2004-tii ayaa Weriye Fahad Yaasiin waxa uu qoray maqaal uu ugu magacdaray

(I DOORO AAN KU DILLEE) wuxuuna ku soo beegay maqaalkaan xiligii loo ololaynayay Tartanka madaxnimada shirkii Impagathi, waxa uuna weriyuhu sii saadaaliyey in uu doorashada ku soo bixi doono C/llaahi Yuusuf Axmed maadaama uu ugu tun roonaa qabqablayaashii shirkaas abaabuley oo ay itoobiya dabada ka riixeysey , waxaana meesha isugu tagey intii dilaaga ahayd Abwaan Tabantaabo ayaa yiri “Dilaa Sare Haddii aan la Dilin waa Dalacayaaye saa la Dilli waaye”

Xaqiiqda marka loo hadlo waxa uu weriyuhu uga digayey xildhibaanada Baarlamaanka in ay doortaan shaqsi ummadda u horseeda burbur iyo baaba', hase yeeshee arrintaasi waa ay iska indha tireen, xildhibaan ayaa waxa uu yiri "Ninkii afka ii buuxiya ayaan dooranayaa, waxba igama gelin cidda la dilayo" mid kale oo Musqusha ku tirsanaya lacag ayaa isna waxa uu yiri "Weligay ma arag lacag intaan la eg meeshay doonto ha ka dhacdo wixii doonana ha baaba'een", mid kale ayaa isna sii raaciyey "Wallaahi C/llaahi Yuusuf nin uga dhow Doorashada ma jiro, waayo waa nin 40 sano u soo halgamayay madaxtinimada oo dad badan u soo baabiyey, marka ummaddu waxay u baahan tahay nin noocaan oo kale waayo Dadka Soomaaliyeed 16-kii sano ayay faraha ka baxeen, marka C/llaahi ayaa dariiqa toosan ku soo celin doona, ummadduna waxay u baahan tahay nin milatari ah oo birta calaaliya oo aanan cidna ka naxeyn".

Xildhibaan kale oo ka soo horjeeda C/llaahi Yuusuf oo isna u digaya xildhibaanada kale ayaa yiri "waxaan idinkaga digayaa in aad doorataan C/llaahi Yuusuf, waa nin dhiig fara badan ku soo qubeystay oo aan cidna ka naxeyn, marka waxaan idin leeyahay ha laga digtoonaado ninkaa doorashadiisa". Xildhibaan kale oo ay isku beel yihiin C/llaahi Yuusuf ayaa yiri "Wallee Soomaaliyeey waxaana ka baqayaa in uu hoog iyo baaba' idiinla yimaado C/llaahi, waayo waan idinka naqaanaa ninkaa waa nin madax adag oo kelitalis ah, cid uu ka naxayana ma jirto, waan ognahay in Dowladda Itoobiya ay kharash badan ku bixineyso soo bixitaanka C/llaahi Yuusuf Axmed, waxayna ula jeedaa in ay Soomaaliya sii baabi'iso ee ujeedo kale oo ay leedahay ma jirto.

C/llaahi Yuusuf waxa uu helay habeenkii Doorashada 189 cod, waxayna Beeluhu codadka u kala siiyeen sida tan 55 Beelaha Digil iyo Mirifle, 57 Beelaha Hawiye, 45 Beelaha Dir, 22 Beesha Daarood, 10 Beelaha Isbahaysiga, coddeyntaan waxaa kaaga cad in Beelaha Hawiye ay si indho la'aan ah u doorteen C/llaahi Yuusuf Axmed, kadib markii ay heleen lacago fara badan, sidoo kale waxaa coddeyntaan kaaga soo baxaya in beesha Daarood ee uu ka soo jeedo C/lllaahi Yuusuf ay aad ugu yar yihiin coddeynta, taas oo ah in ay ahaayeen dad si aad C/llaahi Yuusuf u yaqaanay. Nin xildhibaan ah oo ka mid ah Xildhibaandii horey u soo doortay C/llaahi Yuusuf kuna sii jeeday shirka Jabuuti ayaa mar aan kula kulmay Magaalada Muqdisho waxa uu yiri "Aad baan uga shalaayay Doorashadii C/llaahi Yuusuf, mas'uuliyadeeda dhibaatadii ku dhacay shacabka waxaa iska leh intii soo dooratay C/llaahi Yuusuf,

C/llaahi Axmed Caddow oo tartanka la galay C/llaahi Yuusuf Axmed ayaa doorashadaas waxa uu ka waayay wixii uu filayey, intii aysan doorashadaasi dhicin waxa uu yiri mar la wareystay "waxaan doonayaa in aan si soomaalinimo ah doorashada ugu soo baxo nin qabiil wax ku doonaya ma ihi, ninkaan iraahdo doorashada igu taageerna waxa iigu jawaaba 'lacag ma wadataa', inta yaabay ayaan hoos waxaan ka iri 'ma aqaan ummadan halka loo wado balse iyadaa ka war keeni doonto".

Waxaa caddaatay in ay soo baxday oraahdii ahayd (I Dooro aan ku dillee), waxa uuna C/llahi Yuusuf bilaabay in uu wadanka soo geliyo ciidamo Itoobiyaan ah kuwaas oo ka gaystay wadanka xasuuq fara badan, iyadoo xiligii uu joogay C/llaahi Magaalada Muqdisho ee labada sano ahayd la barakiciyay dad gaaraya Labo Milyan oo qof, sidoo kale waxaa dalka ka cararay dad fara badan kadib markii loo jeediyey hanjabaadyo, C/llaahi waxaa afkiisa ka dhamaan waayay waxaan la dagaalamayaa argagixiso, xitaa waxa laga waayay hadal dadka soo jiita, iyadoo raggii kale ee isaga la shaqaynayay ee ka soo jeeday gobolkaan ay iyana si bareer ah ula safteen C/llaahi, waxaa dhamaantood ka soo wada yeeray hadalo ay bulshada Soomaaliyeed weligeed hilmaami doonin, iyadoo markii dambe C/llaahi Yuusuf ay iska hor yimaadeen Cali Max'ed Geedi taasina keentay in Cali xilka iska casilo, hase yeeshee markii uu yimid Nuur Cadde, C/llaahi waxa uu is lahaa waxaad heshay nin aad sii adeegsan doonto, balse waxay arrintu noqotay in C/llaahi uu maro wadaddii Geedi horey u maray, xilkiina uu iska casilo, waxaana haatan cad oo iska muuqata in xaaladdu ku soo laabatay labo sano ka hor meeshii ay joogtay iyadoo intii hore ka awood badan.

Sheekh Shariif Sheekh Axmed oo ay beesha caalamka wax la waday ayaa ku soo baxay 31-kii bishii hore Doorashada madaxweynimada Soomaaliya, runtii doorashadaani waxay ahayd mid deg deg badan, Xildhibaanada meesha isugu tagayna waxay ahaayeen kuwo si aad ah ula dhacsanaa doorka uu Sheekh Shariif ka cayaaray arrimaha Soomaaliya, taasina waxay keentay in uu cod aqlabiyad leh ka helo xildhibaanadii Baarlamaanka, runtii doorashadii C/llaahi iyo middaan waxaa u dhexeeye farqi weyn, waayo middaan waxaa inta badan laga siman yahay in faragelinta Itoobiya ay ka marneed, sidoo kale waxaa marnaa in lacago laaluush ah la kala qaato, waxaana taas sabab u ah markii Sheekh Shariif ay soo sharaxeen Isbahaysiga dib u xorreynta oo iyagu lahaa 200 oo Xildhibaan, xitaa waxaa la yaab leh in bulshada rayidka ah oo 75 xubnood ku lahayd Isbahaysiga aysan ka qaybgelin doorashadii Sheekh Shariif Sheekh Axmed, taas oo ay iska caddeyd in Shariifku uusan baahneyn 75-taa Xildhibaan oo uu haystay kalsooni buuxda, waxaase mucjiso noqotay in Sheekh Shariif isku soo baxaan Maslax Max'ed Siyaad oo uu dhalay madaxweynihii hore ee Soomaaliya Max'ed Siyaad Barre, hase yeeshee dadka odorosa siyaasadda waxay markiiba qireen in Maslax ay ka ahyd in uu magac ka helo doorashadaas balse uu Shariifku ku cad-caddaa oo uu ku soo bixi doono tartanka.

Haddaba haddii ay shalayd ahayd (I dooro aan ku dillee), maanta waa (I dooro aan ku daryeelee). Sheekh Shariif inkastoo Muddo yar ku jirey siyaasadda haddana waxaa hor taagan caqabado fara badan oo ay ugu horeyso sidii uu u qancin lahaa kooxaha ka dagaalamaya gudaha dalka oo iyagu si aad ah uga soo horjeeda Sheekh Shariif Sheekh Axmed kuna tilmaamay in uu yahay nin ka leexday wadaddii ay kuwada ballameen sida ay sheegeenna isku dhiibay wax ay ugu yeereen beesha Caalamka, balse Sheekh Xasan Daahir Aweys ayaa waxa uu yiri "markii C/llaahi laga dhameystay dantii laga lahaa ayaa haddana la doonaya in Sheekh Shariif maalmo kale lagu sii meel gaaro, marka arrinta Soomaaliya waa jug jug meeshaada joog.

Marka laga yimaado hadalada ay kooxaha kala duwan ee Soomaalida ka soo yeeray kuna wajahan doorashad Sheekh Shariif, waxa sidoo kale iyana cod dheer ku taageeray beesha Caalamka iyo Wadamada Islaamka gaar ahaan Ururka Culumada Islaamka ee Adduunka kuwaas oo kooxdda Al-Shabaab iyo Isbahaysiga garabka Asmara u soo jeediyeen in ay raacan Shariifka, isla markaana ay soo gogol dhigtaan haddii ay wax qaladaad ah tabanayaan, waxayna taasi u muuqataa in Shariifku uu taageero badan ka haysto dhinacyada caalamka, balse hadda caqabadda keliya ee jirta lagu tilmaami karo in ay tahay kooxaha gudaha oo qudhooda kooban marka loo barbardhigo mucaaraddkii ka hor imaan jiray dowladihii horey loo dhisay, Shariifka ayaa doorashadiisii kadib waxa uu sheegay in uu la hadli doono gebi ahaanba dhinacyada soomaaliyeed, waxa uuna arrintaan ku celcelinayay mudo dheer, dadka siyaasadda indha-indheeyana waxay tilmaamayaan in Sheekhu ka gudbi karo caqabadahaan, maadaama mucaaradka ka soo horjeeda ay yihiin ay mudo isla soo shaqeeyaan oo ay wax wada fahmi karaan, sidoo kale shacabka soomaaliyeed ayaa kalsooni badan ka muujiyay Madaxweynaha cusub, iyagoo daliishaday in uu yahy nin Nabadeed oo aan qoriga caaraddiisa wax ku raadineyn sida C/llaahi Yuusuf waa sida ay tilmaameen, isku soo wada duuboo waxa loo badinayaa in arrintu hagaagi doono mar haddii Xukuumadda cusub iyo Madaxweynuhuba si buuxda uga hawlgalan Caasimadda Muqdisho, waxaana dareemi kartaa in tani ay ka macno tahay oraahdii aan horey u sheegay ee ahayd (I dooro aan ku daryeelee), bulshaduna waxay qabtaa in aan la deg degin ee daryeelka la sugo

W/D Amiin Yuusuf Khasaaro

E-Mail amiinkhasaaro@hotmail.com