Dadweynaha Magaalada Baydhabo oo si weyn u soo dhaweeyey Ururka Al-Shabaab
Wararka naga soo gaaraya Magaalada Baydhabo waxay sheegayaan in isbedelkii
weynaa ee ka dhacay magaalada ee ahaa la wareegidii Urur Diimeedka Al-Shabaab ay
si weyn u soo dhaweeyeen dadweynaha Magaalada Baydhabo oo iyagu mudooyinkaan
dambe ku jiray nabadgelyo daro, taas oo sababtay in dadka iyo gaadiidku ay isku
socon waayaan.
Dadweynaha ayaa markii laga qaaday wareysiyo fara badan waxay sheegeen in
isbedelkaani uu Baydhabo u horseedi karo nabadgelyo, waayo mar kasta waxaa
wanaagsan in uu hal xoog uu u haro magaalada, balse marka uu labo xoog iska soo
horjeedo waxay sheegeen in ay halkaa ku baabi’I karaan shacabka iyo hantidooda.
Sheekh Mukhtaar Roobow (Abuu Mansuur) oo meelo fagaare ah kula hadlay dadweyne
aad u fara badan ayaa waxa uu sheegay in magaalada Baydhabo wixii haatan ka
dambeeya lagu xukumi doono shareecadda Islaamka, taas oo ay si weyn u soo
dhaweeyeen dadweynaha Magaalada, waxa uu sheegay Abuu Mansuur in sida ugu
dhaqsiyaha badan maamul islaami ah loogu sameyn doono gobolka Bay oo haatan
gacanta u galay Ururka Al-shabaab, sidoo kale waxa uu sheegay in gobolka Bakool
isna loo sameyn doono maamul islaami ah.
Dadweynihii bililiqada ka gaystay xarumaha Dowladda ayaa haatan bilaabay in ay
dib u soo celiyaan waxa ay qaateen kadib markii Abuu Masuur uu labo maalmood u
qabtay dadkii qaatay qalabkii Dowladda, waxa uuna sheegay in hantidaasi loogu
adeegi doono shacabka gobolada Bay iyo Bakool.
Ururka Al-Shabaab ayaa sii daayay 10 xubnood oo ka tirsan Baarlamaanka Dowladda
Federaalka oo iyagu loogu yimid Baydhabo iyo maamulkii gobolka Bay, hase yeeshee
dadweynaha Soomaaliyeed ayaa su’aal ka keenay arrintaasi kuna tilmaamay in
hadafkii ururka Al-Shabaab laga weeciyey tubtiisii, hase yeeshee dadka qaar ayaa
waxay leeyihiin in raggaasi ay ururka Al-Shabaab uga bedesheen in la sii daayo
hub fara badan iyo rasaas ay ka tageen ciidamada Itoobiya kuwaas oo ay Itoobiya
siisay dhallinyaro beeleed la doonayay in ay difaacaan Magaalada, hase yeeshee
ururka Al-Shabaab ayaa si fudud kula wareegay magaalada Baydhabo.
W/D Amiin Yuusuf Khasaaro
E-Mail amiinkhasaaro@hotmail.com
Faafin: SomaliTalk.com | Jan 29, 2009