SOMALITALK.COM dahabshiil
w w w . S o m a l i T a l k . c o m
SOMALITALK - WARAR

1da Luulyo iyo Soomaalida...

  • Xuska Munaasabada 1 Luulyo oo si weyn looga xusey magaalada Kampala ee Dalka Uganda
  • Dr. CALI CUSMAAN:"Waa Xus Maalmo Qadarin Mudan‏"..
  • KOWDA LUULIYO IYO KARACHI
  • laba Munaasabadood oo kala ahaa mid Qalinjabin ah iyo munaasabadaha 26-ka june iyo 1-da july ayaa ka dhacday magaalada Hyderabad ee wadanka India
  • Sh. Nuur Baaruud oo ardayda soomaaliyeed ee sudan la xusay 50 guradii xornimada soomaaliya
  • Wariyeyaal soo qaban qaabiyey Sannad Guurada 50 – aad ee Xoriyada Somalia oo si weyn looga xusay magaalada Borlange

Xuska Munaasabada 1 Luulyo oo si weyn looga xusey magaalada Kampala ee Dalka Uganda

waxaa habeennimadii xaley ahayd lagu qabtay xaflad si weyn loo soo agaasimay Hoolka weyn ee Xarunta iskuulka Aga Khan ee magaalada Kampala taasi oo lagu maamuusayey 50 guuraydii ka soo wareegata xoriyada Gobolada Koonfureed iyo israacii Gobolada Waqooyi iyadoona ay ka soo qeybgaleen madax faro badan oo ka kala socday sida Hay,ada Inter Aid oo iyada hoos timaada hay,ada UNHCR Safaaradda Soomaalida Madam Aydiid Khadiijo Siciid Gurxan iyo weliba Dr Xaawo Cabdi oo iyada si weyn looga yaqaano dalka Soomaaliya Wasiirudowlihii hore ee Wasaaradda Gaashaandhiga Dawladii Federaalka ee Soomaaliya iyo weliba boqolaal dad weyn soomaaliyeed oo isugu jira haween iyo dhalinyaro,

Ugu horeyntii xafladani oo ahayd mid si weyn loo soo maamuusey islamarkaasna dadweynaha soomaaliyeed ay ku ciidayeen farxada iyo reen reenta munaasabada 1 Luulyo ayaa waxaa halkaasi ka hadashey Madam Aydiid Khadiijo Siciid Gurxan oo iyada ah Gudoomiyaha Somali Intiative Peace and Development ee Dalka Uganda islamarkaasna wax weyn u qabatay soomaalida ku soo qaxday Dalka Uganda gaar ahaan caasumada Kampala iyadoona ugu horeyntii umadda soomaaliyeed ugu hambalyeysay munaasabada 1 Luulyo oo ah 50guuradii ka soo wareegatay Xoriyadii Gobolada Koonfured iyo israacii Gobolada Waqooyi iyadoona halkaasi ka soo jeedisay khudbad qiimo weyn ku dheehan oo ku wajahan muhiimada ay umadda soomaaliyeed ay u leedahay munaasabadda amaba xuskani 1 Luulyo iyadoona sheegtay in ay xornimadii qeyb weyn ka qaateen dhalinyaradii soomaaliyeed ee ururkii SYL kuwaasi oo ay si weyn u xustay iyadoona tibaaxday in ay xurnimadu dhibaato weyn u soo mareen dhalinyaradaasi soomaaliyeed ugu danbeyntii Madam Aydid Khadijo Siciid Gurxan ayaa waxa ay shacabka soomaaliyeed ugu baaqday meeli weliba oo ay aduunka ka joogaan in ay ka qeyb qaataan xasiloonida dalka soomaaliya iyadoona xustay in ay si weyn uga xuntahay dhibaatada 21 jirsatay ee maanta dalka ka jirta,

Waxaa kaloo isna halkaasi ka hadley Wasiirudowlihii hore ee Wasaaradda Gaashaandhiga Dawladii Federaalka ee Soomaaliya sheekh Yuusuf Indhacade isagoona ugu horeyntiiba umadda soomaaliyeed salaan ku aadan munaasabada halkaasi uga diray umadda soomaaliyeed meel weliba oo ay aduunka ka joogaan isagoona ilaahay uga baryey in ay sanadkaan sanadkiisa kale ku gaaraan barwaaqo iyo baraare,

waxaa iyana halkaasi ka hadashey Dr Xaawo Cabdi oo iyada si weyn looga yaqaano dalka soomaaliya iyadoona iyana halkaasi hambalyo ku aadan munaasabada

1 Luulyo halkaasi uga dirtay shicibweynaha soomaaliyeed iyadoona ilaahay u bariday dadka soomaaliyeed oo ay ku habstay colaada iyo gaajada iyo weliba barakaca iyadoona ilaahay uga bariday in dhibaatada ka saaro soomaaliya,

ugu danbeyntii Waxaa kaloo iyana halkaasi lagu soo bandhigay heeso iyo ruwaayado ka turjumaya munaasabada 1 Luulyo iyo ahmiyadda ay u leedahay shacab weynaha soomaaliyeed meel weliba oo ay joogaan iyadoona halkasi sido kale lagu soo bandhigay calankii buluuga ahaa ee soomaaliyeed kaasi oo qofkii arka dareen weyn ku abuuraya ama ka ilmaysiinaya iyadoona ay xaflada ku dhamaatay si wanaagsan

Ma ahan oo keliya meelaha laga xusey munaasabada i luulyo waxaa kaloo laga xusey magaalada Nairobi ee xarunta dalka Kenya sidoo kale waxaa laga xusey guud ahaan caalamka intiisa badan.

Xuseen Cabdulaahi Xasan
E-Mail Xuseen339@hotmail.com
Kampala Uganda

Dr. CALI CUSMAAN:"Waa Xus Maalmo Qadarin Mudan‏"..

ATLANTA: Guddiga Isboortiga iyo dhaqanka ayaa waxa uu abaabulay xaflad aad u qiimo badan oo kulmisa maalmo Ummadda Soomaaliyeed iyo addunkaba qiimo ku leh,taarikhaaso oo kala ah Juun 23 maalinta Olympigadda Addunka, 26 Juun maalintii ugu horeysay ee la saaro Calan Soomaaliyeed, 27 Juun oo ah maalinti ay xornimadda qaadatay walaalaheen Jabuuti, 1da Luulyo isu tagii labadii Gobol ee Koonfur iyo Waqooyi iyo 4 July oo ah Maalintii ay xornimadda qaateen Dawladda aanu saaxiibka nahay ee Mareykanka, waxaana ugu horeyntii ka hadlay Gudoomiyaha Isboorti iyo dhaqanka ahaana Xoghayahii hore ee Guddiga Olympic-da Soomaaliyeed Mudane Dr. Cali Cusmaan Cali oo aad ugu mahad celiyey ka soo qeyb galayaasha sidii xurmadda laheyd oo ay uga aqbaleen Casuumadda, isagoo sheegay in laga bilaabo 20 Juun illa 4 Luulyo ay socon doonto xafladaha lagu weyneynaayo maalmahaas qadarinta Mudan.

Waxa ugu horeyntii halkaa ka hadashay (Khadka Teleefoonka) Kusimaha Wasiirka Wasaaradda Dhalinyaradda iyo Isboortiga Marwo Khadiijo M. Diiriye iyadoo ku hadleyso Magaca Madaxweynaha Jamhuuriyadda Soomaaliyeed Mudane Sheekh Shariif Axmed,Gudoomiyaha Barlamaanka Mudane Shariif Xasan iyo Ra'iisul wasaaraha Mudane Dr. Cumar Cabdirashiid Cali Sharmaarke, ayey waxay si qoto dheer uga hadashay halgankii loo soo galay xornimadda aanu maanta ku naalooneyno, waxayna ku tilmaantay halgankaasi mid mar kastaba ay taarikhdu xusi doono, waxay kaloo Hambalyo kal iyo laab ah u jeedisay Madaxweynaha Dalka aanu walaalaha nahay ee Jabuuti Mudane Cumar Geele oo wax badan u soo qabtay Ummadda Soomaaliyeed taa uu qof kastoo Soomaali ah uu xususnaan doono.

Kusimaha Wasiirka Wasaaradda Isboortiga Marwo Khadiijo M. Diiriye ayaa sidoo ku dheeraatay taarikhda lama iloobaanka ah ee 1da Luulyo taa oo aheyd isutagii labadii gobol ee ka xoroobay mustacmarkii, ugu dambeynti waxay u dirtay Dalka Mareykanka Hambalyo ku aadan 4 July oo ah Maalintii ay xornimadda qaateen, waxayna iyadoo magaca Madaxda Soomaaliyeed ku hadleyso ay uga mahadnaqday doorkii ay ka qaateen badbaadinta Ummadda Soomaaliyeed.

Waxay kaloo xustay 23 Juun oo loo dabaaldegaayo 114 guuraddi ka soo wareegatay maalintii udubadda loo taagay Guddiga Olambikada Caalamka oo ay Soomaalia ka tahay xubin buuxda, waxay akhiritaankii u mahadcelisay Guddoomiyaha Isboortiga ahaana Xoghayahii hore ee GOS Dr. Cali Csumaan Cali dadaalka mar kastaba uu muujiyo isagoo mar kastaba jecel in Ummadda Soomaaliyeed ay nabad ku naaloodaan, waxayna halkii ku kasbatay sacab aan kala joogsi laheyn.

Waxaana kaloo Xafladaasi khadka teleefoonka kaga ka qeyb galay Xidhibaan Macalin Maxamuud Maxamed Aadan [Macalin Jiis], Xildhibaan Mahad Cabdalla Cawad [Xasharo] iyo Danjire Cabdiraxmaan Dinaari, waxayna madaxdani kuu dheeraadeen ahmiyadda ay maalmahaani ay Ummadda Soomaaliyeed u leedahay, waxayna xuseen in Xornimadda maanta aanu haysano aysan ku imaanin si dhib yar, laakiin loo daadiyey dhiig badan iyado ay dad badan oo Soomaali ah ay u waayeen Xubnahooda, waxayna shacabka Soomaaliyeed ka codsadeen in bal markaan loo jeesto nabadda lana iloobo dhibaatooyinkii hore u dhacay, waxay kaloo carabka ku adkeeyeen in dagaal iyo is dil midna guul lagu gaareynin iyagoo sheegay in ay xaq tahay in jiilka soo koraayo loo reebo dhaxal wanagsan oo salka ku haya nabad iyo wada noolaasho, waxayna ugu dambeyntii aad iyo aad ugu mahadceliyeen madaxda Dawladda Midnimo Qaran oo wax kastaba u hurtay sidii Soomaaliya looga dhalin lahaa Nabad waarta, waxay ugu dambeyntii Illaah u baryeen in sanadkaan sanadkiisa aanu ku gaarno nabad iyo bash bash.

Waxaana ugu dambeyntii ka soo qeybgalayaashii mar kale u mahad celiyey Gudoomiyaha Isboortiga ahaa Xoghayahii GOS ee hore, waxaa kaloo Xoghayaha uu hambalyo u diray Isagoo ku hadlaya inta samaha jaecel ummadda Soomaaliyeed ayuu waxaa isagoo qiireysan ayna ka muuqato shucuur wadannimo Hambalyo iyo Bogaadin u diray Fanaanka Soomaaliyeed Keynaan Cabdi Warsame taa uu ku kasbaday sida uu u muujiyay in ay weli Soomaaliya jirto. Waxaana uu kor u qaaday niyadda shacabka Soomaaliyeed waxaana aan leeyahay Guuleyso Keynaan , SOMALIA HA NOLAATO ..SOMALIA HA IS RAACDO, Sidoo dhamaan qoyska Olambikada (Olympic Family) oo ay ka mid yihiin Halyeeyada kala ah ah Edwin Moses,Tommy Smith, Ron Davis, Mike Spino, Lee evans iyo Mel Pender oo dhamaantood ka mid ah Ciyaaryahanno Biladda Olambikada ku Guuleystay oo saaxiib dhaw la ah Dr. Cali Cusmaan Cali, wuxuuna Dr. Cali ku soo gabagabeeyey mahadcelin aan la koobi karin uu u jeediyey Danjire Cabdiraxmaan Nuur Maxamed (DINAARI) doorkii shariifka ahaa uu ka qaatay isku xirka Dawladda Midnimo Qaran iyo jaaliyadaha ku nool Addunyadda afarteeda dacal, taa oo sahleysa iska warqabka Dawladda Soomaaliyeed iyo Soomaalidda qurbaha ku nool, waxaana xafladii ay ku soo gababawday si heer sare ah.

Said Ibrahim
Email: saciid_buuna@hotmail.com

KOWDA LUULIYO IYO KARACHI

Waxaa hamaynkii xalay ahaa lagu qabtay magaalada Karachi ee koofurta dalka Pakistan Xaflad si aad ah loo soo agaasimay oo loogu dabaal dagayay sanad guurada 50aad ee kasoo wareegatay markii ay Somaliya gaar ahaan gobalada koofureed ka xoroobeen gumaysihii talyaaniga.

Xafladaan oo ahayd mid soo jiidasho leh ayaa waxaa kasoo qayb galay dadwayne isugu jira aqoonyahano, arday, dhalinyaro, hooyooyin iyo caruur, waxaana intii ay socotay madasha xaflada lagu soo bandhigay waxyaabo kala duwan oo ay ka mid ahaayeen qudbado, majaajilo, heeso, gabayo iyo sidoo kale duco si wada jir ah loogu duceeyay Soomaliya.

Waxaa soo abuubulay kaalin wayna ka qaatay qabsoomida xafladaan ururo soomaaliyeed oo issu tagay kuwaas oo ka hawl gala Pakistan iyo meelo badan oo caalamka ah. Ururadaan oo ah kuwo ka shaqeeya arimo kaladuwan sida caafimaadka, nabadaynta, midaynta iyo hormarinta ayaa waxaa ka mid ah:

  1. Xisbiga Waddaniyiiinta Soomaaliyeed (Hanoolaato).
  2. Ururka Waddaniga Soomaaliyeed
  3. Ururka Ardayda Soomaaliyeed ee Jaamacada Karachi(Karachi University)
  4. Ururka Jaaliyada Soomaaliyeed ee Hyderabad
  5. Dr. Osman foundation.

Ururadaan oo sal u ahaa qabsoomida xafladaan loogu dabaal dagayo kowda luuliyo ayaa intii lagu guda jiray waqtiga dabaal daga waxaa halkaas hadalo wax ku ool ah ka jeediyay madaxda ururada oo kala ahAbdirahman Xasan Shabuuti oo ah wakiilka xisbiga wadaniyiinta soomaaliyeed (Hanoolaato), Kamaal Xaaji Guuleed gudoomiyaha ururka wadaniga Soomaaliyeed, Shaafici Abdullahi Mo’alimgudoomiyaha ardayda jaamacadda Karachi Univesity, Ahmed Mohamed Hussien xoghayaha Jaaliyada Soomaalida Magaalada Hyderpad Dr. Mohamed Osman madaxa Dr. Osman Foundation iyo Farah Mohamed Sharawe gudoomiyaha ururka dhaqaatiirta Soomaaliyeed ee Pakistan.

Dhammaan madaxdaas ururada oo halkaas hadalo qiimo leh ka jeediyay ayaa waxyaabihii ay ka hadleen ama diirada saareen waxaa ka mid ahaa ahmiyada ay kowda luuliyo u leedahay bulshada Soomaaliyeed, taariikhda soomaliya, taariikhda calanka buluga ah iyo taariikhda halgamayaashii soomaaliya oo ay ka mid ahaayeen Ahmed Gurey, Sayid Maxamed, SYL iyo kuwa kale oo badan, sidoo kale waxay bulshada soomaaliyeed meel walba oo ay joogtaba u direen salaam iyo farxad ku aadan kowda luuliyo iyagoo ilaahay uga baryayay in ilaahay quluubtooda isu dumo ayna noqdaan kuwa fahma dantooda guud iyo tan gaar ahaaneedba.

Waxyaabihii halkaas lagu soo bandhigay ama looga hadlay ma,ahan kuwa aan halkaan kusoo koobi karo, balse waxaa lama ilaawaan ah in halkaas aan lagu soo bandhigin oo kaliya qudbado, balse sidoo kale fanaaniin da yar ay ka qaadeen heeso wadani ah iyo sidoo kale gabayo kala duwan oo uu ka mid ahaa gabaygii caanka ahaa ee lagu xasuusto maalintii la taagay calanka jamhuuriyada Soomaaliya kaas oo ah

“SAREEYOOW MA NUSQAAMOOW,AAN SIDUU YAHAY EEGEE KANA SIIB KANA SAAR” (Suldan Tima Cadde).

Xusitaanka kowda luuliyo maahan mid kucusub bulshada soomaaliyeed ee ku dhaqan Pakistan, balse waxaa la is dhihi karaa xafladii xalay waxay ahayd mid ka xiiso iyo qiiro badan kuwii hore iyadoo kasoo qayb galayaasha wajiyadooda ay ka muuqatay farxad iyo damaashaad. Mar aan wax ka waydiiyay qaar ka mid ah kasoo qayb galayaasha sida ay u arkaan kowda luuliyo iyo sanad guurada 50 aad ayaa waxay ii sheegeen “in ay ku faraxsanyihiin u dabaal daga kowda luuliyo iyagoo sidoo kalana murugo ka muujiyay xaalada soomaaliya ay ku sugantahay waqti xaadirkaan”.

Dabaal daga kowda luuliyo maahan mid ka dhacaya Pakistan oo kaliya sidoo kale kumanaan Soomaali ah ayaa aduunka daafihiisa uga dabaal dagaya kowda luuliyo, waxaase laga yaabaa dadka qaarkood inaysanba fahansanayn muhiimada ay leedahay kowda luuliyo.

  • 1dii luuliyo 1960, waa maalintii calansaarka iyo midnimada soomaaliya,
  •  waa maalintii gobolada koonfur ee Soomaaliya ay ka xoroobeen gumeystihii talyaaniga, isla markaana ay la midoobeen gobolada waqooyi, halkaasna ay ka curatay Jamhuuriyaddii Soomaaliya.
  • Waa maalintii la laabay calankii gumaysiga,laguna bedelay mid somaali leedahay.
  • Waa maalin kumanaan soomaali ah ay la ilmeeyeen farax iyo damaashaad gumaystihiina uu la ilmeeyay murugu iyo naxdin.
  • Waa maalintii hanka Soomaaliyeed kor u kacay oo lagu hammiyey loona hawlgalay in la haleelo qaran Soomaaliyeed oo dhammeystiran.

Waxaa jira dad ka niyad jabsan dabaal daga kowda luuliyo oo ku andacoonaya maanta inay mudantahay in la baroor diiqdo maadaama ay Soomaaliya meel adag xaaladeedu marayso, taas waxay ila tahay qaran iyo qaran la,aanba inay mar walba mudantahay in la xuso, loona dabaal dago kowda luuliyo maamadaama ay tahay maalin taariikhi ah oo aan mar naba la hilmaami karin. Waxaan ognahay in Soomaaliya muddo 20 sano ka badan nidaam la,aan iyo fawdo ka jirto, balse waxaan filayaa siday u indho la’dahay uma Alla-la’a, lagamana quusan in maalin maalmaha ka mid ah la arko soomaaliya oo mid ah. Waxaan rajaynayaa in ay soo bixi doonaan wadaniyiin soomaaliyeed oo dalka ka saara dhibaatada daashatay.

Somaliya ha noolaato Hana is raacdo

Hanbalyo kowda luuliyo

Qorre: Durran Hassan Aden
Karachi, Pakistan
La xiriir: abdimanaam@gmail.com

laba Munaasabadood oo kala ahaa mid Qalinjabin ah iyo munaasabadaha 26-ka june iyo 1-da july ayaa ka dhacday magaalada Hyderabad ee wadanka India

xaflad si heer ah loo soo agaasimay ayaa ka dhacday magaalada Hyderabad.

xafladaasi oo lagu maamuusayay munaasabadaha 26-ka june iyo 1-da july ayaa ka dhacday Jaamcadda JNTU ee magaaladatan Hyderabad ee Dalkan India.

Xafladan ayaa waxa soo qabanqaabiyay isla markaana Qabsoomidiisa iska lahaa ururka ay Ardayda Somaliyed kumidaysanyihiin ee Somali Students Association (S.S.A) loo yaqaano ee ka dhisan Dalkan India.

Ugu horayn waxaa Hadal furitaan iyo mahad celinba halkaasi ka jeediyay Gudoomiyaha ururka Somali Students Association Mr. Faysal Mohamed Mataan, Gudoomiyaha ayaa Kasoo qaybgalayaashii xafladda uga mahad celiyay taageeradooda ku aadan qabsoomida xafladan iyo dadkii waqtigooda u huray intaba.

waxaa sidoo kale xafladaasi la mataano ahayd oo barbar socotay xaflad kale oo Qalin jabin ah oo loo qabtay Ardayda Somaliyeed ee ayagu ka qalin jabiyay heerarka kala duwan ee waxbarasho oo isugu jira kuwa qalin jabiyay Intermediate, Bachelor Degree, Master Degree iyo PHD intaba.

Marti sharaftii dardaaranka iyo bogaadinta ka jeediyay halkaasi ayaa waxaa ka mid ahaa Abdirahman Mohamed Omar oo loo yaqan (G8) oo asagu wax ka taabtay xaaladda nololeed ee soo wajahda Ardayda marka ay wadankan yimaadaan iyo waxyaabaha lagudboon Marka uu Ardayga Somaliyed u jihaysto dhanka waxbarashada.

Ardaydii xafladaasi ka hadashay isla markaana kakala timid Gobolada wadankan India ayaa waxaa ka mid ahaa Xasan Ciise Diiriye oo asagu ku dheeraaday Hambalyaynta iyo is xasuusinta dhibaatadii loo soo maray Xornimadii wadanka, sidoo kale wuxuu halkaasi kula dardaarmay uuna dhiira galin u jeediyay Ardaydii xafladda Qalinjabinta loo qabtay.

Sidoo kale mid ka mid ah Ardaydi Qalin jabiyayaasha ahna madaxa Secretery-ga ee Somali Students Association (S.S.A) Ciise Osman Yusuf ayaa halkaassi qudbad dheer oo ku aadan halganka waxbarasho iyo heerarka kala duwan ee waxbarasho ka jeediyay.

"waxbarashadu waa midda aan uga nimid wadankii Hooyo, waana mid mudan in aan kaga faa'idaysano waqtiga" ayaa hadaladiisa ka mid ahaa Mr. Ciise Osman Yusuf.

Qudbad xamaasad galisay dareenka soona jiidatay dhagaha ka soo qaybgalayaashii xafladda ayaa waxaa halkaasi ka jeedisay Ubax Nur Sheikh oo ka mid ahayd ardaydii dhameesatay qaybta Masters Degree-ga ee (M.B.A).

"Waxbarashadu waa Iftiinka iyo mustaqbalka Dalka iyo Dadkaba, sidaas daraateed qofki waxbarta wuxuu awood u leeyahay inuu soo saaro ubad wanaagsan saamayn fiicana ku yeesha Dalka iyo Dadkaba" waa sida ay hadalka u dhigtay Ubax Nuur Sheikh.

Sidoo kale ubax Nur Sheikh waxay Hambalyo ku aadan Munaasabadaha 26-ka june iyo 1-da july u dirtay dhamaan bulsha waynta Somaliyed ee kukala nool aduunka.

Sidaasi si lamid ah ayaa waxaa halkaasi khudbado dheer kakala jeediyay Madaxda jaamacada Magaalada Hyderabad oo ayagu balan qaaday inay soo dhaweenayaan Dhamaan Ardayda SOmaliyeed uguna Hambalyeeyeen Bulshada Somaliyed Munaasabadaha 26-ka june iyo 1-da July.

Barnaamijyadii Halkaasi lagu soo bandhigay ayaa sidoo kale waxaa ka mid ahayd Riwaayad aad loola dhacay waxna ka badashay dareenka kasoo qaybgalayaashii xafladda ayadoo Riwaayadda taabanaysay xaaladaha kala duwan ee ka jira wadanka iyo sida qof kaste oo muwaadin SOmaliyed ah lagudboon inuu Dalkiisa iyo Dadkiisaba daacad u noqdo.

Sidoo kale Waxaa halkaasi lagu soo bandhigay Projector muujinaya qayraadkii Dabiiciga ahaa ee uu wadanku lahaa iyo sida ay ahaan jireen Goobihii waxbarasho ee wadanka.

Xafladaasi oo kusoo gabagabowday Jawi farxadeed ayadoo qofkaste wajigiisa laga dheehan karay sida uu ula dhacay wixii lagu soo bandhigay xafladda, sidoo kale ayaa siyaabo kala duwan loogu kala hambalyaynayay Qalin jabiyayaashii xafladda.

  • By: Wariye Najiib Abdirizak Warsame ( Najiib yare)
  • Magaalada Hyderabad ee Dalka India.
  • Tell: 0091-9618398299
  • Email: Najiibyare4@hotmail.com

Sh. Nuur Baaruud oo ardayda soomaaliyeed ee sudan la xusay 50 guradii xornimada soomaaliya

Kulanka dhalinyarada soomaaliyeed aya xaflad si weyn loo soo agaasimay xarunta dalka sudan ee khartuum habeenimadii khamiista, xafladan oo lagu xusayay xornimada 50 jirsatay ee dalka soomaaliya .

Waxaana ka soo qeyb galay xaflada afahayeenka culumaa,udiinka soomaaliyeed shiikh nuur baaruud gurxan iyadoo uu kasoo jeediyay kalmad aad u qiima badnayd oo uga hadlayay halgankii xornimo-doonka wuxuuna falanqeyay taariikhdoodii, dowrkii SYL ay ku lahayeen helida xornimada iyo xiirarka ay lahaayeen diinta iyo xornimo u dirirka .

Xaalada u dalka ku sugan yahay kama tagin sheekhu wuxuuna si qoto dheer uga hadlay carqaladaha hor istaagay dadaaladi ay wadeen culumaa udiinka soomaaliyeed iyo dhacdooyinki ay la kulmeen intii ay ku guda jireen howshaas iyadoo uu tilmaamay iney dowlada islaamiga ah ee soomaaliya tahay dhinaca kaliya ee nabada diyaarka u ah wuxuuna ku booriyay dhamaan soomaalida iney garab galaan oo ay la shaqeyaan .

Waxa kale oo isna ka hadlay Ustaad Cabduqaadir Xirsi oo si kooban u dul maray muhiimada munaasabadan , iyadoo uu xigay Ustaad Xuseen Bashiir oo soo qaatay xaalada u dalka ku sugan yahay isagoo dhalin yarada waxbaratay ku dhiiri geliyay inay badbaadiyaan dalkooda .Madaxa kulanka dhalinyarada soomaaliyeed Cabdifitaax Qaasim aya isna tibaaxay in ay dhlinyaradu u dagan yihiin masaalix shisheeye oo fulinayaan dad dano gaar ah leh .

Waxaana ugu danbeyntii lasoo bandhigay filim gaaban oo aad qiiro badnaa xasuusiyayna ardayda dalka iyo bilicda uu laha berri iyo qeyraadkiisa iyo madaxdii soo martayba.

MAXAMED CABDIWELI YUUSUF(taango)

otaange@hotmail.com

Wariyeyaal soo qaban qaabiyey Sannad Guurada 50 – aad ee Xoriyada Somalia oo si weyn looga xusay magaalada Borlange

Wariyeyaasha kala ah Maxamed Cabdulle Xasan ”Siidi”, C/risaaq Cumar Ismaaciil ”Sheekh Aduun”, Xasan Maxamed Axmed ”Liisho” oo haatan ku nool magaalada Borlange Gobolka Dalarna ee Dalka Sweden ayaa si iskood ah isu abaabulay inaay isu keenaan dhalinyaro iyo waxgarad kakala socday Jaaliyada Soomaaliyeed ee ku nool magaalada Borlange si ay u weyneyaan sannad guurada 50 – aad ee kasoo wareegatay maalintii Calanka Buluuga ah laga taago Somalia.

Dadweyne tirada kor u dhaafayey boqolaal ayaa kasoo qeyb galay kulan balaaran oo loogu talo galay weyneynta maalinta xoriyada Somalia iyadoo halkaasi ay ka hadleen laba masuul oo u sharaxan doorashada Sweden kuwaasoo Somalia u dhashay isla markaana ah laba nin oo aan cidi la tartamaysa aanan jirin doonayana inaay magaca Soomaalinimo loogu codeeyo.

Ragaasi ayaa siweyn ugu hadlay taariikhda Calanka Jamhuuriyada Somalia iyo qiimaha uu uleeyahay ummada Soomaaliyed iyo ragii usoo geeriyooday xornimo udirirkii 1960 – kii markii Somalia ay ka xorowday gumeysigii kusoo duulay.

Abaarihii 12:00 Am ama saqda dhexe ayaa Calanka Somalia ee Buluuga ah kor loo taagay isla markaana loo sara kacay, lana qaaday Astaanka Calanka Somalia: Soomaaliyoo toosoo, Toosoo isku tiirsada ee , Hadba kiina taagdaranee Taageera waligiinee, waxaana la shiday muusikada Astaata Soomaaliyoo toosoo, ka dib halkaasi waxaa ka bilaabatay damaashaad iyadoo lagusoo bandhigay ciyaaraha hiddaha iyo dhaqanka Soomaaliyeed iyo heeso kala duwan oo ay qaadayeen fanaaniin da' yar oo soo koraya.

Mursal iyo Fanax oo ah laba musharax oo u kala tartamaya jagooyinka heer degmo iyo heer gobol ayaanan jirin Soomaali kale oo tartanka kula jirta waxayna codad ka sugayaan Soomaalida ku nool Gobolka Dalarna taasoo la hubo inaay 100% helayaan codadka ay ku tashanayaan.

Wariyeyaasha Maxamed Siidi, Sheekh Aduun iyo Xasan Liisho oo iyagana halkaasi ka hadlay ayaa sheegay in ay aad ugu xun yihiin raggii ka soo horeeyey inaaysan diyaarin xaflada qiimaha uleh Soomaaliya iyagoo ka dhiidhiyey iskuna xil saaray inaay usara kacaan maalinta xoriyada Somalia sidii Jaaliyada Somalia ee ku nool magaalada Borlange ay xusi lahaayeen maalintaasi qiimaha badan xambaarsan.

Sidoo kale wariyeyaashani ayaa ka hadlay xoriyada iyo sidii ay ku timi iyo waliba calanka buluuga ah ee dhexda shan geesoodka xidigta cad ku leh qiimaha uu uleeyahay bulshada Soomaaliyeed.

Dhalinyaro badan oo ku dhalatay dalka Sweden iyo qaar iyagoo yar yar laga soo waday dalka Somalia oo xaflada kasoo qeyb galay markaay dhagaysteen qudbadaha ka hadlayay xornimada ayaa aad ugu farxay oo soo dhaweeyey waxa aysan hore u maqal.

Wariyeyaashani waxayna hambalyo u dirayaan dhamaan ummada Soomaaliyeed inaay kula ciidaan maalinta xoriyada Somalia oo kasoo wareegatay 50 – sanno in Allah wadankeena nooga qaado dhibaatada kuwa maalin kasto ku dhimanayo Allah ka badbaadiyo kuwa dhibka bidayana Allah tusiyo Dhabaha toosan.

Gaba gabadii Sheekh Aduun, Maxamed Siidi iyo Xasan Liisho iyagoo aad ugu xun waxay cambaareeynayaan iyagoo fursadaani ka faa’ideysanaya xadgudubkii loo geeystay wariyeyaashi shalay madaafiicda lala dhacay iyagoo gudanaya waajibaadkooda hawl maalmeedka ah, waxay kaloo tacsi u dirayaan shacabka Soomaaliyeed ee maalin waliba lagu laynayo dalka Somalia.

Hassan liisho
Borlämge Sweden
liisho@hotmail.com
 

Faafin: SomaliTalk.com / July 3, 2010

 

Kulaabo bogga www.SomaliTalk.com © www.SomaliTalk.com

La soo xiriir:

IIDHEH
XAYAYSIIS