NOQO HANAD LAGU DIIRSADOO HAAKA LA YIRAAHDO ! AAMIN ALLOW AAMIIN!!
Ku bilaabid magaca Alle naxariistaaga naxariista badan
Alle waa wadaan wada’e, wax ciddii diinta sheegataba lala
diriro, wax hadba wadaad aan waxba dhimin la qafaasho oo gaalo
laga gado, wax rag magac iyo mansab ku raadsadaan inay la
diriraan diinta islaamka iyo ciddii laga dareemo inay diinta
ehel u tahayba, wuxuu Alle maanta qaddaray in hoggaamiyihii
ummadda Soomaaliyeed oo dhan loo doorto sheikh shalay loo
doortay inuu madax u noqdo maxkamadihii ku midoobay hirgalinta
shareecada islaamka iyo sugidda nabadda shacabka Soomaaliyeed ee
koonfurta Soomaaliya ku nool siiba Muqdiisho iyo daafaheeda.
Runtii waa arrin aan la filahayn laguna riyoonayn, in maanta
madaxweynaha Soomaaliya loo doorto sheikh Asal raac ah oo
rumaysan in xalka dhibaatada Soomaaliya uu ku jiro in kitaabka
Alle lagu dhaqo. Waa guul ummadda Soomaaliyeed Alle siiyey,
haddii aysan calfan waayin oo arrintoodu noqon maah-maahdii
Soomaaliyeed ee ahayd
“Tuke nasiib uu caano ku helo waa leeyahay laakin nasiib uu
ku calfado ma laha”!!
Guushaan waxaa lagu gaaray idanka Alle kaddib laba arrimood,
tan koowaad waa fidaa’iyiinta gunnimada ka dhiidhiyey oo diiday
inay gaalo isa soo bahaysatay gorodda u laad-laadiyaan, oo
halgan hubaysan kala hortagay cadowyo isa soo bahaystay oo ku
tala galay inay ummadda Soomaaliyeed ee Muslimka ah dulleeyaan
diintana ka fogeeyaan. Tallaabadaas millatari oo ay ka wada qayb
qaateen in badan oo Shacabka Soomaaliyeed ka mid ah, oo ay
horkacayeen culimadooda, iyadoo dadka Xamar degganaa ay
dhiidhiyeen oo dhiig badan daadiyeen, dhiiggaas oo horseeday in
laga quusto in Soomaali la gumaysto. Runtiina billad dahab bay
ka mudan yihiin ummadda Soomaaliyeed culimadii halgankaas
horkacday iyo shacabkii garab istaagay oo diiday inuu is dhiibo
iyadoo marar badan xasuuq lagu sameeyey, intoodii geeriyootayna
Alle shahaado ha siiyo oo Janno fardowso ha geeyee.
Waxaa kaloo lagu gaaray guushaan halgan siyaasadeed oo ay ku
dhaqaaqeen rag uu hormood u ahaa sheikh Shariif Sheikh Axmed oo
runtii ku qanciyey aadane badan oo moodayey inay diinta islaamka
iyo asal raacu yihiin dugaag aan si loola dhaqmo la aqoon isla
markaasna aan nabad keeni Karin, si loo wada noolaadana aan
aqoon. Sheikh Shariif Sheikh Axmed runtii wuxuu soo jiitay
indhaha wixii samaan iyo khayr jecel oo Soomaali ah, iyo intii
Soomaalida khayr la jecelba. Isagoo afkiisa ka dhawray hadal iin
leh iyo carrab dalab leh.
Waddadiisiisa isagoo aan ka bayrin buu haddana wuxuu ku
guulaystay inuu hadal qabow dantiisa iyo ujeeddadiisa ku
hiigsado. Dad badan baa moodaya inay kala hari karaan halganka
millatari iyo halganka siyaasadeed, oo siyaasaddu tahay wax aan
loo baahnayn, waana dad aan war hayn runtii kuwa sidaas qabaa.
Wiilka qoriga sita oo goobta ka diriraya haddii aysan dhinac
socon halgan siyaasadeed oo lagu taakeerayo laguna difaacayo
ragga diriraya iyo mabaaddii’da dartood loo dirirahayo, yoolka
la hiigsanayo lama gaareen, arrimmahana boqolkiiba sagaashan
siyaasad iyo xeel bay ku fulaan oo lagu gaaraa tobanka hartayna
tallaabo millatari baa lagu gooyaa.
Ceelkii Xiima-caddo
Laba hoggaamiye dhaqameed oo reer Mudug ahaa oo noolaa qarni
ka hor oo la kala oran jiray sida warintu leedahay Axmed Saagil
iyo Cigaal Caymo, baa maalin iyagoo laba faras ku jooga waxay
dul yimaadeen ceel Xiima-caddo la oran jiray oo biyo booli ahaa,
biyo booli waxaa laga wadaa ceel aan biyaha ceshan ee durba
liqa. Waxay u yimaadeen Xiima-caddo oo inta Alle raxmad ku
shubay buux-dhafay oo caaddaas maraya, markaas ayay ceelkii la
hadleen oo ku yiraahdeen:
“Xiima-caddow xilahaya dalaaqan baysan Rabbigay deeqi kuugu
harsanayn ee biyahaas xagso ama iska liq” hadalkaas oo noqday
maah-maah xigmad badan ku jirto oo aad loo soo xigto.
Haatan waxaan maanta maah-maahdaas u soo qaatay oo ku dhaga
hadlayaa bah-wadaaddood meel ay joogaanba, waxaanna ku leeyahay
maanta waxaa idiin soo meertay fursad qaali ah oo ah deeq weyn
oo Rabbigay Soomaali siiyey haddii aysan hanan waayin oo iska
qubin, shalay argagax iyo baqdin baa ku noolaydeen oo
indhihiinana oo shan ah baa mu’miniin walaalihiin ah inta la
qafaasho la qalanayey, idinkuna waxba uma aydan tarahayn ee nin
walba lafihiisa ayuu la baqayey, idinkoo adduunyo jeclaaday oo
ganacsi iyo hanti kala rogaya oo ku mashquulsan isla markaasna
diyaar u ah inaad talis kasta hoos joogtaan oo dulliga
dugsataan, waatii uu Alle idiin soo diray kuwii khasabka idinku
kiciyey oo madfaca idinku garaacay, iyagoo si bareer ah u
sheegay inay u adeegayaan gaalo soo kiraysatay oo xataa ka
xishoon waayey inay gaalo u adeegayaan diintooda iyo dadkoodana
la dirirayaan.
Dabadeed markii aad nafta u yaabteen oo meel aad ku gabbataan
weydeen waa idinkii dagaalka galay, oo geeri oggolaaday, taasna
wax la soo kacaa-kufaba waatan maanta miraheedii la gaaray,
marka waxaan idin leeyahay haddii aad asal raac tihiin dhammaan
qaybihiinna oo dhan iyo aragtiyihiinna kala duwan oo dhan,
waxaan idinkula talin lahaa inaad danniga xun iyo talaxumada
iska daysaan oo Rabbigiin ka yaabtaan, oo aad taladiinna iyo
tabartiinna isugu gaysaan dawladnimadaas maanta Alle idin siiyey
ummadda idin aammintay oo idin dooratayna aad si fiican u
horkacdaan oo si miyir ah uga walwaashaan meesha xilka leh ee ay
taal.
Haddii kale ogaada inaysan fursaddaasi dib idiinku soo noqon
doonin, oo aad raciyad noqon doontaan, dadkuna idinka niyad
jabayo oo taageerayo ciddii kale oo u baaqda, dabadeedna aad
gunnimadii ku laaban doontaan iyo in la idiinku yeero magacyo
kala duwan oo la idinku takoorayo, Alle hortiisna waa la idin
weyddiin doonaa fursaddaas aad dayacdeen. Xinka iyo xasaradda
iyo difaacashada aragtiyo kooxeed oo meel hoose ahna runtii meel
ku gaari maysaan, male awaal been ah oo aydaan wax caddayn ah u
haynna waa wixii Alle diintiisa ku reebay. Dhinaca kale
dagaalkii la galay oo guusha lagu helay koox kaliyihi ma galin
ee waa loo dhammaa, oo shacabka taageeradiisa baa qiimaha u weyn
lahayd, shacabkuna dagaal dambe oo talo xumo iyo danaysi ku
salaysan taageeri mayo, markaasna waxaa xaqiiqo ah in kooxdii
cidla is xaruurta oo diidda heshiiska iyo nabadda hoggaanka
cusub ku baaqayo inay tuke canbaar leh noqonayaan iyagaana is
takoorayo, dagaalna meel ku gaari mayaan.
Inta daacadda ahina markii ay arkaan dagaal aan ujeeddo
lahayn inay ku socdaan waa ka tashanayaan oo isaga harayaan,
inta soo hartaan markii ay rafaad iyo silic ku abaadaan bay kala
habqamayaan oo dantu u run sheegaysaa.
Waxaan idinkula talinayaa inaad isaga hartaan Muslim
khilaafnimo iyo talaxumo oo guushii Alle idin siiyey aad iska
daadisaan, halkaasna uu ka faa’idaysto cadowgii aad shalay
midnimada uga adkaateen oo uu isku kiin jabiyo. Dabadeedna uu
dhinac kale idinka soo galo, raggu waa inaysan ku dagmin
gobollada iyo degmooyinka cidlada ah oo ay joogaan xoogaa
malleeshiyo beeleedyo ah oo aan dagaal niyad u ahayn oo is
dhiibaya ama cararaya. Dagaalku hadhow sidaas noqon mayo oo
waxaa idinla diriraya rag dagaalka yaqaan, qalab cusubna haysta
isla markaasna qaddiyad iyo mabda’ u diriraya.
Waxaan idinkula talin lahaa quruurka iska jira, waa lagu
jabaaye. Oo intaad Alle ka yaabtaan fidno iska ogaada oo
culimada idinka waaweyn ee xilka qaadday taageera oo hawsha
dhiniciinna ka qabta, xag siyaasad iyo xag millatariba, oo noqda
ciidankii dhidibbada u aasi lahaa dawlad Soomaaliyeed oo haybad
leh oo manhajka Alle ku socota oo tusaale fiican u noqota
Muslimiinta kale.
Shareecada islaamkana waxaa ugu horreeya caddaalad iyo run,
waa in horta kala dambayntii dawladnimo la soo celiyo, oo
hannaankii siyaasadda la saxo oo caddaalada wax walba lagu
saleeyo, musuqmaasuq iyo danaysina lala diriro, oo danta guud la
daryeelo, isla markaasna loo sinnaado dheefta iyo dhibka, iyo
talinta iyo garsoorka iyo hantida ummadda, oo meesha laga saaro
in koox tira yar hantida ummadda iska boobto, talada iyo
awooddana ay koox yar sidii ay rabto ka yeesho. Markii
caddaaladda la sugo oo runtu socoto, oo ammaanka la sugo, isla
markaasna dadku sinnaado oo qabyaalad iyo eex meesha ka baxaan,
waa in markaas wixii hoose loo soo jeensadaa, oo shareecada
islaamka, qawaaniinta iyo nudumka lagu saxaa, dhaqaalaha iyo
ciidankana la waafajiyaa shareecada islaamka. Ijtihaad iyo
aqoonna waa lama huraan, iyo in arrimaha muhimka laga wada
tashado.
Tallaabooyinka la qaadayo iyo maraaxisha la marayana waxaa u
xilsaaran madaxda la doortay iyo ciddii ay la tashanayaan ee waa
in looga dambeeyaa oo lagu xaq dhawraa, talo soo jeedin iyo
toosin usluub wanaagsan loo soo marayo baa dadweynaha u furan,
iyadoo aan dadka talada loo dhiibay loo gacan dhaafahayn
xilkooda iyo waajibaadkooda. Qof kasta haddii uu doonayo inuu
madaxiisa ku socdo oo sidii la qumman uu ku dhaqaaqo, oo qof
walba uu amiir yahay, waxba kala socon mayaan dawladnimo iyo
karaamana jiri mayso.
Dhammaan shacabka Soomaaliyeed meel ay joogaanba waxaan kula
talinayaa inay garab istaagaan dawladda cusub oo hoggaankeeda
loo doortay sheikh diinta islaamka yaqaan oo aan filayo inuu
diintiisa iyo dalkiisa iyo dadkiisaba daacad u yahay, sida aan
ku barannay waayihii kharaaraa oo la soo maray, sidaas waxaa
iyana u taageeray oo ku tilmaamay sheikh Shariif Sheikh Axmed
golaha culimada Muslimiinta adduunka oo Sheikh Yusuf Al-Qardaawi
madax u yahay, iyagoo kula taliyey ragga culimada ah ee
khilaafsan inay taageeraan taliska cusub. Iyagoo soo jeediyey
inay diyaar u yihiin inay dhex-dhexaadiyaan. Culimadu waa
inaysan noqon kuwa ugu horreeya ee dawladda Sheikhu hoggaaminayo
ka hor-yimaada, oo waa inay Alle ka baqaan oo iska daayaan
qiilasha aan xaqiiqada ku salaysnayn ee ay ku bannaysanayaan
inay uga hor yimaadaan maamulka Cusub ee culimada diinta loo
daayey, waa inaysan ragga diinta u doodayaa culimada ceebayn oo
fidno horseedin, oo gacan siin fikradaha qaba inuusan wadaad dad
dhiqi Karin madaxna noqon Karin.
Waxa ay Sheikh ku eedaynayaan male awaal ku saabsan inuu
heshiisyo hoose oo dan laga leeyahay la galay dad shisheeye ah,
taas oo aan caddayn loo hayn, tan kale waxay Sheikha ku
eedaynayaan inuu mabaaddii’dii la isku ogaa ka leexdahy taas oo
aan iyana xaqiiqo ahayn, waxay Sheikha la garan waayeen
xeeladaha iyo tabaha siyaasadeed ee hadba meel la galaya, iyo
tanaasulaadka farciga ah ee aan taabanayn diintiisa, isagoo
runtii ah hoggaamiye talo u dhalato oo go’aan gaara goorta ku
habboon, isla markaasna u samaysan siyaasad iyo dad-dhiqid,
aanna filayo inuu Soomaali caqabadda hortaagan ka tallaabin karo
Alle idanki.
La yaabna ma laha inay dhallin yarada yar-yar ee diinta u
qiiraysan tillaabooyinka siyaasadda qaarkood u arkaan in diintii
laga leexday, maxaa yeelay kuwo iyaga ka khayr badan baa kii
dadka u khayr badnaa tanaasulaad siyaasadeed oo yar-yar oo uu
sameeyey lagaran waayey, oo ka carooday, oo Abu Bakar ma ahee
saxaabadii kale waxay ka xumaadeen, qaar ka mid ah qodobbadii uu
nebigu scw ergaygii Quraysh la galay, heshiiskii Al-Xuddaybiya
iyadoo rasuulku scw meel fog wax ka arkayey, oo tanaasulaadka
hooseeya ee gaalada wax la ahayd isagu ka shisheeyey, oo ku
mintiday inuu ujeeddada guud ilaaliyo. Saxaabadu inkastoo ay
caroodeen oo arrinta ka xumaadeen haddana nebiga scw taladiisa
kama ay hor imaan ee way u hoggaansameen, markii dambana waa la
ogaa sidii guul looga gaaray heshiiskii nebigu scw gaalada la
galay, iyadoo Muslimiinta fursad u siiyey inay Quraysh qudhooda
kaga takhallusaan kaddib markii ay Muslimiintu ka takhalluseen
cadowgii Yuhuudda ee Khaybar, dabadeedna markii Quraysh axdigii
jabisay dharbaaxo ku dhufteen.
Haddaba dhallin-yarada yar-yar arrinta samir ha ku liqeen oo
saxaabadii ha ku daydeen Sheikha iyo culimada kale oo la
shaqaynaysana Alle darti ha ku aammineen oo natiijada ha sugeen,
duco iyo talo wanaagsanna ha ku taageereen, askarna ha u noqdeen.
Alle waxaan ka baryaynnaa inuu Sheikh Axmed Sheikh Shariif nooga
dhigo Imaam Caaddil ah oo Soomaali u horseeda tubtii ay aakhiro
iyo adduunba ku bad-baadi lahayd…..aamiin.
Sheikhana waxaan kula talinayaa inuu beel welwaal ahaado oo
uusan habkiisii hore wax ka baddalin, dhallin yarada diinta u
qiiraysan iyo ciddii kale oo mucaarad ahna uu geed kasta ugu
tagaa oo si fiican qaddiyaddiisa uga dhaadhiciyaa, oo qanciyaa,
sidii uu awalba ballan qaaday, waxaan filayaa marka uu qalbi
daacadnimo ah kula hadlo inuu intii qalbigoodu daacad yahay
qancinayo, ciddii dan kale lehna waa soo bixi doontaa oo Alle
waa og-yahay addoommadiisuna waa arkayaan, meelna gaari mayaan.
Talada iyo tawfiiqda Allaha na solansiiyo.
Sheikh Mohamed Mohamud Abdi.
Nakonde-Zambia. Monday, February 02, 2009
shmaxamed@yahoo.com