Naadiga Somali Pen oo xusey Maalinta Afka Caalimiga ee 21 Febraayo
SAWIRRO:
Sawirada Halkan ka daawo.....
Xaflad lagu maamuusayay maalinta 21-Feberaayo oo ah maalinta Afafka caalmaka iyo
afka Soomaaliga ayaa lagu qabtay Muqdisho, taasoo ay soo
qabanqaabisay Naadiga Hal abuurka iyo Qorayaasha Soomaaliyeed, laantiisa
koonfurta Somalia.
Qaybaha kala duwan ee bulshada sida fanaaniinta, saxaafadda, waxgaradka iyo
marti sharaf kale ayaa kasoo qaybgalay xaflada, waxaana halkaas laga soo
jeediyay hadalo ku aadan afka Somaliga iyo sugaan lagu cabiray horumarka afka.
Ugu horreyn waxaa hadal ka jeediyay xaflada Xoghayaha Naadiga SOMALIPEN
Koonfurta Somalia Axmed Max'ed Dhicisoow oo ka hadlay heerarkii uu soo maray
Naadiga tan iyo markii la aasaasay, wuxuuna sheegay in naadigu uu xooga saaray
sidii loo ururin lahaa Afka Soomaaliga, isla markaana meel la isugu keeni lahaa
qoryaaasha iyo fanaaniinta.
Waxaa kaloo halkaas ka hadlay Cabdi Wehliye Siyaad oo ku hadlay magaca bulshada
rayidka gaar ahaanHayadaha INXA iyo Xarunta Ismaaciil jimcaale DHIJRO, wuxuuna u
mahadceliyay intii soo qabanqaabisay munaasabada, isagoo sheegay in Afka Hooyo
ee Somaliga uu ka mid yahay saddexda Af ee ka qoran Afrika, iyadoo ay ka
horreeyeen qoraalkiisa Afafka Amharic iyo Sawahili.
Cabdi Wehliye wuxuu Somalida u soo jeediyay inay xoogga saaraan horumarinta iyo
taabogelinta afkooda hooyo ee Somaliga, isagoo xusay in ummad horumarkeed uu ku
xiran yahay horumarka afkeeda.
Guddoomiyaha Naadiga SOMALIPEN laanteeda Koonfurta Somalia C/naasir Yuusuf
Macallin Ganey oo buuxiyay booskii uu ka geeriyooday ALLAHA u raxmadeen Cabdi
Muxumad Amiin ayaa ka hadlay waxqabadka Naadiga iyo weliba howlaha horyaalla.
'Naadiga waxaa horyaalla saddex arrimood, kuwaasoo kala ah: Ururinta Hal
abuurayaasha Soomaaliyeed, Ururinta Qorayaasha Soomaaliyeed iyo weliba Ururinta
Haweenka hal abuurka leh, si loo horumariyo suugaanta Afka Hooyo" ayuu yiri C/naasir
Ganey.
Sidoo kale Guddoomiyuhu wuxuu mahad balaaran u jeediyay dhammaan ciddii gacan
siiyay Naadiga intii uu jiray, isagoo xusay in naadigu uu dhexda u xiran doono
horumarinta Afka Hooyo ee Soomaaliga.
Xaflada ayaa waxaa sidoo kale hadal kooban ka jeediyay Guddoomiye ku xigeenka
Dalladda Isku-xirka & Horumarinta Dhallinyarada Soomaaliyeed SOYDEN Cismaan
Maxamed Cabdi (Daallo), wuxuuna sheegay in afka Hooyo ee Somaliga uu ku badbaadi
karo iyadoo ay dhallinyaru horumariyaan afka, joojiyaana ku hadalka afafka kale
ee Ajnabiga.
Fanaaniin iyo Abwaano ayka mid ahaayeen Cabdi dhuux Yuusuf , Cismaan Cabdulaahi
Guure , Abwaan Barre Bangaladesh ,Abwaan Maxamed Axmed farey , Saciid Xarawo iyo
dahabo Maxamed ayaa iyagu kusoo bandhigay halkaas tixo gabayo ah, kuwaasoo ay ku
cabirayeen isbadalka afka Soomaaliga ee Hooyo, waxaana sugaantii ay soo
bandhigeen ay ku cabireen in Afku yahay waxa ugu qiimo badan ee ay Somalidu
haysato.
Afhayeenka Dowladda Somalia Cabdi Xaaji Goobdoon ayaa hadalo kooban kusoo xiray
xaflada, isagoo sheegay in looga baahan yahay saxaafada iyo sugaanleyda inay
xoogga saaraan horumarka Afka Soomaaliga.
Naadiga Afafka Caalamka ayaa la aasaasay sannadkii 1928-kii, iyadoo naadiga Hal
abuurka iyo Qorayaasha Soomaaliyeed la aasaasay sannadkii 1997-dii, halka
Naadiga SOMALIPEN laantiisa Koonfurta la aasaasay sannadkii 2003.
W/D Amiin Yuusuf Khasaaro
E-Mail amiinkhasaaro@hotmail.com