16,February,2009 waxaa magaalada Wad madani ee caasimadda u ah gobolka Jaziira ee Sudan lagu soo gabagabeeyey kulamo loogu gogol xaarayey helidda dallad ama shabakad ay ku mideysan yihiin aqoonyahannada Soomaaliyeed ee ku takhasusay cilmiga beeraha qeybihiisa kala duwan.

Aasaasidda shabakaddan ayaa waxey ka dambeysay kadib markii ay isla garteen aqoonyahannada halkaa ku shiray lagama maarmaannimada in la helo nidaam mideynaya dhamaan culumada cilmiga beeraha ee ku kala nool daafaha dunida, nidaamkaas oo run ahaantii u fududeynaya gudashada waajibka ka saaran ummadda iyo ka qeybqaadashada horumarinta dalka.

Dalladdan ayaa waxaa looga fadhiyaa iney qeyb weyn ka qaadato kobcinta dhaqaalaha dalka oo sida la wada ogsoon yahay ku tiirsan xoolaha iyo beeraha.

Sidoo kale dalladdan waxey xoogga saari doontaa isu keenista gebi ahaan aqoonyahannada Soomaaliyeed ee ku takhasusay qeybaha kala duwan ee cilmiga beeraha meel walba oo dunida ay ka joogaan .

Run ahaantii kala go' weyn ayaa ku yimid guud ahaan waxbarashada Soomaaliya duruufaha dagaalka awgood taasoo sababtay in iska warqabid la'aan iyo weliba xiriir la'aanay ka dhex dhacdo jiilka aqoonyahannadii hore iyo aqoonyahannada dhalinyarada ah ee goor dhow qalin jebisay amaba hadda ku mashquulsan waxbarashada , sidaa awgeed dalladdu waxey ku dadaali doontaa isku xiridda labadaa jiil, tallaabadaasoo nafci weyn ula soo noqon doonta dhamaan umadda, gaar ahaan inta ku howlan waxbarashada.

Aqoonyahannada ayaa halkaa waxey isku tusiyeen jiritaanka mushkilado dhowr ah isla markaana habka ugu fudud uguna habboon ee looga tallaabi karo ay tahay helitaanka awood mideysan oo waajihi karta mushkiladaha noocan oo kale ah.

Waxaa halkaasi guddoomiye loogu doortay Maxamed Khadar Cabdi Maxamed(Afgooye) oo ah aqoonyahan cilmiga beeraha kuna takhasusay Pesticides & Toxicology , isagoo ka hadlayey kulankaa ayaa waxuu yiri :- "Annagu hadafkeennu waxuu yahay helitaanka ummad Soomaaliyeed oo isku filan".

Xoghayaha guud ee dalladda C/rashiid Caraaye Cumar oo isagu ku takhasusay Agricultural Engineering ayaa tibaaxay iney muhiim tahay howlgelinta shabakaddaan " Nin walboo Soomaali ah waxa uu dowr ku leeyahay shacabka Soomaaliyeed horumarintiisa , waxaana wax aad loogu farxo ah inaan diyaar u nahay gudashada dowrka nooga aaddan ummadda"ayuu yiri xoghayaha.

Haddaba , isku xiraha guud ee dalladda C/raxmaan Axmad Xasan (Dadweyne) oo ah aqoonyahan ku takhasusay Animal Production ayaa isagu baaq u jeediyey dhamaan aqoonyahannada ku takhasusay cilmiga beeraha meel walba oo ay joogaan iney qeyb libaax leh ka qaataan dardar gelinta howlaha shabakadda .

Sidoo kale ,Sayid Cali Muxyidiin Maxamed oo isagu ah aqoonyahan ku takhasusay Plant Protection isla markaana ah xoghayaha maaliyadda ee shabakadda ayaa sheegay in dalku u baahan yahay waxqabad ,ummadduna u baahan tahay horumarin, dhaqaaluhuna u baahan yahay kobcin, annaguna aan u baahan nahay midnimo.

Ugu dambeyn , aqoonyahandii halkaa isugu tagay ayaa waxey baaq guud u jeediyeen gebi ahaan Soomaalida iney ka qeyb qaataan horumarinta habsami u socodka dalladdan, taasoo noo horseedeysa inaan si wada jir ah u wada dhisno waddankeenna una horumarinno dhaqaalihiisa.

Waxaa si khaas ah loogu baaqayaa dhamaan aqoonyahannada ku takhasusay cilmiga beeraha iney lasoo xiriiraan walaalahooda maamulka shabakadda oo ay kala soo xiriiri karaan e-mailka shabakadda oo ah agrosoma@hotmail.com