Warqad furan oo ku socota Madaxweynaha Puntland  Cabdiraxman Faroole 
 

MA OGTAHAY DALLUUN BAA KA QODAN DOOX HORTEENA AHE 
MA OGTAHAY XADHKAHA DAADSAN AAN LANA DAREEMEYNIN 
MA OGTAHAY INAAD DOOR HESHAAN LAGULA DOONEYNIN 
MA OGTAHAY MID KULA DOODAYOO KUU DAN LAA JIRA'E 
MA OGTAHAY SHISHEEYUHU NIN DAGAN WAA KUWII DILA'E 
MA OGTAHAY DIGTOONAAN LA'AAN DACAR INAAD LEEFI 
 

Puntland 30 sano oo dawlad Soomaaliyeed oo maamul kala duwan ah oo aysan wax horumar ah ka helin, iyada oo lagu naanaysi jirey Gaari waa, 8 sano oo dagaalo sokeeye oo baαn iyo fowda ah iyo 10 sano oo Maamul goboleed magac u yaal ah (quasi Administration) Puntland waxay soo istaagtay ayada oo sakaraad ah wado kala bayr ah; kala bayr ay ku kala dooranayso labo wado oo kala ah.

1. wado horseed u noqota nabad, horumar, xasilooni, barwaaqo iyo cadaalad
2. wado horseed u noqota burbur hor leh, dagaal sokeeye oo hor leh, rajo laαan iyo qax cusub.

Inkasta oo aanan saadaal dhab ah ka bixin Karin waxa uu noqon doono maamulka cusub ee Puntland hadana waxaan qadarayaa in Puntland dooratey wadada koowaad markii ay meesha ka saartay Cade iyo kooxdiisi. 
 

Madaxweyne,

Waxaad dhaxashey Puntland oo sakaraad maliil ah – amni daro, maamulxumo, musuqmaasuq, gobolo maqan, fakhri baahsan, go’doon siyaasadeed oo dibad iyo gudaba leh iyo hoos udhac dhaqan-dhaqaale. Madaxweyne talo badso lana tasho dadka waxgaradka, aqoonyahanka nadiifka ah iyo culumaaϊdiinka; isku day inaad soo dhaweyso dadka damiirka leh ee Puntland u diirnaxaya xataa hadii aad afkaarta ku kala duwan tihiin. Culeyska Puntland maanta yaala wuxuu u baahan yahay si wadareed in loo wajaho, loona talo badsado.    

ARRIN CULUS HADUU SOO DEGO OO DIIRKA KA CADDAADO

DUQEEY IYO WAXAA LOO WACAA DUUL XIGAALO AHE

HADUU YIRAA ADAYS DEEQA OO UUNKA KALE DAYRSHO

BAL OGOOW DABAYL BAY U KICI DARAJADIISIIYE 
 

Madaxweyne,

Ka dhig mudnaanta koowaad sidaad amniga wax uga qaban lahayd una abuuri lahayd jawi nabadgelyo iyo deegaan la isku haleyn karo (conducive environment) kaas oo suurtagalin kara inuu soo jiito maalgalin shisheeye iyo mid muwaadinba. Dhis ciidan amni oo tayo leh xuquuqdoodana hela, ruuxu marka uu xuquuqdiisa helo ayuu gudan karaa waajibaadkiisa. Garanmayo sida uu amni u sugi karo askari aan wax mushahar ah qaadan, askari aan daryeel helin, askari aan dalacaad darajo, koorso aqooneed iyo horumar midna sugeyn. Askari markii uu tuug, burcad iyo qaadicul dariiq dilo loo qisaasayo oo la leeyahay adoo reer hebel ah ayaad nin reer hebel ah dishey. Marka aad weydiisi waxa ay dhibaatada u samaynayaana waxaa u halheys ah dhan u joogso wiilyahow askari dheef helaa baqa e. ka ilaali ciidamada amniga khaas ahaan booliiska inay ka mid noqdaan qolada isticmaasha daroogada cagaaran (qaadka) waayo dadka isticmaala qaadku waxay qabaan baahi joogta ah, qof had iyo heer baahana gacantogleyntiisaa badan.     
 

Madaxweyne

Xulo gole wasiiro ah oo aqoon, daacadnimo iyo hal abuur leh, wasiiro hami sare leh, kana naxaya diinta, dalka iyo dadka. Wasiiro aan caqligoodu ku koobneyn adeegii ma la ii soo direy, wasiiro oran kara arrinku sidan maaha ee aan haahda ku kala hormarin, golaha wasiirada ee aad magacowdaa waxay ilaa xad sawir naga siin doonaan meesha aad wax u wado. Waxa igu maqaala ah in masuuliyiinta Puntland ugu sareysay qaarkood ay mudo qaadan jirtey in laga dhaadhiciyo inuu jiro hayαdo ay gudoomiyeyaal ka ahaayeen marka la doonayo inay shir u furaan; iska daa istaraatijiyad iyo qorshe la dajiyee.  
 

Madaxweyne

Soomaalida waxaa dhexmaray dagaal sokeeye dhiig iyo dhaqana isagama tagin. Puntland waxay aaminsantahay Soomaalinimo, deriswanaag iyo isixtiraam iyo in jifo walba gobolkeedi iyo degmadeedi tagto laguna ixtiraamo hadey wanaag iyo horumar haysana ay ayada ka soo bilowdo inta Rabi quluubteena isku soo dumayo. Hadaba, kula dhaqan beelaha Soomaaliyeed soomaalinimo, tixgalin iyo deris wanaag kuna xali khilafaadka jira wadahadal iyo siyaasad debacsan; hadiise loo qaato dacfi iyo tabar laαan u diyaar garoow dagaal dhab ah oo sanada badan qaata loogana hortagayo dulmi iyo sedbursi. Avoid war, but if you start war, try to win the war.  
 

Madaxweyne

Puntland waa dal qani ah, dadyow kalana caawin karta hadii si wanagsan loo maareeyo khayraadkeeda, isku tasho isuna dheelitir shaqaalaha dawlada iyo dakhliga, la dagaalan musuqa, aasaasna gudiga la dagaalanka musuqa (anti corruption commission). ku dadaal in dakhliga dawladu uu si sharci ku soo xeroodo, si sharci ahna ku baxo. Lunsashada hantida qaranku waxay noqotey wax caadi ah oo lagu tartamo, sidaa darteed waa inaan sina loogu dulqaadan (zero tolerance). Waxa ay dad badan aaminsan yihiin in dhibka maaliyada ee Puntland ka jira uu bilowday xiligii aad wasiirka Maaliyada ka ahayd Puntland, u muuji dadkaas wax ay ku qancaan. 
 

Caqli, cudud iyo cood wixii Alle ku siiyo 90% ugu shaqee horumarka iyo wanaaga Puntland 10% ku raadi sidii dib loogu yagleeli lahaa qaran Soomaaliyeed oo caafimaad qaba. Ha uga faaνideysan hogaanka Puntland in aad xoogaa shilmaana ka urursato ama aad ka dhigato salaan aad ku gaadho jago kale sidii maamuladii kaa horeeyey. Ha noqon hogaamiye Afrikaan ah oo hadiiba aan xukunka xoog looga qaadin; xukunka ka taga asaga oo la hiifayo lana haaraamayo.    

NIN WALIBA WAXUU NOO QABTIYO QALADKU NOO GEYSTEY

DIIWAANA QARAN BAA JIROO LOOGU QORAYAAYE

NIN QURAARAD CALASHOO DAJIYEY QOOMAMEE ABIDE

QARNIYADA DANBAA KUGU NACLADA FICILKA QAARKIISE

……………………………………………. QURUXSO TAARIIKHDA

……………………………………………..QURUXSO TAARIIKHDA

……………………………………………..QURUXSO TAARIIKHDA

Cabdiraxmaan Salaad Aaden

Email: dhaguuf@hotmail.com