Waxaan magaalada London kula kulmay mudane C/qaadir Biriq oo ka mid ahaa ciyaartooydii hore ee Soomaaliya, kana tirsanaa kooxda Petrolka, isla markaana ka mid ahaa marti sharafkii ka soo qayb gashay tartankii koobka Bariga iyo Bartamaha koobka Chalange Cup 2009 ee lagu qabtey dalka Uganda.

Mudane Biriq ayaa ii sheekeeyay sida ay sanadkaan uga soo qayb galeen tartanka xulka Qaranka Soomaaliya iyo XSKC, waxana u yiri xulka Qaranka Soomaaliya sanadkaan waxaa ka muuqday diyaar garoow aad u wanaagsan, kadib markii ay 2 bilood ku dhawaad ku xareysnaayeen dalka Jabuuti halkaas oo ay ku qaadanayeen tababaro, isla markaana maamulka XSKC ayaa ka muuqday isbadal marka loo eego sanadihii hore, waxaana hogaaminayay gudoomiye ku xigeenka Xiriirka Soomaaliyeed ee Kubadda cagta ( XSKC) Mudane Ahmed Nur Hassan Abdulle.

Yusuf : Wax ma nooga sheegi kartaa ciyaaraha xulkeena Soomaaliya la yesheen kooxaha ka soo qayb galay tartanka koobka Bariga iyo Bartamaha (Chalange cup 2009)?.

Biriq: Soomaaliya waxay sanadkaan ciyaaro isaga hor yimaadeen wadamada Zinzibar, Tanzania, Rwanda iyo Uganda, ciyaarta Somalia v Zinzibar waa laga badiyay kooxda xulka Soomaaliya, inkastoo ay dadaaleen waxay natiijadu noqotey 2 goal oo xulka Zinzibar ka dhaliyo xulka Soomaaliyana aysan waxba dhalinin, kadib markii goalhayaha xulka Soomaaliya C/qadir Bakaiya uu qaladka lahaa madaama uu goalkii kowaad laga soo laaday meel dheer kadib markii uu goalka ka soo fogaaday, taas oo niyad jabisay xulkeena.

Ciyaartii labaad oo ahayd mid aad u xiisa badnayd isla markaana la is lahaa dalka Soomaaliya maanta cashar baa la siinayaa sida ay qoreen jaraa'idka ka faloonayay tartanka, madaama ay la ciyaarayaan dalka Tanzania, run ahaantii ciyaarta oo aad kululayd ayay fursad qaali ah helay ciyaaryahanka number sagaalad ee xulka Soomaaliya Ciyaaryahan Ciise ayaa si qurux badan Goal uga naxsaday xulka dalka Tanzania daqiiqadii 13-naad ciyaarta qaybteedii kowaad, taas wax badan ka badashay niyada xulkeena iyo taagerayaasha Soomaalida oo soo buux dhaafshay garoonka.

Xulka dalka Tanzania ayaa waxay ku noqotey mid ay liqi waayaan in Goal ay ka dhaliyaan ciyaaryahano ka yimid dalka nidaam iyo nabadgalyo lahayn isla markaana aan lagu aqoonin inay iska celiyaan tartamada ay hore uga soo qayb galeen, taas keentay inay ku soo qaadan weeraro is daba joog ah si ay uga badiyaan xulka Somalia , dadaal iyo karti ayay muujiyeen daafaca xulka Soomaaliya , taas oo saamixi waysay inay ka soo gudbaan afka hore Goalka, inkastoo Goalhayaha xulka Soomaaliya Goalhaye Khaalid ayaa ahaa mid si weyn ula dheelay xulka dalka Tanzania kadib markii uu 90 daqiiqo ee ciyaarta u diiday inay ka dhaliyaan hal Goal xataa, taas oo ugu dambayntii ku soo dhamaatey in xulka Soomaaliya uu suurtagaliyo inay ka badiyaan xulka Tanzania oo islahaa galabta ku qadeeya masaakiintaan.

Yusuf: Dalka Soomaaliya waligiis ma ka badinin xulka Tanzania maxaa is leedahay maxaa suurtagaliyay inay soo hoyaan guul taariikhi ah?

Biriq: Run ahaantii waxaan is leeyahay dhawr sababood inay ugu wacnaayeen tan kowaad in ciyaaryahanka Ciise oo qayb weyn ku lahaa guusha madaama uu aad u yaqaan qaab ciyaareedka xulka Tanzania , isagoo ka mid ahaan jirey kooxda Simba ee dalka Tanzania, tan labaadna waxaan oran karaa daafaca xulka Soomaaliya u safnaa oo is ciyaar yaqaanay madaama ay ahaayeen daafaca kooxda Elman Soomaaliya, tan 3aad Goalhayaha xulka Soomaaliya Khaalid ayaa isna saldhig u ahaa in ka daafaco goalka fursado badan ay heleen xulka Tanzania.

Yusuf: Kulamadii xulka Soomaaliya la yesheen Rwanda iyo Uganda maxaa looga badiyay ayaa is leedahay madaama ay ka soo badiyeen xulka Tanzania?

Biriq: Labadaan ciyaarood xulkeena waa laga adkaaday runtii inkastoo aan arkayay in ay sabab u ahaayeen in xulkeena ciyaartii Rwanda oo aan islahaa way ka badin karaan laakinse nasiib xumo ciyaaryahan Ciise oo ahaa weerarka ugu qatarsan xulkeena ahaana ninkii Goalka ka dhaliyay Tanzania ayaa dhawac soo gaarey daqiiqadii 10aad ciyaarta qaybteedii kowaad, kadib waxaa garabka ka jabay ciyaaryahanka la yiraahdo Anwar oo ka dheelayay daafaca, taas oo sababtey in labad nin oo aad muhiim ugu ahaa xulkeena in garoonka laga soo saaro, qaybtii labaadna waxaa yimid roob aad u badan garoonkiina waxa uu isku badalay dhiiqo iyo ay ku ciyaari kari waayan garoonka, madaama aysan wadanin kabaha loogu talagalay in marka garoonka isku badalo dhooqo in lagu ciyaaro, ugu dambayntiina waxa ay qasabtey in 3 gaol laga dhaliyo xulka Soomaaliya, halka Rwanda ay guusha ku raacday.

Ciyaartii Uganda waxay noqotey in dalka Soomaaliya looga badiyo 3 goal oo kale, madaama Uganda ay ahayd kooxda la saadaalinayay inay hanan doono koobka madaama dalkeena lagu qabanaayo hadana wiilasheena marka loo eego xulka Uganda aad ayay u kala duwanaayeen madaama Lix ka mid ah xulka Uganda ayaa ka ciyaara dalalka Yurub, marka iska muuqatey in farqi weyn noo dhaxeeyay labada kooxood, laakinse macalinka xulka Uganda wareysi u bixiyay ayuu ku sheegay in ciyaartooydeena ay muujiyeen ciyaar wanaag isla markaana uu u arko inay leeyihiin mustaqbal madaama xaalada dalkooda marka loo eego ay mudan yihiin inay yihiin dhalinyaro mustaqbal wanaagsan leh.

Yusuf: Qaab noocee ah ayaa loo soo xulay xulka dalka Soomaaliya ciyaartooyda uga qayb galaysay tartankaan?

Biriq: Sanadkaan waxaa xulka loo soo xulay qaab wanaagsan oo ka duwan sanadihii hore, tusaale ahaan kooxaha ka dhisan magaalada Muqdisho waxaa laga soo xulay ciyaartooy badan,gobalada Sool iyo Bari waxaa laga keenay labo ciyaartooy halka Yurub iyo North Amerika laga keenay ilaa 8 ciyaartooy, maamulkana ay ka yimaadeen gudaha iyo dibadaba, taasna waxaa dheera marti sharaf kale oo iyagana iskood isku soo xilqaamay oo ka soo qayb galay si ay u dhiiragaliyaan xulka Soomaaliya ayaa iyana jirey iyo taageerayaal badan oo Soomali ah oo dagan dalka Uganda oo dhiirigalinayay xulkeena.

Yusuf: Yaa maalgalinta ku sameeyay xulka SOOMAALIYA sanadkaan 2009 si ay uga soo qayb galaan tartankaan?

Biriq: Waxaa sanadkaan meesha ka muuqday isbadal weyn xaga martigalinta iyo maalgalinta, sideedaba koobkaan waxaa maalgaliyay Televesionka la yiraahdo GTV, shirkadaas ayaa ahayd Responsorka kowaad laakinse Garoomada iyo Hotelada la deganaa waxaa iska lahaa dowlada dalka Uganda oo martigalinta tartankaan lahayd, waxaan deganayn Hotelkii Stadium Muqdisho camal, waxaana lagu dheelayay garoonkii Stadium Muqdisho garoon u eg oo isku dhismo ah oo aniga xusuus gaar ah ii lahaa madaama aan dib u xasuustey barisamaadkii dalkeena, madaama garoonkan shirkada dhistey tan dalkeena dhistey ay ahaayeen shirkad Chines ah.

Yusuf: Dalka Soomaaliya lagama dheelo horyaal iyo Jeneraal Daa'uud marka sidee la isaga celinayaa dowlado dhisan kooxaha matalaya?

Biriq: Run ahaantii intii muda ah magaalada Muqdisho lagama dheelin horyaal iyo Jeneraal Daa'uud waa sax laakinse daruufaha dalka ka jira ayaa u saamixi waayay ayaan filayaa inkastoo ay muhiim tahay in koobab rasmi ah inay socdaan ay jiraan la abuuro mustaqbalka.

Yusuf: Biriq ma waxaa i leedahay Muqdisho bas baa Soomaaliya ah?. hadii aysan Muqdisho nabad ahayn maa AFGOOYE la tago ama Balcad waayo waa lagu dheeli karaa kubadda laguna qaban karaa koobab, maxaase u diiday inay gobalada ka shaqeeyaan hadiiba Xamar nabadii loo diiday?

Biriq: Su'aalahaan dad badan baa qaba waxaan jeclaan lahaa inay ka jawaabaan XSKC madaama iyaga un arinkaan wax ka qaban karaan ayay aniga ila tahay madaama aanan aniga xil ka haynin Xiriirka .

Yusuf: gartey sax miyaa in dhalinyaro aan u diyaarsanayn inay la dheelaan wadamo diyaarsan oo ka niyad wanaagsan? sababtoo ah wiil gaajaysan inta Xamar laga soo kaxeeyo in wajiga la geeyo un sax miyaa oo aan laga fekerin diyaar garoow iyo kooxaha la soo dhisin?

Biriq: Sax ma ahan laakinse hada waxaan is leeyahay wax badan baa iska badali doono inkastoo dhibaatada ay iska badan tahay in laga qayb galo sax ayaan u arkaa laakinse loo tashado isla markaana qof kasta oo wax ka badali kara sidii wax loo horumarin lahaa waa waajib inuu gacansiiyo XSKC iyagana waa inay raadiyaan dadka wanaagsan iyo ciyaartooyda wanaagsan.

Yusuf: Maxaa is leedahay oo hortaagan inay meel ka soo wada jeestaan qurba joogta sheegata inay sanad walbo Yurub iyo North Amerika ku qabata tartamada inay si wada jir u soo xulaan ciyaaryahano dalka matala oo tayo leh?

Biriq: Way jiraan dad isku dayay inay dalkooda ciyaaryahano Yurub iyo North Amerika joogta ka kaxeeyay wayna ku amaanan yihiin laakiinse inay si wadajir ah uga wada tashadaan ayaa ka dhiman taasna waxay imaanaysaa marka dhalinyarada qurbaha ku kortey waxna ku baratey maamulaan tartamada xagaaga la qabto ka horna in wax badan qabanayaan kooxaha is diidan ma filaayo, in la heshiina waa jeclaan lahaa waxna la wado qabso.

Yusuf: Maxaa kaaga soo baxay intii aad joogtey dalka Uganda oo ay socdeen tartamada Bariga iyo Bartamaha Afrika?

Biriq: Inaa ka soo korarsaday waayo aragnimo isla markaana shucuur Soomaalinimo kala soo noqday madaama Qarankeenii aan matalayney, waxaa kale farxad ii ah inaan garoonka ku arko kumanaan Soomaali ah oo calanka Soomaaliya wata oo taageero la daba taagan ciyaartooydeena hadii ay guulaystaan iyo hadii laga guulaysto, barashada aan isa soo baranay maamulka iyo ciyaartooyba iyo dabcan jaaliyada Soomaaliyeed ee uganda ku nool oo run ahaantii noo muujiyay Soomaalinimo iyo asxaabtii aan isku raacnay dalka Uganda

Yusuf: Yaa halkaas ka salamaysaa adiga ka faaidaysanaya wareysiga aan ka qaaday maanta?

Biriq: Waad mahadsan tahay waxaan halkaan ka salamayaa ugu horeyn Maamulka XSKC gaar ahaan Gudoomiye ku xigeenka XSKC mudane Ahmed-Nur Hassan Abdulle oo aan dhihi karo nin dadaal badan kuna dayasho mudan wax qabadkiisa, waxaan kale oo salamayaa dhamaan ciyaartooyda xulka qaranka Soomaaliya dhamaantood, waxaan kale hadane salamayaa Safiirka Soomaaliya u fadhiya Uganda Mudane Siid Ahmed, General Bashiir Goobe, C/qani Siciid Carab, Macalin Geella, Mohamed Geedi, Dahir Boodaaye, Sunni Siciid iyo Farah Blue iyo dhamaan jaaliyada Soomaaliyeed ee ku nool dalka Uganda ee nagala qayb galay tartanka.

Yusuf : Mahadsanid mudane Biriq

Biriq: Adaa mudan Yusuf Yusuf

W/D: Yusuf Yusuf

Sports Editor and SSPAMEDIA

mrsomalia@hotmail.com

London / Nijmegen