- Madaxweynaha DFKMG Soomaaliya Sheekh Shariif Sheekh Axmed oo la
Dejiyey Madaxtooyada Dowlada Jabuuti.
- Xildhibaan TFG ka tirsan oo yiri "TFI Waxaa Xukumayey oo ay Amarka ka
Qaadan Jireen Wakiilada Deeq Bixiyayaasha, Hay'adaha UNDP, WFP iyo
Shaqaalaha Baanka Aduunka…" wareysi gaar ah
- Xildhibaanada Beelaha Direed oo si Weyn Isugu Raacey Qabashada Xilka
Ra'iisul Wasaaraha In ay u Taagan Yihiin.
- Dhamaan Xildhibaanada Baarlamaanka KMG ayaa la filayaa in siminaar
socondoona todobaad uu uga furmo Guriga Ummada ee caasimada dalka Jabuuti
05/02/2009, kaasoo ujeedadiisu tahay habka doodaha Baarlamaanka, is-barasho
Xildhibaanada cusub iyo kuwii hore, sida aan ka helney xubno ku dhow dhow
xafiiska gudoonka Baarlamaanka.
Madaxweynaha DFKMG Soomaaliya Sheekh Shariif Sheekh Axmed oo la Dejiyey
Madaxtooyada Dowlada Jabuuti.
Madaxweynaha DKMG ee Soomaaliya Sheekh Shariif Sh. Axmed iyo wafdi uu
hogaaminayo ayaa soo gaarey 04/02/2009 caasimada dalka Jabuuti, Madaxweyne
Sheekh Shariif oo ay diyaarad wada saarnaayeen Madaxweynaha dalka Jabuuti Md,
Ismaaciil Cumar Geelle ayaa waxaa garoonka diyaaradaha Jabuuti ku soo dhaweeyay
mas’uuliyiin ka tirsan Dowladda Jabuuti iyo xildhibaanada Baarlamaanka KMG
Soomaaliya.
Madaxweyne Sheekh Shariif ayaa la dejiyey Xarunta Madaxtooyda dowlada Jabuuti,
halka wafidga kale ee la socdey Madaxweynaha loo oo ay ka mid ahaayeen Ra'iisul
Wasaarihii hore ee DFKMG Nuur Xasan Xuseen, Xildhibaan Shariif Xasan Sheekh
Aadan, Xildhibaanad Fowsiyo Maxamed Sheekh iyo xubno kale loo gudbiyey Hotelka
Kempiniski oo ay hore u deganaayeen.
Madaxweyne Sheekh Shariif oo wax ka yar 24 saac loo doortey xilka madaxweynaha,
islamarkaana loo dhaariyey 8 saacadood kadib ayaa wuxuu ka qayb galey shirkii
12-aad ee midowga Afrika, waxaa uuna kulamo kala duwan la soo qaatey madax kala
duwan oo isugu jira madaxweynayaasha qaar ka mid ah wadamada Afrika,
Diblamaasiinta dalallka caalamka, Wakiilada Ururada Caalamka.
Madaxweynaha ayaa waxaa hor yaala hawlo fara badan oo ay ka mid tahay ku
dhawaaqista Ra'iisul Wasaaraha cusub ee Xukuumada TNG-da, Ansixinta Golaha
Xukuumada cusub oo Baarlamaanka la horgeeyo iyo Qorshe hawleedkeeda, dib ugu
laabashada dalka Soomaaliya dhamaan Dowlada cusub sidey u dhan tahay, iyadoo ay
jiraan is riix riix beeleed oo dhinaca qabashada xilka Ra'iisul Wasaaraha cusub,
taasoo ay ka muujinayaan dadka arimaha siyaasada ku xeel dheer aragtiyo isugu
jira talo bixin iyo handadaado fara badan oo ay ka imaanayaan Beelaha
Soomaaliyeed, Halka xoogaga ka soo horjeed DKMG ay iyaguna diyaarinayaan
qorshayaal cusub oo lagu wiiqayo awooda dowlada cusub ee aan wali saldhigin
dhismo Xukuumadeeda cusub.
Xildhibaan TFG ka tirsan oo yiri "TFI Waxaa Xukumayey oo ay Amarka ka Qaadan
Jireen Wakiilada Deeq Bixiyayaasha, Hay'adaha UNDP, WFP iyo Shaqaalaha Baanka
Aduunka…" wareysi gaar ah
Mid ka mid ah xubnihii ugu cad cadaa Xukuumada TFG-da, islamarkaana xog-ogaalka
ka ah waxa ka socday TFI oo codsadey inaan magaciisa la shaacin oo aan kula
kulmey Hoteel Shariton ee caasimada dalka Jabuuti, wax ka weydiiyey waxyaabaha
ay ku fashilantey TFI, sida ay isula shaqeyn karaan Xildhibaanadii hore iyo kuwa
cusub, caqabadaha ka hor imaanaya dowlada cusub iyo sababihii dhaliyey khilaafka
Cabdullaahi Yuusuf iyo Dowlada Ethopia ayaa isagoo arimahaasi ka hadlaya waxaa
uu yiri " TFI micnaheedu waxaa weeye, Madaxweynaha, Baarlamaanka, Xukuumada iyo
Garsoorka oo dhan, dhamaantoodna waxaa xukumayey oo ay amarka ka qaadan jireen
Wakiilada Deeq bixiyayaasha, Hay'adaha UNDP, WFP iyo shaqaalaha Baanka aduunka,
TFG-na waxay isu haysatey iney u shaqeyso Hay'adahan oo ay mushaar ka qaataan,
Afka Dowlada soomaliya waxaa ku hadli jirey Hay'adahan, TFG waxay ahayd shaqaalo"
ayuu yiri Xildhibaankan, isagoo hadalka sii wata ayaa intaa ku darey
"marka shaqo la doonayo in laga fushado, mushaarka ayaa laga xanibi jirey, mudo
kadib marka danaha laga fushado waa laga tegi jirey, Wasiirada TFG sababta ay
xafiis u yeelan waayeen, waxaa ka mid ah laaluush ayaa la siin jirey si aysan
xafiis u sameysan, sababtoo ah Hay'adahan ma ogoleyn in la sameeyo Miizaaniyada
dowlada, Ra'iisul Wasaarayaashii TFG soo marey waxaa laga hor taagnaa inaysan
miizaaniyad sameyn, si aan loola xisaabtamin Hay'adahan".
Xildhibaankan waxaa uu u soo jeediyey Xukuumada cusub in aysan ku dhicin
khaladaadkii hore ay ugu dhacdey TFG-da " Xukuumada cusub waa iney sameysaa
Miizaaniyad iyo in ay isku filneysiiso dhaqaalaheeda gudaha, lahaatana Talada
dalkeeda oo ay noqoto dowlad laga amar qaato, lana xisaabtanto Wakiilada
Hay'adaa Doonariska" ayuu yiri Xildhibaankan.
Mar uu ka hadlaayey sida ay isula shaqeyn karaan Baarlamaankan cusub iyo kii
hore ayaa wuxuu yiri "Baarlamaanka cusub hadii uu noqdo mid isku xiran oo ka
fikira danaha Ummada, wuxuu hogaaminkaraa kii hore meelaha haba isaga qayl
qaylyeene, sababtoo ah Baarlamaankii hore malaha Mabaa'dii isku xiran oo uu
ilaashado, wuxuuna ku shaqeeyaa Korabshin, marka Baarlamaanka cusub waxaa laga
sugayaa in ay bedelaan shaqadaas adag, islamarkaana la helo Gudoomiye Baarlamaan
adag oo la xisaabtama Xukuumada".
Sidoo kale mar uu ka hadlaayey xoogaga hubeysan ee ka soo horjeeda DKMG sida
Uruka Al-shabaabo iyo dowlada cusub ayaa wuxuu yiri "Shariifka iyo Al-shabaab ma
heshiinkaraan, Sheekh Shariif hadii uu qaraar ku gaaro inuu iska dhiciyo, isagaa
adkaanaya ama awoodooda ayuu liciifinayaa, laakiin waxay ku heshiin karaan Al-shabaab
oo Sheekh Shariif soo raaca, ninkan Daahir Aweys ee jooga Asmara Kursi doon buu
ahaa, kursigiina shariif ayaa kala hoos baxay".
Xildhibaanku mar uu ka hadlaayey sababaha keeney khilaafka Cabdullaahi Yuusuf
iyo Ethopia ayaa wuxuu yiri "Ethopia iyo Cabdullaahi Yuusuf waxay ku dirireen,
Gabre ayaa diidey amarka Cabdullaahi Yuusuf, kadib markii Gabre lagu amrey in
dalka xoog lagu qabto, taasoo Gabrena uu ka soo horjeestey yirina, Anagu awood
uma lihin intaas ee ciidamo booliis gudaha ah sameyta, arintaas waxay dhalisey
in Cabdullaahi Yuusuf uu u dacwoodo Dowlada Ethopia si looga bedelo, markii la
bedeley Gabre isaguna wuxuu go'aansadey inuusan ka dambeyn sidaasna xilkii looga
qaadey Cabdullaahi Yuusuf, marka Ethopia ma dooneyso in qalalaasaha uu dalka ka
dhamaado" ayuu hadalkiisa ku soo gebagebeeyey Xildhibaankan.
Xildhibaanada Beelaha Direed oo si Weyn Isugu Raacey Qabashada Xilka Ra'iisul
Wasaaraha In ay u Taagan Yihiin
Xildhibaanada Beelaha Soomaaliya ee jooga Jabuuti ayaa si gooni gooni shir ugu
leh Hoteelada caasimada dalka Jabuuti, waxayna si weyn ugu mash-quulsan yihiin
ogaanshaha magacaabista magaca Ra'iisul Wasaaraha cusub iyo soo xulista xubnaha
Wasiirada Beelaha dhexdooda oo la filayo in Madaxweynuhu uu ku dhawaaqo Ra'iisul
Wasaaraha saacad kasta oo soo socota.
Arintan ayaa waxaa ka taagan is riix riix adag oo u dhexeeya Jufooyinka Beelo ka
soo jeeda Daarood, waxayna qaarkood hadalo hoose iigu sheegeen hadii aan loo
magacaabin Jufadooda in ay kalsoonida kala noqonayaan Dowlada cusub ee uu soo
dhiso Ra'iisul wasaaraha la magacaabey, halka Xildhibaanada Beesha Direed siday
u dhan yihiin shir gaar ah oo ay ku sheesheen Hoteel Lasestaa ee Magaalada
Jabuuti ay go'aan ku gaareen in mar dambe aysan ogolaandoonin in siyaasada iska
soo horjeeda ee Beesha Hawiye iyo Daarood ay uga aamusaan qabashada mas'uuliyada
dalka. Waxayna si weyn ugu mash-quulsan yihiin xubintii iyaga matali lahayd.
Mid ka mid ah Xildhibaanada ARS ee Beesha Direen oo si gaar ah iigu waramey ayaa
wuxuu yiri "mar dambe ogolaan meyno, inaan uga aamusno siyaasada iska soo
horjeeda ee Beesha Hawiye iyo Daarood oo iyaga ay isku ugaarsanayaan, waana ka
dhex bixineynaa xilkaas, waxaana jebineynaa tiirkii colaada horseedey, anagu
waxaan dooneynaa Soomaalinimo ee ma dooneyno inaan dib dambe u eegano arinkan"
ayuu yiri isagoo aad ugu xamaaseysan go'aanka ay gaareen iyo in la soo celiyo
midnimadii luntey ee Soomaaliya
Maxamed Macallin Cismaan(All-man) Somalitalk Jabuuti
fatxumaalik@hotmail.com
Faafin: SomaliTalk.com | Feb 5, 2009
Daabaco
Boggan | Print
