Waxoogaa Deeq Ah Oo Khamiistii La Gaarsiiyay Qaxootiga Xeradda Alla-amin
Ee Duleedka Caabudwaaq.
![](27feb56.jpg)
Waxoogaa deeq ah ayaa maanta waxaa lagaarsiiyay Xeradda Qaxootiga Alla-aamin oo
ku taalla duleedka Magaaladda Caabudwaaq.
Qaxootigaan oo ah ugu yaraan 350 qoys una badan dad reer miyi ah oo xoolihii ay
haysteen ku dhaafeen abaar dheer oo soo martay ayaa markii qoys walba wixii
xoolo uu intifaacsan jiray ay ka dhamaadeen waxa uu usoo hayaamay dhanka
Magaalada Caabudwaaq.
![](27feb57.jpg)
Qaxootigaan ayaa inta badan waxa
ay ka yimaadeen Tuulooyin ku yaalla gudaha iyo xuduudka Ismaamulka Somalida
Ethiopia ay la wadaagto Caabudwaaq, qaxootigaan oo bilihii ugu danbeeyay deganaa
meel koonfurta Caabudwaaq ah una jirta ilaa 5 km ayaan helin wax gargaar ah oo
weyn tan iyo intii ay halkaas deganaayeen, waloow ay jireen dad iskood isu
xilqaamay oo wixii ay awoodi kareen gaarsiiyay.
Qaxootigaan ayaa waxay iisheegeen in markii ay waayeen wax hay'adda ama
samafalayaal si rasmi ah wax ugu tara waxa ay ula baxeen xerada ay degan yihiin
Xeradda Alla-aamin, taasoo ay uga dan leeyihiin in ilaahay mooyee cid kale oo
umaqan aysan jirin, run ahaantiina waa mid jirta arintaasi waa dad masaakiin ah
oo subaxdii sida shinbiraha irzaaqad rabi mooyee aan ku xisaabtamin wax meel
uyaalla ama cid kale oo ay wax ka sugayaan sidaasna ay ku noolaayeen waqti dheer.
Qaxootiga ayaa waxaa ka muuqata dhibaato kasta oo ku dhacda qof bani aadam ah
kuwa ugu daran sida gaajada, jiradda, iyo daryeel la aan intaas oo dhan ayaa
iskugu darmaday taasina waxay keentay in dad badani ugu dhintaan maalin walba
saxar la aan.
Qaxootiga ayaa maanta waxaa loo geeyay waxoogaa Raashin, Sijaayaddo iyo Maacuun.
deeqdaan ayaa waxaa ku soo kala deeqay Hay'adda ICRC iyo Qaybaha Bulshadda
Caabudaaq, sida Waxgaradka, Culumadda, Dhalinyaradda iyo Dhamaan cid kasta oo ka
danqatay dhibaatada haysata dadkaan masaakiinta ah ee silicu haysto.
Maalmihii ugu danbeeyay ayaa waxaa aad looga hadlayay Masaajid-yadda iyo dhamaan
goobaha dadku iskugu yimaado dhibaatadda haysata dadkaan qaxootiga ah ee aan
hadana cidi umaqnayn daryeel iyo nolol midna aan haysan, hadana ku dul nool
magaalada korkeeda taasoo cuqubo iyo dhibaato weyni ka imaan karto hadii aan loo
naxariisan.
Si kastaba ha ahaatee waxaa jira dad badan oo arintaan si weyn uga xanuunsaday
waloow tabarta dad badan oo dhibkaan taabanayo aysan wax weyn u awoodin, balse
ay qaxootiga anfacayso wax kasta oo loogu deeqo ha yaraato ama ha badnaatee.
W/D: Said Qodax
Caabudwaaq, Somalia
sqodax10@hotmail.com
Faafin: SomaliTalk.com | Feb 27, 2009