Kartuuniiste caan ah oo soo bandhigay sawiro
ka tarjumaya taariikhda Soomaaliya iyo baaq uu
guud oo uu jeedinayo
Sawirada uu soo bandhigay halkan ka daawo...
Kartuuniiste Aadan Faarax Afey (Aadan Afey) oo
ku nool magaalada Muqdisho isla markaasina si
weyn looga yaqaan guud ahaan dalka Soomaaliya,
ayaa maanta soo bandhigay sawiro ka tarjumaya
xaaladda dalka Soomaaliya, gaar ahaan qarniyadii
hore iyo xaaladda maanta uu dalku marayo.
Sawiradaasi oo ah kuwa farshaxanka isla
markaasina Kartuuniiste Aadn Afey uu gacantiisa
ku sameeyay, ayaa ahaa sawiro soo jiidasho leh,
isla mar ahaantaasna marka aad daawato
qalbigaada ku reebaya xusuus taariikheed aad u
fog iyo dareen wadaniyadeed.
Kartuuniiste Aadan Afey oo aanu ku booqanay
xaruntiisa oo ku taala magaalada Muqdisho ayaa
Weriyayaasha waxa uu uga sheekeeyay
taariikhdiisa, gaar ahaan mihnadiisa Sawir
gacmeedyada, sidii uu ku soo bartay, meelihii uu
ka soo shaqeeyay iyo waxyaabihii ku dhaliyay
inuu Warbaahinta u soo bandhigo sawiro
xambaarsan taariikhda waayihii hore iyo
marxaladda maanta dalka ka jirta.
Waxa uu sheegay Kartuuniste Aadan Afey in
barashada sawirka gacanta uu bilaabay sanadka
markuu ahaa 1971-kii, isagoona sheegay in
barashada mihnadaasi ay ku dhiirigelisay
Haweeney Talyaani ah oo lagu magacaabo Suor
Flamigna, wuxuuna la soo shaqeeyay qaar ka mid
ah Wargeysyadii dalka ka soo bixi jiray xilligii
Dowladda ay dalka ka jirtay.
Sanadkii 1983-kii waxa uu Kartuuniistaha sawir
gacmeedyo ku bilaabay wargeys lagu magacaabi
jiray Xiddigta Oktoobar, wuxuuna sidoo kale la
soo shaqeeyay wargeysyo dhowr ah oo iyagu ka soo
bixi jiray Madbacaddii Qaranka Soomaaliyeed.
Xilligii burburka uu dalka ka dhacay, waxa uu
sheegay Kartuuniiste Aadan Afey inuu la
shaqeeyay inta badan Wargeysyadii dalka ka soo
bixi jiray, isagoo sidoo kale caan ku ahaa
sheeko ku soo bixi jirtay Wargeyskii MAANTA ee
ay soo saari jirtay UNOSOM, sheekadaas oo lagu
magacaabo Cilmi iyo Maandeeq, sheekadaasi oo
ahayd mid gebigeedba ah Kartuun.
Farshaxaniiste Aadan Afey waxa uu Weriyayaasha u
soo bandhigay Sawirro uu ku sameeyay gacanta,
kuwaasi oo mid kastaba ka tarjumayay marxalad,
gaar ahaan labaatankii sano ee ugu dambeysay,
halka sawiradaasi qaarkood ay yihiin kuwo
xambaarsan taariikhda faca weyn ee dalka
Soomaaliya, xilliyadii gumeysiga Talyaaniga uu
dalka heystay, waxaana sawiradaasi ka mid ahaa
dagaal dhex maray beelaha Biyamaal iyo
Talyaaniga xilligii gumeysiga uu dalka ku jiray.
Kartuuniiste Aadan Afey ayaa sheegay in ujeedada
uu u soo bandhigayo sawiradaasi taariikhiga ah,
waxa uu sheegay in maadaama dalka uu soo maray
muddo ka badan 18-sano burbur iyo kala dambeyn
la’aan, taasi oo keentay inay gabaabsi noqdaan
keydadka taariikhda Soomaaliya, uu doonayo in
laga caawiyo sidii uu howshaasi baaxadda leh u
sii wadi lahaa.
“Mudaama dalka aanay ka jirin dowlad dhexe oo
awood leh muddo ka badan 18-sano waxaa lumay
taariikhda faca weyn ee dadka iyo dalka
Soomaaliyeed, sidaas daraadeed waxaan shacabka
Soomaaliyeed meel kasta oo uu joogo iyo dhammaan
adduun weynaha ka codsanayaa inay igu
dhiirigeliyaan sidii aan howshaasi ku sii wadan
lahaa” ayuu yiri Aadan Afey.
Fiiro gaar ah: Sawiradan waxay gaar u yihiin
Kartuuniiste Aadan Afey, lamina daabacan karo
iyadoo aan fasax looga heysan Kartuunistaha iska
leh, cidii dooneysa inay arrintaasi ka qeyb
qaadatana waxay la xiriiri kartaa Kartuuniste
Aadan Afey oo laga helo: Tel: No. +25250-991855.
Mahamud Ahmed Hassan
xuurshe114@hotmail.com