SOMALITALK.COM dahabshiil
w w w . S o m a l i T a l k . c o m
SOMALITALK - WARAR

Hay'ad u dooda Suxufiyiinta oo saddex kun oo doolar ugu deeqdey Qoyskii uu ka geeriyoodey Weriye Xasan Mayow Xasan

Sawirada halkan ka daawo....

Lacag ay ku deeqday Hay'ad u doodda Suxufiyiinta oo xarunteedu tahay Magaalada Doxa ee dalka Qatar (Doxa Center For Media freedom), ayaa maanta la gudoonsiiyya qoyskii uu dhawaan ka geeriyooday ALLAHA u naxariistee Wariye Xasan Mayoow Xasan oo ka tirsanaa Idaacadda Shabelle.

Deeqdan lacageed oo la soo marsiiyay hay'adda Suxufiyiinta NUSOJ ayaa qoyskan lagu gudoonsiiyya xarunta Idaacada Shabelle ee Muqdisho, iyadoo suxufiyiin badan ay ku suganaayeen goobta lacagta lagu bixinayay.

Lacagtan oo gaaraysay 3-kun oo Dollar ayaa waxaa qoyska uu ka geeriyooday wariyaha guddoonsiiyay agaasimaha Idaacadda Shabelle Muqtaar Maxamed Hiraabe, iyadoo lacagta la gudoonsiiyay Marwadii Marxuumka oo lagu magacaabo Ubax Muuse Max'ed, waxaana la socday hooyadiis oo lagu magacaabo Milko Jaamac Cumar iyo caruurtii uu dhalay.

Xogahay Warfaafinta NUSOJ C/raxmaan Cumar Madoobe (Dalmar) oo xaflada ka hadlay ayaa aqriyay magacyada caruurtii uu ka geeriyooday Xasan Mayoow, kuwaasoo kala ahaa: Aamino Xasan Mayow oo 10-jir ah, Max'ed Xasan Mayow oo 8-jir ah, Rowda Xasan Mayow oo 6-jir ah, C/kariin Xasan Mayow oo 2-jir ah iyo Faadumo Xasan Mayow oo 3-jir ah.

Sidoo kale xaflada ayaa waxaa ka hadlay Xoghaya Shaqada NUSOJ C/rashiid C/llaahi Xaydar, wuxuuna sheegay isagoo ay wajigiisa murugo ka muuqato in deeqadan ay tahay mid loo baahnaa in lasoo gaarsiiyo qoyskii iyo caruurtii uu ka geeriyooday walaalkeen Xasan Mayow oo kooxo hubeysan ay si bareera ah u toogteen.

Agaasimaha Idaacada Shabelle Mukhtaar Maxamed Hiraabe oo isna ka hadlay gudoonsiinta deeqda lacageed ayaa si ku nuuxnuuxsaday inay tahay deeqadan tii ugu horreysay ee lasoo gaarsiiyo Qoyskii uu ka baxay Xasan Mayow, isagoo uga mahadceliyay hay'adda soo dhiibtay lacagta deeqdan.

Hooyada Marxuumka oo lagu magacaabo Milko Jaamac Cumar oo iyaduna hadal kooban jeedisay ayaa sheegtay inay aad ugu faraxsan tahay gacanta ay walaalaheeda Doxa u soo taageen, iyadoo dunida oo dhan u dirtay codsi ah in gacan la siiyo qoyskii uu ka geeriyooday Xasan Mayow

W/D Amiin Yuusuf Khasaaro.
E-Mail amiinkhasaaro@hotmail.com

Faafin: SomaliTalk.com | Jan 8, 2009

Kulaabo bogga www.SomaliTalk.com © www.SomaliTalk.com

La soo xiriir:

IIDHEH
XAYAYSIIS