Sawirada Halkan ka daawo....

Kooxda Banaadir Stars ee ah laacibiinta kubbada ciribta ku laada ayaa xayuubsaday koobkii daahfurka wargeyska Xog-Maal ee Cape halka kooxda xidigaha Isafaham Stars ee balooniga hawada ku maamula ay ku hartay wax lagu tilmaami karro nasiibka oo ka hiiliyey kadib gool ku laad (rigooro) lagu kala bixinayay kooxaha markii 90kii daqiiqo ay gool iyo gool isku mari waayeen.

Tartankani oo ay ka qeybgaleen 4 kooxood oo Cape Town ka dhisan ayaa biloowdey 28 dii December sanadkii hore, wuxuuna soo gabogaboobey 3 dii janaayo goortaas oo ciyaartii kama dambeysta ahayd ay ku laactameen kooxaha Banaadir Stars iyo Isfaham Stars waxayna ciyaartani ku dhamaatay Bandir Stars 4-3 Isfaham Stars, waxaana koobkii xayuubsaday Banaadir Stars oo taageerooyaashooda iyo ciyaarooyda ay garoonka si layaab leh ugu damaashaadeen iyagoo wada jibeysan.

Kadib ciyaarta waxaa la qabtay xaflad gaaban garoonka dhexdiisa oo ay hadalo ka jeediyeen gudiga maamulka isboortiga Western Cape iyo maamulka Xog-Maal, gudoomiyaha maamulka isboortiga Cabdi Gaab oo ahaa ciyaartooy hore oo qaran, isla markaasina ciyaartaasi garsoore ka ahaa ayaa ciyaartooyda ku booriyey isboortiga in uu ka reeban yahay wax kasta oo takoor ah ama qabyaalada ah, sidoo kale waxaa meesha ka hadlay Salaad Duwe, Yuusuf UK, iyo Garsoore Abuubakar oo dhamaantood gudiga ka tirsan, waxaa sidoo kale hadal gaaban ka jeediyey Cabdinaasir Axmed Sh. Bashiir saxansoxo, agaasimaha Wargeyska Xog-Maal oo hadalkiisa ku sheegey in talaabadani ay koobka ku qabteen ay oga gol leeyihiin sidii ay dhalinta ugu dhiirigalin lahaayeen isboortiga wuxuu yiri "qalabka warbaahinta waa awooda shanaad ee aduunka, Xog-Maal waa curdun waxaanan oga gol leenahay in aan kor u qaadno aqoonta, cilmiga iyo wacyiga bulshada, umad kasta waxay hormar ku gaartaa illaa heerka ay hesho macluumaad iyo xog wanaagsan" ayuu yiri Saxansoxo .

Waxaa xaflada koobkii qalinka ahaa lagu gudoonsiiyey banadir Stars, halka abaalmarin shahaado sharaf kooxdii ugu asluubta badneyd ahayd lagu gudoonisiiyey kooxda Jay United oo kabtankooda u gudoomey shahaada.

Ciyaartii tan ka horeysey ayaa malaha ahayd tii ugu xiisaha badneyd ee wareega, sida uu wargeyka Xog-Maal bogga 11 aad ku qorey cadadkii 3 aad ee Isniintii soo baxay, ciyaartani waxay ahayd mid xiiso iyo xamaasad kullansatay kooxahana ay muujiyeen ciyaar wanaag iyo looltan adag, waxay dhexmartay Isfaham Stars iyo Bellville Stars oo 90 kii daqiiqo ku dhamaystey gool la'aan illaa rigoore ama gool ku laad lagu kala saaro, halkaasina waxay guusha ku raacday kooxda Isfaham Stars 4-3 Belville Stars.

Ciyaartii furitaanka oo dhacday 28 dii Decebber oo dhexmartay Jay United iyo Banadir Stars ayaa iyaduna ahayd ciyaar kullansatay astaan kasta oo ciyaar wanaag ah marka laga eegayo asluubta iyo dhaqan wanaaga ay ciyaartooyda muujiyeen, gaar ahaan kooxda Jay United oo abaalmarin asluub wanaag ah Xog-Maal kaga heshay ciyaartaasi, waxaa la gudoonsiiyey Jay United shahaado sharaf ah xaga asluubta ay ku muteysteen.

Wargeyska Xog-Maal ayaa balan qaaday in ay sii wadi doonaan tartana ay qabanayaan taasina ay kala tashan doonaan gudiga isboortiga.

Cabdinaasir Axmed Sh. Bashiir (saxansoxo), SomaliTalk.com, Cape Town,
Email: Saxansoxo1@hotmail.com