Maxaa la gudboon Gen. Ilka Jiir , kadib markuu ku
guulaysto jagadda Madaxweynenimada Puntland
Waxaa dad badan oo siyaasada Puntland ku xeel dheeri
odorasayaan in Gen. Ilka jiir uu ku guulaysan doono
jagadda Madaxweynenimada Puntland. Hadaba hadii
figradaasi ay rumowdo waxaa iswaydiin mudan sida uu u
ekaan doono qaab-dhismeedka maamul ee uu madaxda ka
noqon doono Gen. Ilka Jiir. Sidoo kale waxaa la
iswaydiin doonaa siyaasada Gen. Ilka Jiir ma waxay noqon
doontaa mid qun yar socod ah mise mid firfircoon oo
dhakhso ula fal gasho amuuraha horyaala Puntland.
Hadaba akhristow maqaalkaygu kuma saabsana odoroska
labada arimood ee kor ku xusan balse wuxuu ku saabsan
yahay talooyin aan u soo jeedinayo Gen. Ilka jiir iyo u
iftiimin ku aadan maamul taaba gala oo aan fadhiid
noqon.
Shaxda iyo Qaab Dhishmeedka Maamulka Gen. Ilka Jiir.
Waxaad moodaa in sanadka 2009 uu yahay sanad isbadal
xowli ku socda ku soo biiriyay caalamka, wadamo badan oo
dunida ka mid ahina uu ka socdo isbadalo aan hore loo
filan ama hadaan si kale u dhigo aan ka mid ahaan jirin
caadada iyo hab-dhaqanka maamulada hore loogu aqoon
jiray calaamka.
Waxaa tusaale kaaga filan USA oo uu 2009 hogaanka u
qaban doono Madaxweyne Barack Obama , oo ah nin
muq-shabeel ah oo aabihii Muslim ahaa kana soo jeedo
dalka Kenya, hoogadiista ahayd haweenay cad oo Kansas,
USA ka soo jeeda. Waxaa kale oo isbado caykaas oo kale
ah ka socdaan dalal badan, sida Koonfurta Afrika, Kenya,
Simbaabwi iyo Soomaaliya oo uu madaxweyne Cabdullahi
Yusuf si sharafi ku dheehan tahay isku casilay ilaa
iminkana aan la ogaan meesha geediga lagu furi doono.
Hadaba 2009 waa sanad aan cidina saadaalin Karin waxa
dhici doona, balse hal shay ay hubaal tahay taas oo ah
in isbedel siyaasadeed oo xowli ku socda jiro.
Sidaa awgeed ayaad moodaa in isbedelada dhici doona ay
ka mid noqon doonto guusha uu heli doono Gen. Ilka Jiir,
isagoo ku guulaysan doona Madaxweynenimada Puntland.
Hadaba waxaan jeclaan lahaa in maamulka cusub ee Gen.
Ilka jiir u ekaado sidan:
Gen. Ilko jiir – Madaxweyne
Saleebeen Ciise - Madaxweyne ku-xigeen
Muxiyadiin Cali – Wasiirka Ganacsiga iyo Dekedaha
Cabdi Awaare – Wasiirka Dowladaha hoose
Nuuradiin Diiriye – Wasiirka xiriirka dibada iyo
Iskaashiga Caalamiga ah
Cabdiraxman Faroole - Wasiirka Qorshaynta
Col. Garam-Garam, Taliyaha Daraawiishta
Gen. Gaani Maxamed, Taliyaha amniga iyo Booliska
Dr. Cabdulahi Dhagacade – Wasiirka Caafimaadka
Caasha Ghelle – Wasiirka arimaha Gudaha
Intaas jagooyinka ka soo hara ha u qaybiyo ashkhaasta
kale oo u qalba kana soo kala jeedaha beelaha iyo
gobolada ay ka kooban tahay Puntland.
Shaxdaas kor ku xusani waxay keeni kartaa:
in dhamaan dadkii is sharaxay inta ugu tayadda fiicnayd
hesho wasaarado ay u qalmaan si toos ahna uga howlgeli
karaan,
in shaxdani u muujin doonto reer Puntland bog cusub oo
ku aadan hab maamul oo ku salaysan wada shaqayn iyo
kalsooni.
iyo in ay meesha ka baxayso afraadii ku fashilmay
hogaanka dalka, waa cusub oo ku salaysan maskax iyo
mabaadi furfurana ay gasho Puntland
Siyaasadda Gen. Ilka Jiir:
Ilaa iyo iminka khalad ama meelka dhac iyo gabi iska
xoor midna laguma sheegin Jananka, balse deganaan iyo
dadaal ku salaysan hab maamul xeelado cusub wata ayuu la
yimid Gen. Ilka Jiir.
Waxaan Jananka kula kulmay anigoo ku sii jeeda Puntland
horaadkii bisha August, 2008, dabadeedna anigoo ku sugan
Garoowe ayaan ka war helay inuu Gen. Ilko Jiir yimid
magaalada Boosaaso.
Sidii caadada u ahayd musharaxiinta kale ayaan ka
filayay isagoo tikniko iyo baabuur daba yaacayso inuu
iman doono Garoowe dabadeedna u sii gudbi doono Mudug
iyo Sool. Balse waxaan ka war helay inuu Jananku aaday
xagaas iyo Sanaag.
Afraad aan isla joognay Garoowe oo deegaamada Sanaag u
dhalatay ayaan ka war helay inay socdaal ugu kici
timayaan dhinacaas iyo Sanaag si ay uga qayb qaataan
shirweyne ka dhici doona halkaasi, kaas oo uu hormuud ka
yahay Jananku.
Hadaba guulaha shirkaasi iyo socdaalkaas ka soo baxay
ayaan oran karaa waa guul u soo hoyatay bahwadaagta reer
Puntland , taas oo ah in markii ugu horaysay taariikhda
reer Sanaag la arkay iyagoo hogaan qudha ku daba safan,
taageero hiil iyo hoo lehna la garab taagan, waxaan
filayaa Suldaan Maxamuud Cali Shire ayaa ugu danbeeyay
hogaan noocaas oo kale ah, ama hadaan sida kale u dhigo
muwaafaqo iyo midnimo beesha Warsangeli.
Taasi waxay ku tusin kartaa tayada iyo qaabka hab maamul
ama xeeladeed uu yeelan karo hogaanka cusub ee Puntland
ee uu hormuudka ka yahay Gen. Ilka Jiir.
Waxaa hogaankaan cusubi keeni karaa in la helo
madaxweyne difaaci kara khadiyada Sool , Sanaag iyo
Cayn, ahna nin u dhashay deegaankaas , kuna hayb iyo
hogaan ah bahwadaagta Puntland, sidaa awgeed khadiyada
sadexdaas gobol waxaa laga fili karaa maamulkan cusub
inuu noqdo mid hanta deegaamadaasi, mid mideeya
walaalaha reer Puntland, mid difaaca sharafta iyo dhulka
Puntland.
Intaa waxaa kuu sii dheer Jananka oo looga fadhiyo soo
celinta kala danbaynta iyo amniga dhamaan deegaamada
Puntland, difaaca xuduudaha labada foronti, difaaca
khayraadka bad iyo beri ee Puntland, doonista midnimada
Soomali wayn, iyo daris kula noolaanshaha walaalaha
Soomaaliyeed ee aan ood wadaagta nahay.
Howl aad u weyn ayaa sugaysa Madaxweynaha Mustaqbalka
Puntland Gen. Ilka Jiir , marka waxaan leenahay duco iyo
taageero ayaanu kula garab taaganahay, waxaan leenahay
noqo hogaamiyihii loo darsado, noqo mid lagu raayo, noqo
mid mideeya Puntland iyo Soomaali inteeda kale.
Guul iyo Gobanimo.
Farah Aw-Osman
Ottawa, Canada
awosman@gmail.com
Faafin: SomaliTalk.com | Jan 7, 2009
|