Doorashada GOS oo waqtigii lagu balansanaa in lagu qabto dalka Jabuuti ayaa
si lama filaan ah loo joojiyay sababtuna waa maxay?.
DJABOUTI 26/01/2009. Doorashda guud ee GOS ee lagu balansanaa in la qabto bisha
Febraayo 2009 magaalada madaxda Jabuuti ayaa dib loo dhigay, sida aan baaris ku
samaynay kuna ogaanay, ayay dad xog ogagaal ahi noo xaqiijiyeen in wasaarada
Sportiga iyo dhalinyarada dalka Jabuuti ay si cad ugu sheegtay labada garab ee
GOS u kala farcameen inaysan dalkooda ku qabsan karin shirar iska soo horjeeda
oo gooni gooni ah, kadib markii Wasaarada Isboortiga dalka Jabuuti ay soo
gaareen warqado kala duwan ay ku saxiixan yihiin Gudoomiyaha GOS iyo Ku
xigeenkiisa oo ka codsanaya inay rabaan in doorashadii GOS lagu qabto Hotelka
Impreal oo ku yaal duleedka magaalada Jabuuti.
Waxaa kale iyana warqadO dacwo ah oo iska soo horjeeda loo direy International
Olympic Commitee ( IOC), warqadahaas oo iyana ka kala yimid labada garab ee GOS
u kala jabay oo ay ku sheeganayaan inay shir ku qabanayaan doorashada dalka
Jabuuti, iyagoo sheeganaya mid kastaba inuu haysto aqlabiyada xiriirada ka
diiwan gashan GOS.
Sida aan email rasmi ah aan kaga helnay sarkaal ka tirsan IOC & NOC oo diiday
inaa shaaciyo magaciisa ayaa noo cadeeyay inaysan ka qayb galin doorashadii GOS
lagu qaban lahaa dalka Jabuuti biloowga Febraayo 2009, kadib markii aan ka war
helnay khilaafka kala soo dhaxgalay madaxda GOS, sidaa daraadeedna goob
joogayaasha IOC & NOC way ka baaqdeen safarkii ay ku tagi lahaayeen dalka
Jabuuti ayuu qoralkiisa ku soo koobay.
Mar hadii is qabqabsigii u gaarey dalalka dariska ah iyo IOC, NOC waxaan filayaa
in dhaqaalihii la iska guran jirey inuu istaagi doono isla markaana Sports
Soomaaliya uu horumari doono madaama laga yaabo in kuwa badan oo meesha naq u
soo doontey inay isaga tagi doonaan oo ay ku soo hari doonaan kuwa ay dhabta ka
tahay in la horumariyo Sports dalkeena iyo dhalinyaradeena iyadoo la baryin
meelo kale.
GOS ayaa heerka khilaafkoodu gaarey heerkii ugu xumaa kadib markii ay isku
khilaafeen xogaa dhaqaale ah oo ka soo galay IOC iyo NOC sanadkii hore lagu
qaybsan lahaa, taas oo keentay inay ku dagalamaan awooda ururka cidii mar labaad
ku soo laaban lahayd, waxaana xafiiskii uu ku shaqayn jirey gudoomiyaha GOS
mudane C/qaadir Gacal Abkow laga hor istaagay inuu ku shaqeeyo isla markaana
waxaa laga mamnuucay inuu ka soo qayb galo tartamada lagu qabto garoonka
Luujino, halkaas oo ku xoog badan yahay hogaamiyaha rug cadaaga ah ee Mudane
Aden Xaaji Yabarow '' Wiish''
Mudane Abkow ayaa isna gashaanbuur cusub la samaystey qaar ka mid ah xiriirada
Sports ee ka howl gala magaalada Muqdisho si uu lolanka garabka kale isaga
riixo, isagoo shalayto lagu arkaayay koob lagu maamusayay Aba Nur Sheikh oo lagu
qabtey xaafada Shangaani ee magaalada Muqdisho, booqashada Abkow iyo xiriirada
la socday ayaa ka dhiganta mid uu ku muujinaayo awoodisa Sport, si caalamka ugu
qanciyo in weli uu yahay gudoomiyaha sharciga GOS.
Dhanka kale mudane Aden Xaaji Yabarow '' Wiish'' oo nin si weyn looga yaqaan
dalka Soomaaliya gaar ahaan fagaarayaasha cayaaraha iyo wasaaradi hore Sport iyo
Dhalinyada Soomaaliya ayaa isna xusul duub ba' an ugu jira sidii loogu dooran
lahaa mar un gudoomiyaha GOS ee cusub.
Lolanka iyo is afgaran waaga ka dhax dilaacay Gudoomiyaha GOS & ku xigeenkiisa
ayaa waxaa ka faaidaysanaya dad aan Sports Soomaaliyeed ehel u ahayn, isla
markaana ah Qurba joog raba inay dhaqaale iyo magac ka sameeyaan dal iyo
dadkiisa ay la hareen khilaaf joogta iyo nidaam daro, waxaa nasiib xumo ah in la
waayo dad isku soo jiida kooxaha ku hardamaya lolanka awoodaha ilaha dhaqaalaha
leh isla markaana wax tara dhalinyarada Soomaaliyeed ee u baahan inay helaan
fursado ay aqoontooda Sports ku hormariyaan iyo fursado kale.
Waxaase ilaa hada mowqifkiisa la ogayn Xogahaya guud ee GOS mudane C/laahi
Tarabi oo aan u arko inuu yahay nin qunyar socod ah isla markaana afgaaban oo
aqoon Sports leh dhinaca uu raacsan yahay ilaa hada ma cada madaama uu yahay
ninka laga rabo inuu isku hayo awoodaha is diidan ee GOS, hasayeeshee waxaa
modaa inay jirto awood qarsoon oo wax ka maamulaysa daaha gadaashiisa, waxaana
muhiim ah in xogahayaha guud ee GOS uu shaqadiisa ka soo baxaa madaama ay muhiim
u tahay socodsiinta howlaha ururka inta laga helaayo dowlad Soomaaliyeed oo
awood badan oo shaqaynaysa.
Waxaa iyana lolan xaga awoodaha ka dhexdilaacay saakay wararka aan ka helayno
ilo ku dhaw dhaw Gos xiriirada tira badan ee hoos yimaada Gos, kuwaas oo u kala
jabay labada dhinac, madaama lagu tartamaayo codadka xiriirada, tusaale ahaan
saakay waxaa gacanta iskula tagi lahaa Gudoomiyaha iyo ku xigeenkiisa xiriirka
Cayaaraha fudud, iyagoo isku qabsaday cida codka ( VOte) ay siinayaan iyo qofka
codaynaya.
Waxaa moodaa in hab dhaqankii dagaal oogayaasha inuu ay u dhaqmayaan dadka
maanta sheeganaya inay yihiin bulshada Cayaaraha Soomaaliyeed kuwa hogaamiya,
arinkaas oo ah mid laga xumaado isla markaana laga hortago, saxaafada xortana
waxaa waajib ku ah inay ifiso isla markaana daba gasho kuwa raba inay u
afduubnaato bulshada waxa kala dhaxeeyo ee u baahan in laga wada tashado si loo
gaaro goolka aan tiigsanayno oo ah in bulshadeena dhibaataysan aan u furno
albaabo ama neecaaw caafimaaad qabta oo bari ka ah musuqmaasuq iyo qabyaalad ku
dhisan xukun iyo beeso raadin.
Waxaa muhiim ah in loo istaago in dib u xoreyn loogu samayn lahaa GOS iyo
xiriirada hoos yimaada si Sports loo gaarsiiyo miyo iyo magaalo si aan
caalamkaan horumarey wax ula qaybsan lahayn.
Ururka GOS & Xiriiradiisa ayaa waxa u yahay ururka kaliya ee leh in kabadan 50
gudoomiye ku xigeeno aan la ogayn howlaha ay qabtaan iyo sababta loo magacaabay,
kuwaas oo aan war iska haynin, sababta aan saas u leeyahay waxaa weeye mar aan
ka qayb galay ramadaankii hore ayaa dadkii ka soo wada qayb galay wada sheegteen
inay yihiin gudoomiye ku xigeeno xiriiro kale duwan iyo Gos taas oo iga
fajicisay.
Ugu dambayntiina waxaa GOS ugu baqayaa inay iska dib isku xisaabiyaan isla
markaana isbarbaryaaca iyo xaqiraada dadka wax u qaban kara bulshadeena talada
ku wareejiyaan, iska hilmaaman magacaabida jagooyinka naas nuujinta ah ay dadka
ku kala qaybiyaan.
Mahadsanidiin
W/D: Yusuf Yusuf
sPORTS Editor and SSPAMEDIA
mrsomalia@hotmail.com
London
Mohamed Salim macalin ku dayasho mudan isla markaana mustaqbal wanaagsan
leh
Mohamed Salim waa macalin kubadda cagta ah oo ku nool magaalada Manchester,
isla markaana ka tirsan ururka Soomaalida WPSC, mar aan tagay magaalada
Manchester ayaa kula kulmay isagoo ka qayb qaadanaya barnaamij ay ku xulanayeen
kooxda Manchester City caruur Soomaaliyeed.
Mohamed Salim ayaan kala
sheekaystey shaqada macalinimo ee uu ka qabto kooxda WPSC, runtiina si wanaagsan
ayaan ula dhacay deganaanta iyo daacadnimada ka muuqato, iyadoo intaasna u sii
dheer tahay inuu aad u jecel yahay inuu tababaro caruurta Soomaaliyeed si ay
mustaqbal wanaagsan ugu yeeshaan ciyaarta kubadda cagta.
Ururka WPSC ayaa waxaa gudoomiye u ah mudane Fu'aad balse ururkan ayaa waxa uu
gacanta ku hayaa caruur aan ku qiyaasay ilaa 100 caruur Soomaaliyeed oo dagan
magaalada Manchester, waxaana ay leeyihiin kooxo dhisan oo kala heer ah isla
markaana waxaa macalimiin u ah dhalinyaro Soomaaliyeed oo dhamaantood haysta
shahaadada macalinimo ee dalka Ingiriiska.
Run ahaantii qaabka ay iskugu xiran yihiin iyo sida ay shaqada ugu caaboon
yihiin ma ahan mid aan halkaan ku cabiro karo balse waxaan is leeyahay waa
ururka kaliya oo dhalinyaro Soomaaliyeed ay maamulaan kuwaas oo wax ku bartey
dalka Ingiriiska kuna korey, waxaana la taliye u ah garsoore C/Qadir Caddaay oo
siiya wixii talooyin ah ama sidii ay xiriir ula samayn lahaayeen bahda Sports
Soomaaliyeed.
Waxaan kala qayb galay oo aan soo daawaday ciyaar aad u xiisa badnayd ee
kooxda WPSC ay kala hor tageen koox ka dhisan magaalada Manchester, ciyaartaas
oo xiisa badnayd waxay guushii ku raacday kooxda WPSC under 13.
Macalin Mohamed Salim waa nin dhalinyaro ah haystana shahaadada macalinimo
heerka 2aad ama (level 2 England), isla markaana ka shaqeeya Man City Youth
Academy oo ku taal magaalada Manchester, run ahaantiina waxaan is leeyahay
Mohamed Salim waa nin mustaqbalka wax weyn ku soo kordhin kara kubadda cagta
Soomaaliya, hadii ay ahaan lahayd xaga macalinimada, madaama macalimiinta
laylisa xulka Soomaaliya waxaa ka maqan qibradaha iyo qaab tababarka cusub ee
wadamada ku horumarey kubadda cagta, marka waxaa la joogaa xiligii ay dib u
fekeri lahaayeen XSKC inay raadiyaan ama u heli lahaayeen macalimiin da' yar oo
fikrado cusub ku soo kordhin doonta xulka dalkeena, Mohamed Salim-na waxaan u
rajaynayaa inuu sii wato dadaalkiisa iyo waxbarashadiisa isla markaana uu xooga
saaro inuu meel fiican ka gaaro kooxda Manchester City Youth Academy mustaqbalka
insha Allah.
Bahda Sports Soomaaliyeed -na waa inay hada kadib xooga saraan sidii
dhalinyarada Soomaaliyeed gacan ka siiyaan sidii ay iskood wax ugu qabsan
lahaayeen madaama dhalinyaradaan ay yihiin kuwa af fahmi kara jiilka yar yar ee
Qurbaha ku dhashay, balse wixii talo ah ka siiyaan iyo waayo aragnimadooda
W/D: Yusuf Yusuf
Sports Editor & SSPAMEDIA
mrsomalia@hotmail.com
London
Ciyaaryahan Magan Daahir Yusuf oo Soomaalida Dagan Wadanka Holand ay u
Sameeyeen Xaflad Soo Dhaweyn ah.
Waxaa lagu Qabtay Magaalada Aplehsha oo ku Taala Gobolka Freesland ee Woqooyiga
Wadanka Holand Xaflad lagu Soo Dhawenayo Ciyaaryahan Magan Taahir Yuusuf oo
Ciyaara Ciyaarta Kubadda Miiska Kana Tirsan Naadiga D.O.V iyo Xulka Qaranka
Kubadda Miiska ee Wadanka Holand.
Xafdladan oo ay Soo Qaban Qaabiyeen Xubnaha Jaaliyadad Soomaalida ee ku Nool
Goboladda Freslan iyo garonigan oo ku Yaala Woqoiyiga Wadanka Holand ayaa waxaa
soo abaabulay Ciyaaryahay Bashiir Aadan Diini oo ay Asxaab hore isla ahaan
Jireen Ciyaaryahay Magan Daahir Yuusuf islana Ciyaari Jireen Ciyaarta Kubadda
koleyga iyada oo lagu Maamuusayay Guulaha waaweyn oo Ciyaaryahay Magan Daahir ka
soo hoyay Ciyaarta Kubadda Miiska ee guud ahaan Wadanka Holand ka dib Markii uu
ku Guuleysatay Ciyaaryahan Magan Koobka 12 top ka Kubadda Miiska oo uu Kaalinta
1aad ka galay Guud ahaan Ciyaarta Kuabdda Miiska ee Wadanka Holand,
Hoolkii ay Xafladda Ka
dhaceysay oo Markii uu Ciyaar yahan Magan Daahir Yuusuf soo Galayay Lagu soo
Dhaweeyay Si Qiirad iyo Wadaninmo Leh ayaa Dadku Waxaa ay ahaayeen kuwo ku soo
Dhaweeyay iyaga oo Ruxayay Caleemo Qoyan,Sidoo kale Fanaaniinta Kala ah:Beeji
iidi Ramadaan iyo Xamasto Sheekh Cabdi ay halkaas ka Qaadayeen Heeso Wadani ah
oo ay la Qiiroodeen Dadkii halkaas iskugu yimid.
Ciyaaryahan Magan Daahir
Yuusf oo la hadlayay dadkii Xafladaas ka soo qayb Galay ayaa Sheegay in uu aad
ugu Faraxsanyahay Xafladda ay Soomaalida u Sameeyeen isaga oo Sheegay in Tani ay
ka mid tahay Boqolaal Xaflado Hore oo ay u Sameeyeen Soomaalida ku Nool Qurbaha
Balse tani ay uga Duwantahay Maadaama Buu yiri ay ka Muuqato Qiiro wadaniyeed
iyo Xamaasad ayna Soo Qaba Qaabiyeen Asxaabtiisii Hore ee Ciyaaraha iyo sidoo
kale Dhalinyarada Mustaqbalka isaga oo ku Guubaabiyay Dhamaan Dhalinyarada in ay
Jaaniska ka Faa,ideystaan Gaar ahaan kuwa Ku cusub Wadanka Holand ee Dhawaantaan
soo galay isaga oo tusaale u soo Qaatay naftiisa oo uu sheegay in waqtiga uu
imaanayay Holand in uu ahaay Sida ay Haatan Taaganyihiin oo kale Ka dibna Gaaray
Heerka uu Maanta Taaganyahay.
Xafladan ayaa Sidoo kale waxaa ka soo Qaybgalay oo khudbado Xamaasad leh
Halkaas ka soo Jeediyay Agaasimaha Warbaahinta Waagacusub Daahir Cabdulle
Calasow iyo Madaxa Dhalinta Waagacusub ee Dalka Holand Bashiir Aadan Diini iyo
Marti Sharaf kale oo aad u fara badan oo halkaas lagu Casuumay.
Waxaa sidoo kale Goob joog ka ahaa xafladda Madax ka socotay Xisbiga Mideynta
Dhalinyarada Soomaaliyeed ee S.Y.U.P oo uu ka mid ahaay Gudoomiyaha Xisbiga
S.Y.U.P Md:Maxamed Abuukar Sh/Xassan(M.deeq) iyo Xoghayaha Guud ee Xisbiga Md:
Cali Daahir Ciid(Cali Dheere) iyo Madaxa Tababarada iyo Dhaqan Celinta
Dhalinyarada Md;Jaabir Cismaan iyo Mas,uuliyiin kale oo ka socotay Xubnaha
Jaaliyadad Soomaalida ee wadanka Holand.iyo warbaahinta Soomaalida Qaybaheeda
kala Gadisan.waxaana la is xasuusiyay in Muhim ay tahay in Dhalinyarada Qurbaha
ku Cusub Xiligan uu Magan u Yahay Darsi ay ku Dayadaan oo uu qof walibana
hirgalin karo waxa uu jecelyahay hadii uu dadaal dheeraad ah sameeyo sida
Ciyaaryahan magan Daahir oo kale.
Gabagabadii xafladda ayaa Ciyaaryahan Magan Daahir Waxaa la Gudoonsiiyay
Abaalmarintii loogu Tala galay iyada oo Hoolka xafladda ka Dhaceysayna ay ku
Ciyaareen Qaar ka tirsan Dadkii ka soo Qaybgalay Xafladda Ciyaaraha Qoob ka
ciyaarka iyaga oo Muujinaya Farxadda ay u Qabaan in Mar uun in ay la Kulmaan
Ciyaaryahay Magan Daahir iyada oo la arkayay Qaar Fara badan oo ka Tirsan Dadkii
halkaas iskugu yimaday oo ka Dalbanaya Ciyaaryahay magan in ay la Qaataan Sawiro
iyo iyaga oo ka dalbanaya in uu Saxiix u sameeyo.
Xafladan ayaa waxaa ay ku soo gabagabowday sidii loogu tala galay iyada oo
dadka xafladda soo agaasimay iyo kuwa ka soo qaybgalayna la arkayay in Waqtiga
uu aad ugu yaraay oo ay dalbanayeen in Ciyaaryahan Magan daahir uu la sii joogo
waqti intaas ka badan Xiisaha ay u qabaan kaliya,Waxaana uu Magan balanqaaday in
ay isku arki doonaan Marar kale Xaflado sidaan oo kale ah.
Maxamed Abuukar Sh/Xassan(M.Deeq)
Appelscha,Friesland,Netherland
GSM : 0031643642191
E-mail:deeq1982@hotmail.com
Faafin: SomaliTalk.com | Jan 27, 2009