Dardaaran ku socda Xildhibaanada cusub ee Puntland
Sidaan ka aragnay war baahinta maanta ayaa la idiin
dhaariyey xilka culus ee aad xambaarteen. Halkaas oo aad dhaar ku
marteen inaad xilkaas u gudaneysaan si hufan oo cadaalad ku jirto
Ilaahay iyo ummadda xilka u qaaddeena raali galineysa.
Halkaan waxaan idin kula dardaarmayaa inaad Ilaahay
ka cabsataan oo xilka sida la idin kugu dhiibay uga soo dhalaashaan?
Waxaa dhici karta in la isa su’aalayo xilka aan ka soo dhalaalno waa
kee? Xilkaas waxaa weeye inaad ka fiirsataan oo aad ka fiirsataan oo aad
mar saddexaad ka fiirsataan ruuxa aad codkiina siinaysaan. Mudane
xildhibaan Ilaahay ka baq codkaaga ha ku bixin qabiil, saaxiibnimo iyo
manfaca adduun toona. Sii codkaaga Musharaxii aad is leedahay dadka,
dalka iyo diinta ayuu wax u qabanayaa. Ku salee caddaalad codkaaga, hana
ku saleyn eexasho, maxsuubiyah iyo waxa soomaali meeshaas dhigay. Mudane
Xildhibaan yaan lagu qalin daarin? Qalin daarkuna inuu caado Somaali
noqday wad la socotaa. Mudane Xildhibaan maanta ayuu codkaagu miisaan
leeyahay 8da January ka dib xoog yeelan mahayo.
Waxaan soo xusuustay 2004kii ayaan maalin jamca ah
soo galay Masaajid ku yaal xaafad ka tirsan xaafadaha London ee dalka
Ingiriiska, Khudbadii Jamcaha ayaa bilaabatay, Khadiibku waa Muslim
Pakistani, Markaas waxaa socda Doorashooyinkii Xisbiyada Ingiriiska,
Khadiibkii oo hadaladiisa caluushu ku rogmaneyso ayaa dadka wuxuu ka
codsanyaa inay codkooda siiyaan Xildhibaanka la yiraahdo George Galloway
oo xildhibaan ka ah Xisbiga (Respect). Hadaladii Khadiibka maalintaas
waxaan ka xasuustaa ‘’ War Muslimow codkiinu maanta ayuu qaymo leeyahay
ee beri ninna kuma yaqaan. Kaad dooratidna beri xafiiskiisa ma gali
kartid. War nimaan ummadda Islaamka waxba u qabaneyn codkaaga ha siin.
War guryaha ka soo baxa oo codkiina bixiya, war ha is oranina gaalo ha u
kala eexanina . War codkiina siiya George Galloway isagaa dantiina
wadee…IWM’’. Saacaddaan aan maqaalka qorayo MP George Galloway wuxuu ka
mudahraadsan yahay oo ka qaylinayaa weerarada gardarada ah ee Qaza
(Falastiin) lagu hayo.
Ugu dambeyntii Xildhibaanow yaan lagu qalin daarin,
arladu waa dhiiqo ha sidban, Yaan Card lagu marsan. Mas’uuliyad weyn baa
ku saaran, yoolka loo socdo waa sidee ummaddaas silicsan wax loogu qaban
lahaa, dadkii wax u qaban lahaa inaad ka mid noqoto ayaana laguu doortay
(khalad iyo sax sidii la rabo ha laguu soo doortee). Maanta ayey
kalimaddaadu miisaan leedahay beri wax lagaa akhrisan mahayo. Haddeer
nin ummadda wax u qaban kara sii codkaaga.
Wa salaam.
Said Hashi Warsame (Master of Islamic Banking &
finance)
shwarsama@hotmail.com