isku raaceen in aqoon la'aani aan wax la fulin kara aysan jirin iyago isla gartay in diiradda la saaro in la unko jiil ku wanagsan Ciyaaraha fudud aqoontooduna ay tahay mid la saanqaadi karta himiladda aanu tiigsaneyno.

Ugu dambeyntii waxa la isku raacay in guddigani loo bixiyo SOMALI RUNNERS COMMUNITY ORGANISATION oo marka la soo gaabiyo noqonaayo [SRCO],waxa kaloo la isla gartay in la sameeyo guddi hogaamiya ururkaani inta laga gaaro shirweynaha oo la qaban doono mustaqbalka dhaw, waxayna kala yihiin:-

• 1-Cabdi Warsame Isaak (Gudoomiye)

• 2-Cumar Xasan Culusow (Gudoomiye Kuxigeen)

• 3-Shidane Cumar Axmed (Xoghaye)

• 4-Axmed Cusmaan Cilmi (XOOR) Kaaliye Xoghaye

• 5-Jaamac Bile Cabdi (Xoghayaha Maaliyadda).

Waxa ugu dambeyntii shirkaasi khadka Teleefoonka uga qeyb galay isaga jooga Dalka Ingriiska Mudane Cabdulle Saney oo ka mid ah Gudoomiye Ku xigeenadda Xiriirka Soomaaliyeed ee Ciyaaraha Fudud, isagoo marka ugu horeysa ugu hambalyeeyay Halyeeyadda Soomaaliyeed ee Ciyaaraha Fudud si ay markaan ugu heelan yihiin kor u qaadida Ciyaaraha Fudud ee Soomaaliya oo sida la ogsoon yahay magac iyo maamuusba ku lahaa adduunyadda waxaana isagoo ku hadlaayo magaca Xirirka Ciyaaraha Fudud uu u ballaqaaday in aysan waxba ka hagran doonin intii awoodooda ah, waxaana ugu dambeyntii ku booriyey in himiladaan wanagsan laga mira dhaliyaa isagoo sheegay in qeybta Xiriirka ku soo aada ay ka soo dhalaali doonto, waxaana uu shirkii ku soo dhamaaday si heer sare ah.

Isboorti Chief Editor
Said Ibrahim Hussein (BUUNA)
Cell Phone:+2526-99-982912
               +2526-1-5520008
Email:buuna@isboorti.com 

Faafin: SomaliTalk.com / June 2, 2010

Kulaabo bogga www.SomaliTalk.com © www.SomaliTalk.com

La soo xiriir: